Read Jinghpaw Common Language Bible 2009 NINGPAWT NINGHPANG 39 Bible Online

NINGPAWT NINGHPANG 39 - Jinghpaw Common Language Bible 2009 bible

NINGPAWT NINGHPANG 39

¹Ya Ishmaela masha ni Yosep hpe Egutu mung de woi hkrat wa nhtawm hkawhkam wa a mung bawng du salang ni hta na hkawhkam wang hpe sin ai sin langa ni a du Hputihpa hpe dut ya mu ai.

²Dai MADU gaw Yosep hte rau nga nga ai rai nna shi hpe awng dang shangun wu ai.

³Yosep gaw Egutu masha shi a madu a nta hta nga wu ai. Shi galaw ai lam shagu mung shi hpe awng dang shangun ai dai MADU gaw Yosep hte rau nga nga ai hpe mu wu ai.

⁴Hputihpa mung shi hpe yu sharawng wu ai rai nna shi hte sha seng ai shangun ma shatai da wu ai. Shi a nta hte shi madu da lu sai arung arai yawng Yosep hpe hpareng shangun wu ai.

⁵Yosep a majaw, dai aten kaw nna dai MADU mung Egutu mung na dai masha wa a nta dinghku hte shi a sun hkauna na shi lu ai arai shagu hte hpe shaman ya wu ai.

⁶Hputihpa mung shi lu ai arung arai mahkra hpe Yosep e yu lajang na matu, shi a lata hta ap ya wu ai rai nna, shi sha ai lusha hta kaga hpa hpe mung shi nan n hkan chye nang ra wu ai. Yosep chyawm gaw hkum shingyan galu kaba nna ahpraw nsam mung htap nga ai.

⁷Kade n na yang, shi madu a madu jan mahtang Yosep hpe ra gasit hpang wa nna shi hte rau yup na matu saw lajin wu ai.

⁸Yosep mahtang n hkraw ya ai rai nna, shi hpe, “Yu u, ndai yang ngai nga nga nngai majaw nta kata na arung arai hpa hpe mung nye a madu shi nan n chye da ra nu ai. Shi lu malu arai mahkra hpe hpareng lajang ya na matu mung ngai hpe ap da ni ai.

⁹Ndai nta hta shi lu ai daru magam ahkang aya zawn ngai mung lu nngai. Nang hta kaga hpa mung ngai hpe shi hkum shingdang da ai n rai; dai re ai mi, dai zawn n hkru ai amu hte Karai Kasang hpe ngai kaning di shut hpyit lu na rai nga a ta?,” ngu nna tsun wu ai.

¹⁰Shi gaw Yosep hpe shani shagu tsun wu ti mung, shi hte rau yup wu ai n rai.

¹¹Rai ti mung, lani mi na aten hta, Yosep gaw shi a amu galaw na nga, nta nhku de shang wa yang, dai yang e nta na shangun ma langai mi mung n nga nga ai.

¹²Dai numsha gaw shi a palawng galu hpe magra jum da nna, “Sa rit, ngai hte yup ga,” ngu wu ai. Rai ti mung shi chyawm gaw shinggan de kagat hprawng mat wa nna dai numsha a lata hta palawng galu hpe tawn kau da wu ai.

¹³Shi a lata hta palawng galu hpe tawn kau da nhtawm shinggan de hprawng mat wa ai hpe shi mu dat wu yang,

¹⁴shi a nta na shangun ma ni hpe shaga nna, “Da ndai hpe yu yu mu! Nye a madu wa ndai nta de woi tawn ai ndai Hebre masha wa gaw anhte hpe n sawn n sang di mi ai. Nye a gawk de shi shang wa nna ngai hpe roi na shakut wu ai majaw nsen kaba hte ngai dang lu ai daram jahtau dat we ai.

¹⁵Ngai ja ja jahtau dat ai nsen hpe shi na wu ai rai nna shi a palawng hpe nye a makau e tawn kau da nhtawm shinggan de gat hprawng mat wa wu ai,” ngu nna tsun dan wu ai.

¹⁶Yosep a madu nta de bai du wa ai aten du hkra, shi a palawng galu hpe shi kaw tawn da wu ai.

¹⁷Dai hpang shi gaw madu wa hpe, “Ndai kaw nang woi tawn da ai dai Hebre mayam wa gaw nye a gawk de shang nna ngai hpe n sawn n sang di wu ai.

¹⁸Rai ti mung, ngai jahtau dat we yang, shi a palawng galu hpe nye a makau e tawn kau da nna shinggan de gat hprawng mat wa wu ai,” ngu nna shawng na ga hte maren hkap tsun dan wu ai.

¹⁹Yosep a madu chyawm gaw ja ja masin pawt wu ai rai nna, Yosep hpe rim nhtawm,

²⁰hkawhkam wa a bawng masha ni rawng ai htawng hta shi hpe bang da wu ai rai nna dai yang e shi bawng dung nga wu ai.

²¹Rai ti mung dai MADU gaw Yosep hte rau rai nga ai majaw shi hpe shaman ya wu ai; htawng agyi wa mung shi hpe ra sharawng nga wu ai.

²²Dai rai nna shi gaw Yosep hpe kaga bawng masha ni yawng hpe hpareng na ahkang ap ya wu ai rai nna htawng kata galaw na bungli lit shagu hpe mung shi hpe hpajang shangun mu ai.

²³Dai MADU gaw Yosep hte rau rai nga nna shi galaw ai amu shagu hta shi hpe awng dang shangun wu ai majaw htawng agyi wa gaw Yosep hte seng ai amu langai mi mung hkan yu ra wu ai n rai.