Read Jinghpaw Common Language Bible 2009 NINGPAWT NINGHPANG 41 Bible Online

NINGPAWT NINGHPANG 41 - Jinghpaw Common Language Bible 2009 bible

NINGPAWT NINGHPANG 41

¹Ya lahkawng ning lai jang, Egutu hkawhkam yup mang mu wu ai. Yu u, Nila hka nu makau e shi tsap nga yang, dai hka nu hta na hpum sau ai

²hte hkum hkrang pri manen ai upra sanit pru lung wa nhtawm tsingdu tsingman ni hpe sha let nga nga ma ai.

³Dai hpang kaga upra sanit mung pru lung wa ma ai. Dai ni mahtang gaw lasi grawm grawm rai nna nra dawng ai hte kyip kyip rai ma ai. Dai ni gaw hkin-gau ntsa e nga nga ai kaga upra ni a makau hkan e sa tsap nga ma ai.

⁴Dai lasi grawm grawm re ai upra ni mahtang hpum sau ai upra ni hpe sha kau mu ai, dai hpang hkawhkam wa hprang mat wu ai.

⁵Shi bai yup nna kaga yup mang hpe bai mu wu ai. Yu u, mam hpun langai mi hta na ja kat nna myin sai mam gungsi sanit si pru nga ai.

⁶Dai hpang kahtet kang ai zaibru jang nbung ahpawt ai a majaw mam nmyem gungsi sanit pru nga ai.

⁷Dai mam nmyem gungsi ni mahtang ja kat ai gungsi ni hpe mayu kau mu ai. Dai hpang hkawhkam wa hprang mat wa ai hte yup mang mu nu ai hpe shi dum chye wa wu ai.

⁸Jahpawt rai jang, shi myit ru nga ai rai nna, Egutu mung na mandan lakle chye ai sara ni hte hpaji byeng-ya chye ai ni yawng hpe shi shaga la nhtawm shi a yup mang hpe hkai dan wu ai. Rai ti mung, shi mu ai yup mang htai ya lu ai masha mi n nga nga ai.

⁹Dai hpang sabyi jau ai wa gaw hkawhkam wa hpe, “Ngai shut kau se ai majaw mara dai hpe dai ni she ngai yin la lu nngai.

¹⁰Nang chyawm gaw muk kabaw ai agyi hte ngai hpe masin pawt nit dai majaw sin langa du wa a nta hta an hpe sharen da mi ai.

¹¹An lahkawng gaw lana jan e sha, lachyum kaga ga rawng ai yup mang ni hpe mu ga ai.

¹²Dai sin langa du wa ai mayam ngu ai Hebre shabrang langai mi mung dai yang e an hte rau sharen da ai hkrum wu ai. Shi hpe yup mang ni hkai dan ga ai rai nna an a matu dai ni hpe shi htai ya mi ai.

¹³Shi htai ya ai hte maren, lam shagu byin wa sai. Dai rai nna mi na nye a aya hpe nang bai jaw ya tim, muk kabaw ai agyi wa hpe chyawm gaw nang sat kau nit dai,” ngu nna tsun dan wu ai.

¹⁴Hkawhkam wa gaw Yosep hpe shaga la na matu shangun dat wu ai. Shi gaw nmun shangun nna hpun palawng galai kau ngut ai hte hkawhkam wa a man de shang wa wu ai.

¹⁵Hkawhkam wa gaw shi hpe, “Ngai yup mang langai mu nngai, dai hpe kadai mung n htai lu ma ai. Nang chyawm gaw yup mang ni hpe htai ya lu nga ndai hpe ngai chye da ni ai,” ngu nna tsun wu ai.

¹⁶Yosep gaw, “Hkawhkam wa e, ngai n htai lu na nngai; rai ti mung Karai Kasang gaw ra sharawng ai ga htai langai jaw ya na ra ai,” ngu nna htan wu ai.

¹⁷Dai hkawhkam wa mung, “Nila hka nu hka kau e ngai tsap nga yang

¹⁸hpum nna manen pri tsawm ai nga upra sanit dai hka nu kaw na pru lung wa nhtawm tsingdu tsingman ni sha let nga nga ma ai hpe ngai mu nngai.

¹⁹Dai hpang lasi grawm grawm rai nna nra hkrai se se re ai kaga nga upra sanit mung pru lung wa ma ai. Dai ni gaw Egutu mung shara shagu hkan ngai galoi mung mu yu nga ai ni hta pyi grau n tsawm ai upra ni rai nga ai.

²⁰Dai lasi ai upra ni mahtang hpum tsawm ai ni hpe sha kau mu ai;

²¹rai ti mung, mi na ta raw yu n tsawm nga ma ai majaw kadai mung dai hpe n chye ma ai. Dai hpang ngai hprang mat ni ai.

²²Bai mam hpun langai mi hta kaba ja kat nna myin ai mam gungsi sanit si pru wa ai yup mang hpe mung ngai naw mu nngai.

²³Dai hpang e mung, kaji nna nyip nyip rai nhtawm kahtet kang ai zaibru jang nbung a majaw kahtet kyip mat ai mam gungsi sanit prut lung wa nga ai;

²⁴dai ni gaw ja kat ai mam gungsi sanit hpe mayu kau mu ai. Yup mang dai ni hpe mandan lakle sara ni hpe ngai hkai dan ti mung shanhte hta na kadai mung n htai ya lu ma ai.

²⁵Yosep gaw hkawhkam wa hpe, “Dai yup mang lahkawng yan a lachyum gaw maren sha rai nga ai. Karai Kasang galaw na amu shi nang hpe tsun dan nu ai.

²⁶Dai hpum sau ai nga upra sanit gaw sanit ning rai nga ai; bai ja kat ai mam gungsi sanit mung sanit ning rai nga ai. Dai ni gaw lachyum maren sha rai nga ai.

²⁷De a hpang e pru lung wa ai lasi grawm grawm re ai nga upra sanit hte kaji nna nyip nyip rai nhtawm kahtet kang ai zaibru jang na nbung ahpawt ai a majaw kyip mat ai mam gungsi sanit gaw hku hku na sanit ning rai nga ai.

²⁸Dai gaw ngai nang hpe hkai dan ai hte maren Karai Kasang galaw na amu shi nang hpe madun dan nit dai.

²⁹Dai rai nna Egutu mung ting hta sanit ning tup nai mam ni hpring kabrat hkra law htam wa na ra ai.

³⁰Dai hpang sanit ning hku hku wa na ra ai rai nna dai gaw mung ting hpe jahten kau na ra ai; shawng na lu su ngamu ngamai lai wa sai sanit ning hpe dum lu na ra ai n rai.

³¹Dai hku hku ai gaw nachying hkrit kajawng shara rai na ra ai majaw shawng na lu su ngamu ngamai ai aten hpe n dum mat hkra malap kau na mara ai.

³²Nang mu kahtap ai yup mang a lachyum gaw dai amu hpe Karai Kasang shagrin shangang nna dai hpe du na ra ai kade n na ai aten hta shi shabyin dat na ra ai lam rai nga ai.

³³“Dai re ai majaw, hpaji byeng-ya hte myit kraw hpaji hte hpring ai masha hpe, ya jang nang lata la nhtawm mungdan hpe hpareng na shi hpe san tawn da sanu.

³⁴Kaga myit su salang ni hpe mung san da nna hpring kabrat hkra lu su ngamu ngamai ai sanit ning laman na nai mam htam manga hta na htam mi hpe lahkawn shangun u.

³⁵Dai du na ra ai lu su ngamu ngamai ai shaning laman hta malu masha yawng lahkawn shinggyin da lu na matu, shanhte hpe hkang da nna dai ni hpe sin na matu shanhte hpe ahkaw ahkang jaw ya u.

³⁶Egutu mung a ntsa e du wa nga ai dai hku hku na sanit ning laman hta, dai malu masha gaw mungdan a matu jarit lusha tai na ra ai. Ndai lam hku nna, mung masha ni kawsi kyet na mara ai n rai,” ngu nna tsun wu ai.

³⁷Hkawhkam wa hte shi a mung du salang ni mung shi a yaw shada ai lam hpe myit hkrum ya mu ai hte shagrin ya mu ai;

³⁸shi gaw shanhte hpe, “Karai Kasang a Wenyi rawng ai ndai Yosep hta grau kaja ai masha anhte galoi mung mu tam na ga ai n rai,” ngu nna tsun mu ai.

³⁹Hkawhkam wa gaw Yosep hpe, “Karai Kasang nang hpe ndai amu yawng madun dan nit dai majaw kaga kadai hta mung grau kaba ai hpaji byeng-ya hte myit kraw hpaji hpe nang lu la nga ndai gaw asan sha rai nga sai.

⁴⁰Ngai gaw nang hpe nye a mungdan ting a ntsa na mung du shatai na nngai; nye a amyu masha ni yawng na a hkang da ai ga ni hpe madat mara na mara ai. Na a ahkang aya mung nye a lawu hprut hta agrin nga lu na rin dai.

⁴¹Ngai nang hpe Egutu mung ting hpe up hkang na mung du aya ya jang san da sade ai,” ngu nna tsun wu ai.

⁴²Hkawhkam wa mung hkawhkam dazik tawk ka da ai lachyawp hpe shi a lata hta chyawp ya wu ai. Dai hta kaga, reng ai lachyit palawng galu hpe mung jahpun ya nhtawm shi a du hta ja saidawng mung gali ya wu ai.

⁴³Shi gaw Yosep hpe hkawhkam wa jawn ai leng a lahkawng ngu na leng hta shajawn wu ai. Shi a sin langa ni mung shi a shawng e sa wa nna, “Lam yen mu! ngu nna jahtau mu ai. Shing rai Yosep gaw Egutu mung ting hpe up hkang lu na mung du aya hta san da ai hkrum wu ai.

⁴⁴Hkawhkam wa gaw shi hpe, “Ngai hkawhkam rai nga nngai-na a ahkang hte sha n rai yang, Egutu mung ting hta kadai mung tinang a lagaw lata sharawt lu na ma ai n rai,” ngu nna tsun wu ai.

⁴⁵Shi gaw Yosep hpe Egutu amyu mying rai nga ai Zahpenat Hpanea ngu nna shamying wu ai; bai shi hpe Heliopoli mare na hkinjawng Hputihpera a shayi sha Asenat hpe mung shi a matu la ya mu ai. Egutu hkawhkam hpe daw jau hpang wa ai aten hta Yosep a asak gaw sumshi ning rai nga salu ai. Shi gaw hkawhkam wang kaw nna pru mat wa nhtawm Egutu mung ting de gawan hkawm wu ai.

⁴⁶

⁴⁷Dai lu su ngamu ngamai ai sanit ning laman hta lamu ga gaw nsi naisi law htam hkra shapraw ya nga ai.

⁴⁸Yosep gaw dai ni yawng hpe lahkawn shinggyin nna mare ni hta htun da wu ai. Dai mare ni a grup yin hkauna ni hta na nai mam malu masha ni hpe mung mare shagu hta htun da wu ai.

⁴⁹Nai mam ni grai law htam nga ai rai nna, dai ni hpe n shadawn ai sha tawn da wu ai. Dai ni gaw panglai zaibru daram law nga ai.

⁵⁰Dai hku hku ai shaning ni garai n du yang, Asenat gaw Yosep a matu shadang sha lahkawng shangai ya wu ai.

⁵¹Shi gaw, “Ngai hkam sha ai nye a nni nkri yawng hte nye wa a dinghku yawng hpe Karai Kasang e malap kau shangun ni ai. Dai re ai majaw shi a shadang sha alat hpe Manashe [28] ngu nna shamying wu ai.

⁵²Shi gaw, “Ngai ru yak tsin-yam tsindam sa hkrum ai mung hta Karai Kasang ngai hpe kashu kasha jaw ya ni ai,” ngu nna tsun wu ai. Dai majaw dai shadang sha hpe Ehprim [29] ngu nna shamying wu ai.

⁵³Ya Egutu mung hta lu su ngamu ngamai ai sanit ning htum mat ai hte rau Yosep htai ya sai hte maren,

⁵⁴hku hku na sanit ning gaw du hpang wa ra ai. Dai rai nna mung shagu hkan e hku hku nga ma ti mung Egutu mung hta chyawm gaw lusha ni nga nga ai.

⁵⁵Egutu masha ni kawsi kyet hpang wa ai shaloi, shanhte gaw hkawhkam wa kaw lusha sa hpyi jahtau ma ai. Shanhte hpe Yosep hpang de sa shangun nhtawm shi shanhte hpe tsun ai hte maren, hkan galaw na matu hkang dat wu ai.

⁵⁶Dai hkuwa gaw grau grau sawng wa ai rai nna mungdan ting hta byin nga ai. Yosep gaw mam dum ni yawng hpe hpaw nhtawm Egutu masha ni hpe nai mam dut ya wu ai.

⁵⁷Dai hkuwa gaw shara shagu hkan nachying laja nga ai majaw Yosep hpang de nai mam mari na nga, mung shagu na masha ni Egutu mung de du sa nga ma ai.