Read Jinghpaw Common Language Bible 2009 2 SAMUELA 11 Bible Online

2 SAMUELA 11 - Jinghpaw Common Language Bible 2009 bible

2 SAMUELA 11

¹Ya shaning galai nna hkawhkam ni majan gasat na ladu bai hkrum wa jang, Dawi gaw Yoab hte shi a du salang ni hte Israela hpyen luksuk ni hpe shangun dat wu ai rai nna Amon masha ni hpe dang kau nhtawm Raba mare hpe wang tawn da ma ai. Rai ti mung Dawi shi nan chyawm gaw Yerusalem mare e nga nga ai.

²Lani mi na shana de maga chyahkring mi myet nga nna yup la ai hpang, Dawi rawt wa nhtawm shi a hkawhkam hkaw numgaw de sa wa wu ai. Dai yang e shi kayin hkawm wu yang, yu u, numsha langai mi shi a nta e hka shin nga ai hpe mu dat wu ai. Dai numsha chyawm gaw ahpraw asam mung grai tsawm nga ai.

³Dai rai nna shi kadai rai nga ai hpe san shangun na nga, kasa langai mi hpe shangun dat wu ai; shaloi shi gaw Batsheba rai nga nna Eliam a shayi sha, Hiti masha Uria a madu jan rai nga ai hpe chye la wu ai.

⁴Dawi gaw shi hpe sa woi la na matu kasa ni hpe shangun dat wu ai; shanhte mung shi hpang de woi wa ya ma ai rai nna shi hte kanawn wu ai. (Shi mung htung hte maren num hking sa ngut ai hpang sha naw rai nna jasan jaseng da wu ai.) Dai hpang shi gaw nta de wa mat wa wu ai.

⁵Dai hpang shi hta na-um nasin hkum rai nga sai hpe chye jang, Dawi hpe tsun dan na matu shiga shana shangun dat wu ai.

⁶Shaloi Dawi gaw Yoab hpe shiga shana dat wu ai: “Hiti masha Uria hpe ngai hpang de sa shangun dat rit.” Dai rai nna Yoab mung shi hpe Dawi hpang de shangun dat ya wu ai.

⁷Ya Uria du jang, Yoab hte hpyen hpung ni kaja nga ma ai kun? Majan gasat gala ai gaw kaning hku rai nga a ta?,” ngu nna shi hpe hkap san wu ai.

⁸Dai hpang Dawi gaw Uria hpe, “Nta de wa nna loi hkring mi wa sa la su,” ngu nna tsun wu ai. Shing rai Uria pru mat wa jang Dawi mung shi a nta de kumhpa langai sa jaw shangun dat wu ai.

⁹Rai ti mung, Uria mahtang nta de n wa ai sha, hkawhkam wa a sin langa ni hte rau hkawhkam hkaw chyinghka lam e yup nga wu ai.

¹⁰Uria nta de n wa ai shiga hpe Dawi na jang, shi gaw Uria hpe, “Nang gaw aten na na hkawm nhtawm ya she nhtang wa ai mi, nta de hpa majaw n wa mayu nga n ni?,” ngu nna san wu ai.

¹¹Uria mahtang, “Israela hte Yuda masha ni mahtang majan pa hkan e she nga nga ma ai. Shanhte hte rau Ga Shaka Sumpu mung nga nga ai; nye a up hkang du Yoab hte shi a du salang ni mung pa hkan e she dap jung tawn da nga ma ai mi, ngai kaning rai nta de wa nna lu lu sha sha rai let, nye a madu jan hte yup lu na rai ta? Dai zawn re ai amu hpe galoi mung ngai n galaw na rai nga nngai gaw chyoi pra ai mying hta dai lam yawng hpe ngai dagam nngai!,” ngu htan wu ai.

¹²Dai rai nna Dawi gaw, “Dai ni gaw ndai yang e naw nga nga u; hpawt ni mahtang she ngai nang hpe nhtang shangun dat de ga,” ngu nna tsun wu ai. Uria gaw dai shani mung, hpang shani mung Yerusalem mare e nga nga wu ai.

¹³Dawi gaw shi hpe shana shat jaw shanang na matu saw shaga dat wu ai. Rai ti mung dai shana e Uria nta de n wa ai sha, hkawhkam hkaw na sin langa ni a gawk hta nba hpun let[1] yup nga wu ai.

¹⁴Hpang jahpawt e, Dawi gaw Yoab hpang de laika langai ka dat nhtawm Uria a lata hta dai hpe shagun dat ya wu ai.

¹⁵Dawi gaw, “Gasat gala lam grau nna laja htum ai ai shara ngu na shawng lam de Uria hpe tawn da u; shing rai sat kau ai hkrum mat hkra shawng de shanang sa shangun nhtawm hpyen masha ni hpe chyawm gaw hpang de htingnut mat wa shangun u,” ngu nna ka dat wu ai.

¹⁶Yoab gaw mare hpe wang da nga yang, shi chye da sai dai n-gun ja ai gumlau hpyen ni nga ai shara langai mi de Uria hpe shang gasat shangun dat wu ai.

¹⁷Gumlau hpyen hpung ni dai mare kaw nna pru sa wa nhtawm Yoab a hpung ni hpe gasat ma yang, Dawi a du salang nkau mi sat kau ai hkrum nga ma ai; Uria mung dai majan hta si lawm mat nga sai.

¹⁸Dai hpang Yoab gaw Dawi hpang de majan shiga shana dat wu ai rai nna,

¹⁹Yoab mung dai kasa wa hpe, “Majan shiga a lam yawng mayawng hkawhkam wa hpe nang tsun shana dan ngut jang,

²⁰hkawhkam wa masin pawt nna, ‘Shanhte hpe gasat myit yang, hpa majaw dai mare de shade de wa kahtep sa wa myit ta? Bunghku ntsa kaw nna shanhte ndan gap jung dat na mu ai hpe nanhte n dum chye myit ni?

²¹Gidon a kasha Abimelek kaning rai sat kau hkrum nga ai hpe nanhte n dum manit ni? Dai gaw Htebeza mare hta num langai mi htumrin nlung langai la nhtawm bunghku ntsa kaw nna kabai jahkrat nna shi hpe sat kau nga ai. Dai rai yang, nanhte gaw hpa majaw bunghku de shade de wa kahtep sa myit ni?,’ ngu nna san mai nga ai. Dai re ai majaw hkawhkam wa nang hpe dai lam san wa ai rai yang, shi hpe, ‘Na a du Uria mung sat kau hkrum nga nu ai,’” ngu nna tsun dan u ngu wu ai.

²²Shing rai dai kasa wa mung Dawi kaw sa nhtawm Yoab shi hpe hkang dat ai ga hte maren tsun dan wu ai.

²³Shi gaw, “Anhte a gumlau hpyen ni mahtang anhte hta grau nna n-gun ja nga ma ai rai nna pa hta e anhte hpe htim gasat na nga, mare kaw na pru sa wa ma ai; rai ti mung shanhte hpe mare chyinghka du hkra bai gawt nhtang kau lu ga ai.

²⁴Shanhte gaw anhte hpe bunghku ntsa kaw nna ndan ni hte hkap gap nga ma ai majaw Madu hkawhkam a du salang nkau mi sat kau ai hkrum nga ga ai; na a du Uria mung sat kau ai hkrum mat nu ai,” ngu nna tsun dan wu ai.

²⁵Dawi gaw dai kasa wa hpe, “Yoab hpe n-gun shakang nhtawm myit gawng n run na lam shi hpe tsun u; majan e kadai si na hpe kadai mung n lu tsun nga ai. Mare dai hpe tsam mari di gasat anin nna dai hpe madu la na lam shi hpe tsun u,” ngu nna tsun wu ai.

²⁶Batsheba gaw shi a madu wa sat kau hkrum sai lam hpe na jang, shi madu wa a majaw sharung shayawt nga wu ai.

²⁷Batsheba sharung shayawt ai ladaw lai jang, Dawi gaw masha shangun dat nna hkawhkam hkaw de shi hpe shaga la wu ai. Shi mung Dawi a madu jan tai ai hte shi a matu shadang sha langai shangai ya wu ai. Rai ti mung dai MADU chyawm gaw Dawi galaw kau nu ai amu hpe n yu sharawng nga wu ai.