Read Jinghpaw Common Language Bible 2009 2 SAMUELA 20 Bible Online

2 SAMUELA 20 - Jinghpaw Common Language Bible 2009 bible

2 SAMUELA 20

¹Benyamin amyu bawsang hta na Bikri a kasha Sheba mying nna, arawn alai n htap ai masha langai, Gilgala mare hta nga ai. Shi gaw pahtau dum dat nhtawm, “Dawi hkrat sum u ga law! Shi a hpang anhte n hkan lu na ga ai! Israela masha ni e nta de wa shajang saga law!,” ngu nna jahtau tsun wu ai.

²Dai re ai majaw Israela masha ni gaw Dawi kaw nna hprawng pru wa nhtawm, Sheba a hpang de hkan nang mat wa ma ai; rai ti mung, Yuda masha ni chyawm gaw Dawi hta sadi naw dung nga ma ai rai nna Yawdan hka kaw nna Yerusalem mare du hkra Dawi kaw hkan nang nga ma ai.

³Dawi gaw Yerusalem mare na shi a hkawhkam hkaw de bai du wa jang, dai hkawhkam htingnu sin na matu shi shangun tawn da ai lashi num shi woi la nna shanhte hpe rawng da nhtawm bau tawn wu ai. Shanhte hta ra kadawn nga ai lam ni hpe karum ya wu ti mung, shanhte hte n kanawn ai sha nga nga wu ai. Dai rai nna shanhte gaw gaida jan ni zawn naw ngam nga ai shanhte a asak hkrun lam tup dai zawn sharen da ai hkrum nga ma ai.

⁴Hkawhkam wa gaw Amasa hpe, “Yuda masha ni hpe shaga jahpawng nna hpawt din ni rai jang, shanhte hte rau ndai de bai nhtang sa wa mi,” ngu nna tsun wu ai.

⁵Amasa gaw shanhte hpe sa shaga ginrawn wu ti mung, hkawhkam wa ndat da ai aten laman, n lu shaga nhtang la lu wu ai.

⁶Dai majaw hkawhkam wa gaw Abishai hpe, “Sheba gaw Absalom hta pyi grau nna anhte hpe sharu shatsang na ra ai. Nye a masha ni hpe woi nna shi a hpang hkan su; shing n rai jang, shi gaw bunghku ngang ai mare nkau mi gan madu la nhtawm anhte a lata kaw nna lawt mat wa na ra ai,” ngu nna tsun wu ai.

⁷Dai rai nna Yoab a masha ni mung, hkawhkam wang na sin langa hte kaga hpyenla ni yawng gaw Abishai hte rau Sheba a hpang hkan shachyut na matu Yerusalem mare kaw nna pru sa wa ma ai.

⁸Shanhte gaw Gibeon mare na lunghtawn kaba de du jang, Amasa sa tau la wu ai. Yoab chyawm gaw hpyen majan rawt na matu hpyen palawng sumraw la nna n-ga hta nhtu bang nhtawm dai hpe shingkyit hta noi da wu ai. Shing rai shawng de sit sa wa yang nhtu hkrat mat lu ai.

⁹Yoab gaw Amasa hpe, “Nye a manang wa e, kaja nga n ni?,” ngu nna tsun let shi hpe pup na matu shi a hkra lata hte Amasa a nhka mun jum da ya wu ai.

¹⁰Lata maga mi de Yoab lang da ai nhtu gaw Amasa hpe hpa di na zawn n nawn da wu ai majaw, Yoab gaw shi a kan galun baw dat wu yang, pu kan ni ga ntsa de hkrat ayai mat hkra rai nga ai; shaloi shi akajawng sha si mat wa ai rai nna bai n kahtap galun ra mat wu ai. Dai hpang Yoab hte shi a kanau Abishai yan gaw Sheba hpang de matut shachyut mat wa wu ai.

¹¹Yoab a masha langai mi gaw Amasa a moi mang makau e tsap nga nna, “Yoab hte Dawi hpang maga nga ai masha shagu hte gaw Yoab a hpang hkan mu!,” ngu nna jahtau tsun ma ai.

¹²Amasa a hkum gaw asai hte galwi nga nna nmaw lam ka-ang e taw nga ai. Shing rai byin nga ai shara hta masha shagu wa hkring hkring rai nga ma ai hpe Yoab mu jang ndai nmaw lam e taw nga ai moi mang hpe pa de gang garawt mat wa nhtawm nba hte magap da wu ai.

¹³Dai moi mang hpe nmaw lam kaw nna sit kau ngut jang, masha shagu mung Sheba hpe hkan shachyut na nga, Yoab kaw hkan nang nga ma ai.

¹⁴Sheba mahtang Israela amyu bawsang yawng a lamu ga hku ga lai mat wa nhtawm Abela Bet Mahka mare de sa wa nna Bikri lakung lama na masha hpung yawng hpe jahpawng la let dai mare kata de shi hte rau hkan shang nang mat wa ma ai.

¹⁵Dai yang e Sheba nga nga ai hpe Yoab a masha ni na jang, dai mare hpe sa wang da nga ma ai. Shanhte gaw bunghku shinggan e kaduk htu nhtawm bunghku daw sharun kau na nga, bunghku npawt ni hpe htu ma ai.

¹⁶Dai mare kata e nga ai hpaji rawng ai numsha langai mi gaw mare bunghku kaw nna pru wa nhtawm, “Madat mu! Yoab hpe nang de sa wa na lam tsun dan ya mi: Ngai shi hte ga shaga mayu nngai,” ngu nna jahtau tsun wu ai.

¹⁷Yoab sa wa wu yang dai numsha gaw, “Nang Yoab rai nga n ni?,” ngu nna hkap san wu ai. Shaloi shi gaw, “Rai nga nngai,” ngu nna htan wu ai. Bai numsha gaw, “Madu e, ngai tsun ai ga na la ya e,” ngu nna tsun wu ai. Shi mung, “Ngai madat ya na nngai,” ngu nna htan wu ai.

¹⁸Dai numsha gaw, “Moi shawng de mahtang shanhte gaw, ‘Shanhte galaw law rai ga ma ai hte maren, Abela mare kata hta mahtai sa tam la la rai ma ai.

¹⁹Anhte a mare gaw kaba ai mare langai mi rai nna Israela mung hta grau nna ngwi pyaw sim sa htum ai hte sadi dung htum ai mare langai mi rai nga ai. Nang gaw ndai mare hpe hpa majaw jahten sharun kau mayu nga n ta? Dai MADU madu da ai mare hpe nang sharun jahten kau mayu nga n ni?,” ngu nna tsun wu ai.

²⁰Yoab gaw, “Galoi n rai nu ga! Na a mare hpe ngai galoi n sharun, n jahten kau na we ai!

²¹Dai gaw anhte a yaw shatawng shada ai lam n rai nga ai. Ehprim bum ga na Bikri a kasha Sheba mying ai masha langai mi gaw Hkawhkam Dawi hpe gumlau rawt hpang wa nu ai. Dai wa hpe ap ya mi ai rai yang, ngai ndai mare kaw na htingnut mat wa na nngai.” ngu nna tsun wu ai. Dai numsha mung, “Nang hpe mare bunghku ntsa hku shi a baw kabai jahkrat ya na ga ai,” ngu nna tsun wu ai.

²²Dai hpang numsha gaw mare masha ni hpang de wa nhtawm shi maw mawn ai lam tsun dan wu ai rai nna, Sheba a baw daw la nhtawm Yoab hpang de bunghku ntsa hku kabai jahkrat ya wu ai. Shaloi Yoab pahtau dum dat let, shi a masha ni dai mare kaw na pru mat wa na kumla madun dat wu ai majaw, tinang nang a nta de wa shajang mat ma ai. Yoab mung Yerusalem mare de hkawhkam wa hpang de bai nhtang mat wa wu ai.

²³Yoab gaw Israela hpyen luksuk hpe up hkang ai du rai nga ai; Yehoiada a kasha Benaia gaw Dawi a asak sin ai amu woi hpareng ai wa rai nga ai.

²⁴Adoniram mahtang maja magam amu galaw hpung hpe woi hpareng nga ai; Ahiluda a kasha Yehoshahpat gaw labau laika ka mazing ai hpareng rai nga ai.

²⁵Shewa gaw hkawhkam hkaw hte seng ai amu madu rai nga ai; Zadok hte Abiahta yan gaw hkinjawng rai ma ai.

²⁶Yaira mare na Ira mung Dawi a hkinjawng langai mi rai nga ai.