Read Jinghpaw Common Language Bible 2009 NINGPAWT NINGHPANG 32 Bible Online

NINGPAWT NINGHPANG 32 - Jinghpaw Common Language Bible 2009 bible

NINGPAWT NINGHPANG 32

¹Yaku gaw shi a hkrun lam hpe hkawm matut sa wa wu yang, lamu kasa nkau mi shi hte sa hkrum ma ai.

²Dai ni hpe shi mu ai shaloi, “Ndai gaw Karai Kasang a dabang rai nga ai,” ngu nna shi tsun wu ai. Shing rai dai shara hpe ngu nna shamying wu ai.

³Yaku gaw Edom mung e nga ai shi a kahpu Esaw hpang de shi a shawng e kasa ni hpe shangun dat wu ai.

⁴Shi shanhte hpe hkang dat mu ai gaw: “Na a ga hpe madat mara ai shangun ma, ngai Yaku gaw ya du hkra Laban kaw nga kau da nna bai nhtang wa ai hta htingnai mat nngai.

⁵Dumsu ni hte lawze ni mung, sagu bainam ni hte mayam ni mung, ngai lu nngai. Na a man e myi man pa lu na hpe myit mada let nang hpe shana dat nngai.”

⁶Dai kasa ni Yaku kaw bai du wa yang, shanhte gaw, “Na a nhpu Esaw kaw anhte du saga ai. Nang hpe sa tau la na nga, shi a hkrun lam hkawm na matu shajin da nu ai. Shi hte rau masha mali tsa mung lawm nang na ma ai,” ngu nna tsun dan mu ai.

⁷Yaku gaw hkrit kahpra ai hte myit ru nga wu ai. Shi kaw hkan nang ai masha ni hte shi a sagu, bainam, dumsu hte gawla-uk ni hpe mung hpung lahkawng di nna garan tawn da wu ai.

⁸Shi gaw, “Shawng na hpung hpe Esaw sa gasat yang, hpung mi gaw lawt lu na nhten,” ngu nna myit nawn da wu ai.

⁹Dai hpang Yaku gaw, “Nye a aji Abraham a Karai Kasang nye wa Isak a Karai Kasang e, nye a akyu hpyi ga hpe na ya e! MADU e, nang ngai hpe nye a mung ga, nye a amyu ni shanu nga ai ga de nhtang wa na matu mung, nye a matu lam shagu hta mai kaja shangun na mung, nang tsun nit dai.

¹⁰Na a shangun ma wa, ngai gaw nang madun dan sai matsan dum ai chyeju hte sadi sahka lam mahkra hte n ging n dan la nga nngai. Nye a dawhkrawng langai mi hte sha, ndai Yawdan hka hpe rap di nngai; ya chyawm gaw ndai hpung lahkawng hte ngai nhtang wa ni ai.

¹¹Nye hpu Esaw a lata kaw na ngai hpe hkye hkrang la e, ngai akyu hpyi nga nngai law. Ngai hkrit mung hkrit nga nngai-shi sa wa nna anhte hpe gasat nhtawm anhte yawng hpe mung, kanu ni hte kasha ni hpe pyi sa shamyit kau na hkrit nga nngai.

¹²Nye a matu lam shagu hta mai kaja shangun na mung, ngai hpe panglai hkin-gau mayan kadai mung n dang hti lu hkra law htam ai zaibru ni zawn amyu bawsang ni hpe shalaw jahtam ya na nga nna mung, nang ga sadi jaw nit dai hpe dum nga u,” ngu nna akyu hpyi wu ai.

¹³Shana tup dai yang e nga nga ai hpang, shi a yam nga hpung hta na kahpu Esaw hpe kumhpa na matu, bainam yi lahkawng tsa, bainam la hkun, sagu yi lahkawng tsa, sagu la hkun, kasha ni hte nawng chyu chyu ai gawla-uk kanu sumshi, dumsu uyi mali shi, dumsu usu shi, lawze yi hkun hte lawze la shi hpe lata tawn da wu ai.

¹⁶Dai ni hpe hpung hte hpung garan tawn nhtawm hpung shagu hta shi a shangun ma langai hpra hpe woi awn shangun wu ai. Shi gaw shanhte hpe, “Nye a shawng e sa wa masu; bai hpung hte hpung mi mung gang gang rai mu,” ngu nna tsun wu ai.

¹⁷Shi gaw shawng na shangun ma wa hpe, “Nye a kahpu Esaw nang hte hkrum nna, ‘Na a madu kadai rai ta? Nang kade sa wa nga n ni?, Na man na ndai yam nga ni hpe kadai madu a ni?,’ nga nna hkap san yang, na a shangun ma Yaku a rai nga ai.

¹⁸Shi gaw dai ni hpe shi a madu Esaw hpe jaw dat ai kumhpa rai nga ai. Yaku shi hkum nan gaw anhte a shingdu e naw rai nga ai,’” ngu nna nanhte htan lu na myit dai, nga nna hkang dat wu ai.

¹⁹Dai hte maren hpung lahkawng na wa hpe mung, hpung masum na wa hpe mung, kaga hpung yawng hta hkan ai ni hpe mung: “Da ndai gaw nanhte Esaw hte hkrum ai shaloi tsun na ga rai malit dai.

²⁰Nanhte gaw, ‘Rai sa, na a shangun ma Yaku gaw anhte a shingdu e naw rai nga ai,’” ngu lu na myit dai, nga nna hkang da wu ai. Yaku mung, “Ngai shi hpe kumhpaw kumhpa jaw ya nna, shi a myit hpe kayin wa hkra lau la na we ai; shaloi ngai shi hte hkrum yang, ngai hpe mara mahkoi mi dat ya nhten,” ngu nna myit yu nga ai.

²¹Shi gaw kumhpaw kumhpa ni hpe shi a shawng e shawng shalai dat nna shi mahtang dabang e dai shana nga shalai kau wu ai.

²²Dai shana e, Yaku rawt nna shi a madu jan lahkawng hte shingnan num yan hpe mung, shi a kasha shi langai hpe woi nna Yabok hka hpe rap ma ai.

²³Shi shanhte hpe rap shakawt kau ngut ai hpang, shi a sut rai yawng hpe mung sharap tawn da wu ai;

²⁴rai ti mung shi chyu sha shingdu e hti ngam nga wu ai. Shaloi masha langai mi sa nna nhtoi grai wa n san lu ai aten du hkra shi hte gamu hkat nga ai.

²⁵Dai wa shi n dang lu ai hpe mu jang, Yaku a dangbau manat ya ai rai nna hkrihkraw kashai mat wu ai.

²⁶Dai masha wa gaw, “Ngai wa na ni ai; nhtoi mung htoi wa ra ai,” ngu nna tsun wu ai. Yaku mahtang, “Nang ngai hpe n shaman ya ai rai yang, ngai wa shangun na n rai,” ngu nna htan wu ai.

²⁷Dai wa gaw, “Na a mying hpa rai lit ta?,” ngu nna san wu ai. Shi gaw, “Yaku” ngu nna htan wu ai.

²⁸Dai masha wa gaw, “Na a mying Yaku ngu lu sana n rai. Nang gaw Karai Kasang hte mung, masha ni hte mung malan da ting hkat ai hte dang kau nit dai; dai rai nna na a amying Israela[26] rai na lit dai,” ngu nna tsun wu ai.

²⁹Yaku mung, “Na a mying ya jang ngai hpe tsun dan e,” ngu nna tsun wu ai. Rai ti mung, shi mahtang, “Nang hpa majaw nye a mying chye mayu nga n ni?,” ngu nna tsun nhtawm Yaku hpe shaman ya wu ai.

³⁰Yaku gaw, “Ngai gaw Karai Kasang hpe myi man chyaw mu se ai. Ngai mung ya du hkra naw ahkrung nga nngai,” ngu nna tsun wu ai. Shing rai dai shara hpe Hpeniela ngu nna shi shamying da wu ai.

³¹Hpeniela shara na Yaku pru wa yang, jan pru sai. Shi a dangbau a majaw shi a lagaw layawt mat wu ai.

³²Yaku a dangbau kaw na lasa manat hkrum wu ai majaw Israela amyu ni dai ni du hkra, dai dangbau hkrihkraw ntsa na lasa n sha ma ai.