Read Jinghpaw Common Language Bible 2009 2 SAMUELA 8 Bible Online

2 SAMUELA 8 - Jinghpaw Common Language Bible 2009 bible

2 SAMUELA 8

¹Ya aten ram ram na ai hpang, Hkawhkam Dawi gaw Hpilisti masha ni hpe bai htim gasat ai hte dang kau wu ai rai nna mung ting hpe up hkang nga ai shanhte a daru magam n-gun hpe jahtum kau ya wu ai.

²Dai hpang Moba mung masha ni hpe shi gasat dang kau wu ai. Shi gaw bawng masha shagu hpe ga ntsa e kaleng da shangun nhtawm dai ni kaw na masha masum hta lahkawng hkawng shaw la nna sat kau wu ai. Dai rai nna Moba masha ni mung Dawi a up hkang ai npu de shang mat wa ai hte shi hpe ahkun hkanse bang jaw ma ai.

³Dai hpang Dawi gaw Uhprat a lahta daw na lamu ga hpe bai up hkang lu hkra nga, Zoba mungdaw hpe up ai Rehob a kasha Suri Hkawhkam Hadadeza hpe gasat dang kau wu ai.

⁴Dawi gaw dai wa a gumra jawn masha hkying mi sanit tsa, lagaw hpyenla mun lahkawng hte hpe rim la lu wu ai. Bai hpyen leng latsa a matu gumra law ram daram shi tawn da ya nna, kaga ngam ai ni yawng hpe lahkap dan kau ya wu ai.

⁵Damasku mare na Suri masha ni Hkawhkam Hadadeza hpe sa karum la na matu luksuk hpung mi hpe dat dat mu ai shaloi, Dawi gaw dai ni hpe htim gasat kau nhtawm masha mun lahkawng hkying lahkawng hte hpe sat kau wu ai.

⁶Dai hpang shi gaw shanhte a lamu ga hta hpyen dap tawn da wu ai rai nna shanhte mung shi a up hkang ai npu hta taw ai hte shi hpe ahkun hkanse bang ya ma ai. Dai MADU mung Dawi hkawm sa ai shara shagu hkan awng dang shangun nga ai.

⁷Hadadeza a du salang ni lang ai ja ninggang ni hpe mung Dawi lu rim wu ai rai nna, Yerusalem mare de la wa wu ai.

⁸Hadadeza up hkang ai Beta hte Berohtai mare na magri mang law law hpe mung shi la mat wa wu ai.

⁹Hadadeza a hpyen luksuk yawng hpe Dawi gasat dang sai lam Hamat Hkawhkam Toi na wu ai.

¹⁰Shaloi shi gaw Toi e law law lang gasat ninghkap yu sai Hadadeza hpe gasat dang kau lu sai Hkawhkam Dawi a awng padang hpe shakawn shagrau na matu mung, shi hpe sa shakram la na matu mung, shi a kasha Yoram hpe shangun dat wu ai. Yoram mung aja, gumhpraw hte magri mang hte galaw ai kumhpa arung arai ni hpe la sa ya wu ai.

¹¹Hkawhkam Dawi chyawm gaw nawku daw jau ai hta lang na matu dai ni hte hpawn

¹²shi gasat dang da sai Edom, Moba, Amon, Hpilisti hte Amalek masha amyu baw ni kaw na shi la wa ai aja, gumhpraw hpe mung, Hadadeza kaw na lu la ai lanep kau chyen ni hpe mung nawng ya wu ai.

¹³Edom masha mun mi hkying matsat hte hpe Jum Kadit e sat kau lu nna nhtang wa ai shaloi, Dawi gaw mi na hta grau nna mying dan hkung gumhkawng wa salu ai.

¹⁴Shi gaw hpyen dap ni hpe Edom mung ting hta tawn da wu ai rai nna shanhte mung shi a up hkang ai npu hta taw nga ma ai. Dai MADU mung Dawi hpe shara shagu hkan awng padang lu la shangun nga ai.

¹⁵Dawi gaw Israela mung ting hpe up hkang nga ai rai nna shi a amyu masha ni hpe tut nawng teng man rap ra ai hku jeyang ya nga ai.

¹⁶Kanu Zeruia a kasha Yoab gaw hpyen luksuk up hkang du kaba rai nga ai; Ahiluda a kasha Yehoshahpat gaw labau ka matsing ai ni a hpareng rai nga ai.

¹⁷Ahitub a kasha Zadok hte Abiahta a kasha Ahimelek yan gaw hkinjawng yan rai ma ai. Seraia chyawm gaw hkawhkam hkaw na amu madu rai nga ai;

¹⁸Yehoiada a kasha Benaia gaw Dawi a hkum hpe makawp maga ai hpareng wa rai nga ai; Dawi a shadang sha ni mung hkinjawng ni rai ma ai.