Read Jinghpaw Common Language Bible 2009 1 HKAWHKAM 10 Bible Online

1 HKAWHKAM 10 - Jinghpaw Common Language Bible 2009 bible

1 HKAWHKAM 10

¹Sheba hkawhkam jan gaw Shawlumon a mying kajai gumhkawng nga ai hpe na jang, shi hpe htai yak na zawn nawn ai ga san ni hpe san let chyam yu na nga, Yerusalem mare de sa wa wu ai.

²Shi gaw shi kaw hkan gumbawm nang ai masha wunawng wuwa ni hte rau gawla-uk ni hta manam pyaw ai namji namya ni, lungseng ni hte ja law law htaw let woi sa wa wu ai. Shi gaw Shawlumon hte hkrum jang, shi myit shapraw lu ai ga san yawng hte shi hpe san yu wu ai.

³Shawlumon gaw dai ga san ni yawng hpe htai ya ai rai nna shi tsun dan ai lam hta shi a matu nau wa yak ai lam hpa mung n nga nga wu ai.

⁴Sheba hkawhkam jan gaw Shawlumon a hpaji byeng-ya hpe mung, shi gaw gap da sai shi a hkawhkam htingnu hpe mung,

⁵shi a sha ku ntsa hta daw jau ai lusha hpe mung, shi a du salang ni nga ai nta ni hpe mung, shi a hkawhkam hkaw na rung magam bungli galaw ai hpung kaba hte shanhte bu hpun sumli ai hking ni hpe mung, shi a lusha poi ni hpe daw jau ya nga ai shangun ma ni hpe mung, Nawku Htingnu hta shi nawng jau ya ai shagu hkungga ni hpe mung mu jang nsa pyi n lu sa la na daram mau kajawng mat wu ai.

⁶Shi gaw hkawhkam Shawlumon hpe, “Nang hte na a hpaji byeng-ya a lam hte seng nna nye a mungdan hta ngai na lu ai ga gaw teng nga a hka!

⁷Rai ti mung nye a myi hte chyaw dai lam ni yawng hpe ngai n sa yu lu dingsa, dai lam hpe ngai kam lu nga nngai n rai. Yu u, de a chyen mi hpe pyi ngai n na yu nngai; na a hpaji byeng-ya hte sut gan gaw ngai hpe tsun dan yu ai hta pyi grau nna law nga ai.

⁸Na a madu jan ni gaw gade sha gam kaja nga ma hka! Na a man e tut nawng nga nga ai na a shangun ma ni hte na a hpaji ga ni hpe na la lu na ahkaw ahkang lu la ai ni gaw gade sha gam kaja nga ma hka!

⁹Dai MADU na a Karai Kasang hpe shakawn kungdawn ga law! Shi gaw nang hpe Israela hkawhkam shatai nhtawm shi hte nang rau rai nga ai hpe gade sha yu awng sharawng nga ai hpe madun dan nga nu ai. Shi gaw Israela hpe prat dingsa tsaw ra nga ai majaw teng man ai tara hte tara daw dan lu na matu shi nang hpe shanhte a hkawhkam shatai ya nit dai,” ngu nna tsun wu ai.

¹⁰Shi gaw Hkawhkam Shawlumon hpe shi la sa ai ja tan manga daram, manam pyaw ai namji namya hte lungseng law law jaw ya wu ai. Hkawhkam Shawlumon hpe shi sak jaw ai dai manam pyaw ai baw namji namya gaw hkawhkam wa gara aten galoi mung lu la yu ai kumhpa hta grau law htum rai nga ai.

¹¹(Ohpira mung na ja htaw wa ai Hiram a sanghpaw li hpung gaw dai mung na junipa hpun hte ja lungseng law law hpe mung la wa ya ma ai.

¹²Shawlumon gaw Nawku Htingnu hte hkawhkam htingnu hta hkrai shum galaw ai shaloi dai hpun ni hpe lang nga ai; mahkawn mangoi ai ni a matu dawraw tingse galaw ai hta mung lang nga ai. Dai junipa hpun gaw Israela mung de jashawn ai gun rai hta kaja htum ai hpun rai nga ai; dai zawn re ai hpun hpe galoi mung bai n mu yu nga sai.)

¹³Hkawhkam Shawlumon gaw Sheba Hkawhkam jan hpe shi hpyi mahpyi hta kaga htung hte maren jaw ya ang ai kumhpaw kumhpa ni hpe jaw mayu ai made jaw ya wu ai. Dai hpang shi hte shi kaw hkan gumbawm nang ai ali ama ni Sheba mung de nhtang mat wa ma ai.

¹⁴Hkawhkam Shawlumon a laning mi hta lu la ai aja gaw tan 25 jan rai nga ai;

¹⁵dai hta kaga hpaga ga ai masha ni kaw na hta la lu ai ahkun ni, hpaga amyat ni hte Arabi hkawhkam ni hte Israela ginwang ni hpe up hkang ai mung du ni sak jaw ai shagrau kumhpa ni naw lawm nga ai.

¹⁶Shawlumon gaw ninggang kaba lahkawng tsa hte hpe ja pawng 15 daram hte chya magap da nga ai.

¹⁷Shi gaw ninggang kaji masum tsa hte hpe mung aja pawng 4 daram hte chya magap da wu ai. Shi gaw ndai ninggang ni yawng hpe Lebanon Nam Maling a htingnu hta tawn da wu ai.

¹⁸Shi gaw hkawhkam tingnyang kaba langai mi hpe mung galaw wu ai. De a daw chyen mi hpe magwi kawng hte galaw nna ngam ai daw hpe jet htum ai ja hte sup da nga ai.

¹⁹Tingnyang de lung wa na matu lakang n-gam kru rawng nna, lakang n-gam shagu a matu jahtum lahkawng maga hta hkanghkyi langai ngai tawn da ai rai nna hkanghkyi yawng shi lahkawng rai nga ai. Tingnyang baw a shingdu maga de din din rai nga nna, dung shara a maga mi hte maga mi ngu na lata mara ai shara ni hta hkanghkyi langai ngai tawn da nga ai. Dai zawn re ai gaw gara mungdan hta mung n galaw shadun da yu nga ai.

²¹Shawlumon a ntsin du lu ai gawm ni yawng hpe aja hte galaw da nga ai; Lebanon Nam Maling a htingnu hta lang ai wan ni yawng ja jet hkrai rai nga ai, gumhpraw hpe n lang da nga ai; Shawlumon a prat e gumhpraw gaw hpa manu n dan ai zawn nawn da mu ai.

²²Shi gaw nammukdara hta hkawm ai sanghpaw li hpung ni lu ai rai nna Hiram a sanghpaw li hpung ni hte rau hkawm nga ma ai. Shing rai masum ning du shagu shi a sanghpaw li hpung ni gaw ja gumhpraw, magwi kawng, woi lagang ni hte woi ni htaw let nhtang wa wa rai ma ai.

²³Hkawhkam Shawlumon gaw kaga hkawhkam ni kadai hta mung grau nna sut su ai hte hpaji byeng-ya rawng nga ai;

²⁴Karai Kasang Shawlumon hpe jaw ya nu ai hpaji byeng-ya hpe sa madat hkam la na matu mungkan ga ting ra sharawng nga ma ai.

²⁵Shi kaw sa ai masha kadai mung shi a matu kumhpa ngu na aja, gumhpraw, palawng galu, laknak, manam pyaw ai baw namji namya, gumra hte lawze ni hpe la sa ya ma ai. Dai hpe shaning shagu matut sak jaw ma ai.

²⁶Shawlumon gaw gumra leng hkying mi mali tsa hte gumra dap na gumra mun mi hkying lahkawng rawng ai n-gun hpe gaw sharawt da wu ai. Dai hta na nkau mi hpe Yerusalem mare hta mung, ngam ai ni hpe kaga mare ni hkan bau rem tawn da nga ai.

²⁷Shi hkaw dung ai aten hta Yerusalem mare e gumhpraw hpe nlung zawn lang nna, arit hpun gaw Yuda mung bum lagaw hkan e tu ai maihkawng hpun ni zawn law htam nga ai.

²⁸Hkawhkam wa a dat kasa ni mahtang Musri hte Kiliki mungdan hkan na shapraw ai gumra ni hte,

²⁹Egutu mung na shapraw ai gumra leng manu ni gaw shanhte a lata hta rai nga ai. Shanhte gaw Hiti hte Suri hkawhkam ni hpe gumra ni hte gumra leng ni hpe dut ya nga ma ai; shing rai leng langai mi hpe gumhpraw 600 hte gumra langai mi hpe gumhpraw 150 hte ging dan ai hku dut ma ai.