Read Jinghpaw Common Language Bible 2009 1 HKAWHKAM 20 Bible Online

1 HKAWHKAM 20 - Jinghpaw Common Language Bible 2009 bible

1 HKAWHKAM 20

¹Suri Hkawhkam Benhadad gaw shi a hpyen hpung ni yawng hpe shaga hpawng da nga ai; kaga up hkang mung du sumshi lahkawng mung shanhte a gumra ni hte hpyen leng ni hte karum ma ai rai nna, shi rawt sa wa nhtawm Samari mare hpe wang da let, dai mare hpe maja htim gasat wu ai.

²Shi gaw mare kata de Israela Hkawhkam Ahab hpang de kasa ni hpe shangun dat nhtawm, “Na ja gumhpraw mung,

³na a numsha ni hte n-gun ja htum ai na a nshu nsha ni mung shi a matu rai nga lit dai, nga nna Hkawhkam Benhadad hpyi nga ai,” ngu nna tsun wu ai.

⁴Ahab gaw, “Ngai hpe mung, ngai madu da ai arai shagu hte hpe mung shi lu la na rai nga ai gaw ngai myit hkrum we ai, ngu nna nye a madu Hkawhkam Benhadad hpe tsun ya mi,” ngu nna htan wu ai.

⁵Dai hpang kasa ni mung kaga Benhadad a hpyi lajin ai lam hte hpawn Ahab kaw bai du sa ma ai: “Na a ja gumhpraw, na a numsha ni hte kashu kasha ni, ngai hpe ap ya na matu nang hpang de ngai shangun dat nngai.

⁶Ya chyawm gaw kaning hku mi rai tim, na a hkawhkam htingnu hpe mung, na a du salang ni a nta ni hpe mung sawk yu na matu nye a du salang ni hpe shangun dat na we ai. Shanhte myit nawn nna manu dan ai arung arai shagu hpe la mat wa na mara ai. Dai yang e hpawt de ndai aten daram hta, shanhte nga nga na mara ai.”

⁷Hkawhkam Ahab gaw mungdan ningbaw ni yawng hpe shaga la nhtawm, “Ndai masha wa anhte hpe jahten sharun kau mayu nga ai gaw nanhte mu nga myit dai. Shi gaw kasa ni hpe shangun dat nhtawm nye a madu jan ni hpe mung, nye a kashu kasha ni hte ja gumhpraw ni hpe hpyi shangun nga ai rai nna ngai myit hkrum kau ya se ai,” ngu nna tsun dan wu ai.

⁸Shaloi ningbaw ni hte amyu masha ni gaw, “Shi a ga hpa hpe mung hkum madat ya et; asum mung hkum jaw et,” ngu nna htan mu ai.

⁹Dai re ai majaw Ahab gaw Benhadad a kasa ni hpe, “Shawng nnan shi hpyi ai hpe myit hkrum ya nngai; rai ti mung, lahkawng lang ngu na shi hpyi ai hpe chyawm gaw ngai n lu shatup lu na lam, nye a madu hkawhkam wa hpe tsun dan ya mi,” ngu nna tsun htang wu ai. Ya kasa ni pru mat wa ai hpang kaga shiga gun wa nhtawm,

¹⁰Benhadad kaw nna nhtang wa mu ai: “Ndai na a mare hpe jahten sharun kau nna shanhte a lata ni hte wut shingyun ni hpe hpai mat wa lu hkra law ram ai masha ni hpe ngai woi sa wa na nngai. Dai zawn ngai n galaw lu ai rai yang karai ni ngai hpe si hkra adup mi ga law!”

¹¹Hkawhkam Ahab gaw, “Hpyenla jet gaw majan garai n sa yang lu grang ai n rai; majan ngut ai hpang mahtang gumrawng ging nga ai lam, Hkawhkam Benhadad hpe wa tsun ya mi,” ngu nna htan wu ai.

¹²Benhadad gaw shi a hpyen jinghku hpung ni hte kaga up hkang du ni hte rau shanhte a sum ni hta chyaru lu nang nga yang, Ahab kaw nna mahtai lu la ma ai. Dai rai nna dai mare hpe htim gasat na matu jin jin rai nga na lam shi a masha ni hpe hkang dat wu ai. Shaloi shanhte mung shara la shajang ma ai.

¹³Dai aten hta myihtoi langai mi gaw Hkawhkam Ahab kaw sa nhtawm, “Dai MADU gaw dai hpyen hpung kaba hpe hkum hkrit et! Dai ni pyi shanhte hpe dang kau lu ai awng padang ngai nang hpe jaw na de ai; shaloi ngai nan dai MADU rai nga nngai hpe nang chye lu na rai ndai ngu tsun ai,” ngu nna tsun wu ai.

¹⁴Ahab gaw, “Dai gasat gala ai hpe kadai woi awn na rai ta?,” ngu nna san wu ai. Dai myihtoi wa chyawm gaw, “Ginwang up hkang mung du ni a npu na hpyenla shabrang ni dai amu hpe galaw na lam, dai MADU tsun ai,” ngu nna htan wu ai. Hkawhkam wa gaw, “Dap dung n-gun shamu shamawt lam hpe kadai hkang na rai ta?,” ngu nna san wu ai. Shaloi myihtoi wa gaw, “Dai gaw nang rai nga ndai,” ngu nna bai htan wu ai.

¹⁵Dai rai nna hkawhkam wa gaw ginwang up hkang du ni a npu hta nga ai shabrang hpyenla ni hpe shaga shapraw dat wu yang, yawng 232 rai nga ai. Dai hpang Israela hpyen luksuk hpe bai shaga shapraw dat wu yang dai yawng hkying sanit rai nga ai.

¹⁶Shaloi gasat gala ai gaw shani chyingtung aten e hpang wa sai; Benhadad hte shi a jinghku hpyen hpung sumshi lahkawng hte gaw shanhte a sum ni hta chyaru naw nang jawng nga ma ai.

¹⁷Ya hpyenla shabrang ni shawng htim lung wa ma ai. Benhadad wa shangun dat ai kin-yu masha ni mung, Samari mare na hpyen hpung mi pru wa masai lam, shi hpe wa shana mu ai.

¹⁸Benhadad gaw, “Shanhte gasat sa wa ai rai ti mung ngwi pyaw sim sa lam san jahkrup na mi rai tim, shanhte hpe jahkrung rim tawn mu,” ngu nna hkang dat wu ai.

¹⁹Dai gasat gala ai hpe hpyenla shabrang ni woi awn ai hta Israela hpyen hpung ni hkan nang nga ma ai rai nna;

²⁰shanhte langai dek dek rai hpyen ni hpe sat kau mu ai; dai Suri masha ni mahtang hprawng mat wa nhtawm Israela masha ni hkan shachyut nang nga ma ai; rai ti mung Benhadad mahtang gumra dap na masha nkau mi hte rau gumra hta jawn nna hprawng lawt mat wa nga ai.

²¹Hkawhkam Ahab gaw pa de pru sa wa nhtawm gumra ni hte hpyen leng jawn ai ni hpe dang kau ai rai nna Suri masha ni hpe nhtum nni di kau wu ai.

²²Dai hpang myihtoi wa gaw Hkawhkam Ahab kaw sa nna, “Bai nhtang wa nhtawm na a hpyen n-gun hpe bai shalaw la nna n-gun ban la u: htaning na ndai ginhtawng aten Suri hkawhkam nang hpe bai sa gasat na ra ai majaw na a hpyen zai ladat hpe sadi sahka hte hkyen da u,” ngu nna tsun wu ai.

²³Hkawhkam Benhadad a du salang ni mahtang shi hpe, “Israela a karai ni gaw bum ga na karai ni rai nga ma ai majaw, Israela masha ni anhte hpe dang kau mi ai; anhte mahtang pa layang hkan e shanhte hpe gasat ga ai rai yang, anhte teng teng wa shanhte hpe dang kau lu na ga ai.

²⁴Ya chyawm gaw shanhte hpe up hkang ai masha marai sumshi lahkawng hpe yeng kau nhtawm shanhte a malai hpyen du ni hpe san da ga.

²⁵Nang kaw nna hprawng htaw mat wa ai hpyen luksuk hte hpawn gumra ni hte hpyen leng ni hte maren, law hkra naw shaga tawn ga. Israela masha ni hpe layang ga e anhte gasat gaw; ndai shanhte hpe anhte dang kau na ga ai,” ngu nna tsun mu ai. Shaloi Benhadad mung shanhte a hpaji jaw ga hpe myit hkrum ya ai hte hkan sa ya wu ai.

²⁶Ya ginhtawng aten bai du jang, shi gaw shi a masha ni hpe shaga shapraw la nhtawm shanhte hte rau Israela masha ni hpe htim gasat na nga, Ahpek mare de rawt lung wa ma ai.

²⁷Israela masha ni mung hpyen hking hte hkrak rai shaga shapraw la hkrum ma ai. Shanhte gaw Suri masha ni nga ai de man yawng ai shara de rawt lung wa nhtawm hpung lahkawng garan nna dap jung da mu ai. Israela masha ni chyawm gaw mung ting hta pri rai nga ai Suri masha ni hte shadawn yu yang, kaji ai bainam hpung lahkawng daram sha rai ma ai.

²⁸Myihtoi langai mi gaw Hkawhkam Ahab kaw sa nhtawm, “Dai MADU ning nga tsun ai. Ngai gaw layang ga na karai n rai, bum ga hkan na karai langai rai nga nngai, nga nna Suri masha ni tsun mu ai majaw ngai nan dai MADU rai nga nngai hpe nang hte na a amyu masha ni chye lu hkra, shanhte a hpyen luksuk kaba hpe dang kau lu ai awng padang ngai nang hpe jaw na we ai,” ngu nna tsun wu ai.

²⁹Suri masha ni hte Israela masha ni gaw shan shada da man chyaw rai nga ai shanhte a dap ni hta sanit ya tup nga nga ma ai. Sanit ya ngu na shani hta shanhte gasat hpang wa ma ai rai nna Israela masha ni mahtang Suri masha sen mi hpe sat kau mu ai.

³⁰Ngam nga ai ni mung Ahpek mare kata de hprawng shang mat wa mu yang, mare bunghku daw agrawp bun ai majaw shanhte hta na mun lahkawng hkying sanit hpe gamyet sat kau mu ai. Benhadad mung mare kata hprawng mat wa nhtawm nta langai a shingdu gawk hta shang shingbyi nga wu ai.

³¹Shi a du salang ni shi kaw sa nhtawm, “Israela hkawhkam ni gaw matsan chye dum nga ma ai hpe anhte na yu ga ai. Anhte a nshang ni hta lachyit sumpan ni hte kyit nhtawm du ni hta sumri ahkyen la nna Israela hkawhkam wa hpang de sa na ahkang jaw mi. Shaloi shi gaw na a asak hpe jahkrung da ya mai nga ai,” ngu nna tsun ma ai.

³²Dai rai nna shanhte gaw lachyit sumpan hpe shanhte a nshang ni hta lawai da nna shanhte a du ni hta sumri ahkyen nhtawm Ahab hpang de sa nna, “Na a shangun ma Benhadad gaw shi a asak a matu nang hpe hpyi nem nga ai,” ngu nna htan wu ai. Ahab gaw, “Shi naw hkrung nga a ni? Kaja sa! Shi gaw nye a kahpu ba langai zawn rai nga ai!,” ngu nna htan wu ai.

³³Benhadad a du salang ni gaw Ahab e, “Hpu” ngu nna tsun dat jang shanhte alawan hkap htan nhtawm, “Nang tsun ai hte maren Benhadad gaw na a hpu she rai nga a hka!,” ngu tsun let mai kaja ai maka kumla pru wa na matu la yu nga ma ai. Shaloi Ahab gaw, “Shi hpe ngai hpang de woi sa wa mi,” ngu nna hkang dat wu ai. Benhadad du jang, Ahab gaw shi hte rau gumra leng jawn na matu saw shaga wu ai.

³⁴Benhadad gaw shi hpe, “Nye wa gaw na nwa kaw na kashun la ai mare ni hpe ngai bai jaw na de ai; nye wa gaw Samari mare hta dut lu dut sha shara masat da ya ai zawn nang hkum nan mung Damasku mare e shara langai masat da mai nga ndai,” ngu nna tsun wu ai. Ahab gaw, “Ndai ga shaka ni hte ngai nang hpe shalawt dat na de ai,” ngu nna tsun htan wu ai. Shing rai shi hpe ga shaka tawn da nna shi hpe dat dat wu ai.

³⁵Dai MADU hkang da ai ga hte maren, myihtoi hpung mi hta na langai mi gaw shi hpe adup jahpye na matu myihtoi manang langai mi hpe hkang dat wu ai. Rai ti mung shi ningdang kau wu ai rai nna,

³⁶dai myihtoi wa gaw shi manang wa hpe, “Nang gaw dai MADU a hkang da ai ga hpe n madat n mara kau nit dai majaw ngai kaw na pru mat wa jang hkanghkyi langai nang hpe kawa sat na ra ai,” ngu nna tsun wu ai. Shi pru mat wa ai shaloi jang, hkanghkyi htim sa wa nna shi hpe kawa sat kau nga ai.

³⁷Dai hpang myihtoi dai wa nan kaga masha langai mi hpang de sa nna, “Ngai hpe adup jahpye e!,” ngu nna tsun wu ai. Dai wa mung shi hpe ja ja kayat jahpye nna machyi jahkrum wu ai.

³⁸Myihtoi wa gaw shi a myi man hpe sumpan hte ahkyen kayawp nhtawm shi hkum hpe masu da let Israela hkawhkam wa lai wa na hpe ala let nmaw lam makau e sa tsap nga ai.

³⁹Hkawhkam wa lai wa jang, myihtoi wa gaw shi hpe jahtau let, “Madu hkawhkam e, majan ginra e ngai majan gasat nga yang, rim la hkrum ai hpyenla hpe ngai hpang de woi wa nhtawm, ndai wa hpe sin u, shi hprawng lawt mat wa ai rai yang, de a matu na a asak jaw kau ra na ndai; shing n rai yang, gumhpraw hkying masum wa ra na ndai,” ngu nna ngai hpe tsun wu ai.

⁴⁰Rai ti mung kaga amu ni hte ngai bungli kyin nga yang, dai wa lawt mat wa nu ai. Hkawhkam wa gaw, “Nang gaw na a daw dan ai lam hpe tsun nga nit dai majaw de a ari hpe nang jaw ra na ndai,” ngu nna htan wu ai.

⁴¹Dai myihtoi wa gaw shi a myi man ahkyen kayawp da ai sumpan hpe gang je kau dat wu ai rai nna hkawhkam wa mung myihtoi langai ngai rai nga ai hpe kalang lata yu matsing dat wu ai.

⁴²Myihtoi wa gaw hkawhkam wa hpe, “Da ndai gaw dai MADU a ga rai nga ai: ‘Sat kau na matu ngai hkang dat ai wa hpe shalawt kau dat na ahkang nang jaw kau nit dai majaw de a matu na a asak mung hprawng shalawt kau dat ai shi a hpyen luksuk a majaw na a luksuk jahten shaza kau hkrum na rai nga ai,’” ngu nna tsun wu ai.

⁴³Hkawhkam wa mung Samari mare shi a nta de myit ru myit htum ai hte nhtang mat wa wu ai.