Read Jinghpaw Common Language Bible 2009 2 SAMUELA 15 Bible Online

2 SAMUELA 15 - Jinghpaw Common Language Bible 2009 bible

2 SAMUELA 15

¹Dai hpang Absalom gaw shi a matu leng langai hte gumra ni hpe lajang tawn nhtawm shi a shawng e gat na masha marai manga shi san tawn da wu ai.

²Shi gaw jau jau rawt nna mare chyinghka lam e sa tsap tsap rai nga ai. Amu rawng ai masha langai ngai gaw hkawhkam wa hpe tara dara shangun mayu nna dai de sa wa jang, Absalom mahtang dai wa hpe shaga la nhtawm shi kanang na rai nga a ta?, ngu nna hkap san san di wu ai. Shaloi shi gaw wora amyu bawsang na rai nga nngai ngu nna htan jang,

³Absalom mahtang, “Yu u, tara gaw na a maga de rai nga ai; rai ti mung na a amu hpe madat ya na hkawhkam wa san da ya ai masha kadai mung n nga ma ai,” ngu nna tsun wu ai.

⁴Shi gaw, “Ngai lama tara agyi langai rai taw gaw, ngai gade sha myit sharawng ya na rai nga a hka! Amu rawng ai ni kadai mung ngai kaw sa jang, shi a matu teng man ai lam ngai jaw ya na we ai law,” ngu nna tsun tsun di wu ai.

⁵Masha langai ngai Absalom kaw sit sa nna shi a man e gum dagup nga jang dai wa hpe Absalom hkap ahpum la nna shi hpe pup pup di wu ai.

⁶Teng man ai amu a matu hkawhkam wa kaw sa sa re ai Israela masha shagu hte hpe Absalom dai hku hkap galaw law di wu ai majaw shanhte a sadi dung madat mara ai lam hpe shi mayun hkam la lu nga wu ai.

⁷Ya mali ning na ai hpang, Absalom gaw Dawi hpe, “Madu e, dai MADU hpe ngai tawn da ai ga sadi hpe shatup lu na matu, Hebron mare de ngai hpe wa shangun e law.

⁸Suri mung Geshura mare e ngai naw nga ai shaloi, Yerusalem mare de ngai hpe bai woi wa ai rai yang, Hebron mare e ngai nang hpe nawku na nngai ngu nna dai MADU hpe ngai ga sadi jaw da nngai law,” ngu nna tsun wu ai.

⁹Hkawhkam wa gaw, “Ngwi pyaw sim sa ai hte wa su,” ngu nna tsun wu ai. Dai rai nna Absalom mung Hebron mare de wa mat wa wu ai.

¹⁰Rai ti mung shi gaw Israela amyu bawsang ni yawng hpang de kasa ni hpe shangun dat nhtawm, “Pahtau dum ai nsen hpe nanhte na jang, ‘Absalom gaw Hebron mare hta hkawhkam tai wa sanu ai law!,’” ngu nna jahtau tsun dat mu, nga nna tsun na rai myit dai.

¹¹Absalom saw shaga da ai masha lahkawng tsa mung, shi hte rau Yerusalem mare kaw nna pru mat wa ma ai; shanhte gaw maw mawn ai lam hpa mung n chye nga ma ai rai nna myit kaja hte hkan nang nga ma ai.

¹²Absalom gaw Hkawhkam Dawi a hpaji jaw ni hta na langai rai nga ai Ahihtohpela mahtang Gilo mare e shagu hkungga ni hpe nawng jau nga yang, shaga la wu ai. Hkawhkam wa hpe gumlau maw mawn ai gaw n-gun ja wa nna Absalom a hpang hkan ai ni grau grau law jat wa ma ai.

¹³Kasa langai mi gaw Dawi kaw sa nna, “Israela masha ni mahtang Absalom hta sadi dung nna myit lawm mat wa masai,” ngu nna shiga tsun dan wu ai.

¹⁴Dai rai nna Dawi gaw shi hte rau Yerusalem mare e nga ai shi a du salang ni yawng hpe, “Anhte Absalom a lata kaw nna lawt mayu ga ai rai yang, ya jang hprawng mat wa saga! Alawan rai manu law! Shing n rai yang, shi anhte hpe ndai yang dep rau nna anhte hpe gasat dang kau nhtawm mare hta nga ai masha shagu hte hpe sat kau na ra ai!,” ngu nna tsun wu ai.

¹⁵Shanhte mung, “Mai sa law, madu hkawhkam e, nang tsun matsun ai hte maren anhte hkan galaw na jin jin rai nga saga ai,” ngu nna htan ma ai.

¹⁶Shaloi hkawhkam htingnu sin na matu lashi num shi hte hpe tawn da ai hta kaga, shi a dinghku masha ni hte du salang ni yawng hkawhkam wa kaw hkan nang nna pru mat wa shajang ma ai.

¹⁷Hkawhkam wa hte shi a masha ni mare kaw nna pru mat wa nna jahtum na nta e hkring nga ma ai.

¹⁸Hkawhkam wang na sin langa wa shi a man e lai hkawm nga yang, shi a du salang ni yawng mung shi a makau e tsap nang nga ma ai. Shi kaw hkan nang nga ai Gat mare na hpyenla kru tsa hte mung hkawm lai mat wa ma ai;

¹⁹hkawhkam wa gaw shanhte a ningbaw Itai hpe, “Nang hpa majaw anhte kaw hkan nang nga n ni? Nhtang wa nhtawm hkawhkam ningnan wa hte rau wa nga su. Nang gaw maigan masha langai mi rai nna na a mung kaw na hprawng shingbyi hkawm ai wa she rai nga ndai.

²⁰Nang ndai yang e chyahkring mi sha naw nga ai wa she rai nga ndai mi nang hpe hpa majaw ngai hte rau hkawm sa shangun ang na rai nga a ta? Ngai gade sa wa nga ai pyi gaw, ngai n chye tsun dan lu nngai. Dai majaw nang hte rau na a manaw manang ni hpe woi nna nhtang mat wa masu; dai MADU gaw nanhte hpe matsan dum ai hte kangka ai chyeju shaman ya nga u ga law,” ngu nna tsun wu ai.

²¹Rai ti mung Itai mahtang, “Madu hkawhkam e, nang du hkawm ai shara shagu hkan si hkrung si htan amu hte hkrup kadup wa tim pyi, nang hte rau tut nawng n daw n hka ai sha hkawm sa na nngai, ngu dai MADU a mying ningsang hta ngai nang hpe dagam nngai law,” ngu nna htan wu ai.

²²Dawi gaw, “Dai daram wa nga jang mung, rai la sai! She rawt sa wa masu!,” ngu nna htan wu ai. Dai rai nna Itai mung shi a masha ni hte shanhte hta hkan shingbyi nang nga ai ni yawng hte rau lai sa mat wa ma ai.

²³Dawi kaw hkan nang ai masha ni pru mat wa ma yang, amyu masha ni ja ja jahtau hkrap nga ma ai. Hkawhkam wa gaw Kidron hka shi rap jang shi a masha ni mung hkan rap nang nna shanhte rau sha nam mali maga de hkawm shang mat wa ma ai.

²⁴Dai yang e nga nga ai hkinjawng Zadok hte Lewi masha ni mung chyoi pra ai Ga Shaka Sumpu hpai da nga ma ai. Shanhte gaw amyu masha ni yawng mare kaw nna pru tawm mat wa ai aten du hkra dai Ga Shaka Sumpu hpe n hta ka-aw ai sha tawn da ma ai. Hkinjawng Abiahta mung dai yang e nga nga ai.

²⁵Dai hpang hkawhkam wa gaw Zadok hpe, “Ga Shaka Sumpu hpe mare de bai la wa mu; dai MADU ngai hta awng sharawng nga ai rai yang, dai hpe tawn da ai shara hta dai hpe bai mu lu na matu ngai hpe bai nhtang wa shangun na rai wu ai.

²⁶Rai ti mung shi ngai hpe n ra sharawng sai rai yang mung, hpa n ra ai, shi ra ai hku ngai hpe galaw nu ga,” ngu nna tsun wu ai.

²⁷Shi gaw matut nna Zadok hpe, “Yu u, na a kasha Ahimaza hte Abiahta a kasha Yonahtan hpe woi nna mare de mahtang angwi apyaw hte nhtang wa masu.

²⁸Ndai aten hte yang chyawm gaw, nang kaw na shiga bai lu la ai aten du hkra, nam mali kata na hka rap ai uhkan shara hta ngai ala nga na nngai,” ngu nna tsun wu ai.

²⁹Dai rai nna Zadok hte Abiahta yan gaw Ga Shaka Sumpu hpe Yerusalem mare de bai la wa nhtawm dai yang e nga nga ma ai.

³⁰Dawi mung yawn hkyen ai kumla hte shi a baw htinggrum nna kyepdin raw kau nhtawm hkrap let, Tsanlun Bum de lung wa wu ai. Shi a hpang hkan ai masha ni yawng mung shanhte a baw ni htinggrum nhtawm hkrap let shi kaw hkan nang nga ma ai.

³¹Ahihtohpela mahtang Absalom a gumlau hpung hte matut mat sai shiga Dawi na jang, shi gaw, “MADU e, chyeju hte Ahihtohpela a hpaji daw ya ai lam hpe angawk kau ya u!,” ngu nna hpyi wu ai.

³²Dawi gaw kawng pungding na nawku shara langai de du jang, Arhki shara na shi a kam ging ai manang Hushai mung shi a hpun palawng ni gang je kau nhtawm baw hta ga nhpu hte bun la let shi hpe sa hkrum wu ai.

³³Shaloi Dawi gaw shi hpe, “Nang ngai kaw hkan nang ai rai tim, nang ngai hpe hpa mung karum ya lu na ndai n rai,

³⁴rai ti mung mare de nang nhtang wa nhtawm, shi a kawa hpe nang daw jau yu nit dai zawn shi hpe mung ya sadi sahka hte daw jau na lam Absalom hpe tsun dan ya ai hku nang ngai hpe karum lu na rai ndai. Ahihtohpela jaw ai hpaji ga hpe mung nhtan shai ai hku nang galaw lu na rai ndai.

³⁵Dai yang e, hkinjawng Zadok hte Abiahta yan mung nga nga na mara ai rai nna hkawhkam htingnu kata nang na ai lam magup shan hpe tsun dan lu na rai ndai.

³⁶Shanhte hta shan a kasha Ahimaza hte Yonahtan yan mung shan hte rau nga nga ma ai rai nna nang shinggyin la lu ai shiga yawng ngai hpang de shana dat lu na rai ndai,” ngu nna tsun wu ai.

³⁷Dai rai nna Dawi a manang Hushai gaw mare de nhtang wa ai aten hta Absalom mung Yerusalem mare de du shang wa nga ai.