Read Jinghpaw Common Language Bible 2009 NINGPAWT NINGHPANG 34 Bible Online

NINGPAWT NINGHPANG 34 - Jinghpaw Common Language Bible 2009 bible

NINGPAWT NINGHPANG 34

¹Yaku hte Lea yan a shayi sha Dina gaw lani mi na aten hta, Hkanan mung na numsha nkau mi hpang de sa chyai na nga, pru mat wa wu ai.

²Dai mung hpe up ai Hiwi amyu masha Hamura a kasha Shehkem gaw shi hpe mu nna, woi wa nhtawm roi kau wu ai.

³Rai ti mung, dai numsha a ahpraw ningja grai tsawm htap nga ai hpe shi mu wu ai majaw shi hta tsaw ra myit anoi nga ai rai nna shi a tsaw ra myit hpe hkam la lu na matu shakut wu ai.

⁴Shi gaw kawa hpe, “Ndai numsha hpe nye a madu jan shatai la na, ngai ra sharawng nngai,” ngu nna tsun wu ai.

⁵Yaku gaw shi a shayi sha sari jahpoi hkrum nga sai hpe chye wu ti mung, shi a shadang sha ni yam nga ni hte pa de naw nga nga ma ai majaw shanhte bai wa ai aten du hkra atsin sha nga nga wu ai.

⁶Shehkem a kawa Hamura gaw Yaku hpe

⁷sa shaga na nga pru sa wa nga yang sha, Yaku a shadang sha ni mung pa de na du shang wa ma ai. Dai lam hpe shanhte na ma yang, Shehkem galaw kau ai dai zawn re ai amu hte Yaku a shayi sha roi kau hkrum ai a jaw e, Israela amyu masha ni n kaw n law di kau hkrum sai hpe na kajawng nna ja ja pawt bu nga ma ai.

⁸Hamura gaw shi hpe, “Ngai sha Shehkem gaw na a shayi sha hpe tsaw ra myit jung noi nga nu ai. Chyeju hte shi hpe la shangun ga law.

⁹Anhte hte nanhte a amyu masha ni shada da num jaw num ya rai nna mayaw htinggaw de sha wa lu na myit hkrum ga shaka hpe galaw tawn da saga,

¹⁰shing rai yang, nanhte mung ndai anhte a mung hta anhte hte rau nga lu na myit dai; nanhte myit htep nga ai gara shara hta mung shanu nga lu nna, hpaga yumga ndut ndang lu galaw nhtawm sut gan madu la lu na myit dai,” ngu nna tsun wu ai.

¹¹Dai hpang Shehkem mung Dina a kawa hte kahpu kanau ni hpe, “Ndai lam hta ngai myi man pa lu we ga, nanhte myit dik hkra hpyi ai hpe ngai jaw na made ai.

¹²Ngai shi hpe hkungran la na, nanhte hkraw myit dai rai yang, nanhte la ang ai hpu ja re ai kumhpa a lam ngai hpe tsun dan mi. Num nnan a matu nanhte hpyi ai made ngai bang na nngai,” ngu nna tsun wu ai.

¹³Shehkem mung shanhte a kajan Dina hpe sari jahpoi kau ya nu ai majaw Yaku a shadang sha ni mahtang Shehkem hte shi a kawa Hamura yan hpe hpaji hte htan ma ai.

¹⁴Shanhte gaw shi hpe, “Matu gadoi n hkam ai wa hpe anhte a kajan n ya sha lu na ga ai; dai sha n-ga, anhte a matu myi man sum shara tai na ru ai.

¹⁵Anhte zawn nanhte mung tai wa myit ga, nanhte a lasha ni yawng matu gadoi hkam ai rai yang chyu sha, anhte myit hkrum ya lu na ga ai.

¹⁶Dai hpang shada da num jaw num ya ai amu hpe anhte myit hkrum ya na ga ai. Anhte mung nanhte a ka-ang e nga lu nna, nanhte hte amyu langai sha tai na ga ai.

¹⁷Rai ti mung anhte a ga ni hpe nanhte n hkap la ai sha, matu gadoi n hkam la myit yang chyawm gaw shi hpe anhte woi nna wa mat na ga ai,” ngu nna tsun ma ai.

¹⁸Dai ga ni hpe Hamura hte shi a kasha Shehkem na ra ma ai,

¹⁹Yaku a shayi sha hpe tsaw ra wu ai majaw mung, shing re ai hpaji jaw ga hpe galaw na dai shabrang wa loi mi mung n kanung nga ai. Shi gaw shi a dinghku masha ni yawng hta grau ahkyak htum ai wa rai nga ai.

²⁰Hamura hte shi a kasha Shehkem gaw mare chyinghka e nga ai hpawng ginra de sa nhtawm shanhte a manang rai nga ai

²¹mare masha ni hpe, “Ndai masha ni hku hkau chye ma ai; dai rai nna ndai mung hta anhte hte rau shanu nga nna hpaga yumga ndut ndang galaw mu ga. Ndai mungdan mung shanhte a matu nga shara dam lada rai nga malu ai. Shanhte a shayi sha ni hpe anhte la ga; shanhte hpe mung anhte a shayi sha ni hpe ya sha ga.

²²Rai ti mung shanhte matu gadoi hkam ai zawn anhte a lasha ni yawng hpe matu gadoi ya ai rai yang chyu sha, shanhte gaw anhte a ka-ang e nga nga nhtawm anhte hte amyu langai sha rum wa na, ndai amyu masha ni myit hkrum ya na mara ai.

²³Shanhte a yam nga hte sut gan arai yawng mayawng gaw anhte a arai tai na n rai ni? Dai re ai majaw shanhte gaw anhte a ka-ang e, shanu nga lu mu ga, dai hpe anhte myit hkrum daw dan ya saga,” ngu nna tsun mu ai.

²⁴Hamura hte Shehkem yan a lajin ai ga hpe mare masha ni yawng myit hkrum ai hte lasha ni yawng mung matu gadoi hkam la mu ai.

²⁵Masum ya na ai hpang, dai matu gadoi hkam ai ni naw machyi nga yang, Yaku a kasha Dina a kahpu Simun hte Lewi yan gaw nhtu hpra hpra lang nna mare de sa nhtawm n rup n tsen ai hpe alun ai lam hpa mung n nga ai sha, lasha ni yawng hte hpawn Hamura hte Shehkem shan wa lawm hkra sat kau mu ai. Dai hpang Dina hpe Shehkem a nta kaw nna shapraw la nhtawm woi mat wa ma ai.

²⁷Masha sat sharu kau ngut ai hpang mung, Yaku a shadang sha nkau mi mahtang shanhte a kajan a sari hpoi awu asin hkrum ai hpe matai dawp la na nga, mare hpe hpya kau ya mu ai.

²⁸Shanhte gaw sagu bainam hpung, dumsu lawze ni hte mare kata hte hkauna pa hkan na arai nga manga yawng la kau ya mu ai.

²⁹Shanhte gaw manu dan ai arung arai shagu hpe la nhtawm numsha ni hte ma kaji ni yawng hpe mung rim la ai hte nta hkan na arung arai shagu hpe mung htawm la kau ya ma ai.

³⁰Yaku gaw Simun yan Lewi hpe, “Nan gaw ngai hpe ru yak tsin-yam tsindam la wa ya manit dai. Ya chyawm gaw Hkanani hte Hperizi masha ni hte mungdan hta shanu nga ai masha shagu hte gaw ngai hpe n dawng na mara ai. Ngai hta masha n law nga ai majaw shanhte yawng rau jawm zup nna ngai hpe htim gasat ai rai yang, anhte a dinghku ting shamyit kau ai hkrum na raga ai,” ngu nna tsun wu ai.

³¹Rai ti mung shan mahtang, “Anhte a kajan hpe shawa num langai zawn n shatai kau lu na ga ai,” ngu nna htan ma ai.