Read Jinghpaw Common Language Bible 2009 NINGPAWT NINGHPANG 33 Bible Online

NINGPAWT NINGHPANG 33 - Jinghpaw Common Language Bible 2009 bible

NINGPAWT NINGHPANG 33

¹Ya Esaw gaw shi a masha mali tsa hte rau sa wa nga ai hpe Yaku mu wu ai; Shi gaw Lea, Rahkela hte shingnan num lahkawng yan hpe kasha karan ya wu ai.

²Dai rai nna shingnan num yan hte shan a kasha ni hpe shawng e, dai hpang Lea hte shi a kasha ni, Rahkela hte Yosep hpe jahtum e, shi tawn da wu ai.

³Yaku mahtang shanhte a shawng e lai sa mat wa nna shi a kahpu kaw du ai aten du hkra ga de sanit lang gum dagup wu ai.

⁴Rai ti mung, Esaw mahtang shi hte hkrum lu hkra gat sa wa nna, shi hpe ahpum da let pup wu ai. Shan nau lahkawng yan hkrap ma ai.

⁵Esaw gaw grup yin de mada yu wu yang, numsha ni hte kasha ni hpe mu ai shaloi, “Nang hte rau hkan ai ndai masha ni gaw kadai ni rai nga ma ta?,” ngu nna san wu ai. Hpu ba e, ndai ni gaw ra n rawng hkra ngai hpe Karai Kasang jaw ya ai ma ni rai nga ma ai,” ngu nna Yaku htan wu ai.

⁶Dai hpang shingnan num ni hte shanhte a kasha ni sit lung wa nhtawm gum dagup ma ai.

⁷Dai hpang Lea hte shi a kasha ni sit lung wa nhtawm gum dagup ma ai. Yawng a hpang jahtum hta, Yosep hte Rahkela sit lung wa nhtawm gum dagup ma ai.

⁸Esaw mahtang, “Ngai hkrum kau dat ai kaga hpung ni gaw kaning re ai ni rai nga ma ta? Dai gaw kaning re ai lachyum rai nga a ta?,” ngu nna san wu yang, Yaku gaw, “Dai gaw na a man e myi man pa lu na matu rai nga li ai,” ngu nna htan wu ai.

⁹Rai ti mung, Esaw mahtang, “Ngai nau wa e, ngai lu ai hte pyi ram la nga nngai; nang lu ai dai ni hpe bai la da u,” ngu nna tsun wu ai.

¹⁰Yaku gaw, “N rai law, na a man e ngai myi man pa ni ai rai yang gaw chyeju hte nye a kumhpa ni hkap la ya e. Nang ngai hpe hku lahkun re ai myit rawng nga ndai majaw, na a myi man hpe mu lu ai gaw nye a matu Karai Kasang a myi man mu lu ai zawn rai nga li ai.

¹¹Na a matu ngu nna ngai la wa ya ai ndai kumhpa hpe chyeju hte hkap la ya e; Karai Kasang mung ngai hpe matsan dum la nna, ngai hta ra ai lam magup hpe jaw ya ni ai,” ngu nna tsun wu ai. Yaku mung shi hkap la ai aten du hkra a shadut nga wu ai.

¹²Esaw gaw, “Sa, pru sa wa na hkyen yu saga. Na a shawng e ngai sa na nngai,” ngu nna tsun wu ai.

¹³Yaku mahtang, “Ma ni mung n kung ma ai; bai sagu ni hte yam nga hpung hta chyu chyu ai hkalung ni hkan nang ma ai hpe ngai myit shalawm ra ai mung nang chye nga ndai. Dai sha n-ga, lani mi hta sha dai ni hpe nau hte gawt shatsang jang mung uhpung ting si mat na mara ai.

¹⁴Nye a shawng e nang mahtang wa magang su. Ngai gaw yam nga ni hte ma ni hkawm lu ai daram mi hte nang nga ai Edom mung de hkan du nang ai aten du hkra angwi ngwi hte hkan nang wa na nngai,” ngu nna htan wu ai.

¹⁵Esaw gaw, “Dai rai taw, nye a masha nkau mi nang hte tawn da ya de ga,” ngu nna tsun wu ai. Rai ti mung, Yaku mahtang, “Na a man e myi man pa lu na hta kaga

¹⁶hpa mung ngai n ra nngai,” ngu nna tsun wu ai.

¹⁷Esaw gaw dai shani jang rawt nna Edom mung de bai wa mat wa wu ai. Rai ti mung, Yaku chyawm gaw Suhkot ngu ai shara de du hkra hkawm sa wa nna, shi nga na nta hte yam nga ni rawng na sum ni hpe gap wu ai. Dai rai nna shara dai hpe Suhkot ngu nna shamying wu ai.

¹⁸Yaku gaw Mesopotamia mung na bai wa yang, Hkanan mung na Shehkem ngu ai mare de shim lum ai hte du wa nna dai mare makau na pa ni hta shi a dabang ni de da wu ai.

¹⁹Shehkem a kawa Hamura a amyu matu ni shanu nga ai pa layang daw chyen mi hpe mung gumhpraw latsa hte mari la kau wu ai.

²⁰Dai yang e, tawn hkungri langai mi shi galaw tawn da nhtawm dai hpe Ela, Israela a Karai Kasang ngu nna shamying wu ai.