Read Jinghpaw Common Language Bible 2009 2 SAMUELA 22 Bible Online

2 SAMUELA 22 - Jinghpaw Common Language Bible 2009 bible

2 SAMUELA 22

¹Dai MADU gaw Dawi hpe Shawlu hte kaga shi hpe gumlau ai hpyen ni a lata kaw nna hkye mawai la ai shaloi, Dawi gaw ndai mahkawn ga hte dai MADU hpe mahkawn mangoi wu ai:

²Dai MADU gaw ngai hpe makawp maga ai wa rai nna; shi gaw ngang ai hpyen dap rai nga ai.

³Nye a Karai Kasang gaw ngai hpe makawp maga ai wa rai nga ai; shi hte rau rai nga nngai majaw ngai shim nga lu nngai. Shi gaw ngai hpe ninggang langai zawn makawp maga ai hte; shi gaw ngai hpe hkap makawp la ai hte shim hkra tawn da nga ai. Shi gaw ngai hpe hkye hkrang la ai wa rai nga ai; ngai hpe makawp maga la ai hte kashun kashe du daw sai hkaw amu kaw nna mung hkye mawai la nga ai.

⁴Dai MADU hpe ngai shaga yang, ngai hpe nye a gumlau hpyen ni a lata kaw na hkye mawai la nga ai. Dai MADU hpe shakawn kungdawn mu!

⁵Si hkrung si htan a hka leng ni ngai hpe gawan tawn nna, jahten shabyak ai hka leng ni ngai hpe gamyet taleng bun nga ai.

⁶Si hkrung si htan a hkrit hpa gaw ngai hpe wang tawn nna; lup sung hku gaw nye a matu mahkam hkam da ya nga ai.

⁷Ngai ru tsang hkrum ai shaloi, dai MADU hpe ngai shaga nngai; karum la na matu nye a Karai Kasang hpe ngai shaga nngai. Shi a htingnu hta nye a nsen hpe shi na wu ai rai nna, karum la na matu nye a hpyi jahtau ai ga hpe shi madat ya nga sai.

⁸Shaloi ginding aga gaw gari ashun nna awam nga ai; Karai Kasang masin pawt ai majaw sumsing lamu a npawt ni kangi kanga rai nna ashun awam nga ai!

⁹Shi a ladi kaw na wan hkut pru nna; shi a n-gup kaw na wan hkru nga ai hte grung ai wan n-ga chyi nga ai.

¹⁰Shi gaw sumsing lamu hpe gang je nna yu wa nhtawm, shi a lagaw npu e htat ai nsin rai nga ai.

¹¹Singkaw tu ai hkrung kanu a ntsa e chyang ai hte pyen hkawm nhtawm; nbung a singkaw ntsa e shi hkawm sa nga ai.

¹²Shi gaw chyip mak re ai nsin hte shi hkum hpe nan ka-up da nhtawm; htat ai sumwi ni hte hka ni hte gawan da nga ai.

¹³shi a man na htoi kabrim ai shara kaw na hkru nga ai wan n-ga chyi nga ai.

¹⁴Shaloi dai MADU gaw sumsing lamu kaw nna mu shangoi dat ai majaw, Chyahtum Chyalai N-gun Rawng Ai Karai Kasang a nsen na lu nga ai.

¹⁵Shi gaw shi a pala ni gap dat nna, shi a gumlau hpyen ni hpe shabra kau nu ai; myihprap gala dat nna shanhte hpe jahprawng kau wu ai.

¹⁶Dai MADU gaw shi a gumlau hpyen ni hpe daru kau nna, masin pawt let shanhte hpe shabam dat wu yang; panglai hka a htumpa ni dawng pru wa nna, ginding aga a npawt nhpang ni dan pru nga ai.

¹⁷Dai MADU gaw matsaw ntsa de na ladawn dat nhtawm ngai hpe tek jum da nga ai; sung ai hka hta na mung shi ngai hpe gang shaw la ni ai.

¹⁸Shi gaw n-gun ja ai nye a gumlau hpyen ni a lata kaw na mung, ngai hpe n ju n dawng ai ni yawng kaw na mung, shi ngai hpe hkye mawai la nga sai. Shanhte gaw nye a matu n-gun nau wa ja la nga ma ai.

¹⁹Ngai ru yak hkrum sha ai shaloi, shanhte ngai hpe gasat ma ai; rai ti mung dai MADU ngai hpe hkye hkrang la nga ai.

²⁰Shi gaw ngai hpe hkrit hpa shara kaw na mung karum la nga ai; shi gaw ngai hta awng sharawng nga ai majaw ngai hpe hkye hkrang la nga sai.

²¹Ngai gaw jaw ai amu galaw nga nngai majaw dai MADU ngai hpe shagrau kumhpa jaw ya nga ai; ngai hta mara n kap nga ai majaw shi ngai hpe shaman ya nga ai.

²²Dai MADU a tara hpe ngai madat mara ai rai nna, nye a Karai Kasang kaw na kayin mat wa nngai n rai.

²³Shi a tara ni yawng hpe ngai hkan sa ni ai; shi a hkang da ai ga ni hpe ngai n madat nga nngai n rai.

²⁴Ngai hta mara n kap nga ai majaw shut hpyit amu galaw ai kaw na mung ngai koi yen nga ai hpe shi chye nga ai.

²⁵Ngai gaw jaw hkrak ai amu galaw nga nngai majaw mung, ngai hta mara n kap nga ai majaw mung, shi ngai hpe kumhpa jaw shagrau ya nga ai.

²⁶O MADU e, nang hta sadi dung nga ai ni hta nang sadi dung nga ndai; hkum tsup ai ni hpe dik hkra mai kaja ai lam madun ya nga ndai.

²⁷Nang gaw san seng ai ni hpe san seng ai myit madun dan ti mung; n hkru n shawp ai ni hte chyawm gaw nhtan shai nga ndai.

²⁸Nang gaw shagrit shanem ai myit rawng ai ni hpe hkye mawai la ndai; rai ti mung gumrawng gumtawng ai ni hpe chyawm gaw nang shagrit kau nga ndai.

²⁹MADU e, nang gaw nye a nhtoi rai nga ndai, ngai kaw na nsin hpe nang jahkoi kau ya nga ndai.

³⁰Nang gaw ngai hpe nye a gumlau hpyen ni hpe htim gasat na n-gun mung, shanhte a dahpran shara ni hpe dang kau lu na atsam marai mung jaw ya nit dai.

³¹Karai Kasang gaw shi a amu gade sha hkum tsup nga ai hte shi tsun ai ga ni gade sha kam hpa mai nga a hka! Shi a makawp maga lam hkan tam ai ni yawng a matu shi gaw ninggang langai zawn rai nga ai.

³²Dai MADU chyu sha Karai Kasang rai nga ai; Karai Kasang chyu sha anhte a dahpran shara rai nga ai.

³³Ndai Karai Kasang gaw nye a ngang ai shingbyi shara rai nga ai; shi gaw nye a hkrun lam hpe shim lum hkra lakawn ya nga ai.

³⁴Shi gaw ngai hpe shan nga lagaw zawn shangang shakang ya nna, shi gaw ngai hpe bum ni a ntsa e shim hkra bau sin ya nga ai.

³⁵Shi gaw ngai hpe majan a matu sharin ya nna; ja htum ai ndan hpe ngai akyu jashawn lu nga nngai.

³⁶O MADU e, nang ngai hpe makawp maga nna hkye hkrang la nga ndai; na a karum la ai lam gaw ngai hpe galu kaba shangun nga ai.

³⁷Nang gaw ngai hpe rim la hkrum na hkat kaw nna makawp la nga ndai majaw ngai galoi mung n kashawt nngai.

³⁸Nye a gumlau hpyen ni hpe ngai hkan shachyut nna dang kau nngai; shanhte hpe shamyit kau lu ai aten du hkra ngai jahkring da nga nngai n rai.

³⁹Ngai shanhte hpe adup kadawng kau mawe ai majaw n rawt tsap lu ma ai; shanhte gaw nye a man e sum kadawng mat masai.

⁴⁰Nang gaw ngai hpe majan gasat na matu n-gun jaw ya ai hte nye a gumlau hpyen ni hpe dang kau lu na awng padang mung jaw ya nga ndai.

⁴¹Nang gaw nye a gumlau hpyen ni hpe ngai kaw nna jahprawng kau ya nhtawm; ngai hpe n ju n dawng ai ni hpe shamyit kau lu nga ndai.

⁴²Karum la na matu shanhte tam ma ti mung, shanhte hpe kadai mung n hkye mawai la nga ai; Dai MADU hpe shanhte shaga ti mung, shi htan ya wu ai n rai.

⁴³Ga nhpu zawn tai mat hkra ngai shanhte hpe adup mani mawe ai; nmaw lam ntsa na hkumpup zawn shanhte hpe ngai kabye anya kau we ai.

⁴⁴Nang gaw ngai hpe gumlau masha ni a lata kaw na hkye mawai la nit dai; masha amyu baw ni hpe up hkang na ahkang ngai hpe lajang ya nga ndai. Ngai n chye ai masha ni mung nye a up hkang ai npu hta taw nga ma ai.

⁴⁵Maigan masha ni gaw nye a man e gum dagup ma ai; ngai tsun ai ga shanhte na ai shaloi madat mara ma ai.

⁴⁶Shanhte lu ai nden marai n rawng mat malu ai; shanhte a hpyen dap ni kaw na hkrit gari ai hte pru wa ma ai.

⁴⁷Dai MADU gaw ahkrung nga ai! Nye a dahpran shara rai nga ai wa hpe shakawn kungdawn mu! Ngai hpe hkye hkrang la ai dai n-gun lapyin rawng ai Karai Kasang a galu kaba ai lam hpe htawn tsun nga mu!

⁴⁸Shi gaw ngai hpe nye a gumlau hpyen ni hpe dang kau lu na awng padang ngai hpe jaw ya nga ai; masha amyu baw ni hpe nye a up hkang ai npu hta shi tawn da nga ai;

⁴⁹nye a gumlau ni a lata kaw nna ngai hpe hkye mawai la nga ai. O MADU e, nye a gumlau hpyen ni hpe dang kau lu na awng padang nang ngai hpe jaw ya nga ndai hte kashun kashe du daw sai hkaw amu galaw shapraw ai masha ni a lata kaw nna makawp maga la nga ai.

⁵⁰Dai re ai majaw, amyu baw ni hta ngai nang hpe shakawn kungdawn nngai; ngai nang hpe mahkawn shakawn nngai.

⁵¹Karai Kasang gaw shi a hkawhkam wa hpe galu kaba ai awng padang jaw ya nga ai; shi gaw shi lata san da nu ai wa ngu ai, Dawi hte shi a amyu matu ni hpe htani htana dinggrin tsaw ra myit madun dan nga ai law.