Read Jinghpaw Common Language Bible 2009 2 SAMUELA 1 Bible Online

2 SAMUELA 1 - Jinghpaw Common Language Bible 2009 bible

2 SAMUELA 1

¹Shawlu si mat ai hpang, Dawi gaw Amalek masha ni hpe gasat dang nna bai nhtang wa let Ziklag mare e lahkawng ya wa nga nga wu ai.

²Hpang shani e, shabrang langai mi gaw Shawlu a dap kaw na du wa nhtawm shi a bu hpun palawng ni gang je kau let shi a baw ntsa e ga nhpu hte bun nna yawn hkyen ai lam madun dan nga wu ai. Shaloi Dawi hpang de shi sa nna ga de dingnyawm dagup let hkungga jaw wu ai.

³Dawi gaw shi hpe, “Nang kanang kaw nna sa wa n ta?,” ngu nna san wu ai. Shi gaw, “Israela dap kaw nna hprawng sa wa nngai,” ngu nna htan wu ai.

⁴Dawi gaw, “Dai rai taw gaw, hpa byin ai lam, ngai hpe tsun dan yu e,” ngu nna tsun wu ai. Shi gaw, “Anhte a hpyen luksuk gaw majan pa kaw nna hprawng kagat jawng mat saga ai. Anhte a masha law law ni mung sat kau ai hkrum nga sai; Shawlu hte shi a kasha Yonahtan yan mung sat kau ai hkrum nga masai,” ngu nna tsun htang wu ai.

⁵Dawi gaw shi hpe, “Shawlu hte Yonahtan si mat sai hpe nang kaning rai chye n ta?,” ngu nna san wu ai.

⁶Dai shabrang wa chyawm gaw, “Gilaboa Bum ntsa e hpa baw mi byin sai kun, ngu du hkawm yu yang, Shawlu gaw shi a nri hta shanat nga ai shaloi hpyen maga de na hpyen leng ni hte gumra jawn ai ni shi hpang de shani sa wa nga ma ai hpe ngai mu nngai.

⁷Dai hpang grup grup de kayin mada dat yu wu yang, shi gaw ngai hpe mu nna shaga dat wu ai. Shaloi ngai mung, ‘Madu e, nga nga nngai!,’ ngu nna htan we ai.

⁸Shi gaw ngai hpe nang kadai rai nga n ta?, ngu nna san wu ai; ngai gaw Amalek masha rai nga nngai, ngu nna htan we ai.

⁹Dai hpang shi gaw, ‘Nang de sa wa rit, ngai hpe sat kau e! Ngai gaw ningma kaba hte machyi hkrum nga nngai rai nna ngai ya si na sha rai nga ni ai,’ ngu nna tsun wu ai.

¹⁰Dai rai nna shi kadawng taw mat ai hte rau, shi si mat na chyalu sha rai nga ai hpe ngai chye ai majaw shi kaw ngai lung wa nhtawm sat kau da nngai. Dai hpang shi a baw na janmau hte shi a lahpum na lahkawn hpe ngai la nhtawm nang madu hpang de ya ngai la sa ring ngai,” ngu nna tsun wu ai.

¹¹Dawi gaw yawn hkyen ai hte shi a palawng ni hpe gang je kau nga ai rai nna shi a masha ni yawng mung dai hte maren galaw ma ai.

¹²Shanhte gaw Shawlu hte Yonahtan yan wa mung, Israela ni mung, dai MADU a amyu masha ni mung majan pa e law law wa sat kau ai hkrum nga ma ai majaw shana de du hkra yawn hkyen ai hte sharung shayawt let lusha gam nga ma ai.

¹³Dawi gaw shi hpang de shiga la wa ya ai shabrang wa hpe, “Nang kanang na rai ndai da aw?,” ngu nna san wu ai. Shi chyawm gaw, “Ngai gaw Amalek masha langai mi rai nngai; rai ti mung na a mung e ngai nga nga nngai,” ngu nna htan wu ai.

¹⁴Dawi gaw shi hpe, “Dai MADU lata san da sai hkawhkam wa hpe nang kaning di sat gwi nga n ta?,” ngu nna san wu ai.

¹⁵Dawi gaw shi a masha langai mi hpe shaga la nna, “Shi hpe sat kau su,” ngu nna tsun wu ai. Dai wa mung Amalek masha wa hpe sat kau wu ai.

¹⁶Dawi gaw dai Amalek masha wa hpe, “Ndai amu nang nan galaw shapraw dat nga ndai. Dai MADU gaw hkawhkam galaw na matu lata san da sai wa hpe nang sat kau sai lam yin la nit dai majaw nang hkum nan daw dan ai hkrum nga nit dai,” ngu nna tsun wu ai.

¹⁷Dawi gaw Shawlu hte shi a kasha Yonahtan a matu ndai sharung shayawt ga hte mahkawn mangoi nhtawm,

¹⁸Yuda amyu masha ni hpe sharin ya na matu hkang da wu ai. (Dai hpe Yasha a Laika hta ka matsing da nga ai.)

¹⁹“Israela a kawng ni hta anhte a ningbaw ni si taw nga ma ai! Share shagan htum ai anhte a hpyenla ni kadawng mat ma sahka!

²⁰Dai ashi hpe Gat mare hkan hkum tsun ndau mu; Ashkelon mare lam hkan e hkum kajai myit. Hpilisti numsha ni hpe hkum kabu shangun myit; tara maigan masha ni a shayi sha ni hpe hkum gara shangun nga myit.

²¹Gilaboa kawng ni hta marang mung numri mung n hkrat mat nu ga; De a yi hkauna ni gaw tut nawng e nsi naisi n shapraw ya nu ga! Magrau grang ai wa a ninggang ni gaw dai yang e n sawn nsang di kabai kau ai hkrum nga nu hka! Shawlu a ninggang gaw sau hte galoi mung n arut da lu na sai.

²²“Yonahtan a ndan gaw si shangun lu nga ai, Shawlu a nhtu mung matsan chye dum ai n rai; chyalai n-gun rawng ai ni hpe adup kadawng kau nhtawm, gumlau hpyen ni hpe sat kau nga ai.

²³“Shawlu hte Yonahtan grai mau na zawn hkrung nga dingsa tsaw ra nja; si wa ai mung ndaw nhka, galang ni hta grau laram, hkanghkyi ni hta grau ningtsam rawng nga ai.

²⁴“Israela numsha ni e, Shawlu a matu sharung shayawt nga mu! Shi gaw nanhte hpe hkyeng mang ai hpun palawng jahpun nna, aja lungseng ni hte nanhte hpe mawn sumli da manit dai.

²⁵“Magrau grang ai hpyenla ni kadawng taw mat masai; shanhte gaw majan pa e sat kau ai hkrum nga masai. Kawng ni hta Yonahtan si taw mat sahka!

²⁶“Ngai hpu Yonahtan e, na a majaw ngai yawn nga nngai; Nang gaw ngai hpe kade sha tsaw ra nga nit hka! Nang ngai hpe tsaw ra ai gaw kade sha mauhpa rai nga a hka! Dai gaw numsha ni a tsaw ra myit hta pyi grau nga a hka!

²⁷“Magrau grang ai hpyenla ni kadawng taw mat sahka! Shanhte a laknak arai ni hpe kabai kau da masai, dai ni gaw hpa asung mi n shang mat sai.”