Read Jinghpaw Common Language Bible 2009 NINGPAWT NINGHPANG 47 Bible Online

NINGPAWT NINGHPANG 47 - Jinghpaw Common Language Bible 2009 bible

NINGPAWT NINGHPANG 47

¹Dai rai nna Yosep gaw shi a kahpu manga hpe woi nhtawm hkawhkam wa hpang de shang ma ai. Shi gaw, “Nye wa hte nye a kahpu kanau ni shanhte a sagu bainam, yam nga hpung ni hte shanhte madu da sai arung arai yawng hte Hkanan mung kaw na du yu wa ma ai; ya Goshen mung e shanhte nga nga ma ai,” ngu nna tsun dan wu ai.

²Dai hpang shi a kahpu kanau ni hpe hkawhkam wa hpang de woi sa wa wu ai.

³Hkawhkam wa mung, “Nanhte a magam bungli ni gaw hpa wa mi rai nga myit ni?,” ngu nna shanhte hpe san wu ai. Shanhte gaw, “Madu e, anhte gaw anhte a kaji kawa ni zawn sagu bainam rem sha ai ni rai nga ga ai.

⁴Hkanan mung hta mung hkuwa laja wa ai rai nna anhte a sagu bainam ni a matu udat shara n nga mat sai majaw ndai mung hta shanu nga na, anhte du sa ga ai; dai re ai majaw, chyeju hte ndai Goshen mung hta shanu nga lu na ahkang anhte hpe jaw mi law,” ngu nna tsun ma ai.

⁵Hkawhkam wa gaw Yosep hpe, “Ya chyawm gaw na nwa hte nhpu nnau ni du mara ai;

⁶Egutu mung gaw shanhte a mung rai nga sai majaw, kaja htum ai mungdaw rai nga ai Goshen mung hta shanhte hpe nga shangun u; shanhte hta atsam marai hte hpring ai masha ni nga dam yang mung, nye a yam nga ni hpe rem na hpareng shanhte hpe galaw shangun u,” ngu nna tsun matsun dat wu ai.

⁷Dai hpang Yosep gaw shi a kawa Yaku hpe woi la nna hkawhkam wa hpang de woi shawn da wu ai. Yaku mung hkawhkam wa hpe shaman ya wu ai;

⁸hkawhkam wa gaw shi hpe, “Nang asak kade ning rai sani?,” ngu nna san wu ai.

⁹Yaku gaw, “Bu htawt hkawm ai nye a prat gaw latsa e sumshi ning tup na mat sali ai; dai shaning ni gaw nye a kaji kawa ni a shaning galu bu hkawm ai zawn n re ai sha, kadun ai hte yak la nga li ai,” ngu nna tsun dan wu ai.

¹⁰Yaku gaw hkawhkam wa hpe shaman ga tsun nna pru mat wa wu ai.

¹¹Dai hpang Yosep mung hkawhkam wa shi hpe hkang da nu ai hte maren, shi a kawa hte kahpu kanau ni hpe Egutu mung na kaja htum ai shara ngu ai Ramese mare hte ni htep ai shara shanhte hpe jaw nna nga shangun mu ai.

¹²Yosep gaw shi a kawa hpe mung, shi a kahpu kanau ni hpe mung, naw ngam nga ai shi a kawa a dinghku masha mahkra hte kaji htum ai wa a matu du hkra lusha garan jaw wu ai.

¹³Shara shagu hkan lusha htum mat hkra hku hku ai gaw nachying laja nga ai rai nna, Egutu hte Hkanan mung masha ni mung kawsi hpang gara ai hte n-gun kya mat ma ai.

¹⁴Shanhte nai mam ni mari yang, dai jahpu gumhpraw ni yawng hpe Yosep shinggyin la nna hkawhkam htingnu de la sa ya wu ai.

¹⁵Egutu hte Hkanan mung hta gumhpraw jai shama kau jang, Egutu mung masha ni Yosep kaw sa nna, “Anhte hpe lusha jaw mi! Anhte hpe hkum si shangun mi! Lama ma sha pyi galaw ya mi! Anhte a gumhpraw yawng mung ma mat saga ai,” ngu nna tsun ma ai.

¹⁶Yosep gaw, “Nanhte a gumhpraw ma mat malit yang gaw nanhte a yam nga ni hpe dun sa wa mi; dai yam nga jahpu a malai nanhte hpe ngai lusha jaw made ga,” ngu nna htan wu ai.

¹⁷Dai rai nna shanhte mung Yosep hpang de shanhte a yam nga ni hpe la sa nhtawm, dai gumra, sagu, bainam, dumsu hte lawze ni a matu shi shanhte hpe lusha jaw wu ai. Dai shaning hta shanhte a yam nga yawng a matu lusha hte galai nna shi bau maka lu wu ai.

¹⁸Hpang shaning hta mung shanhte shi kaw sa nna, “Madu e, anhte a gumhpraw yawng ma mat saga ai; dai lam nang kaw na anhte makoi gyem lu na ga ai n rai. Anhte a yam nga ni hpe mung nang madu la nit dai; anhte a hkum hte lamu ga hta jan nna nang hpe jaw na hpa mung n ngam sai.

¹⁹Anhte hpe hkum si shangun mi! Lama mi sha gaw lajang ya mi! Anhte a sun hkauna ni hpe hkum jahkam da shangun mi. Lusha hte galai na matu anhte a hkum hte lamu ga ni hpe mari la mu. Anhte mahtang hkawhkam a mayam ni tai nna shi mung anhte a lamu ga ni hpe madu la lu na ra ai. Anhte ahkrung nga lu na matu, anhte hpe nai mam jaw mi, anhte a sun hkauna ni hta gat na nli mung jaw mi,” ngu nna tsun ma ai.

²⁰Yosep mahtang Egutu mung na lamu ga mahkra hpe hkawhkam wa a matu mari la kau wu ai. Hkuwa nachying laja nga ai majaw, Egutu masha ni tinang nang a lamu ga ni hpe shanawng dut kau ra ma ai rai nna, dai gaw hkawhkam wa a lamu ga hkrai tai mat malu ai.

²¹Yosep gaw amyu masha ni hpe Egutu mung a jahtum maga mi de na ni hpe kaga maga mi de du hkra mayam amu ni hpe galaw shangun wu ai.

²²Hkinjawng ni madu ai lamu ga hpe chyu sha, shi n mari wu ai. Dai gaw shanhte nga na matu hkawhkam wa ahkang jaw da wu ai majaw shanhte a lamu ga ni hpe n dut ra ma ai; hpa majaw nga yang, hkawhkam wa shanhte hpe karum gumhpraw jaw da nga ai.

²³Yosep gaw mung masha ni hpe, “Yu mu, hkawhkam wa a matu nanhte hte nanhte a lamu ga ni hpe ya ngai mari la ni ai. Ndai gaw nanhte a sun hkauna ni hta gat hkai na nanhte a matu nli tum ni rai nga ai.

²⁴Nsi naisi shu la ai aten hta htam manga kaw na htam mi gaw hkawhkam wa hpe nanhte sak jaw lu na rai myit dai. Ngam ai hpe chyawm gaw hpang e gat na nli a matu mung, nanhte hte nanhte a dinghku masha ni a matu mung, lusha rai nga myit ga, nanhte lang lu na myit dai,” ngu nna tsun wu ai.

²⁵Shanhte mung, “Anhte a asak hpe nang hkye la ya nit dai. Madu e, nang gaw anhte hpe mung matsan yu dum la nit dai. Dai rai nna hkawhkam wa a mayam anhte tai na saga ai,” ngu nna htan ma ai.

²⁶Dai re ai majaw, nsi naisi shu la ai htam manga na htam mi hpe hkawhkam wa madu la u ga, nga nna Yosep gaw Egutu mung a matu tara htuk shapraw da wu ai. Dai tara gaw dai ni du hkra n hten n run ai sha naw grin nga ai. Hkinjawng ni a lamu ga chyu sha hkawhkam wa madu ai lamu ga n tai nga ai.

²⁷Israela amyu masha ni gaw Egutu mung Goshen mung hta shanu nga nna lu su ngamu ngamai wa ma ai hte shanhte hta kashu kasha law law mayat maya wa ma ai.

²⁸Yaku gaw Egutu mung e shi sanit ning sa shanu nga ai hte shi a asak latsa e mali shi sanit ning du hkra hkrung nga lu wu ai.

²⁹Yaku gaw si wa na nhtoi ni wa jang, shi a kasha Yosep hpe shaga la nhtawm shi hpe, “Na a lata nye a magyi lapran hta shawn bang nna ngai hpe Egutu mung e n lup makoi da na matu dagam shaka u.

³⁰Nye a kaji kawa ni hpe makoi ai shara hta lup makoi na hpe ngai ra sharawng nngai; dai re ai majaw, Egutu mung kaw nna ngai hpe hpai lung wa nhtawm shanhte hpe lup ai shara hta ngai hpe lup makoi da mi,” ngu nna htet da wu ai. Yosep mung, “Nang htet ai hte maren, ngai galaw na nngai,” ngu nna tsun wu ai.

³¹Yaku gaw, “Nang galaw na rai yang dagam u,” ngu nna tsun wu yang, Yosep mung dagam shaka wu ai rai nna Yaku gaw shi a yup ku ntsa e chyeju shakawn wu ai.