Read Jinghpaw Common Language Bible 2009 2 SAMUELA 13 Bible Online

2 SAMUELA 13 - Jinghpaw Common Language Bible 2009 bible

2 SAMUELA 13

¹Dawi a kasha Absalom hta Tama mying ai ahpraw asam tsawm nna num garai n wa ai kajan langai nga nga ai; kaga Dawi a kasha ni hta na Amnon mahtang shi hpe yu tsaw ra da wu ai.

²Amnon gaw dai numsha hpe nachying yu tsaw ra wu ai rai nna shi gaw machyi hkum tai wa nga ai, hpa majaw nga yang, shi hte chyu sha nga lu na matu shi a matu yak ai zawn rai nga ai, numsha gaw hkawn jet rai nga ai hte maren lasha ni hte hkrum lu na yak nga ai.

³Rai ti mung shi hta Dawi a kahpu Shama a kasha Yonadab mying nna zen ai amyu jinghku manang langai nga nga ai.

⁴Yonadab gaw Amnon hpe, “Ya, nang gaw hkawhkam wa a kasha rai nga ndai; ti mung lani hte lani nang hta myit n pyaw hpa lam nga nga ai hpe ngai mu nngai. Dai gaw hpa majaw rai nga a ta?,” ngu nna tsun wu ai. Shi gaw, “Nye a kanau Absalom a kajan Tama hpe ngai tsaw ra nga nngai,” ngu nna htan wu ai.

⁵Yonadab mahtang shi hpe, “Yup ku ntsa e taw nga nna, machyi masu dan u. Shing rai na nwa nang hpe sa gawan yu jang, shi hpe, ‘Chyeju hte nye a kajan Tama hpe ngai kaw sa nna galaw daw shangun e law. Ngai shi hpe mu lu na ndai shara hta nan shi hpe lusha hkyen shangun mayu nngai; dai hpang shi hkum nan ngai hpe shachyip lajang jaw ru ga,’” ngu nna tsun wu ai.

⁶Shi mung yup ra de shang let machyi masu nga wu ai. Hkawhkam Dawi gaw shi hpe sa gawan yu wu yang, Amnon gaw shi hpe, “Chyeju hte Tama hpe ngai mu lu ai ndai yang e muk loi mi sa galaw shangun e; dai hpe shi nan ngai hpe daw jau ya u ga law,” ngu nna tsun wu ai.

⁷Shaloi Dawi mung hkawhkam htingnu e nga ai Tama hpang de ning ngu nna shiga shana dat wu ai: “Amnon a nta de sa nna, shi a matu lusha loi mi sa hkyen shachyip ya su.”

⁸Shi gaw dai shara de sa mat wa wu yang, yu u, yup ra ntsa e taw nga ai Amnon hpe sa mu wu ai. Tama gaw shadung loi mi la nna dai hpe gumchya nhtawm Amnon mu lu ai shara hta e muk pa byin wa hkra galaw shachyip da wu ai. Dai hpang muk ni hpe kaba la nhtawm,

⁹shi sha na matu ndi na ru htawk ya wu ti mung n sha hkraw nga ai. Shaloi shi gaw, “Masha shagu pru mat wa mu,” ngu nna tsun dat wu yang, shanhte yawng mung pru mat wa shajang ma ai.

¹⁰Dai hpang shi gaw Tama hpe, “Ndai nye a yup ra nga ai de dai muk ni hpe la wa nna, nang nan ngai hpe daw jau e law,” ngu nna tsun wu ai. Shi gaw muk pa ni hpe la nhtawm shi hpang de sa wa wu ai.

¹¹Shing rai muk pa ni hpe shi wa jaw wu yang, Tama hpe magra jum da let, “Ngai hte rau yup ga,” ngu nna tsun wu ai.

¹²Tama gaw, “N rai, Ndai zawn sari jahpoi ai amu galaw na ngai hpe atik anang hkum shadut et! Dai gaw grai n hkru ai amu she rai nga a hka!

¹³Shing rai jang, shawa a man e ngai kaning rai baw bai sharawt lu na rai nga a ta? Bai nang-nang mung Israela amyu hta tsep kawp sari jahpoi kau ai hkrum na rai nga ndai. Chyeju hte hkawhkam wa hpe she tsun dan yu ga. Ngai hpe na a matu n jaw ya gaw mi n rai nhten, ngu ngai kam nga nngai,” ngu nna tsun wu ai.

¹⁴Rai ti mung Tama tsun ai ga hpe shi n madat ya wu ai. Amnon mahtang shi hta grau n-gun ja ai rai nna shi hpe adip arip roi kau wu ai.

¹⁵Dai hpang Amnon a myit hta grai nan n ju n dawng mat ai myit hpring mat wa wu ai; shawng e shi hpe yu tsaw ra ai hta ya grau nna pyi shi hpe n dawng mat wu ai. Shi gaw Tama hpe, “Pru mat wa nu!,” ngu nna tsun wu ai.

¹⁶Tama gaw, “N rai law, ngai hpe ning rai roi kau nit dai hta ngai hpe gawt shapraw kau dat ai ru hka amu gaw grau kaba nga salit dai!,” ngu nna tsun wu ai. Rai ti mung Amnon chyawm gaw shi tsun ai ga hpe n madat ya wu ai;

¹⁷shaloi shi a shangun ma hpe shaga la nhtawm, “Ndai numsha hpe nye a man kaw na shapraw kau u! Shi hpe gawt shapraw kau nhtawm chyinghka htinggrang kau u!,” ngu nna tsun wu ai.

¹⁸Dai shangun ma wa mung dai numsha hpe gawt shapraw kau nhtawm chyinghka htinggrang kau wu ai. Shaloi Tama gaw dai prat na num garai n wa ai hkawhkam shayi sha langai bu hpun ga ai dai maka ka shatsawm da ai hpun palawng galu hpun da nga ai.

¹⁹Tama gaw shi a baw hta dap hte bun let shi a palawng galu gang je kau nhtawm myi man hpe lata hte magum nna hkrap let wa mat wa wu ai.

²⁰Shi a kahpu Absalom gaw Tama hpe mu ai shaloi shi gaw, “Amnon nang hpe roi kau sani? Ngai jan e, chyeju hte dai lam a majaw nau wa myit hkum ru hkum kahtet nga et; shi gaw na a nhpu rai nga ai majaw dai lam kadai hpe mung hkum tsun dan et,” ngu nna tsun wu ai. Tama mung myit yawn ai hte shi chyu sha garen gari rai, Absalom a nta e nga nga wu ai.

²¹Shing rai byin mat ai shiga hpe Hkawhkam Dawi na jang, shi ja ja masin pawt bu nga ai.

²²Absalom chyawm gaw shi a kajan Tama roi kau hkrum sai a majaw Amnon hpe grai yu n dawng mat ai rai nna shi hpe galoi mung ga n shaga mat wu ai.

²³Ya lahkawng ning lai jang, Absalom gaw Ehprim mare makau na Bala Hazora shara e shi a sagu mun ni hpe rep nga ai rai nna dai shara de hkawhkam wa a shadang sha ni yawng sa na matu saw shaga dat wu ai.

²⁴Shi gaw Hkawhkam Dawi kaw shang nhtawm, “Madu hkawhkam e, nye a sagu mun ni hpe ngai rep nga nngai. Dai rai nna nang hte na a du salang ni dai poi hta sa shang lawm lu na myit dai kun?,” ngu nna tsun wu ai.

²⁵Hkawhkam wa gaw, “Dai hku n rai na re ai ngai sha e, anhte yawng sa ga ai rai yang, na a matu nau wa hki na ndai,” ngu nna tsun wu ai. Absalom akroi anoi ngu ti mung hkawhkam wa n hkan hkraw wu ai. Absalom pru mat wa na matu shi hpe tsun wu ai.

²⁶Rai ti mung Absalom chyawm gaw, “Mai sa, shing wa she a nga yang mung, dik dik ngai hpu Amnon hpe sa shangun lu na n rai ni?,” ngu nna san wu ai. Hkawhkam wa mung, “Shi hpa majaw sa ang na rai wu ni?,” ngu nna san wu ai.

²⁷Rai ti mung Absalom mahtang hpang jahtum Dawi e Amnon hte kaga shi a shadang sha ni Absalom hte rau sa wa shangun lu ai aten du hkra atik anang tsun nga wu ai. Absalom gaw hkawhkam wa a matu mu mai ai lusha poi shachyip lajang da nna,

²⁸shi a shangun ma ni hpe ning ngu matsun da wu ai: “Amnon grai nang nga ai aten, ngai yu nna hkang dat ai hte rau shi hpe sat kau na rai myit dai; dai amu galaw na hkum hkrit nga myit, ngai nan mung lit la na we ai. Nden shaja mu! Hkum kanung nga masa!.”

²⁹Dai rai nna Absalom matsun ai hte maren, shi a shangun ma ni hkan galaw ma ai rai nna Amnon hpe sat kau ma ai. Naw ngam nga ai Dawi a shadang sha ni yawng rawt nhtawm shanhte a lawze ni hta jawn nna hprawng mat wa shajang ma ai.

³⁰Shanhte nlang nta wa lam e naw rai nga ma yang, “Absalom gaw na a shadang sha ni yawng hpe sat sharu kau nu ai-shanhte hta na langai mi hpe mung n ngam da masai da!,” ngu nna Dawi hpe sa tsun dan ma ai.

³¹Hkawhkam wa tsap let, yawn hkyen ai hte shi a hpun palawng ni hpe gang je kau nhtawm ga ntsa e galeng taw nga ai. Shi hte rau nga nga ai shangun ma ni mung shanhte a hpun palawng ni hpe gang je kau ma ai.

³²Rai ti mung, Dawi a kahpu Shama a kasha Yonadab chyawm gaw, “Madu hkawhkam e, shanhte gaw na a shadang sha ni yawng hpe n sat sharu kau nga ai. Amnon chyu sha sat kau ai hkrum nna si mat nga sai. Amnon mahtang shi a kajan Tama hpe roi kau ai shani kaw nna dai zawn galaw na shi myit daw dan da nu ai gaw, Absalom a sat yu nna nang tsun lu na rai nga ndai.

³³Dai re ai majaw na a shadang sha ni yawng si htum mat sai ngu ai shiga hpe hkum kam nga et, Amnon shi chyu sha she sat kau hkrum nu ai,” ngu nna tsun wu ai.

³⁴Dai aten hta Absalom chyawm gaw hprawng mat wa nu ai. Shaloi jang Horonaim kaw na kawng lam hku masha wunawng wuwa mi yu hkrat wa nga ma ai hpe sin langa hpyenla wa mu dat wu ai. Shi gaw hkawhkam wa hpang de wa nhtawm shi mu ai lam tang madun nga ai.

³⁵Ya Yonadab gaw Dawi hpe, “Shanhte rai na ma ai ngu nna ngai tsun ni ai hte maren, na a shadang sha ni yan wa mara ai law,” ngu nna tsun dan wu ai.

³⁶Shing ngu shi tsun dan ngut ai shaloi jang, Dawi a shadang sha ni shang wa nna jahtau hkrap hpang wa ma ai. Dawi hte shi a du salang ni mung ahkup ahka nga mat hkra hkrap nga ma ai.

³⁷Absalom mahtang hprawng mat wa nhtawm Geshura Hkawhkam Amihu a kasha Talamai hpang de sa nna dai yang e masum ning sa nga nga wu ai. Dawi chyawm gaw shi a kasha Amnon a majaw na na sharung shayawt nga ai,

³⁹rai ti mung Amnon a si hkrung si htan lam a majaw shi yawn bran wa jang, shi a kasha Absalom hpe marit ai myit hpring wa nga lu ai.