Read Jinghpaw Common Language Bible 2009 2 SAMUELA 5 Bible Online

2 SAMUELA 5 - Jinghpaw Common Language Bible 2009 bible

2 SAMUELA 5

¹Dai hpang Israela amyu bawsang ni yawng gaw Hebron mare de Dawi kaw sa nna, “Anhte gaw na a hkum shan, na a asai nan rai nga ga ai.

²Lai sai aten, Shawlu anhte a hkawhkam naw rai nga ai aten kaw nna pyi Israela amyu masha ni hpe majan pa hkan nang woi awn yu nit dai. Nang mung dai MADU a amyu masha ni hpe woi awn nna shanhte hpe up hkang ai wa tai wa na lam, shi nang hpe ga sadi jaw da nga nit dai,” ngu nna tsun ma ai.

³Dai rai nna Israela ningbaw ni yawng gaw Hebron mare e nga ai Hkawhkam Dawi hpang de du sa ma ai. Shi mung shanhte hte chyoi pra ga shaka galaw nna jinghku hku tawn wu ai; shanhte gaw shi hpe namman jaw ya nhtawm shi mung Israela a hkawhkam tai wa nu ai.

⁴Shi hkawhkam tai wa ai aten hta Dawi gaw asak sumshi ning du nga sai; shi gaw shaning mali shi ning tup up hkang kau nu ai.

⁵Shi gaw Hebron mare e nga nna Yuda mung hpe sanit ning e shata kru up hkang nhtawm Yerusalem mare e nga nna Israela hte Yuda mung yawng hpe sumshi masum ning tup up nga wu ai.

⁶Ya aten du jang, Hkawhkam Dawi hte shi a masha ni gaw Yerusalem mare hpe htim gasat na nga, pru sa wa ma ai. Dai mare e nga ai Yebusi masha ni chyawm gaw mare dai hpe Dawi n lu gasat dang la na zawn myit nawn da mu ai rai nna shanhte gaw shi hpe, “Nang gaw ndai de galoi mung shang lu na ndai n rai; myi kyaw ai ni hte lagaw hten ai ni pyi nang hpe lu shingdang kau lu nga ai,” ngu nna tsun ma ai.

⁷(Rai ti mung Dawi gaw shanhte a Ziun hpyen dap hpe gasat dang la kau nna, dai hpe Dawi a Mare ngu nna shamying da nga sai.”)

⁸Dai shani e Dawi gaw shi a masha ni hpe, “Ngai zawn zawn Yebusi masha ni hpe n dawng ai masha nang e kadai wa nga nga a ni?, nga nga ai rai yang, shanhte hpe sat kau ram nga ai n rai ni? Dai rai nna hka hkawng hku lung wa nhtawm dai matsan mayan re ai myi kyaw ni hte lagaw hten ai ni hpe htim gasat mu,” ngu nna tsun wu ai. (Dai re ai majaw dai gaw, “Myi kyaw ai ni hte lagaw hten htu ai ni gaw dai MADU a nta de n shang lu na ma ai,” ngu ai ga malai tsun ma ai.)

⁹Dai hpyen dap hpe gasat dang kau ngut ai hpang, dai shara e Dawi dung nna dai hpe, “Dawi a Mare,” ngu nna shamying wu ai. Shi gaw dai mare grup grup hte kawng a sinpraw maga de na lamu ga shara ni hta gaw gap galaw lajang da wu ai.

¹⁰Chyahtum Chyalai N-gun Rawng ai MADU Karai Kasang gaw shi hte rau nga nga ai majaw shi gaw aten shagu grau grau nna n-gun ja wa nga ai.

¹¹Turu Hkawhkam Hiram gaw hpaga yumga hpung langai mi hpe Dawi hpang de shangun dat wu ai; shi gaw hkawhkam htingnu gap na matu nga nna marau hpun tawng ni, lasama ni hte nlung gaw ai ni hte hpawn Dawi hpe karum madi shadaw dat nga ai.

¹²Dai MADU gaw shi hpe Israela hkawhkam aya shagrin ya nu ai hpe mung, shi a amyu masha ni a matu shi a mungdan hpe ngamu ngamai shangun nu ai hpe mung Dawi dum chye nga ai.

¹³Hebron mare kaw nna Yerusalem mare de htawt ai hpang, lashi num ni hte madu jan ni hpe grau la jat wu ai rai nna shayi shadang sha ni grau law jat nga wu ai.

¹⁴Yerusalem mare e shi a matu shangai ya ai kashu kasha ni gaw, Shamua, Shoba, Nahtan, Shawlumon;

¹⁵Iba, Elishua, Nehpeg, Yahpia,

¹⁶Elishama, Eliada, Elihpelet hte rai ma ai.

¹⁷Dawi gaw Israela hkawhkam tai nga sai hpe Hpilisti masha ni na jang, shi hpe sa rim la na nga, shanhte a hpyen luksuk ni rawt sa wa ma ai. Shing nga ai shiga hpe Dawi na jang, hpyen dap de sa nga mat wu ai.

¹⁸Hpilisti masha ni mung Rehpim Kadit de du nna, dai hpe sa madu la ma ai.

¹⁹Dawi gaw dai MADU hpe, “Hpilisti masha ni hpe sa gasat lu na rai ni? Nang ngai hpe awng padang jaw ya na n ni?,” ngu nna san wu ai. Dai MADU mung, “Rai sa, htim gasat su! Ngai nang hpe awng padang jaw na de ai!,” ngu nna htan wu ai.

²⁰Dawi gaw Bala Perazim de lung wa nhtawm dai yang e Hpilisti masha ni hpe gasat dang kau wu ai. Shi gaw, “Dai MADU gaw nye a gumlau hpyen ni hpe hka mawru shaza kau ai zawn galun htinggrang kau nu ai,” ngu nna tsun wu ai. Dai rai nna shara dai hpe Bala Perazim ngu nna shamying wu ai.

²¹Dai yang kaw nna Hpilisti masha ni hprawng mat wa ma yang, shanhte a hpara sumla ni kau da ma ai rai nna Dawi hte shi a masha ni dai ni hpe magawn la mat wa ma ai.

²²Hpilisti masha ni gaw Rehpim Kadit de nhtang sa wa nhtawm dai shara hpe kalang mi bai sa madu la nga ma ai.

²³Dawi gaw kalang mi bai dai MADU hpe san yu wu yang, “Ndai yang kaw nna shanhte hpe hkum gasat; rai ti mung shinggrup da nhtawm balsam hpun ni tu nga ai makau htep kaga maga hku nna shanhte hpe htim gasat na shajin da u.

²⁴Hpun ndung ni hta rawt hkawm wa ai nsen na jang chyawm gaw gasat sanu; hpa majaw nga yang, Hpilisti luksuk hpe gasat dang kau na matu na a shawng e ngai sa wa na rai nga nngai,” ngu nna htan wu ai.

²⁵Dai MADU hkang da nu ai hte maren, Dawi hkan galaw ai rai nna, Geba kaw nna Gezera du hkra Hpilisti masha ni hpe gasat nhtang kau lu ma ai.