Read Jinghpaw Common Language Bible 2009 NINGPAWT NINGHPANG 48 Bible Online

NINGPAWT NINGHPANG 48 - Jinghpaw Common Language Bible 2009 bible

NINGPAWT NINGHPANG 48

¹Dai hpang kade n na yang, shi a kawa machyi nga ai hpe Yosep na wu ai. Dai rai nna shi a kasha Manashe hte Ehprim yan hpe woi let Yaku hte wa hkrum na matu sa mat wa ma ai.

²Yaku gaw shi a kasha Yosep shi hpe sa hkrum ai lam hpe na wu yang, n-gun da ting la nna yup ku hta rawt dung wu ai.

³Yaku gaw Yosep hpe, “Chyahtum Chyalai N-gun Rawng Ai Karai Kasang gaw Hkanan mung Luza mare e ngai kaw dan pru nna shaman ya ni ai.

⁴Shi gaw ngai hpe, “Kashu kasha law law jaw na we ai; shing rai na a amyu matu ni amyu baw law law tai wa na mara ai; na a amyu matu ni htani htana madu nga lu na matu ndai mungdan hpe ngai jaw na de ai,’” ngu nna tsun wu ai.

⁵Yaku mahtang matut nna, “Yosep e, Egutu mung ndai yang e, ngai garai n du yang na a matu shangai wa sai shadang sha lahkawng hpe ngai madu nga nngai; Ehprim yan Manashe gaw grau nna nye a kasha Rubin yan Simun zawn rai ma ai.

⁶Nang hta shadang sha ni naw nga ai rai yang, shanhte a matu n myit ya ra na sai. Dai ni gaw Ehprim hte Manashe yan hkam la lu ai sali wunli a jaw e sha lu na mara ai.

⁷Ndai lam hpe na nnu Rahkela a majaw ngai galaw nga nngai. Mesopotamia mung kaw nna ngai bai nhtang wa ai shaloi, Ehprat mare hte nau n tsan ai Hkanan mung hta shi si mat nna ngai hpe yawn hkyen kaba jahkrum nu ai. Dai rai nna Ehprat de sa wa ai lam makau e shi hpe ngai lup makoi se ai,” ngu nna tsun wu ai. (Ehprat hpe ya aten e Betlehem ngu ai re.)

⁸Yaku gaw Yosep a shadang sha yan hpe mu wu ai shaloi, “Ndai ma yan gaw kadai dai rai nga ma ta?,” ngu nna san wu ai.

⁹Yosep chyawm gaw, “Ndai yan gaw Egutu mung e Karai Kasang ngai hpe jaw ai shadang sha yan rai nga ma ai,” ngu nna htan wu ai. Yaku mung, “Shan hpe ngai hpang de sit wa shangun u; shan hpe ngai shaman ya na nngai,” ngu nna tsun wu ai.

¹⁰Yaku gaw asak kaba nu ai majaw myi amam nna, atsawm sha n mu lu wu ai. Yosep mahtang ma yan hpe shi hpang de woi sa ya ai majaw shi shan hpe ahpum let pup wu ai.

¹¹Yaku gaw Yosep hpe, “Nang hpe bai mu lu na matu ngai galoi mung n myit ni ai; ya chyawm gaw na a kasha yan hpe pyi Karai Kasang ngai hpe mu shangun ni ai,” ngu nna tsun wu ai.

¹²Dai hpang, Yosep gaw shan hpe Yaku a lahpyen kaw na shaw la nhtawm shi a man e ga du hkra gum dagup shangun wu ai.

¹³Yosep gaw Yaku a pai maga de Ehprim, Manashe hpe hkra maga de tawn da ya wu ai.

¹⁴Rai ti mung, Yaku mahtang shi a lata hpe kashai kau nna shi a hkra lata hpe asak kaji ai Ehprim a baw ntsa e mara tawn wu ai; shi a pai lata hpe chyawm gaw grau kaba ai Manashe a baw ntsa e mara ya wu ai.

¹⁵Dai hpang shi gaw Yosep hpe shaman ya wu ai: “Nye a kaji kawa ni rai nga ai Abraham hte Isak daw jau ai Karai Kasang gaw ndai ma yan hpe shaman ya u ga law! Ngai hpe lam woi nga ai Karai Kasang gaw ndai yan hpe dai ni jang shaman ya u ga law!

¹⁶Machyi shoichyum ai yawng hta na ngai hpe hkye mawai la sai lamu kasa gaw shan hpe shaman ya u ga law! Nye a mying hte mung, nye a kaji Abraham hte nye wa Isak yan a amying hte mung, ndai ma yan matut nna hkrung nga mu ga law! Shan hta kashu kasha law law mayat maya wa nna amyu matu law law gumja gumhpra rai wa manu ga law!”

¹⁷Kawa mahtang Ehprim a baw ntsa e shi a hkra lata mara tawn ai hpe Yosep mu nna myit n pyaw wu ai; kawa a lata hpe Ehprim a baw kaw na Manashe a baw de htawt mara ya na matu pawn ya wu ai.

¹⁸Shi gaw kawa hpe, “Wa e, dai hku n rai nga ai; ndai ma mahtang shadang sha alat rai nga ai; na a hkra lata shi a baw ntsa e mara ya u,” ngu nna tsun wu ai.

¹⁹Shi a kawa chyawm gaw n hkraw ai hte, “Ngai chye nngai, ngai sha e, ngai chye nngai; Manashe amyu matu ni mung galu kaba ai amyu ni tai na mara ai. Rai ti mung, shi a kanau wa mahtang shi hta grau kaba na ra ai rai nna shi a amyu matu ni amyu baw law law tai wa na mara ai,” ngu nna tsun wu ai.

²⁰Dai rai nna shi shan hpe dai shani jang shaman ya nhtawm, “Israela amyu masha ni shaman ga tsun ai shaloi, shanhte gaw nan a mying hpe gang na mara ai. Shanhte gaw, ‘Karai Kasang gaw Ehprim yan Manashe hpe zawn shatai nga u ga,’” ngu nna tsun na mara ai. Ndai lam hku nna Yaku gaw Manashe a shawng e Ehprim hpe tawn da wu ai.

²¹Dai hpang Yaku gaw Yosep hpe, “Nang mu ai hte maren ngai gaw si wa na chyu sha rai ni ai, rai ti mung Karai Kasang gaw nanhte hte rau nga nga nna nanhte a kaji kawa ni nga ai mung de bai woi wa na ra ai.

²²Nye a nhtu, ndan hte Amori masha ni kaw na lu la ai dai namhpun kaja ai Shehkem hpe ngai jaw na nngai; dai gaw na nhpu nnau ni a matu n rai; na a matu san san rai nga ai,” ngu nna tsun wu ai.