Read Jinghpaw Common Language Bible 2009 NINGPAWT NINGHPANG 42 Bible Online

NINGPAWT NINGHPANG 42 - Jinghpaw Common Language Bible 2009 bible

NINGPAWT NINGHPANG 42

¹Egutu mung e nai mam nga ai hpe Yaku chye wu yang, shi gaw shi a shadang sha ni hpe, “Nanhte hpa majaw shada da sha yu hkat nga myit ni?

²Yu mu, Egutu mung e nai mam ni nga nga ai hpe ngai na nngai; anhte kyet si ai n hkrum u ga, dai mung de yu sa nna nai mam ni sa mari la masu,” ngu tsun wu ai.

³Yosep a kahpu ni marai shi hte gaw nai mam mari na nga, Egutu mung de yu sa ma ai.

⁴Rai ti mung, Yaku gaw Yosep a kanau Benyamin hpe chyawm gaw kahpu ni hte rau n shangun dat wu ai; hpa majaw nga yang, shi hta n hpru n mai ai lam lama ma hkrum hkra na wu ai hpe shi hkrit tsang ai majaw rai nga ai.

⁵Hkanan mung hta mung hku hku wa ai majaw, Yaku a shadang sha ni, nai mam mari na nga, kaga masha ni hte rau du shang wa ma ai.

⁶Egutu mung a mungdu Yosep gaw mungkan shara shagu na du sa ai masha ni hpe nai mam ni dut ya nga wu ai. Yosep a kahpu ni du sa nhtawm shi man e ga du hkra dingnyawm dagup nga ma ai.

⁷Yosep gaw shi a kahpu ni hpe mu ai shaloi, shi shanhte hpe chye matsing wu ti mung, shanhte hpe n chye ai zawn shi galaw dan wu ai. Shi gaw shanhte hpe nsen shaja let, “Nanhte kanang na du sa ai ni rai myit ta?,” ngu nna san wu ai. Shanhte gaw, “Nai mam malu masha mari na matu Hkanan mung kaw nna anhte du sa raga ai,” ngu nna htan mu ai.

⁸Yosep mahtang shi a kahpu ni hpe chye matsing wu ti mung, shanhte shi hpe n chye matsing da mu ai.

⁹Yosep gaw shanhte a lam hte shi mu ai yup mang ni hpe myit dum let, “Nanhte kin-yu ni rai nga myit dai; anhte a mungdan n-gun kya ai hpe sa yu ai ni she rai nga myit dai,” ngu nna shanhte hpe tsun mu ai.

¹⁰Shanhte mahtang, “N rai law madu e, na a mayam ni lusha mari na san san a matu sha du sa ga ai.

¹¹Anhte yawng mung kahpu kanau ni hkrai rai nga ga ai. Anhte kin-yu ni n rai nga ga ai. Madu e, anhte gaw ding man ai masha ni she rai nga ga ai,” ngu nna htan mu ai.

¹²Yosep gaw shanhte hpe, “N rai law, nanhte gaw anhte a mungdan n-gun kya ai hpe sa yu ai ni she rai nga myit dai,” ngu nna tsun wu ai.

¹³Shanhte mung, “Madu e, anhte gaw Hkanan mung hta nga ai kawa langai a shadang sha kahpu kanau shi lahkawng ni rai ga ai. Kanau langai mi mahtang si mat nna hpungdim wa chyawm gaw anhte kawa hte rau ya naw nga nga ai,” ngu nna tsun mu ai.

¹⁴Yosep gaw, “Ngai tsun sai hte maren, nanhte gaw kin-yu ni she rai nga myit dai.

¹⁵Dai lam teng n teng nanhte chyam yu ai hkrum na myit dai. Nanhte a kanau hpungdim wa hpe ndai shara de n woi sa myit dai rai yang chyawm gaw galoi mung pru wa lu na myit dai n rai, ngu nna hkawhkam wa a mying hta ngai dagam da made ai.

¹⁶Nanhte tsun ai ga teng ai n teng ai hpe chyam yu lu hkra, nanhte hta na marai langai mi wa nna shi hpe wa woi la mu; ngam ai ni hpe chyawm gaw htawng hta sharen da na mawe ai. Dai hku n rai yang, hkawhkam wa teng teng hkrung nga ai hte maren, nanhte kin-yu ni rai nga myit dai,” ngu nna tsun wu ai.

¹⁷Dai hpang shi shanhte hpe htawng hta masum ya sharen da wu ai.

¹⁸Masum ya du ai shani hta Yosep gaw shanhte hpe, “Ngai gaw Karai Kasang hpe hkrit kamyin ai wa rai nga nngai. Dai rai nna mabyin lam langai mi a ntsa hta ngai nanhte a asak hpe jahkrung da ya na made ai rai nna ning di mu:

¹⁹Nanhte ding man nga myit dai hpe chyam yu lu hkra, nanhte hta na marai langai ngai hpe htawng hta sharen da nna, ngam ai ni mahtang kawsi kyet nga ai nanhte a dinghku masha ni hpang de nanhte lu mari da lu sai nai mam ni la nna nhtang wa masu.

²⁰Dai hpang nanhte a kanau hpungdim wa hpe ngai hpang de woi sa wa mi; dai hku galaw ai gaw nanhte tsun ai dai teng man ai lam gaw sakse tai wa nna, nanhte mung si na myit dai n rai,” ngu nna tsun wu ai.

²¹Shanhte mung dai ga hpe myit hkrum ya mu ai rai nna, shanhte shada da mung, “Rai sa, anhte a kanau wa hpe anhte galaw kau ai amu ni a majaw ya, anhte nni nkri hkrum sha nga saga ai; shi a myit masin hta na ru yak tsin-yam tsindam kaba hpe anhte mu nna, karum la na matu shi hpyi nem ti mung, anhte n madat kau ya saga ai. Dai re ai majaw ya anhte ndai ru yak tsin-yam tsindam hkrum sha nga saga ai,” ngu nna tsun hkat ma ai.

²²Rubin chyawm gaw, “Ma hpe n machyi shangun na matu, ngai tsun ni ai; rai ti mung, nanhte mahtang n madat ya myit dai. Shi a si hkrung si htan a matu, ya anhte ari jaw ai hkrum nga saga ai,” ngu nna tsun wu ai.

²³Yosep gaw shanhte kaning nga tsun ai hpe chye na wu ti mung, shanhte dai lam hpe n chye mu ai; hpa majaw nga yang, shanhte mahtang shi hpe ga gale ai wa hte tsun tsun di wu ai majaw rai nga ai.

²⁴Yosep gaw shanhte kaw nna pru mat wa nhtawm sa hkrap nga wu ai. Shanhte kaw bai nhtang shang wa nna ga shaga ngut jang Simun hpe shaw shapraw la nhtawm shanhte a man e shi hpe gyit tawn wu ai.

²⁵Yosep gaw shi kahpu ni a daw hta nai mam ni hte baw jahpring ya nhtawm, langai hte langai a nhpye htingpa hta mung tinang a gumhpraw bai bang ya nna, hkrun lam a matu malu masha jaw dat na hkang dat wu ai. Dai mung galaw da nga sai.

²⁶Kahpu ni gaw lawze ni hta shanhte mari da sai nai mam ni hpe htaw nna pru mat wa ma ai.

²⁷Shanhte gaw shawng de lana mi but yu sai dabang sa ra hta langai wa mi gaw shi a lawze hpe lusha jaw na nga, shi a nhpye htingpa hpaw dat wu yang, dai nhpye htingpa mahka hta shi a gumhpraw ni hpe mu wu ai.

²⁸Shi gaw shi a kahpu ni hpe shaga la nhtawm, “Nye a gumhpraw ngai hpe bai bang ya mi ai. Dai gaw nang e nye a nhpye htingpa hta rawng nga li ai!,” ngu nna tsun wu ai. Shanhte mung myit mak mat nna hkrit gari let Karai Kasang anhte hpe hpa wa mi galaw nu ai kun?,” ngu nna shanhte shada da san hkat mu ai.

²⁹Hkanan mung e nga ai shanhte a kawa Yaku kaw du wa yang, shanhte hta hkrum kadup ai lam yawng hpe tsun dan mu ai.

³⁰“Dai Egutu mungdu wa gaw anhte hpe ja ja tsun nna, shi a mung hpe kin-yu yu shadu mani ai.

³¹Bai, ‘Anhte chyawm gaw kin-yu ni n rai ga ai, ding man ai masha ni she rai nga ga ai.

³²Anhte gaw kawa langai kaw na shadang sha marai shi lahkawng rai nga ga ai. Kanau langai mahtang n nga mat nna, hpungdim wa gaw Hkanan mung e, anhte a kawa hte rau naw nga nga ta sai,” ngu nna anhte htan ga ai.

³³Dai wa gaw, “Nanhte ding man ai masha ni rai myit yang mung, ndai hku nna sawk shapraw yu made ga; nanhte hta na marai langai mi ngai hte rau nga nna, ngam ai ni mahtang nanhte mari da sai nai mam ni hte hpawn, kawsi kyet nga ai nanhte a dinghku masha ni hpang de la wa masu.

³⁴Nanhte a kanau hpungdim wa hpe ngai hpang de woi sa wa marit. Shaloi nanhte gaw kin-yu ni n rai nga myit dai sha, ding man ai masha ni she rai nga myit dai hpe ngai chye lu na made ai. Nanhte a hpu nau wa hpe ngai mung nanhte a lata de bai ap ya ai hte nanhte mung ndai yang e shanu nga lu nna, hpaga yumga galaw lu na myit dai,” ngu nna tsun wu ai.

³⁵Dai hpang shanhte mung shanhte a nhpye htingpa ni hpe htawk yu mu yang, shanhte langai hte langai tinang nang a gumhpraw tingsan ni hpe mu ma ai. Shanhte dai gumhpraw tingsan ni hpe mu ma ai shaloi, shanhte hte shanhte a kawa Yaku ni hkrit gari nga ma ai.

³⁶Shanhte a kawa gaw shanhte hpe, “Nye a kasha ni yawng hpe jasum kau shangun na nanhte ra nga myit ni? Yosep n nga sai, Simun mung n nga sai. Ya Benyamin hpe mung la kau ya na nanhte ra sharawng nga myit dai. Ngai mahtang dai nni nkri hpe hkam sha ai wa rai nga n hka!,” ngu nna tsun wu ai.

³⁷Rubin gaw shi a kawa hpe, “Benyamin hpe nang hpang de, ngai bai n woi nhtang wa ai rai yang, nye a shadang sha lahkawng yan hpe nang sat kau ya lu na ndai. Dai re ai majaw nye a lata hta shi hpe ap ya e, ngai shi hpe bai woi nhtang wa na nngai,” ngu nna tsun wu ai.

³⁸Rai ti mung, Yaku gaw, “Nye a kasha gaw nanhte hte rau yu sa lu na n rai; shi a kahpu mung si mat salu ai, shi langai chyu sha ngam sai. Hkrun lam e shi hta lama ma mung byin hkrum chye nga ai. Ya ngai asak kaba ugut gu ni ai rai nna, ngai hpe yawn hkyen ai amu shabyin nna sat kau na myit dai,” ngu nna tsun wu ai.