Read Jinghpaw Common Language Bible 2009 NINGPAWT NINGHPANG 50 Bible Online

NINGPAWT NINGHPANG 50 - Jinghpaw Common Language Bible 2009 bible

NINGPAWT NINGHPANG 50

¹Yosep gaw shi a kawa hpe ahpum nna hkrap let shi a myi man hpe pup wu ai.

²Dai hpang Yosep gaw shi a kawa a hkum tsawp n yat manam mat hkra tsi lajang da na matu hkang da wu ai.

³Shawoi na zawn tsi lajang da na matu nhtoi mali shi ya aten la ra nga ai. Egutu masha ni mung shi a majaw sanit shi ya tup sharung shayawt nga ma ai.

⁴Dai sharung shayawt ai nhtoi lai jang, Yosep gaw hkawhkam wa a du salang ni hpe shaga la nna, “Chyeju hte ndai shiga hkawhkam wa hpang de shana ya mi:

⁵‘Nye wa si wa mahka e Hkanan mung hta shi lajang da sai lup hta shi hpe lup makoi na matu, ngai hpe ga sadi hte dagam da shangun ni ai. Dai re ai majaw chyeju hte nye wa hpe lup makoi na matu ngai hpe wa shangun mi. Dai hpang ngai bai wa na nngai da,’” ngu nna tsun ya mi ngu wu ai.

⁶Hkawhkam wa gaw, “Nang galaw na ngu ga sadi jaw da nit dai hte maren na nwa hpe wa lup makoi su,” ngu nna htan wu ai.

⁷Dai rai nna Yosep gaw shi a kawa hpe lup makoi na matu lung wa wu ai. Hkawhkam wa a du salang ni yawng mung shi a hkaw na arawng aya kaba lu ai masha ni hte Egutu mung na ningbaw ni yawng mung Yosep hte rau hkan lung wa ma ai.

⁸Shi a dinghku, shi a kahpu kanau ni hte shi kawa a dinghku na ngam nga ai ni yawng mung shi hte rau lung wa ma ai. Shanhte a ma kaji ni, sagu, bainam, dumsu hpung ni hpe sha Goshen ginwang kaw tawn da ma ai.

⁹Gumra leng ni hta hkan ai masha ni hte gumra jawn ai ni mung shi hte rau lung wa ma ai rai nna, dai gaw grai law ai wunawng wuwa rai nga ai.

¹⁰Yawdan hka a sinpraw hkran na Atad a chyarang pa e shanhte du shang wa ma yang, shanhte gaw aten galu wa mi ja ja sharung shayawt nga ma ai. Yosep mung yawn hkyen poi hpe sanit ya tup galaw wu ai.

¹¹Atad a chyarang pa e dai masha ni hkrap ngu hkrap ngoi nga ma ai hpe Hkanan masha ni mu ma ai shaloi shanhte gaw, “Egutu masha ni a sharung shayawt ai poi gaw ja ja kaba nga malu hka!,” ngu nna tsun ma ai. Dai rai nna shara dai hpe Abela Mizraim ngu nna shamying ma ai.

¹²Yaku a shadang sha ni mung shi hkang da nu ai hte maren galaw ya mu ai.

¹³Shanhte gaw shi a hkum tsawp hpe Hkanan mung de hpai wa nhtawm lup wa shatai na nga Heti masha Ehpron kaw na Abraham mari la ai dai Mamre a sinpraw maga de nga ai Makhpela sun na ginlawng hku hta lup makoi bang da ma ai.

¹⁴Yosep gaw shi a kawa hpe lup makoi da ngut jang, shi hte shi a kahpu kanau ni mung, makoi mayang poi hta shi hte rau hkan lawm nang ai ni yawng mung, Egutu mung de bai nhtang yu wa ma ai.

¹⁵Shanhte a kawa si mat ai hpang Yosep a kahpu kanau ni gaw, “Yosep gaw anhte hpe n ju n dawng ai myit naw rawng nna anhte shi hpe machyi shoichyum jahkrum ai lam a majaw anhte hpe bai tai na mi she yaw shada yang gara hku rai na ta?,” ngu nna san hkat ma ai.

¹⁶Dai rai nna shanhte gaw Yosep hpang de shiga shana dat ma ai: “Anhte a kawa garai n si yang,

¹⁷shi anhte hpe, ‘Shanhte nang hpe shut kau mu ai shaloi, na nhpu nnau ni a shut kau ai n hkru ai amu hpe chyeju hte mara dat ya u,’ ngu nna nang hpe hpyi nem na matu tsun da mi ai. Dai rai nna na nwa a Karai Kasang a shangun ma anhte a galaw shut kau sai mara hpe chyeju hte mara dat ya mi law.” Yosep gaw dai shiga hpe lu la ai shaloi hkrap wu ai.

¹⁸Dai hpang shi a kahpu kanau ni nan shi a man de sa nna dingnyawm gum dagup let, “Anhte gaw na a mayam ni zawn na a man e nga nga ga ai,” ngu nna tsun ma ai.

¹⁹Rai ti mung, Yosep gaw shanhte hpe, “Hkum hkrit myit; ngai gaw nye a hkum hpe Karai Kasang a shara hta n tawn da lu nngai.

²⁰Nanhte ngai hpe n hkru ai hku gaw maw manit dai; rai ti mung byin lai wa sai lam ni a majaw dai ni du hkra masha law law a asak hpe jahkrung ya na matu Karai Kasang dai hpe mai kaja ai lam hku galaw nu ai.

²¹Nanhte hkrit tsang shara hpa mung n nga ra na myit dai. Nanhte hte nanhte a ma kaji ni hpe ngai lanu lahku nga na made ai,” ngu nna tsun wu ai. Shanhte hpe kam wa hkra tsun ai gaw shanhte hpe hkra shangun nga ai.

²²Yosep gaw kawa a dinghku masha ni hte rau Egutu mung e matut shanu nga ma ai. Shi si ai aten hta shi a asak latsa e shi ning rai nga ai.

²³Shi gaw Ehprim a kasha ni hte kashu du hkra mu kau da nu ai. Manashe a shadang sha Mahkira a kasha ni hpe mung shi pawn da lu nu ai.

²⁴Shi gaw shi a kahpu kanau ni hpe, “Ngai si wa na ni ai; rai ti mung Karai Kasang gaw nanhte hpe teng teng lanu lahku nhtawm ndai mung kaw nna woi pru wa let, Abraham, Isak hte Yaku ni hpe dagam let ga sadi jaw da ai mung de nanhte hpe woi wa na marin dai,” ngu nna tsun wu ai.

²⁵Dai hpang Yosep gaw shi a amyu masha ni hpe dagam shaka na matu lajin wu ai. Shi gaw, “Ngai hpe ga sadi jaw mi, Karai Kasang nanhte hpe dai mung de woi wa ai shaloi nye a hkum tsawp hpe nanhte hte rau la lung wa na rai myit dai,” ngu nna tsun wu ai.

²⁶Dai rai nna Yosep gaw asak latsa e shi ning hta Egutu mung e si mat wa nu ai. Shanhte gaw shi a hkum tsawp hpe lajang nhtawm da-u hta bang da ma ai.