Read Jinghpaw Common Language Bible 2009 NINGPAWT NINGHPANG 30 Bible Online

NINGPAWT NINGHPANG 30 - Jinghpaw Common Language Bible 2009 bible

NINGPAWT NINGHPANG 30

¹Rai ti mung, Rahkela mahtang Yaku a matu kasha n shangai ya dum wu ai majaw, shi a kana jan hpe yu manawn nga ai rai nna Yaku hpe, “Ngai hpe kasha jaw e, dai n rai yang, ngai si mat na nngai,” ngu nna tsun wu ai.

²Yaku gaw Rahkela hpe masin pawt let, “Karai Kasang a shara hta ngai n nga lu nngai; kashu kasha n shaprat shangun lu ai mung shi chyu sha re,” ngu nna tsun wu ai.

³Rahkela gaw, “Ndai yang e, nye a mayam num Bila nga nga ai; shi hte rau yup u, nye a matu shayi shadang sha shaprat ya lu na rai wu ai. Dai lam hku nna sha, ngai mung shi a marang e kanu tai lu na nngai,” ngu nna tsun wu ai.

⁴Dai rai nna shi a madu wa hpang de Bila hpe ap ya wu ai rai nna Yaku mung shi hte kanawn wu ai.

⁵Bila hta na-um nasin hkum tai wa nna Yaku a matu shadang sha shangai ya wu ai.

⁶Rahkela gaw, “Nye a maga de Karai Kasang jeyang ya ni ai rai nna, nye a akyu hpyi ga hpe shi na ya nu ai. Dai rai nna shi hpe Dan. [18] ngu nna shamying wu ai.

⁷Bila mung na-um nasin hkum bai tai wa nna, Yaku a matu lahkawng ngu na shadang sha hpe shangai ya wu ai.

⁸Rahkela gaw, “Nye a kana hpe aja awa gasat nna dang kau se ai,” ngu nna tsun wu ai. Dai rai nna shi hpe Naphtali [19] ngu nna shamying wu ai.

⁹Lea gaw shi hta kashu kasha n shaprat mat sai hpe dum wu yang, shi a mayam num Zilhpa hpe Yaku a madu jan shatai na shi hpe jaw ya wu ai.

¹⁰Dai hpang Zilhpa gaw Yaku a matu shadang sha langai shangai ya wu ai.

¹¹Lea gaw, “Ngai gam rawng nngai,” ngu nna tsun wu ai. Dai rai nna shi hpe Gad [20] ngu nna shamying wu ai.

¹²Zilhpa gaw Yaku a matu kaga shadang sha langai shangai ya wu ai.

¹³Lea gaw, “Ngai kade sha a lu nga n hka! Ya chyawm gaw numsha ni ngai hpe a lu ai jan ngu nna shaga na mi ai,” ngu nna tsun wu ai; dai rai nna shi hpe Ashe [21] ngu nna shamying wu ai.

¹⁴Ya Rubin gaw hkaulan mam dan ai aten e, yi sun ni de pru sa nhtawm dudim si [22] mu wu ai rai nna kanu Lea hpang de la wa wu ai. Rahkela gaw Lea hpe, “Chyeju hte na nsha la wa ai dudim si loi mi ngai hpe jaw e,” ngu nna tsun wu ai.

¹⁵Lea gaw, “Nye a madu wa hpe la kau ya ai pyi nang n law dum n ni? Ya mung nye a dudim si ni hpe la kau ya na nang naw shakut nga n hka i?,” ngu nna htan wu ai. Rahkela mung, “Na nsha a dudim si ni ngai hpe nang jaw ai rai yang, dai na jang Yaku hte nang lu yup na ndai,” ngu nna tsun wu ai.

¹⁶Ya shana maga de, Yaku gaw pa de na wa yang, Lea gaw shi hpe tau la matu pru sa wa nhtawm, “Ngai sha a dudim si hte ngai nang hpe mari la sade ai majaw, nang ngai kaw dai na shang yup lu na ndai,” ngu nna tsun wu ai. Shi gaw dai shana e Lea hte kanawn kau wu ai.

¹⁷Karai Kasang gaw Lea akyu hpyi ai ga hpe htan ya wu ai rai nna shi hta na-um nasin hkum tai wa ai hte Yaku a matu manga ngu na shadang sha hpe shangai ya wu ai.

¹⁸Lea gaw, “Nye a madu hpe mayam num ya sha ni ai majaw, Karai Kasang gaw ngai hpe shabrai jaw ni ai,” ngu nna tsun wu ai. Dai rai nna shi hpe Yisahka [23] ngu nna shamying wu ai.

¹⁹Lea hta na-um nasin hkum bai tai wa nna Yaku a matu kru ngu na shadang sha shangai ya wu ai.

²⁰Shi gaw, “Karai Kasang ngai hpe kaja ai kumhpa langai jaw ni ai. Dai rai nna ya chyawm gaw ngai shi a matu shadang sha kru shangai ya ni ai majaw nye a madu wa ngai hpe hkap la na ru ai,” ngu nna tsun wu ai. Dai rai nna shi hpe Zebulun [24] ngu nna shamying wu ai.

²¹Dai hpang shayi sha langai shi shangai ai rai nna shi hpe Dina ngu nna shamying wu ai.

²²Karai Kasang gaw Rahkela hpe dum wu ai rai nna shi a akyu hpyi ga hpe htan ya ai hte kashu kasha shaprat na lam hpaw ya wu ai.

²³Shi hta na-um nasin hkum tai wa nna shadang sha langai shangai wu ai. Shi gaw, “Karai Kasang ngai hpe shadang sha jaw ya ai majaw nye a shatan nhkan hpe la kau ya nu ai.

²⁴Dai MADU ngai hpe shadang sha langai naw jaw ru ga,” ngu nna tsun wu ai. Dai rai nna shi hpe Yosep [25] ngu nna shamying wu ai.

²⁵Yosep hpe shangai ai hpang, Yaku gaw Laban hpe, “Nye a dum nta buga de nhtang wa lu n ga, ngai hpe wa shangun e.

²⁶Ngai nang hpe galaw jaw nna lu da sai nye a madu jan ni hte kashu kasha ni hpe dat ya e; ngai pru mat wa na ni ai. Ngai nang hpe kade daram shakut nna daw jau se ai gaw nang chye nga ndai,” ngu nna tsun wu ai.

²⁷Laban gaw shi hpe, “Ndai lam ngai naw tsun yu n ga; na a majaw dai MADU ngai hpe shaman ya ni ai gaw wenyi a n-gun atsam a jaw e ngai dum chye ni ai.

²⁸Na a shabrai ni hpe daw dan u; dai ni hpe ngai jaw na we ai,” ngu nna tsun wu ai.

²⁹Yaku mahtang, “Ngai nang hpe kaning rai galaw jaw sai mung, na a sagu bainam hpung ni hpe nye a lata hte bau maka dat ai hta kade sha galu kaba law htam wa sai hpe mung nang chye nga ndai.

³⁰Ngai garai n du yang, na a sut gan loi sha mi she rai nga lit dai. Ya chyawm gaw manu mana jat wa nit dai. Ngai du ai shara shagu hta dai MADU nang hpe shaman ya nit dai. Ya chyawm gaw nye a sut gan amyat shachyip la na aten mung rai nga sali ai,” ngu nna htan wu ai.

³¹Laban gaw, “Nang hpe hpa jaw na rai ta?, ngu nna san wu ai. Yaku mahtang, “Ngai hpa shabrai ni hpe mung n ra nngai. Ndai hpaji jaw ga hpe nang myit hkrum ya ai rai yang chyawm gaw na a sagu bainam hpung ni hpe matut nna sin rem ya na nngai.

³²Dai ni jang, na a yam nga uhpung ni nga ai de ngai sa nhtawm, chyang ai sagu kasha shagu hte aprup aprap ateng apang re ai bainam kasha ni hpe la da na we ai.

³³Dai gaw ngai ra ai shabrai yawng rai nga li ai. Dai rai jang, htawm hpang e, nye a shabrai ni hpe nang sa jep yang, ngai ding man nga ai hpe nang aloi sha mu lu na rin dai; aprup aprap ateng apang re ai bainam kasha ni hte n chyang ai sagu kasha ni ngai hta lawm wa ai rai yang chyawm gaw dai gaw lagu la ai ni rai nga ai ngu, nang chye la lu na ndai,” ngu nna htan wu ai.

³⁴Laban mung, “Rai sa, myit hkrum ni ai, nang hpaji jaw ai hte maren, ya an galaw wa yu saga,” ngu nna htan wu ai.

³⁵Rai ti mung, dai shani jang, Laban gaw ka ka kawk kawk re ai hte ateng apang re ai bainam la ni hte aprup aprap ateng apang re ai hte hpraw ai ka ai ayi ni yawng hte chyang ai sagu ni yawng hpe mung htawt kau wu ai. Shi gaw dai ni hpe shi kasha ni hpe ap kau wu ai.

³⁶Yaku hte masum ya sat tsan ai shara hta dai yam nga hpung hpe sa tawn da shangun wu ai. Yaku chyawm gaw ngam ai Laban a sagu bainam hpung ni hpe bau rem ya nga wu ai.

³⁷Yaku gaw popala, batan hte paling hpun na tsit ai hpun lakung ni hpe dan la nna hpun hpyi nkau mi hpe gang gaw wu ai; dai lakung ni hta ahpraw bai bai rai hkra gadoi dumrit ashit da wu ai.

³⁸Shi gaw dai lakung ni hpe yam nga ni sa lu ai shanhte a ntsin htung ni hta, sagu bainam ni a man hkan e tawn da ya wu ai. Yam nga ni dai yang e hka sa lu nna uli lung ma ai majaw dai lakung ni hpe shi jung da ya wu ai.

³⁹Dai rai nna bainam ni dai lakung ni a man e uli lung ai shaloi, ka ka shit shit, aprup aprap ateng apang re ai bainam kasha ni hkrat shajang nga ma ai.

⁴⁰Yaku gaw sagu ni hte bainam ni hpe garan ginhka da nhtawm, ka ka shit shit re ai hte Laban a sagu bainam hpung na chyang ai ni de man yawng shangun wu ai. Ndai lam hku nna shi a sagu bainam ni hpe Laban a hpung ni kaw na kaga ga jahka tawn wu ai.

⁴¹N-gun ja ai yam nga ni uli lung ma ai shaloi, Yaku gaw ntsin htung ni hta dai yam nga ni a man e, lakung ni hpe jung da ya wu ai.

⁴²Dai ni mung lakung ni a lapran e uli lung ma ai. Rai ti mung, n-gun kya ai yam nga ni a man e chyawm gaw shi n jung da ya wu ai. Dai rai nna kade n na yang, n-gun kya ai yam nga ni yawng gaw Laban a matu rai nna, n-gun ja ai ni mahtang Yaku a matu rai nga ai.

⁴³Ndai lam hku nna, Yaku gaw grai lu su ai wa tai wa nna sagu bainam hpung, mayam num mayam la, gawla-uk ni hte lawze law law hpe shi lu la wu ai.