Read Jinghpaw Common Language Bible 2009 NINGPAWT NINGHPANG 8 Bible Online

NINGPAWT NINGHPANG 8 - Jinghpaw Common Language Bible 2009 bible

NINGPAWT NINGHPANG 8

¹Karai Kasang gaw Noa hte shi hte rau sanghpaw li hta rawng nga ai yam nga ni yawng hpe malap kau wu ai n rai; shi gaw nbung wa shangun dat ai rai nna, dai hka gaw yawm hpang wa nga ai.

²Aga a kata de nga ai hka hpungtun ni hte sumsing lamu na sha-u chyinghka ni pat mat nga ai. Marang mung hpawng mat ai hte,

³dai hka mung nhtoi 150 ya rai jang, angwi ngwi sha yawm mat wa nga ai.

⁴Dai sanghpaw li mung shata sanit a nhtoi shi sanit ya shani e, Ararat ngu ai bum mayan ntsa e mara nga ai.

⁵Dai hka gaw shata shi du hkra yawm hkrai yawm wa nna shata shi a praw langai ya shani hta bum pungding ni dawng pru wa nga ai.

⁶Ya nhtoi mali shi ya lai jang, Noa gaw hkuwawt chyinghka hpe hpaw nna uhka hpe dat dat wu ai.

⁷Dai uhka gaw ga ntsa e hka tsep kawp hkyet mat ai aten du hkra, bai n nhtang wa ai sha, pyen kahkrang hkawm nga ai.

⁸Shing rai nga yang, Noa gaw hka yawm mat wa sai hpe chye lu hkra nga, hkrudu hpe mung dat dat yu wu ai;

⁹rai ti mung, hka gaw ga ntsa ting hta naw ing nga ai rai nna, hkrudu shi dung sa na shara n mu wu ai. Dai u mung sanghpaw li de bai nhtang wa ai. Noa mung lata ladawn nna hkrudu hpe hkap jum la nhtawm sanghpaw li kata de jashawn la wu ai.

¹⁰Dai kaw nna nhtoi sanit ya du hkra, shi naw la nhtawm hkrudu hpe bai dat dat wu ai.

¹¹Dai u gaw tsanlun lap katsing hpe di makrang nna shana de maga, shi kaw bai nhtang wa wu ai. Dai rai nna hka yawm mat sai hpe Noa chye wu ai.

¹²Dai hpang sanit ya du hkra shi bai la yu nhtawm, hkrudu hpe kalang mi bai dat dat wu yang, dai lang hta hkrudu bai n wa mat nga sai.

¹³Noa a asak 601 ning du ai shawng shata a praw langai ya shani hta, dai hka hpungtun gaw hkyet mat sai. Noa mung sanghpaw li magap hpaw nna grup yin de mada yu wu yang, aga gaw hkraw wa nga ai hpe mu wu ai.

¹⁴Bai shata lahkawng a hkun sanit ya shani e, ginding aga gaw atsai sha hkraw mat nga sai.

¹⁵Karai Kasang gaw Noa hpe, “Nang hte na a madu jan mung,

¹⁶na a shadang sha ni hte shanhte a madu jan ni mung, dai sanghpaw li kaw nna pru wa mu.

¹⁷Ntsa malen u ni yawng hte yam nga ni hpe mung nang hte rau shapraw u; shing rai dai ni gaw ginding aga ting hta chyam bra wa nna law htam mayat maya wa mu ga,” ngu nna tsun wu ai.

¹⁸Dai rai nna Noa gaw shi a madu jan hte mung, shi a shadang sha ni hte shanhte a madu jan ni hte mung sanghpaw li kaw na pru wa ma ai.

¹⁹Yam nga ni hte ntsa malen u ni yawng mung tinang a amyu hte tinang dai sanghpaw li hta na pru wa nga ma ai.

²⁰Noa gaw dai MADU a matu tawn hkungri galaw nhtawm, san seng ai yam nga hte ntsa malen u amyu shagu hte hpe la nna tawn hkungri ntsa e, hkum dingnawng wan nat hkungga nawng jau wu ai.

²¹Dai hkungga a manam pyaw ai sangau gaw dai MADU hpe awng sharawng shangun nga ai rai nna dai MADU gaw, “Shinggyim masha e galaw ai amu a majaw, ginding aga hpe ngai galoi mung dagam kau na ni ai n rai; shi a myit mang ai lam ni gaw shi naw kaji nga ai aten kaw nna n shawp nga ai hpe ngai chye nngai. Ndai lang ngai galaw kau ni ai zawn asak rawng ai hkrung mahkrung ni yawng hpe ngai galoi mung bai jahten na ni ai n rai.

²²Ginding aga grin nga dingsa, nli gat ai aten hte shu la ai aten, anga nga na ra ai. Bai kashung ai hte kahtet ai, nlum ta hte nshung ta, shani hte shana mung tut nawng agrin nga na ra ai,” nga nna shi a kraw e tsun nga ai.