Read Jinghpaw Common Language Bible 2009 NINGPAWT NINGHPANG 35 Bible Online

NINGPAWT NINGHPANG 35 - Jinghpaw Common Language Bible 2009 bible

NINGPAWT NINGHPANG 35

¹Karai Kasang gaw Yaku hpe, “Behtela de ya jang sa wa nna, dai yang e nga nga u. Na nhpu Esaw kaw na hprawng mat wa ai shaloi, nang kaw dan pru ai Ngai Karai Kasang a matu, dai yang e tawn hkungri langai galaw u,” ngu nna tsun wu ai.

²Dai rai nna Yaku mung shi a dinghku masha ni hte shi hte rau nga nga ai ni yawng hte hpe, “Nanhte lu ai maigan hpara sumla ni hpe shapraw kau mu, tinang hkum hpe tinang dai shachyoi shapra nna asan aseng re ai hpun palawng ni bu hpun mu.

³Ngai ru yak tsin-yam tsindam hkrum ai aten hta ngai hpe karum la nna ngai hkawm sa ai shara shagu hkan mung ngai hte rau anga nga ai Karai Kasang a matu tawn hkungri galaw na ngu ai Behtela de sa wa na matu ndai shara kaw nna anhte pru sa wa saga,” ngu nna tsun wu ai.

⁴Dai rai nna shanhte gaw maigan hpara sumla mahkra hte na hta kai ai shanghkawng ni, Yaku a lata de ap kau mu ai. Dai arai ni hpe Shehkem makau e tu ai wamyi hpun nhpang e shi lup kau ya wu ai.

⁵Yaku hte shi a shadang sha ni pru wa hkyen nga yang, hkrit hpa kaba gaw grup yin na mare masha ni a ntsa e, du pru wa ai majaw, dai masha ni shanhte hpe n hkan shachyut ma ai.

⁶Yaku hte shi hte rau hkawm sa nga ai masha yawng hte gaw, ya aten e Behtela ngu nna shamying ai dai Hkanan mung na Luza mare de du ma ai.

⁷Dai yang e, tawn hkungri langai hpe shi galaw wu ai. Dai shara hpe Behtela shara na Karai Kasang a matu ngu nna shamying wu ai; hpa majaw nga yang, kahpu a lata kaw na shi hprawng mat wa yang, dai shara e Karai Kasang shi nan Yaku hpe shadan dan ai shara rai nga lu ai.

⁸Rebeka hpe yu lajang ai Debora si mat nna, Behtela a dingda maga na wamyi hpun nhpang e lup makoi kau mu ai. Dai rai nna dai hpun hpe, “Hkrap Ai Wamyi Hpun,” ngu nna shamying mu ai.

⁹Yaku gaw Mesopotamia mung kaw nna nhtang wa wu yang, Karai Kasang shi kaw kalang mi bai dan pru nhtawm shi hpe shaman ya wu ai.

¹⁰Karai Kasang gaw shi hpe, “Na a mying Yaku rai nga lit dai; rai ti mung, ndai aten kaw nna Israela ngu na rai nga lit dai,” ngu nna tsun wu ai. Karai Kasang gaw shi hpe Israela ngu nna shamying wu ai.

¹¹Karai Kasang gaw shi hpe, “Ngai gaw Chyahtum Chyalai N-gun Rawng Ai Karai Kasang rai nga nngai. Kashu kasha law law mayat maya u; amyu baw ni nang hta na pra hkrat wa nhtawm hkawhkam ni a kaji kawa mung nang tai na rin dai.

¹²Abraham hte Isak yan hpe ngai jaw ai lamu ga gaw nang hpe mung, na a hpang na amyu matu ni hpe mung ngai jaw na we ai,” ngu nna shi hpe tsun wu ai.

¹³Dai hpang Karai Kasang mung shi kaw nna pru mat wa wu ai.

¹⁴Karai Kasang shi hpe ga shaga ai dai shara hta Yaku gaw masat dingsat nlung langai jung da nna, dai hta e sabyi ntsin hte tsanlun sau ni ru bun let nawng da wu ai.

¹⁵Dai shara hpe Behtela ngu nna shi shamying wu ai.

¹⁶Yaku hte shi a dinghku masha ni Behtela kaw nna pru mat wa nhtawm Ehprat kaw nna loi mi naw tsan ai shara hta shanhte naw nga nga yang, Rahkela hta shangai nhtoi gu nna shinggyim machyi laja lana hkrum sha wu ai.

¹⁷Shing rai shangai yak nga yang, shangai karum ai jan gaw, “Hkum hkrit et; shadang sha langai nang bai lu nit dai,” ngu nna shi hpe tsun wu ai.

¹⁸Rai ti mung, shi si wa nna shi a nsoi nsa hkyet mat wa yang, shi a shadang sha hpe Benoni ngu nna shamying da wu ai. Rai ti mung shi a kawa chyawm gaw Benyamin [27] ngu nna shamying wu ai.

¹⁹Rahkela si mat ai shaloi, ya aten e Betlehem ngu nna tsun ai Ehprat de sa wa ai lam makau hta shi hpe lup makoi da mu ai.

²⁰Yaku mung dai yang e, masat dingsat nlung langai jung da wu ai rai nna dai gaw dai ni du hkra Rahkela a lup hpe naw matsing da ya nga ai.

²¹Yaku gaw matut hkawm mat wa nhtawm Edera langchyi a man maga mi hta shara la nna shi a sum de da nga wu ai.

²²Yaku dai mung hta nga nga yang, Rubin mahtang shi kawa a lashi num Bila kaw shang nna kanawn kau wu ai; dai lam hpe Yaku na wu ai rai nna sindawng kahtet wu ai. Yaku hta shadang sha ni shi lahkawng nga ma ai.

²³Lea a shadang sha ni gaw, Rubin (Yaku a shadang sha alat), Simun, Lewi, Yuda, Yisahka hte Zebulun hte rai ma ai.

²⁴Rahkela a shadang sha ni gaw Yosep hte Benyamin yan rai ma ai.

²⁵Rahkela a mayam num Bila a shadang sha ni gaw Dan hte Naphtali yan rai ma ai.

²⁶Lea a mayam num Zilhpa a shadang sha ni gaw Gad hte Ashe yan rai ma ai. Ndai hte gaw Mesopotamia mung e shangai ai shadang sha ni rai ma ai.

²⁷Yaku gaw Abraham hte Isak shanu nga ai Hebron makau na shi kawa Isak nga ai Mamre kahtawng de sa wa wu ai.

²⁸Isak gaw asak latsa e matsat shi ning du hkra nga nna,

²⁹asak kung ugut gu ai aten hta si wa nu ai; shi a shadang Esaw hte Yaku hkan nau shi hpe lup makoi kau ma ai.