Read Jinghpaw Common Language Bible 2009 NINGPAWT NINGHPANG 9 Bible Online

NINGPAWT NINGHPANG 9 - Jinghpaw Common Language Bible 2009 bible

NINGPAWT NINGHPANG 9

¹Karai Kasang gaw Noa hte shi a shadang sha ni hpe shaman ya nna, “Kashu kasha law law shaprat mu, shaloi nanhte a aru arat ni mungkan ting hta shanu nga lu na mara ai.

²Dusat yam nga ni mung, ntsa malen u ni hte hka kata na nga ni yawng mung nang hpe hkrit hkungga na mara ai. Dai ni yawng hpe na a lata hta ap da ya nga nngai.

³Ya chyawm gaw, dai ni hpe mung, tsit lali ai namlaw namlap ni hpe mung nanhte sha lu na myit dai; nanhte a matu lusha tai u ga she, dai yawng mayawng nanhte hpe ngai jaw da nngai.

⁴Lam langai mi gaw asai naw rawng ai ashan hpe nanhte sha lu na myit dai n rai; dai asak gaw asai hta rawng nga ai majaw ndai lam hpe ngai hkum da nngai.

⁵Marai langai ngai masha a asak hpe la kau ai rai yang, shi gaw ari jaw ai hkrum na rai wu ai. Shinggyim masha a asak hpe hkra ai dusat yam nga hpe mung si ari ngai jaw na we ai.

⁶Karai Kasang gaw shinggyim masha hpe shi hte maren bung hkra hpan da nga sai, dai rai nna masha langai ngai hpe sat ai wa kadai rai ti mung shi hkum hpe marai langai ngai e sat kau ai hkrum nga u ga.

⁷“Nanhte gaw kashu kasha law law shaprat lu na rai myit dai, shaloi nanhte a aru arat ni mungkan ga ting hta shanu nga lu na mara ai,” ngu nna tsun wu ai.

⁸Karai Kasang gaw Noa hte shi a shadang sha ni hpe,

⁹“Ya chyawm gaw nang hte na a ru arat ni hte mung,

¹⁰hkrung mahkrung yawng hte mung, ntsa malen u ni hte dusat yam nga ni yawng hte nang hte rau sanghpaw li kaw na pru wa ai amyu shagu hte hte mung, nye a ga shaka hpe tawn da nga nngai.

¹¹Ndai ga ni hte hpawn nye a ga shaka hpe nanhte hte ngai tawn nngai; Dai gaw sha-u a majaw hkrung mahkrung ni yawng jahten kau ai galoi mung bai n hkrum na hte sha-u hte ginding aga hpe galoi mung bai n jahten kau na ngu nna ngai ga sadi jaw ai lam rai nga ai.

¹²Nanhte hte mung, hkrung mahkrung yawng hte mung, ngai tawn da nga ai dai htani htana hte seng ai ga shaka a kumla gaw,

¹³sumwi ni hta nye a n-goila tum hpe ngai tawn da nga nngai. Dai gaw mungkan ga hte tawn da ai nye a ga shaka kumla tai na ra ai.

¹⁴Lamu mung shangun nna dai n-goila tum gaw sumwi hta dan pru ai shaloi,

¹⁵nanhte hte dusat yam nga ni yawng hpe sha-u hte hkrung mahkrung ni yawng hpe galoi mung bai n jahten kau na ngu ai, nye a ga sadi hpe ngai dum nga na nngai.

¹⁶Sumwi ni hta dai n-goila tum dan pru wa ai shaloi, dai hpe ngai yu nna, ngai hte ginding aga ntsa e shanu nga ai hkrung mahkrung ni yawng a lapran e tawn da ai dai htani htana hte seng ai ga shaka hpe dum nga na nngai.

¹⁷Dai gaw hkrung mahkrung mahkra hte ngai shaka tawn da ai ga sadi a kumla rai nga ai,” ngu nna tsun wu ai.

¹⁸Sanghpaw li na pru wa ai Noa a shadang sha ni gaw Shem, Ham hte Yahpet ni rai ma ai. (Ham mahtang Hkanan a kawa rai nga ai.)

¹⁹Ndai Noa a shadang sha ni masum hte gaw mungkan ga na amyu masha ni yawng a kaji kawa ni rai ma ai.

²⁰Noa gaw sun hkauna galaw sha ai wa rai nna, sabyi sun shawng hkai ai wa mung rai nga ai.

²¹Sabyi ntsin nkau mi hpe shi lu ngut ai hpang, shi nang nga ai rai nna hpun nba ni hpe raw kau nhtawm shi a sum hta shakrin taw nga ai.

²²Hkanan a kawa Ham gaw shi a kawa singgu krin rai nga ai hpe mu jang, shinggan de pru nhtawm shi a kahpu yan hpe sa tsun dan wu ai.

²³Dai hpang Shem hte Yahpet gaw hpun nba la nhtawm, tinang a lahpa ni hta mara da nga ma ai. Shan mung sum de htingnut sa wa nna kawa hpe magap ya mu ai; kawa a singgu krin hpe n mu lu u ga, shan a myi man hpe kaga maga de yawng da mu ai.

²⁴Noa gaw sabyi nang ai kaw na bran wa yang, shi a kasha kaji wa shi hpe kaning di nu ai hpe chye wu ai.

²⁵Shi gaw, “Hkanan gaw dagam dala hkrum u ga! Shi gaw shi a kahpu kanau ni kaw mayam tai mat nu ga.

²⁶Shem a Karai Kasang dai MADU hpe shakawn mu! Hkanan gaw Shem a mayam tai mat nu ga.

²⁷Karai Kasang gaw Yahpyet hpe maden shajat ya nu ga! Shi a aru arat ni Shem amyu bawsang ni hte rau shanu nga lu mu ga! Hkanan chyawm gaw Yahpet a mayam tai mat nu ga,” ngu nna tsun ai.

²⁸Noa chyawm gaw dai sha-u ing ai hpang, 350 ning du hkra naw hkrung nga nna,

²⁹shi a asak 950 ning hta si mat sai.