Read Jinghpaw Common Language Bible 2009 2 SAMUELA 19 Bible Online

2 SAMUELA 19 - Jinghpaw Common Language Bible 2009 bible

2 SAMUELA 19

¹Hkawhkam Dawi gaw Absalom a majaw hkrap ngu hkrap ngoi let sharung shayawt nga ai lam Yoab hpe tsun dan ma ai.

²Dai rai nna hkawhkam wa gaw shi a kasha a majaw sharung shayawt nga ai lam shanhte na ma ai rai nna dai shani na awng padang gaw Dawi a hpyen hpung ni a matu yawn shara tai mat malu ai.

³Shanhte gaw majan ginra kaw na kagat hprawng mat wa ai majaw kaya dum nga ai hpyenla ni zawn mare kata de asim sha nhtang mat wa shajang ma ai.

⁴Hkawhkam wa mung shi a myi man magap kau nna, “O Ngai sha e! Ngai sha Absalom e! Absalom ngai sha e!,” ngu nna ja ja tsun let jahtau hkrap wu ai.

⁵Yoab gaw nta de shang sa nhtawm shi hpe, “Na a asak hpe mung, na a shayi shadang sha ni a asak hpe mung, na a madu jan ni hte lashi num ni a asak ni hpe mung hkye ya ai masha ni ngu na na a masha ni hpe dai ni nang shagrit kau nna kaya jahkrum kau nga nit dai.

⁶Nang hpe tsaw ra ai ni hpe nang nhtan jashai kau nhtawm nang hpe n dawng n yawt ai ni hpe mahtang madi shadaw nga n hka! Na a du salang ni hte masha ni gaw na a matu hpa lachyum n pru nga saga ai hpe nang asan sha madun dan nga nit dai; dai ni na nhtoi hta Absalom mahtang hkrung nga nna anhte yawng si mat yang mahtang nang ram ram kabu na rai nga ndai gaw ngai mu lu se ai.

⁷Ya mung, pru sa nna na a masha ni hpe shangang shakang ai hte shalan shabran ya mi; dai hku nang n galaw ai rai yang, hpawt de nang hte rau masha langai mi mung n nga na ra ai gaw dai MADU a mying ningsang gang let ngai dagam nga nngai. Dai gaw na a asak prat tup hta hkrum sha ai nni nkri hta grau sawng htum ai ru yak tsin-yam tsindam tai na ra ai,” ngu nna tsun wu ai.

⁸Dai hpang hkawhkam wa rawt nna mare chyinghka lam makau e sa dung nga wu ai. Dai yang e shi rai nga sai lam shi a masha ni na ma ai shaloi, shanhte yawng mung shi a grup grup hkan e sa hpawng nga ma ai. Dai aten e, Israela amyu masha ni yawng gaw tinang nang a nta de hprawng mat wa shajang nga ma ai.

⁹Shanhte gaw mungdan ting hta shada da a lapran e ga li ga law nga nna, “Hkawhkam Dawi gaw anhte hpe gumlau hpyen ni a lata kaw nna hkye la mani ai. Hpilisti masha ni a lata kaw na mung anhte hpe hkye la mani ai, rai ti mung ya chyawm gaw Absalom a majaw mungdan kaw nna hprawng hkawm nga ai.

¹⁰Anhte a hkawhkam tai u ga ngu, Absalom hpe anhte namman jaw ya saga ti mung, majan pa e sat kau ai hkrum nu ai. Dai rai nna ya mung Hkawhkam Dawi hpe sa woi la na lam marai langai ngai hpa majaw n woi shakut nga myit ni?,” ngu nna shanhte shada da tsun hkat nga ma ai.

¹¹Israela amyu masha ni tsun jahta hkat ai shiga, Hkawhkam Dawi kaw du jang, shi gaw hkinjawng Zadok hte Abiahta yan hpe shangun dat nhtawm Yuda ningbaw ni hpe, “Hkawhkam wa hpe hkawhkam htingnu de bai woi la na lam nanhte hpa majaw hpang jahtum e nga nga myit ta?

¹²Nanhte gaw nye a amyu hpu nau ni rai nga myit dai; nye a ashan, nye a asai nan rai nga myit dai rai yang me, hpa majaw ngai hpe sa woi la na matu hpang jahtum e nga nga myit ni?,” ngu nna san shangun dat wu ai.

¹³Dawi gaw Amasa hpe mung sa tsun dan na matu shan hpe, “Nang gaw nye a amyu hpu nau wa rai nga ndai. Dai re ai majaw ya kaw nna Yoab a shara hta hpyen luksuk a du aya hta ngai nang hpe tawn da nga nngai. Dai hku ngai n shatai lu ai rai yang mung, Karai Kasang gaw ngai hpe si hkra adup nu ga law!,” ngu nna tsun dat wu ai.

¹⁴Dawi htet dat ai ga ni gaw Yuda masha ni yawng a sadi dung ai lam, shi hpang de tsep kawp myit kayin la lu wu ai rai nna shanhte mung shi a du salang ni yawng hte rau nhtang wa na matu, shi hpang de shangun dat ma ai.

¹⁵Hkawhkam wa bai nhtang wa ai hkrun lam hta hka rap yang shi a asak sin ya na nga, Gilgala shara de sa wa nga ai Yuda masha ni hte Yawdan hka e sa hkrum hkat ma ai.

¹⁶Dai aten hta nan Bahurim mare e nga ai Benyamin lakung na Gera a shadang sha Shime gaw Hkawhkam Dawi hpe sa tau la na nga, Yawdan hka de tin tin pru sa mat wa wu ai.

¹⁷Benyamin amyu bawsang hta na masha hkying mi mung shi hte rau nga nga ma ai. Shawlu a dinghku na shangun ma Ziba mung shi a kasha shi manga hte shangun ma marai hkun hte rau sa wa nna hkawhkam wa a shawng e Yawdan hka de du nga masai.

¹⁸Hkawhkam wa a ali ama hpung ni hpe sharap na matu hte hkawhkam wa ra sharawng ai hte maren galaw ya na matu shanhte rap mat wa ma ai. Ya hkawhkam wa hka rap na matu jin jin rai nga yang, Shime mahtang shi a man e gum dagup nhtawm,

¹⁹“Nye a madu hkawhkam wa e, Yerusalem mare kaw nna nang pru mat wa ai shani e, ngai galaw shut kau ni ai lam ni hpe malap kau ya e. Dai lam ngai hpe hkum deng e. Dai lam hpe galoi mung hkum dum ya e.

²⁰Madu e, ngai shut kau nga nngai gaw ya ngai chye nga nngai. Dai re ai majaw ngai gaw madu hkawhkam hpe sa tau la na matu, dai ni dingdung maga de nga ai amyu bawsang ni yawng a shawng e pru sa wa ring ngai,” ngu nna tsun wu ai.

²¹Zeruia a kasha Abishai mahtang ning ngu nna tsun wu ai: “Shime gaw dai MADU lata san da sai hkawhkam wa hpe matsa kau nga ai majaw si lu na rai wu ai.”

²²Rai ti mung Dawi gaw Abishai hte shi a kahpu Yoab yan hpe, “Nan a myit nshat hpe kadai san yu a ta? Nan gaw ngai hpe ru yak shoichyum ai lam jaw na ngu myit ni? Ngai gaw Israela a hkawhkam wa rai nga nngai majaw dai ni e, Israela masha ni kadai mung sat kau hkrum lu na ma ai n rai,” ngu nna tsun wu ai.

²³Dai rai nna shi gaw Shime hpe, “Nang si lu na n rai nga ndai,” ngu nna nye a ga hte nang hpe dagam se ai.

²⁴Dai hpang Shawlu a kashu Mehpiboshet mung hkawhkam wa hpe tau la na nga yu sa wa ai. Shi gaw hkawhkam wa Yerusalem mare kaw nna pru mat wa ai aten kaw nna awng padang hte bai nhtang wa ai aten du hkra, lagaw n shin, nhka mun n ahkut, hpun palawng n hkrut ai sha nga nga wu ai.

²⁵Hkawhkam wa hpe tau la na nga, Yerusalem mare kaw nna Mehpiboshet du sa wa ai shaloi hkawhkam wa gaw shi hpe, “Ataw, Mehpiboshet e, nang ngai hte rau n pru sa nga ndai. Dai gaw hpa majaw rai nga lit ta?,” ngu nna tsun wu ai.

²⁶Shi gaw, “Madu hkawhkam e, nang chye ai hte maren, ngai gaw lagaw hten ai wa rai nga nngai; nang hte rau jawn sa wa lu n-ga, ngu nna lawze hking byau na matu nye a shangun ma wa hpe pyi tsun se ai; rai ti mung shi mahtang ngai hpe gumle gumlau galaw nna hkalem kau wu ai.

²⁷Shi gaw ngai hpe madu hkawhkam hpang de sa hkyen ai hku masu hkalem kau nga ti mung, nang gaw Karai Kasang a lamu kasa hte bung nga ndai majaw na a matu jaw ai zawn re ai amu hpe galaw u.

²⁸Nye wa a dinghku masha ni yawng mung madu hkawhkam a lata hte si ging mat ai ni hkrai rai nga ga ai; rai ti mung nang chyawm gaw na a sha ku e shat lusha sha na ahkang ngai hpe jaw ya nit dai. Dai re ai majaw madu hkawhkam kaw na myi man pa ai amu kaga naw hpyi la na ahkang hpa mung n nga sali ai,” ngu nna htan wu ai.

²⁹Hkawhkam wa mung, “Nang hte Ziba gaw Shawlu a sut gan sali wunli garan la lu nga myit dai ngu nna ngai daw dan hpajang da ya mase ai majaw loi mi mung jat tsun shara n nga ra na lit dai,” ngu nna htan wu ai,

³⁰Mehpiboshet chyawm gaw, “Dai yawng Ziba la kau sanu ga; madu hkawhkam dum nta de shim lum ai hte wa lu sai majaw, nye a matu ram la nga sali ai,” ngu nna htan wu ai.

³¹Gilead mung na Barazilai wa mung hkawhkam wa Yawdan hka rap ai shaloi, asak sin ya na nga Rogelim shara kaw nna yu sa wa nga ai.

³²Barazilai chyawm gaw asak matsat shi ning du sai rai nna dingla ugut gu nga sai. Shi gaw grai sut su ai wa rai nna hkawhkam wa Mahanim mare e wa nga nga yang, shi hpe lusha hte hkap daw wu ai.

³³Hkawhkam wa gaw shi hpe, “Ngai hte rau Yerusalem mare de wa ga, ngai nang hpe lanu lahku na we ai,” ngu nna tsun wu ai.

³⁴Rai ti mung Barazilai mahtang, “Ngai gaw shaning na na asak hkrung nga lu na n rai ni ai. Shing re ai mi, madu hkawhkam hte rau Yerusalem mare de hpa lam a majaw hkan wa ang na rai ta?

³⁵Ngai gaw asak matsat shi ning du nga sali ai; dai rai yang, pyaw hpa lam loi mi mung ngai hpe jaw ya lu sana n rai; lu ai sha ai mung chye chyim lu na n rai; yu ngwi shayi shadang sha ni a mahku nsen ni hpe na lu na nngai n rai. Ngai mahtang madu hkawhkam hpe lit mi a shali she rai na ra ai law.

³⁶Dai zawn kaba la ai shagrau kumhpa hpe n hkam la ging nga nngai. Dai re ai majaw Yawdan hka wora hkran de nang hpe loi mi hkan sa dat na de ai.

³⁷Dai hpang nta de bai nhtang wa nhtawm nye nu yan wa a lupwa makau e si lu n-ga. Ndai gaw nye a kasha Hkimham rai nga ai, nang hpe daw jau na ra ai; nang hte rau shi hpe woi mat wa u. Madu hkawhkam e, nang myit mang ai amu hta kaja htum ai hku shi hkan galaw u ga,” ngu nna htan wu ai.

³⁸Hkawhkam wa gaw, “Ngai hte rau shi hpe woi mat wa na nngai; nang ra ai hte maren, shi hpe ngai galaw na we ai. Nang hpyi mahpyi hpa hpe mung na a matu ngai galaw na we ai,” ngu nna htan wu ai.

³⁹Dai hpang Dawi hte shi a masha ni yawng Yawdan hka rap mat wa ma ai. Shi gaw Barazilai hpe pup nhtawm shaman da ya wu ai; shing rai Barazilai mung nta de wa mat wa wu ai.

⁴⁰Hkawhkam wa hka rap ngut jang, Yuda masha mahkra hte Israela masha ka-ang hkup hte gaw shi hpe hkan sin ya ma ai; shi gaw Hkimham hte rau Gilgala de matut sa mat wa ma ai.

⁴¹Dai hpang Israela masha mahkra hte gaw hkawhkam wa kaw sa nna shi hpe, “Madu hkawhkam e, anhte a hpu nau Yuda masha ni yawng gaw nang hpe mung, na a dinghku masha ni hpe mung, na a masha ni yawng hpe mung Yawdan hka rap na matu nang hpe lakawn nna asak sin ya na ahkang shanhte hpe hpa majaw jaw n ta?,” ngu nna tsun ma ai.

⁴²Yuda masha ni mung, “Hkawhkam wa gaw anhte a hpu nau langai mi rai nga ai majaw dai hku anhte galaw ga ai. Dai re ai majaw dai lam gaw nanhte hpe hpa majaw pawt shangun ang nga ga ni? Anhte a lusha jahpu shi jaw ya mi ai n rai; shi anhte hpe arai hpa mung n jaw ya mi ai,” ngu nna htan ma ai.

⁴³Israela masha ni mung, “Hkawhkam wa gaw nanhte a hpu nau langai mi rai nga tim Hkawhkam Dawi hte seng ai amu hta anhte grau nna htam shi sha n-ga, seng nga ga ai. Nanhte gaw anhte hpe hpa majaw yu kaji nga myit ni? Hkawhkam wa hpe woi nhtang wa na matu anhte shawng bawng jahkrup saga ai hpe hkum malap kau ya mi!,” ngu nna tsun htang wu ai. Rai ti mung Yuda masha ni gaw shada da tsun jahpra ai lam hta Israela masha ni hta grau nna ja la nga ma ai.