Read Jinghpaw Common Language Bible 2009 2 SAMUELA 18 Bible Online

2 SAMUELA 18 - Jinghpaw Common Language Bible 2009 bible

2 SAMUELA 18

¹Hkawhkam Dawi gaw shi a masha ni yawng hpe woi hpawng da nhtawm, shanhte hpe hkying mi up ai, latsa up ai dap hku garan da nhtawm, dai ni hpe up hkang na dap up du ni hpe mung san tawn ya wu ai.

²Dai hpang hpung masum di garan nhtawm hpung mi hpe Yoab, hpung mi hpe Yoab a kanau Abishai, bai hpung mi hpe Gat mare na Itai ni up hkang let pru sa wa shangun wu ai. Dai hpang hkawhkam wa gaw shi a masha ni hpe, “Ngai hkum nan nanhte hte rau pru sa na nngai,” ngu nna tsun wu ai.

³Shanhte gaw, “Nang nan chyawm gaw anhte hte rau n pru sa u ga; anhte hta na naw ngam nga ai ni kayin hprawng mat wa ai rai ti mung, shing n rai anhte hta na ka-ang hkup dang sat kau ai hkrum ga ti mung, gumlau hpyen a matu laklai shai wa na n rai; nang mahtang gaw anhte hta na masha mun mi hta pyi grau manu dan nga ndai. Ndai mare hta nang nga nga nhtawm anhte hpe karum madi shadaw la na grau mai kaja nga ai,” ngu nna htan ma ai.

⁴Hkawhkam wa mung, “Nanhte myit ai lam shagu kaja htum nga myit dai majaw dai hku ngai hkan galaw na nngai,” ngu nna htan wu ai. Dai hpang shi gaw mare chyinghka lam makau e tsap nga yang, shi a masha ni mahtang hkying dap, latsa dap rai nna pru sa wa ma ai.

⁵Shi gaw Yoab, Abishai hte Itai ni hpe ning ngu nna hkang dat wu ai: “Nye a myi man tau let, shabrang wa Absalom hpe lata hkum du ya mi.” Shing nga nna Dawi gaw shi a du ni hpe hkang dat ai ga hpe hpyen hpung ni yawng na ma ai.

⁶Dawi a luksuk ni gaw pa ga de yu sa nhtawm Israela masha ni hte Ehprim nam maling e gasat anut hkat ma ai.

⁷Dawi a masha ni a majaw Israela masha ni sum mat ma ai; dai gaw hkrit hpa sum kaba rai nna dai shani e masha mun lahkawng sat kau ai hkrum nga ai.

⁸Dai gasat gala ai gaw mungdan ting hta byin ai rai nna majan pa e sat kau hkrum ai hta nam maling kata hta si mat ai masha ni mahtang grau law nga ai.

⁹Absalom mung Dawi a masha ni hte akajawng sha hkrum kadup wu ai. Absalom gaw lawze jawn wu ai rai nna wamyi hpun kaba npu hku lai sa mat wa yang, shi a baw hpun lakung lakying ni hta wa dau mat wu ai. Shaloi lawze gaw gat gumtawng mat wa ai rai nna Absalom mung lapran hpatwat e noi goi wat nga ai.

¹⁰Shing rai nga ai hpe Dawi a masha langai sa mu ai rai nna shi gaw Yoab hpe, “Madu e, Absalom gaw wamyi hpun hta noi nga ai hpe ngai mu kau da se ai!,” ngu nna tang madun wu ai.

¹¹Yoab gaw, “Nang shi hpe mu ndai rai yang, dai shara hta nan shi hpe hpa majaw n sat kau da n ta? Dai rai taw, ngai hkum nan nang hpe gumhpraw lap shi hte shingkyit langai jaw na sade ai wa,” ngu nna htan wu ai.

¹²Rai ti mung dai wa mahtang, “Nang ngai hpe gumhpraw lap hkying wa mi jaw ti mung, hkawhkam wa a kasha hpe lata layung hte pyi n hkra gwi nngai. Nang hpe mung Abishai hte Itai yan hpe mung, ‘Nye a myi man tau let, dai shabrang Absalom hpe hkum hkra myit,’ ngu nna hkawhkam wa hkang da ai ga hpe anhte yawng na saga ai.

¹³Rai ti mung hkawhkam wa hkang dat ai ga hpe ngai lale kau nhtawm Absalom hpe sat kau ai rai yang, dai shiga hpe hkawhkam wa na na rai wu ai. Shi mahtang shiga magup na wa ai shaloi, nang mung ngai hpe makawp maga la lu na n rai nga ndai,” ngu nna htan wu ai.

¹⁴Yoab gaw, “Ngai nang hte aten majoi mi n kam shama kau mayu nngai,” ngu nna tsun wu ai. Shi gaw nri masum la lang nhtawm wamyi hpun npu e noi nga nna naw hkrung nga ai Absalom a sinda kata de galun htinggrang bang dat ya wu ai.

¹⁵Dai hpang Yoab a hpyenla marai shi mung Absalom hpang de kahtep sa wa nhtawm shi hpe sat shakre kau da ma ai.

¹⁶Yoab gaw pahtau dum dat nhtawm majan gasat ai hpe jahkring kau wu ai; shi a hpyen hpung ni mung Israela masha ni hpe hkan shachyut nga ai kaw na nhtang mat wa ma ai.

¹⁷Shanhte gaw Absalom a moi mang hpe dai nam maling na sung ai nhkun kaba de kabai jahkrat bang nhtawm, nlung sumpum kaba sumpum let magap da ma ai. Israela masha ni yawng hprawng mat wa nhtawm tinang nang a nta de wa mat wa ma ai.

¹⁸Absalom chyawm gaw shi a prat tup hta shi a mying matut hkrung nga na matu shi hta shadang sha n lu nga sai majaw, Hkawhkam Kadit shara e shi hkum nan a matu masat dingsat shadaw langai hpe gaw da wu ai. Dai rai nna dai hpe shi nan mying shamying da wu ai majaw, dai ni du hkra dai gaw Absalom a masat dingsat ngu nna gumhkawng nga ai.

¹⁹Zadok a kasha Ahimaza gaw Yoab hpe, “Dai MADU gaw shi hpe shi a gumlau hpyen ni a lata kaw na hkye hkrang la nu ai shiga kaja hkawhkam wa hpe wa kagat tsun dan se ga,” ngu nna tsun wu ai.

²⁰Yoab chyawm gaw, “N rai na re law, nang gaw dai ni jang shiga kaja gun mat wa lu na n rai; kaga shani hta mahtang nang tsun dan mai nga ndai. Hkawhkam wa a kasha si mat sai lam hpe dai ni sha gaw n tsun u ga,” ngu nna tsun wu ai.

²¹Dai hpang shi gaw Ehtiopi masha mayam la langai mi hpe, “Nang mu ai hte maren, hkawhkam wa hpe wa tsun dan su,” ngu nna tsun wu ai. Dai mayam wa mung gum dagup nhtawm kagat mat wa wu ai.

²²Ahimaza mung, “Hpa mi byin yang byin ngai n tsang nngai; chyeju hte ngai hpe dai shiga la sa shangun e law,” ngu nna hpyi wu ai. Yoab mung, “Nye kasha e, nang hpa majaw dai zawn re ai amu galaw mayu nga n ta? Dai lam a majaw nang hta hpa shabrai mung hkam la lu na ndai n rai,” ngu nna san wu ai.

²³Ahimaza gaw, “Hpa mi byin yang byin ngai sa mayu nngai,” ngu nna bai tsun wu ai. Dai rai nna Yoab gaw, “Nang shade wa she nga yang mung gat su,” ngu nna tsun wu ai. Shaloi Ahimaza gaw Yawdan Kadit lam hku kagat yu mat wa ai rai nna gade n na yang mayam la wa hpe lai kau da wu ai.

²⁴Dawi chyawm gaw mare chyinghka lam a kata maga hte shinggan maga na lapran shara hta dung nga wu ai. Sin langa wa mung mare bunghku ntsa na tsaw htum ai shara de lung wa nhtawm chyinghka lam ntsa na numgaw e tsap nga ai; shi gaw tsan tsan de praw rai mada dat yu wu yang, masha langai mi chyu sha kagat wa nga ai hpe mu wu ai.

²⁵Shi mung dai lam hkawhkam wa hpe jahtau tsun wu ai hte hkawhkam wa gaw, “Shi chyu sha rai yang gaw shiga kaja la sa ai wa rai nga ai,” ngu nna tsun wu ai. Shaloi kagat sa wa ai mung ni she ni sa wa nga ai.

²⁶Dai hpang sin langa wa gaw kaga langai mi bai shi hkrai kagat sa wa ai hpe mu wu ai rai nna chyinghka sin ai wa hpe, “Yu u, kaga masha langai mi mung kagat wa ra ai law!,” ngu nna jahtau tsun wu ai. Hkawhkam wa chyawm gaw, “Dai wa mung shiga kaja gun sa ai wa she rai nga ai,” ngu nna tsun wu ai.

²⁷Sin langa wa gaw, “Shawng e kagat sa wa ai wa gaw Ahimaza zawn rai nga ai hpe ngai mu lu nngai,” ngu nna tsun wu ai. Hkawhkam wa gaw, “Shi gaw kaja ai masha langai mi rai nga ai majaw shiga kaja gun sa na ra ai,” ngu nna tsun wu ai.

²⁸Ahimaza gaw hkawhkam wa hpe jahtau tsun let shakram la nhtawm shi a man e ga de gum dagup nhtawm, “Madu hkawhkam hpe gumlau ai ni hpe na a lata hta ap ya nna awng padang jaw ya sai dai MADU na a Karai Kasang gaw a nga u ga law!,” ngu nna tsun wu ai.

²⁹Hkawhkam wa gaw, “Dai shabrang Absalom gaw shim lum ai hte nga nga a ni?,” ngu nna san wu ai. Ahimaza mahtang, “Madu e, na a du Yoab ngai hpe shangun dat ai shaloi kabring kabrawng kaba re ai gaw ngai mu kau da se ai, rai ti mung hpa byin sai gaw ngai n tsun dan lu nngai,” ngu nna htan wu ai.

³⁰Hkawhkam wa gaw, “Htawra yang e tsap nga su,” ngu nna tsun wu ai rai nna shi mung dai yang e sa tsap nga wu ai.

³¹Dai hpang Ehtiopi masha mayam wa mung du wa ai rai nna hkawhkam wa hpe, “Madu hkawhkam a matu shiga kaja lu tawn nngai; Nang hpe gumlau ai ni yawng hpe dang kau lu ai awng padang ninglaw dai MADU nang hpe dai ni jaw ya nit dai!,” ngu nna tsun dan wu ai.

³²Hkawhkam wa gaw, “Dai shabrang Absalom gaw shim lum ai hte nga nga a ni?,” ngu nna san wu ai. Mayam la wa mung, “Madu e, nang hta byin lai mat wa sai lam gaw na a gumlau hpyen ni yawng hta mung, nang hpe gumlau ai ni yawng hta mung byin wa sanu ga, ngu nna ngai myit ra sharawng nngai,” ngu nna htan wu ai.

³³Hkawhkam wa gaw yawn hkyen ai hkrum nna mare chyinghka ntsa na gawk de lung wa nhtawm wa hkrap nga ai. Shing rai shi lung wa yang, “O ngai sha e! Nye a kasha Absalom e! Absalom ngai sha e! Nang si na malai ngai mahtang si mat n-ga law; ngai sha Absalom, ngai sha e!,” ngu nna jahtau hkrap wu ai.