Read Jinghpaw Common Language Bible 2009 NINGPAWT NINGHPANG 4 Bible Online

NINGPAWT NINGHPANG 4 - Jinghpaw Common Language Bible 2009 bible

NINGPAWT NINGHPANG 4

¹Dai hpang Adam gaw shi a madu jan hte kanawn nna, shi hta na-um nasin hkum tai wa sai. Shi gaw shadang sha langai shangai nhtawm, “Dai MADU karum la ai a jaw e, shadang sha langai ngai lu se ai,” nga nna tsun wu ai. Dai rai nna shi gaw dai shadang sha hpe Ka-in ngu nna shamying wu ai.

²Shi gaw hpang e mung Abela ngu ai shadang sha hpe bai shangai wu ai. Abela mahtang sagu rem sha ai wa rai nna Ka-in gaw yi hkauna galaw sha ai wa rai nga ai.

³Aten ram ram na ai hpang, Ka-in gaw dai MADU hpe hkungga nawng jau na matu shi a nsi naisi nkau mi la sa nna dai hpe jaw wu ai.

⁴Dai hpang Abela mung shi a sagu hpung hta na shawng hkrat ai sagu kasha hpe la sa nhtawm dai hpe sat nna, dai ni hta na grau tsawm ai daw hpe hkungga nawng jau ya na hkungga a matu jaw ya wu ai. Dai MADU gaw Abela hte shi a hkungga hpe awng sharawng ya wu ai;

⁵rai ti mung shi gaw Ka-in hte shi a hkungga hpe hpa n sawn ya wu ai. Ka-in masin ja ja kahtet ai hte pawt sindawng nga lu ai.

⁶Dai hpang dai MADU gaw Ka-in hpe, “Nang hpa rai pawt nga n ni? Nang hpa majaw myi man sum nga n ta?

⁷Nang jaw ai amu galaw yang gaw nang myi man hpaw lu na rai nga ndai, rai ti mung nang gaw n hkru n shawp ai amu galaw kau nit dai majaw yubak gaw na a chyinghka e makun hpum nga ai. Dai gaw nang hpe up hkang mayu ti mung, dai hpe nang awng dang kau lu ndai,” ngu nna tsun wu ai.

⁸Dai hpang Ka-in gaw shi a kanau Abela hpe, “Pa hkan e hkawm chyai ga,” ngu nna tsun wu ai. Pa hkan e shan nga hkawm nga yang, Ka-in gaw shi a kanau hpang de kayin sa nna shi hpe sat kau wu ai.

⁹Dai MADU gaw Ka-in hpe, “Na a kanau Abela kanang rai nga a ta?,” ngu nna san wu ai. Shi mahtang, “Ngai n chye nngai. Ngai gaw nye a kanau wa hpe hkan lakawn ai wa zawn nawn nga n ni?,” ngu nna htan wu ai.

¹⁰Dai hpang dai MADU gaw, “Nang hpa rai ndai hkrit hpa amu hpe galaw kau nu ni? Na a kanau a asai gaw matai htang ya na matu shaga ai nsen zawn aga kaw nna ngai hpang de jahtau nga ai.

¹¹Nang shi hpe sat ai shaloi, shi a asai hpe hkap la na matu, lamu ga gaw shi a n-gup mahka ai hte na kanau a asai lu kau nu ai. Nang gaw dagam dala hkrum nna yi hkauna galaw ti mung mi na shadang du lu na ndai n rai.

¹²Na a hkai nmai ni hpe gat hkai ai rai yang, aga kaw nna hpa mung tu na ra ai n rai; nang gaw ginding aga ntsa e nta n lu ai sha brak hkawm ai wa tai na rin dai.”

¹³Ka-in gaw dai MADU hpe, “Ndai ari gaw nye a matu n dang hkam lu hkra, nau wa kaba la nga ai.

¹⁴Nang gaw ngai hpe ndai lamu ga kaw nna mung, na a man kaw nna mung shaden kau nga ndai. Ngai gaw ginding aga ntsa e nta n lu ai sha brak hkawm ai wa tai wa nna ngai hpe mu tam ai kadai wa mung ngai hpe sat kau na ra ai,” ngu nna tsun wu ai.

¹⁵Rai ti mung, dai MADU gaw, “N rai law, marai langai ngai nang hpe sat ai rai yang, yubak ari htang sanit jaw ai hkrum na wu ai,” ngu nna shi hpe tsun wu ai. Dai majaw dai MADU gaw Ka-in hpe mu ai ni kadai mung shi hpe n sat lu mu ga, shi hpe masat shakap tawn da ya wu ai.

¹⁶Shing rai Ka-in gaw dai MADU a man kaw nna pru mat wa nhtawm Eden a sinpraw maga e nga ai “Brak Hkawm Ai Shara,” mying ai mung hta nga nga ai.

¹⁷Ka-in hte shi a madu jan gaw shadang sha langai lu ma ai rai nna, shi hpe Enuk ngu nna shamying ma ai. Dai hpang Ka-in gaw mare langai de nna dai hpe shi a shadang sha a amying hku hkan nna Enuk ngu shamying da nga ai.

¹⁸Enuk gaw Irad mying ai shadang sha langai lu ai, shi gaw Mehuyaela a kawa rai nga ai; Mehuyaela gaw Mehtushaela mying ai shadang sha langai lu ai, shi gaw Lamek a kawa rai nga ai.

¹⁹Lamek gaw Ada hte Zila ngu ai madu jan lahkawng lu nga ai.

²⁰Ada gaw Yabala hpe shangai wu ai, shi gaw janghpang sum ni hta nga nna yam nga rem sha ai ni a kaji kawa tai wa sai.

²¹Shi a kanau gaw Yubala rai nna, tingse sumpyi chye dum ai ni yawng a kaji kawa rai nga ai.

²²Zila mahtang magri mang hte hpri arai yawng hpe chye galaw ai ndup sama Htubala Ka-in hpe shangai wu ai. Htubala Ka-in a kajan gaw Nama rai nga ai.

²³Lamek gaw shi a madu jan yan hpe, “Ada hte Zila yan e, nye a ga madat mu; Shabrang langai mi ngai hpe gamai ai majaw ngai shi hpe sat kau ni ai.

²⁴Ka-in hpe sat ai wa yubak matai htang sanit hkrum ai rai yang; Ngai hpe sat ai wa kadai rai ti mung, yubak matai htang sanit shi sanit hkrum lu na ra ai,” ngu nna tsun wu ai.

²⁵Adam hte shi a madu jan hta kaga shadang sha bai lu ma ai. Madu jan gaw, “Karai Kasang gaw Ka-in e sat kau ai Abela a shara hta shadang sha langai jaw ni ai,” ngu nna tsun wu ai. Dai rai nna shi hpe Shet ngu nna shamying wu ai.

²⁶Shet mung shadang sha langai lu ai rai nna shi hpe Enusha ngu nna shamying wu ai. Dai aten kaw nna nawku daw jau ai hta dai MADU a chyoi pra ai mying ningsang hpe amyu masha ni lang hpang wa masai.