Read Jinghpaw Common Language Bible 2009 NINGPAWT NINGHPANG 36 Bible Online

NINGPAWT NINGHPANG 36 - Jinghpaw Common Language Bible 2009 bible

NINGPAWT NINGHPANG 36

¹Da ndai gaw Edom ngu nna mung shaga ai Esaw a lakung lama ni rai ma ai.

²Esaw mahtang Hkanan numsha ni rai nga ai Hiti masha Elon a shayi sha Ada hpe mung, Hiwi masha Zibeon a kasha Ana a shayi sha Aholibama hpe mung,

³Ishmaela a shayi sha Nabaiyut a kajan Basemat ni hpe la wu ai.

⁴Ada gaw Elihpa hpe shangai wu ai; Basemat mahtang Reuela hpe shangai ya wu ai. Aholibama gaw Yeusa, Yalam, Kora hte hpe shangai ya wu ai.

⁵Ndai ni yawng gaw Hkanan mung e, Esaw a matu shaprat ya ai shadang sha ni rai ma ai.

⁶Dai hpang Esaw gaw shi a madu jan ni, shi a shadang sha ni hte shayi sha ni, nta masha ni yawng hte hpe mung, shi a yam nga hpung ni yawng hte Hkanan mung e shi lu la da sai sut gan arung arai yawng hte hpawn shi a kanau Yaku kaw nna kaga mung de htawt mat wa wu ai.

⁷Esaw hte Yaku hta yam nga ni grai law nga ai rai nna, shan rau nga na lam n mai byin ai hte shan shanu nga ai lamu ga mung shan hpe grai wa n lu madi shadaw karum lu ai a majaw, Esaw pru mat wa wu ai.

⁸Dai rai nna Esaw mahtang Edom mung na kawng marawn hkan shanu nga wu ai.

⁹Da ndai ni gaw Edom masha ni a kaji kawa rai nga ai Esaw a lakung lama ni rai nga ai. Esaw a madu jan Ada gaw shi a matu shadang sha Elihpa hpe shangai ya wu ai.

¹⁰Dai Elihpa gaw shadang sha manga lu ai rai nna, dai ni gaw Hteman, Umara, Zehpu, Gahtam hte Kena ni rai nga ai. Kaga madu jan rai nga Htimna mung Elihpa a matu shadang sha Amalek hpe shangai ya wu ai. Esaw a madu jan Basemat mung shadang sha Reuela hpe shangai ya wu ai. Reuela mung shadang sha mali lu wu ai; dai ni gaw Nahat, Zera, Shama hte Miza ni rai ma ai.

¹⁴Zibeon a kasha Ana a shayi sha Esaw a madu jan Aholibama gaw shadang sha masum rai nga ai Yeusa, Yalam hte Kora ni hpe shangai ya wu ai.

¹⁵Ndai ni gaw Esaw kaw na yu hkrat wa ai amyu bawsang ni rai ma ai. Esaw a shadang sha alat Elihpa gaw Hteman, Umara, Zehpu, Kena,

¹⁶Kora, Gahtam hte Amalek ni gaw amyu bawsang ni a kaji kawa tai wa sai. Dai ni yawng gaw Esaw hte madu jan Ada yan a lakung lama ni rai ma ai.

¹⁷Esaw a shadang sha Reuela gaw Nahat, Zera, Shama hte Miza amyu bawsang ni a kaji kawa tai wa sai. Dai ni yawng gaw Esaw hte madu jan Basemat yan a lakung lama ni rai ma ai.

¹⁸Yeusa, Yalam hte Kora ni gaw Esaw hte shi a madu jan rai nga ai Ana a shayi sha Aholibama yan kaw na yu hkrat wa ai amyu lakung ni rai ma ai.

¹⁹Ndai ni yawng gaw Esaw kaw nna pra hkrat wa ai amyu bawsang ni rai ma ai.

²⁰Edom mung na ningpawt buga masha ni gaw amyu bawsang hku ran hkrat wa nna shanhte a kaji daju Hori masha Seira a matu mara ni gaw Lotan, Shobala, Zibeon, Ana, Dishon, Ezera hte Dishan ni rai ma ai.

²²Lotan mahtang Hori hte Heman amyu lakying ni a kaji kawa rai nga ai. (Lotan hta Htimna mying ai kajan langai lu wu ai.)

²³Shobala mung Alwan, Manahat, Ebala, Shehpu hte Onam amyu lakying ni a kaji kawa rai nga ai.

²⁴Zibeon hta Aya hte Ana ngu ai shadang sha lahkawng nga nga ai. (Ana gaw shi kawa a lawze ni hpe bau rem nga yang, nam mali e hka lum hka hpawk ni hpe sa mu ai wa rai nga ai.)

²⁵Ana gaw Hemdan, Eshban, Yitran, Hkeran amyu lakying ni a kaji rai nga ai Dishon a kawa rai nga ai. Ana gaw Aholibama mying ai shayi sha langai mi mung lu wu ai.

²⁷Ezera gaw Bilahan, Zawan hte Akan amyu lakying ni a kaji kawa rai nga ai.

²⁸Dishon mung Uza hte Aran amyu lakying ni a kaji kawa rai nga ai.

²⁹Ndai ni gaw Edom mung hta nga ai Hori bawsang Lotan, Shobala, Zibeon, Ana, Dishon, Ezera hte Dishan amyu bawsang ni rai ma ai.

³¹Israela mung hta gara hkawhkam mung garai n paw pru wa yang, lawu de na hkawhkam ni Edom mung hta matut manoi up hkang lai wa masai. Dai ni gaw; Dinhaba mare na Beora a kasha Bela, Bozra mare na Zera a kasha Yobab Hteman ginwang na Husham, Awit mare na Bedad a kasha Hadad (Shi gaw Moba mung na majan hta Midian masha ni hpe gasat dang kau ai wa rai nga ai.) Masreka mare na Samla, Hka nu makau na Rehubut mare na Shaula, Akbora a kasha Bala Hanan, Paw mare na Hadad (Shi madu jan a mying gaw Mehetabela rai nna Matreda a shayi sha rai nhtawm Mezahaba a kashu rai nga ai.)

⁴⁰Esaw gaw Edom amyu Htimna, Alwa, Yehtet, Aholibama, Ela, Hpinon, Kena, Hteman, Mibzara, Magdula, hte Iram amyu bawsang ni a kaji kawa rai nga ai. Ndai amyu bawsang shagu shanu nga ai shara gaw dai amyu bawsang ni a mying hta hkan nna gumhkawng pru wa nga ai.