Read Jinghpaw Common Language Bible 2009 NINGPAWT NINGHPANG 25 Bible Online

NINGPAWT NINGHPANG 25 - Jinghpaw Common Language Bible 2009 bible

NINGPAWT NINGHPANG 25

¹Abraham mung Ketura mying ai kaga num langai mi hpe bai la wu ai.

²Dai num gaw shi a matu Zimran, Yokshan, Medan, Midian Ishbak hte Shua ni hpe shangai ya wu ai.

³Yokshan gaw Sheba hte Dedan yan a kawa rai nna, Dedan a matu mara ni gaw Ashurim, Letushim hte Leumim ni rai ma ai.

⁴Midian a kasha ni gaw Ehpa, Ehpera, Hanuk, Abida hte Eleda ni rai ma ai. Dai ni yawng gaw Ketura a matu mara ni rai ma ai.

⁵Abraham chyawm gaw shi lu ai sut rai mahkra Isak hpe jaw wu ai;

⁶rai ti mung shi naw hkrung nga yang, kaga num ni hta na Abraham lu ai shadang sha ni hpe mung kumhpaw kumhpa karan jaw wu ai. Dai hpang dai shadang sha ni hpe shi a shadang sha Isak kaw na tsan mat mu ga, lamu ga a sinpraw maga de shi dat dat wu ai.

⁷Ya Abraham gaw shi a asak latsa e sanit shi manga ning du ai shaning hta si mat wa sai.

⁹Shi a kasha yan rai nga ai Isak hte Ishmaela yan gaw Heti masha Zohara a kasha Ehpron madu da ai Mamre a sinpraw maga na sun hta nga ai Makhpela ginlawng hku hta shi hpe lup makoi da ma ai.

¹⁰Dai gaw Hiti masha ni kaw na Abraham mari da ai sun rai nga ai. Dai yang e, Abraham hte shi a madu jan Sara shan lahkawng hpe lup makoi da nga ai.

¹¹Abraham si mat ai hpang, Karai Kasang gaw, “Ngai Hpe Mu Ai Asak Hkrung Nga Ai Hka Htung” a makau e shanu nga ai shi a shadang sha Isak hpe shaman ya wu ai.

¹²Sara a mayam Egutu num Hagara gaw Abraham a matu Ishmaela

¹³hpe shangai ya wu ai rai nna dai shadang sha ni a shangai chyinghkai hkrat wa ai jahpan gaw ndai hku rai nga ai. Dai ni gaw Nabaiyut, Kedara, Adebela, Mibsam,

¹⁴Mishma, Duma, Masa,

¹⁵Hadad, Tema, Yetura, Nahpisha hte Kedema hte rai ma ai.

¹⁶Shanhte gaw amyu bawsang shi lahkawng a kaji kawa ni rai nna, shanhte a kahtawng ni hte but ai dabang hku hkan nna dai ni a mying ni hpe jaw da mu ai.

¹⁷Ishmaela si mat ai shaloi shi a asak latsa e sumshi sanit ning rai nga wu ai.

¹⁸Ishmaela a matu mara ni gaw Egutu mung a sinpraw maga, Asuri mung de sa wa ai lam hta nga ai Hawila hte Shura lapran na lamu ga hkan e shanu nga ma ai. Shanhte gaw Abraham a amyu bawsang ni hte kaga san rai ma ai.

¹⁹Ndai gaw Abraham a kasha Isak a ahtik labau rai nga ai.

²⁰Isak a asak mali shi ning du ai shaloi, Mesopotamia mung na Aramiyan masha Behtuela a shayi sha, Laban a kajan Rebeka hpe la wu ai.

²¹Rebeka maudung dung ai a majaw Isak gaw shi a matu dai MADU kaw akyu hpyi ya wu ai. Dai MADU mung shi a akyu hpyi ga hpe htan ya wu ai rai nna Rebeka hta na-um nasin rai wa lu ai.

²²Shi hta marun hkan nau shangai wa na ra ai rai nna, garai n shangai ai hkritung ma yan gaw shi a kan kata hta shan shada da malan da ting gasat hkat ma ai. Shi gaw, “Ngai hta lama mi byin ai zawn nga ai gaw hpa majaw rai ang ai i?,” nga nna tsun wu ai. Dai rai nna dai mahtai a matu dai MADU hpe san na nga, pru sa wa wu ai.

²³Dai MADU gaw shi hpe, “Na a hkum hta amyu lahkawng nga lit dai; Shada da htinghtawng shingjawng hkat ai amyu lahkawng hpe nang shangai dat na rin dai. Langai wa mi gaw kaga wa hta grau n-gun ja na ra ai; Kaba ai wa mahtang kaji ai wa hpe daw jau na ra ai,” ngu nna tsun wu ai.

²⁴Shi a shangai nhtoi gu wa ra ai. Shi hta shadang sha marun lahkawng kan hta rawng nga wu ai.

²⁵Shawng shangai ai wa mahtang hkyeng ai nsam rawng nna shi a ahpyi mung mun tu ai nba hte bung nga ai. Dai rai nna shi hpe Esaw [10] ngu nna shamying mu ai.

²⁶Hpang na wa gaw Esaw a lahtin manat let shangai wa ai; dai rai nna shi hpe Yaku [11] ngu nna shamying mu ai. Dai kasha yan hpe shaprat ai shaloi, Isak a asak kru shi ning du salu ai.

²⁷Dai ma yan kaba wa nna, Esaw gaw kung kyang ai jaugawng tai wa nhtawm nam hkawm ai asak hkrun lam hpe ra sharawng ai wa rai nga ti mung, Yaku mahtang atsin zim re ai masha re ai majaw nta e sha nga nga wu ai.

²⁸Isak gaw Esaw gyam jaw ai shan lusha sha ai hpe myit pyaw dum wu ai majaw Esaw hpe ra sharawng nga wu ai; rai ti mung Rebeka chyawm gaw Yaku hpe mahtang tsaw ra wu ai.

²⁹Lani mi na aten hta, Yaku shapre si mai shadu nga yang, nam hkawm ai kaw nna Esaw shang wa wu ai.

³⁰Shi kawsi nga wu ai majaw Yaku hpe, “Ngai hpe dai hkyeng ai si mai loi mi jaw e, ngai kawsi kyet nga nngai,” ngu nna tsun wu ai. (Dai rai nna shi hpe Edom ngu nna shamying mu ai.)

³¹Yaku gaw, “Dai rai taw, na a hpu lat aya ngai hpe jaw ai rai yang, ndai mung nang hpe ngai jaw na we ai,” ngu nna htan wu ai.

³²Esaw mung, “Ara rai sa, ya ngai si wa magang rai nga sayang, me, nye a hpu lat aya ngai hpe hpa baw mai kaja lam shabyin ya lu na rai nga a ni?,” ngu nna tsun wu ai.

³³Yaku gaw, “Dai rai yang, na a hpu lat aya ngai hpe jaw na matu shawng dagam u,” ngu nna htan wu ai. Esaw mung dagam nhtawm shi a hpu lat aya Yaku hpe jaw wu ai.

³⁴Dai hpang Yaku mung Esaw hpe muk hte si mai ntsin loi mi jaw wu ai. Shi mung dai ni hpe lu sha nhtawm bai rawt hkawm mat wa wu ai. Esaw gaw shi a hpu lat aya hpe n gawn n sawn di kau wu ai.