Read Jinghpaw Common Language Bible 2009 2 SAMUELA 10 Bible Online

2 SAMUELA 10 - Jinghpaw Common Language Bible 2009 bible

2 SAMUELA 10

¹Ya aten ram ram na ai hpang, Amon Hkawhkam Nahat si mat nna shi a kasha Hanun hkawhkam tai wa sai.

²Hkawhkam Dawi gaw, “Shi a kawa ngai hpe chyeju jaw ai hte maren, kasha Hanun hpe mung sadi dung ai jinghku lai ngai shi hpe madun lu na rai nngai,” ngu nna tsun wu ai. Dai rai nna shi a matsan dum ai lam madun dan na matu kasa ni hpe Dawi shangun dat wu ai. Shanhte Amon mung de du sa wa ma yang,

³Amon ningbaw ni gaw hkawhkam wa hpe, “Nang hpe matsan dum ai lam madun dan na matu, ndai masha ni hpe Dawi shangun dat ai gaw, na nwa hpe shagrau sha-a nna galaw ai zawn nang myit nawn da wu ni? Kaja wa teng teng dai hku n rai law! Shanhte gaw anhte hpe gasat dang kau lu hkra nga, ndai mare hpe kin-yu yu na matu shi shanhte hpe ndai de shangun dat nga nu ai,” ngu nna tsun ma ai.

⁴Hanun gaw Dawi a kasa ni hpe rim la nna shanhte a nhka mun maga mi de na shangun kau ya nhtawm dangbau du hkra shanhte a hpun palawng ni hpe rep kau ya let shanhte hpe dat kau dat mu ai.

⁵Shanhte gaw dum nta de nhtang wa na matu grai kaya mat ma ai. Dawi mung dai mabyin lam hpe na ai shaloi, nanhte a nhka mun ni bai tu galu wa ai aten du hkra n nhtang wa ai sha Yerihko mare hta nga nga mu ngu nna htet dat wu ai.

⁶Amon masha ni gaw Dawi hpe shanhte a gumlau hpyen shatai kau nga masai hpe dum hprang wa ma yang, Berehoba hte Zoba mare na Suri hpyenla mun lahkawng, Toba mare na mun mi hkying lahkawng hte Mahka hkawhkam kaw na masha hkying mi saw la nga ma ai.

⁷Dawi gaw dai shiga hpe na jang, shanhte hpe ninghkap na nga Yoab hte hpyen luksuk mahkra hte hpe shangun dat wu ai.

⁸Dai Amon masha ni mahtang pru sa wa nhtawm shanhte a mare daju ngu na Raba mare chyinghka lam e shara la da nga ma ai; kaga masha ni ngu na Suri masha ni hte Toba hte Mahka a masha ni chyawm gaw pa ga de shara la shajang nga ma ai.

⁹Yoab gaw gumlau hpyen hpung ni shi hpe ashawng ahpang htim gasat na hkyen nga ai hpe mu jang, Israela hpyenla ni hta na kaja htum ai hpyenla ni lata la nhtawm Suri masha ni hte man hkrum rai shara la da shangun wu ai.

¹⁰Naw ngam nga ai shi a hpyen hpung ni hpe shi a kanau Abishai up hkang ai npu hta tawn da nhtawm Amon masha ni hte myi man hkrum re ai hku shara la da shangun wu ai.

¹¹Yoab gaw shi hpe, “Suri masha ni ngai hpe dang nga ma ai hpe nang mu jang ngai hpe sa karum la e; Amon masha ni nang hpe dang jang ngai nang hpe sa karum la na de ai.

¹²N-gun dat nna nden shaja da ting u! Anhte a amyu masha ni hte anhte a Karai Kasang a mare ni a matu anhte ja ja gasat ga. Dai MADU a myit ra sharawng ai hku tai wa u ga!,” ngu nna tsun wu ai.

¹³Yoab hte shi a masha ni shawng htim gasat na matu rawt lung wa ma yang, Suri masha ni hprawng mat wa ma ai.

¹⁴Suri masha ni kagat hprawng htaw mat wa ai hpe Amon masha ni mu jang, shanhte mung Abishai kaw na hprawng mat wa nhtawm mare de htingnut mat wa ma ai. Shaloi Amon masha ni hpe gasat nga ai kaw na Yoab nhtang mat wa nhtawm Yerusalem mare de wa mat wa ma ai.

¹⁵Israela amyu masha ni Suri masha ni hpe gasat kau masai lam hpe shanhte dum chye wa jang, shanhte a hpyen hpung ni yawng hpe shaga hpawng da ma ai.

¹⁶Hkawhkam Hadadeza gaw Uhprat hka nu a sinpraw maga de nga ai Suri masha ni hpe shaga dat wu ai rai nna Zoba Hkawhkam Hadadeza a hpyen luksuk hpe up hkang ai hpyen du Shobak a hkang dat ai ga hte maren Helam mare de shanhte sa mat wa ma ai.

¹⁷Dai shiga hpe Dawi na jang, Israela hpyen hpung ni hpe shinggyin la nhtawm, Yawdan hka rap nna Dawi hte man hkrum rai Suri masha ni shara la da nga ai Helem mare de rawt sa mat wa ma ai. Shing rai gasat gala ai lam hpang wa ai hte,

¹⁸Suri hpyen luksuk hpe Israela masha ni e gawt nhtang kau dat lu ma ai. Dawi hte shi a masha ni chyawm gaw Suri gumra leng gawt ai masha sanit tsa hte gumra jawn masha mun mali hte hpe sat kau ma ai. Gumra hpyen a up hkang du Shobak hpe mung shanhte hkala kau mu ai rai nna majan pa e shi si mat nga ai.

¹⁹Shaloi Hadadeza a up hkang ai npu hta taw nga ai hkawhkam ni mahtang Israela amyu masha ni a majaw shanhte sum mat ma ai hpe dum chye jang, shanhte hte ngwi pyaw sim sa lam galaw nhtawm shanhte a npu hta taw nga ma ai. Dai aten kaw nna Suri masha ni mahtang Amon masha ni hpe sa karum la na matu kachyi mi mung n gwi mat sai sha hkrit mat nga ma ai.