Read Jinghpaw Common Language Bible 2009 2 SAMUELA 12 Bible Online

2 SAMUELA 12 - Jinghpaw Common Language Bible 2009 bible

2 SAMUELA 12

¹Dai MADU gaw myihtoi Nahtan hpe Dawi hpang de shangun dat wu ai. Nahtan mung shi kaw sa nhtawm, “Mare langai mi hta masha lahkawng nga nga ma ai; langai mi gaw sut su nna, kaga langai mi mahtang matsan mayan re ai wa rai nga ai.

²Dai sut su ai wa gaw sagu dumsu law law lu nga yang,

³matsan mayan re ai wa chyawm gaw shi mari la ai sagu kasha langai sha lu nga ai. Shi gaw dai sagu hpe bau rem nna dai gaw shi a nta na shi a ma kaji ni hte rau kaba wa nga ai. Bai shi gaw shi a lusha nkau mi jaw sha nhtawm shi a gawm hta na lu shangun ai hte shi a lahpyen e dai hpe pawn da wu ai. Dai sagu kasha gaw shi a matu shayi sha langai zawn rai nga ai.

⁴Lani mi na aten hta sut su ai wa a nta e manam langai mi du nga ai. Shaloi dai sut su ai wa gaw manam hpe lusha lajang jaw na matu shi lu ai yam nga langai ngai hpe n kam sat wu ai; shing rai sat na malai matsan mayan wa a sagu kasha hpe la nhtawm shi manam a matu lusha jaw kau ya wu ai,” ngu nna tsun wu ai.

⁵Dawi gaw dai sut su ai wa hpe masin grai pawt wu ai rai nna, “Dai zawn re ai masha wa gaw si ging nga ai!,” ngu nna ahkrung nga ai dai MADU hta ngai dagam nngai.

⁶Dai zawn n hkru ai amu hpe shi galaw kau nu ai majaw shi la kau ya ai daram hpe htam mali nhtang wa lu na rai wu ai,” ngu nna tsun wu ai.

⁷Nahtan gaw Dawi hpe, “Dai wa gaw nang rai nga ndai. Da ndai gaw dai MADU Israela a Karai Kasang tsun ai ga rai nga ai: ‘Ya Shawlu a lata na nang hpe ngai hkye mawai la nhtawm Israela a hkawhkam ngai nang hpe shatai da ni ai.

⁸Shi a mungdan hpe mung, shi a madu jan ni hpe mung, ngai nang hpe ap ya sade ai; Israela hte Yuda mung hpe up hkang na hkawhkam ngai nang hpe shatai ni ai. Dai sha pyi n ram dum ai rai yang mung, ngai nang hpe htam lahkawng naw jaw ya lu nga nngai.

⁹Dai rai yang, nye a hkang da ai ga ni hpe nang hpa majaw n madat kau n ta? Ndai zawn n hkru ai amu hpe nang hpa majaw galaw kau hkrup n ni? Nang gaw Uria hpe majan pa e sat kau nit dai; Amon masha ni a lata hte shi hpe sat kau shangun nit dai; dai hpang shi a madu jan hpe nang la kau nga nit dai!

¹⁰Ya chyawm gaw nang gaw nye a ga hpe n madat ai hte Uria a madu jan hpe la kau ya nit dai majaw, ban shagu na na a amyu matu nkau mi gaw kashun kashe du daw sai hkaw ai amu hte si mat na mara ai.

¹¹Ngai gaw na a dinghku kaw na masha langai mi nang hpe ru yak tsin-yam tsindam tam jaw na lam shapraw dat na we ai gaw nang hpe dagam shaka nga nngai. Na a lata kaw nna na a madu jan ni hpe ngai la kau ya nhtawm kaga masha wa a lata de jaw kau na hpe mung nang mu lu na rin dai; shi gaw shani chyingtung e nan pyi na a madu jan ni hte nga sha dan na ra ai.

¹²Nang chyawm gaw dai amu hpe grai machyi shim ai hku shut kau nit dai, rai ti mung Israela masha ni yawng mu chye la lu mu ga, shani chyingtung aten hta dai amu hpe ngai shabyin dat na we ai,” ngu nna tsun wu ai.

¹³Dawi gaw, “Dai MADU hpe ngai shut kau ni ai,” ngu nna tsun wu ai. Nahtan mung, “Dai MADU nang hpe yubak raw ya nga sai; nang si lu na nit dai n rai.

¹⁴Rai ti mung, nang ndai amu galaw let dai MADU hpe ndai zawn n gawn n sawn re ai amu madun dan nit dai majaw, na a kasha gaw si lu na rai nga ai,” ngu nna tsun htang wu ai.

¹⁵Dai hpang Nahtan gaw nta de wa mat wa wu ai. Dai hpang Uria a madu jan Dawi a matu shangai ya nu ai ma hpe dai MADU gaw grai machyi sawng shangun wu ai.

¹⁶Dawi chyawm gaw dai ma kaja wa na matu Karai Kasang kaw akyu hpyi nga ai. Lusha lama ma sha na matu mung shi ningdang kau nhtawm shana shagu shi a gawk kata de shang wa nna dun ntsa e galeng let shana hpe shalai kau kau di wu ai.

¹⁷Shi a hkawhkam wang na du salang ni shi kaw sa nna sa sharawt yu mu ti mung, shi ningdang kau nhtawm shanhte hte rau hpa mung n lu n sha rai nga nga ai.

¹⁸Shaloi bat mi na jang, ma dai si mat sai. Dawi a du salang ni mung dai shiga shi hpe tsun dan na matu hkrit nga ma ai. Shanhte gaw, “Dai ma hkrung nga yang anhte shaga ai ga hpe shi n htan ya ai mi, ya shi a ma si mat sai lam anhte shi hpe kaning rai lu tsun dan lu na rai nga ga ta? Shi hkum hpe grau machyi hkra galaw na ru ai!,” ngu nna tsun ma ai.

¹⁹Shanhte shada da kahte hkat ai hpe Dawi chye wu ai shaloi, dai ma si mat sai hpe shi dum chye wu ai. Dai rai nna shi shanhte hpe, “Ma si mat sani?,” ngu nna san wu ai. Shaloi shanhte mung, “Rai sa, shi si mat sai,” ngu nna htan mu ai.

²⁰Dawi gaw dun kaw nna rawt nhtawm hka shin ai hte shi a kara masit kau nhtawm bu hpun palawng galai kau wu ai. Dai hpang dai MADU a nta hta nawku na nga, shi sa mat wa wu ai. Shi gaw shi a hkawhkam htingnu de bai nhtang wa yang, lusha hpyi wu ai rai nna shanhte daw jau ya ai hte rau shi sha nga ai.

²¹Shi a du salang ni chyawm gaw shi hpe, “Ndai amu anhte n chye na ga ai; ma naw hkrung nga yang, shi a matu nang hkrap nna lusha n sha ndai; rai ti mung shi si mat ai hte rau nang rawt sha nga n hka!,” ngu nna tsun ma ai.

²²Dawi chyawm gaw, “Rai nga ai law, shi naw hkrung nga yang, ngai lusha gam let hkrap ngu hkrap ngoi rai ni ai. Dai MADU gaw ngai hpe matsan dum la nhtawm ma hpe n si shangun na rai wu ai ngu, ngai myit nawn la nngai.

²³Rai ti mung ya chyawm gaw shi si mat sai rai nna ngai hpa majaw lusha gam shara naw nga na rai nga a ta? Ma a asak hpe bai hkan shabai la lu na a ni? Lani mi na aten hta shi nga ai shara de chyawm gaw ngai wa na rai nga nngai, rai ti mung shi mahtang ngai hpang de galoi mung nhtang sa wa lu na n rai,” ngu nna htan wu ai.

²⁴Dai hpang Dawi gaw shi a madu jan Batsheba hpe shalan shabran nhtawm shi hte kanawn nna shadang sha shangai ya wu ai. Ma dai hpe Shawlumon ngu nna Dawi shamying ya wu ai. Dai MADU mung ma hpe tsaw ra wu ai rai nna,

²⁵myihtoi Nahtan hpe hkang dat let, dai MADU ma hpe tsaw ra nga ai majaw ma dai hpe Jedidi ngu nna shamying ya nga ai.

²⁶Yoab gaw Amon mare daju Raba mare hpe matut gasat wu yang, dai mare hpe gasat dang la na sha rai nga nu ai.

²⁷Shi gaw Dawi hpang de kasa ni hpe shangun dat nhtawm ning ngu nna tang madun wu ai: “Raba mare hpe ngai gasat nna dai mare a hka jaw ai lawng hpe lu la kau se ai.

²⁸Ya gaw naw ngam nga ai hpyenla ni hpe shinggyin la nhtawm htim gasat nna nang nan dai hpe madu la sanu. Dai mare hpe ngai bai gasat la ai majaw arawng sadang n kam la mayu nngai.”

²⁹Dai rai nna Dawi gaw shi a hpyenla ni hpe shinggyin la nna Raba mare de sa wa nhtawm dai mare hpe htim gasat wu ai hte dai hpe ka-up dang la kau wu ai.

³⁰Dawi gaw pawng 75 li ai Amon karai Molek a hpara sumla baw kaw na lungseng ja janmau la wa wu ai. Dawi gaw lungseng mung la wa nna shi a janmau hta nan bang da wu ai. Shi gaw dai mare na lanep law law hpe mung la wa wu ai rai nna,

³¹mare masha ni hpe zingret, hpri shanghkawp, hpri ningwa ni hte amu galaw na matu ya nhtawm, wut ju ai amu hpe atik anang galaw shangun da wu ai. Kaga Amon mare ni hta nga ai masha ni yawng hpe mung dai hte maren galaw shangun wu ai. Dai hpang shi hte shi a masha ni Yerusalem mare de nhtang mat wa ma ai.