Read Jinghpaw Common Language Bible 2009 1 HKAWHKAM 19 Bible Online

1 HKAWHKAM 19 - Jinghpaw Common Language Bible 2009 bible

1 HKAWHKAM 19

¹Hkawhkam Ahab gaw Elia galaw nu ai amu magup shagu hte Bala myihtoi ni yawng hpe kaning rai sat kau sai lam shi a madu jan Yezebela hpe tsun dan wu ai.

²Shi gaw Elia hpang de ning ngu shiga shana dat wu ai: “Hpawt de ndai aten e, myihtoi ni hpe nang galaw kau dat nit dai hte maren, nang hpe ngai n galaw ai rai yang, karai ni ngai hpe si hkra adup mi ga law.”

³Elia gaw hkrit nga ai rai nna shi asak a matu hprawng gyem na nga, shi a shangun ma wa hpe woi let Yuda mung na Berasheba mare de sa mat wa ma ai. Dai yang e shangun ma wa hpe jahti tawn nhtawm,

⁴Elia mahtang nam mali kata de lani mi tup hkawm shang mat wa wu ai. Shi hkring nna hpun langai a shingnip hta dung nga let, shi si mayu nu ai hpe hpyi nga wu ai. Shi gaw, “MADU e, dai gaw nau wa rai la sai, nye asak hpe dawm la ya ni; ngai gaw si na mung rai nga nngai!,” ngu nna hpyi tsun wu ai.

⁵Shi gaw hpun npu e galeng taw let yup pyaw nga ai. Lamu kasa gaw akajawng sha shi hpe sa ahtawk let, “Rawt u, shat sha u,” ngu nna tsun wu ai.

⁶Bai grup yin de shi mada yu dat yu wu yang, shi a baw makau e muk pa mi hte hka yam mi nga nga ai hpe mu wu ai. Shi mung lu sha la nna bai kaleng taw nga wu ai.

⁷Dai MADU a lamu kasa mung bai nhtang sa let lahkawng lang ngu na shi hpe jasu sharawt nhtawm, “Rawt u, shat sha u. Ndai hkrun lam gaw na a matu nau wa rai la na ra ai,” ngu nna tsun wu ai.

⁸Elia gaw rawt nna lu sha wu ai majaw chyoi pra ai bum ngu ai Sina de nhtoi mali shi ya tup hkawm sa wa na matu dai lusha gaw shi hpe n-gun ram ram jaw ya nga ai.

⁹Shi gaw shana e nga shalai kau na nga, lungpu langai mi de shang mat wa wu ai. Shaloi dai MADU gaw akajawng sha du nna, “Elia e, ndai yang e nang hpa galaw nga n ta?,” ngu nna san wu ai.

¹⁰Shi gaw, “Chyahtum chyalai n-gun rawng ai MADU Karai Kasang e, ngai gaw nang - nang hpe chyu sha tut nawng daw jau yu sade ai. Rai ti mung Israela amyu masha ni mahtang nang hte shagrin da ai ga shaka hpe jahten kau nna na a tawn hkungri ni hpe sharun shabya kau let na a myihtoi ni yawng hpe sat kau manu ai. Ngai chyu sha ngam nga ni ai. Shanhte gaw ngai hpe sat kau na matu shanhte tam shakut nga ma ai!,” ngu nna htan wu ai.

¹¹Dai MADU gaw shi hpe, “Pru sa nhtawm bum pungding ntsa nye a man e tsap nga u,” ngu nna tsun wu ai. Dai MADU lai wa nna kawng ni hpe ga ayai kau ai hte, lunghkrung ni hpe agrawp kau shangun ai nbung bungga hpe dat dat wu ti mung, dai MADU gaw nbung hta lawm nga ai n rai. Dai nbung sim mat ai hpang nnang nawn nawn wa ti mung dai MADU gaw nnang nawn nawn ai hta lawm nga ai n rai.

¹²Nnang nawn nawn ngut ai hpang wan bai du ti mung, dai MADU gaw wan hta lawm nga ai n rai. Dai wan a hpang akya sha nga nna kahte ai nsen pru nga ai.

¹³Elia gaw dai nsen hpe na jang, shi a myi man hpe shi a hpajawng hte magap nna lungpu makau e sa tsap nga ai. Shaloi nsen langai mi gaw shi hpe, “Elia e, nang ndai yang e hpa galaw nga n ta?,” ngu nna san wu ai.

¹⁴Elia gaw, “Chyahtum chyalai n-gun rawng ai MADU Karai Kasang e, ngai gaw nang-nang hpe chyu sha tut nawng daw jau yu sade ai. Rai ti mung Israela amyu masha ni mahtang nang hte shagrin da ai ga shaka hpe jahten kau nna na a tawn hkungri ni hpe sharun shabya kau let na a myihtoi ni yawng hpe sat kau manu ai. Ngai chyu sha ngam nga ni ai; ngai hpe sat kau na matu shanhte tam shakut nga ma ai,” ngu nna htan wu ai.

¹⁵Dai MADU gaw, “Damasku mare makau na nam mali de nhtang wa su, dai hpang mare de shang nhtawm Hazaela hpe Suri hkawhkam tai na matu namman jaw ya u;

¹⁶Israela hkawhkam tai na matu Nimshi a kasha Yehu hpe namman jaw ya u, na a hkang galai na myihtoi a matu Abela Mehola mare na Shahpat a kasha Elisha hpe namman jaw ya na rai ndai.

¹⁷Hazaela a lata hta si ari jaw hkrum ti mung lawt wa ai kadai hpe mung Yehu sat kau na ra ai. Yehu a lata kaw na lawt wa ai kadai hpe mung Elisha e sat kau ai hkrum na rai wu ai.

¹⁸Rai ti mung, Bala hpe n gum dagup ai hte shi a hpara sumla hpe n pup ai sha ngai hta sadi dung nga ai ni yawng ngu na Israela mung na amyu masha hkying sanit hpe ngai naw jahkrung da we ai,” ngu nna tsun wu ai.

¹⁹Elia pru sa wa wu yang, utang gap mi hte ga galau nga ai Elisha hpe sa mu wu ai; shi a shawng e gap shi langai nga nga ai rai nna Elia gaw shi a ntsa palawng raw la nna Elisha hpe jahpun ya wu ai.

²⁰Dai hpang Elisha gaw shi a utang ni hpe kau da nhtawm Elia hpang de hkan kagat nang let, “Nye nu yan wa hpe pup nhtawm shakram da na we ai. Dai hpang nang kaw hkan nang na nngai,” ngu nna tsun wu ai. Elia mung, “Mai sa, nhtang wa su. Ngai nang hpe hkum da na we ai n rai!,” ngu nna htan wu ai.

²¹Dai hpang Elisha gaw shi a utang gap nga ai de sa wa nhtawm dai ni hpe sat nna nahtai hking ni hpe ju hpun shatai let shan shadu wu ai. Shi gaw masha ni hpe shadu jaw wu ai rai nna shanhte mung dai hpe sha ma ai. Dai hpang shi gaw Elia hpe karum na matu shi a hpang hkan nang mat wa wu ai.