Read Jinghpaw Common Language Bible 2009 1 HKAWHKAM 6 Bible Online

1 HKAWHKAM 6 - Jinghpaw Common Language Bible 2009 bible

1 HKAWHKAM 6

¹Israela amyu masha ni Egutu mung kaw na pru wa ai mali tsa matsat shi ning na mat wa ai hpang, Israela mung e Shawlumon hkaw dung ai mali ning a shata lahkawng ngu na Ziwa shata hta Shawlumon gaw dai Nawku Htingnu hpe gaw gap hpang wa nu ai.

²Dai gaw kata maga galu de pe 90, nda maga de pe 30, tsaw maga de pe 45 rai nga ai.

³Dai Htingnu de shang wa ai gawk gaw nem ai maga de pe 15, chyoi pra ai shara gaw pe 30 dam nga ai.

⁴Nawku Htingnu shakum ni hta hkuwawt hku ni rawng nga ai; dai ni hta shinggan maga gaw kata maga na hta grau gyip nga ai.

⁵Nawku Htingnu a makau grup grup hte shingdu maga gaw shinggan shakum ni hte man hkrum rai nga nna htap masum di nna gap matut da nga ai; htap shagu pe 7 chyen tsaw nga ai.

⁶Lawu htap hta rawng ai gawk gaw pe 7 chyen dam nna, ka-ang htap na gawk gaw pe 9 dam nga ai. Ntsa htap na gawk chyawm gaw pe 10 chyen dam nga ai. Dai Htingnu shakum htap shagu a dun ntsa hta shakum gaw mat wa ai rai nna, lawu tsang na shakum shadun ai dun gaw kaga yan hta grau htat nga ai; shaloi dangbat ngau matu n htinggrang bang ra ai sha gawk ni mung n shamu ai hte shakum ntsa e gaw da lu nga ai.

⁷Dai Htingnu hpe gaw shachyaw yang, nlung nhkun e tawk shatsawm la ngut sai nlung ni hte shachyaw wu ai majaw sumdu mung, nwa mung, hpa hpri arai ngoi shara ai mung n na lu nga ai.

⁸Lawu htap de shang wa ai chyinghka lam gaw Nawku Htingnu a dingda maga hta nga nna htap lahkawng, htap masum de lung wa ai lakang ni hte matut da nga ai.

⁹Dai rai nna Hkawhkam Shawlumon gaw dai Nawku Htingnu hpe gaw gap shangut la lu wu ai. Shi gaw arit dangbat hte hpunpyen ni hte nta madin mung bang da wu ai.

¹⁰Nawku Htingnu a shinggan shakum ni hte htep di nna matut gap da ai htap masum tsaw ai nta hpe gap da nga ai; htap shagu pe 7 chyen tsaw nga ai. Dai ni yawng hpe arit dangbat ni hte matut da nga ai.

¹¹Dai MADU gaw Shawlumon hpe,

¹²“Nye a tara hte hkang da ai ga ni yawng hpe nang madat mara hkan sa ai rai yang, na nwa Dawi hpe ngai ga sadi jaw da ai hte maren, na a matu ngai galaw ya na we ai.

¹³Nang gaw gap da ai ndai Nawku Htingnu hta nye a amyu masha ni hte rau nga nga na nngai; shanhte hpe galoi mung ngai kau da na nngai n rai,” ngu nna tsun wu ai.

¹⁴Dai rai nna Shawlumon gaw Nawku Htingnu hpe gaw gap shangut da nu ai.

¹⁵Shakum kata maga de dun kaw nna magaw madin du hkra arit hpunpyen ni hte magap da nga ai; dun hpe chyawm gaw marau hpunpyen hte galaw da nga ai.

¹⁶Kata gawk ngu na Chyoi Pra Htum Ai Shara hpe Nawku Htingnu a nbang maga de gap da nga ai. Dai mung pe 30 galu nga ai, dun kaw nna magaw madin du hkra arit hpunpyen ni hte kum da nga ai.

¹⁷Dai Chyoi Pra Htum Ai Shara a shawng e nga ai gawk gaw pe 60 galu nga ai.

¹⁸Arit hpunpyen ni hta tauba si sumla ni hte nampan pu sumla ni hpe maka ka shatsawm da nga ai; kaga maga de mahkra ngu na arit hte galaw da nga ai rai nna nlung shakum ni hpe n mu lu nga ai.

¹⁹Dai MADU a Sakse Sumpu tawn da na matu Nawku Htingnu a nbang maga de kata gawk langai gap da nga ai.

²⁰Dai kata gawk gaw galu de, dam de, tsaw de pe 30 hkrai rai nna dai gawk hpe ja jet hte sup da nga ai. Arit hpunpyen ni hte galaw ai tawn hkungri hpe mung sup da nga ai.

²¹Nawku Htingnu a kata maga hte hpe ja hte sup nhtawm, kata gawk de shang wa ai chyinghka lam lai hta mung ja hte sup ai ja saidawng ni hpe grang da nga ai.

²²Nawku Htingnu a kata lam mahkra hte hpe mung, Chyoi Pra Htum Ai Shara hta tawn da ai hkungri hpe mung ja hte sup da nga ai.

²³Tsanlun hpun hte galaw ai dai singkaw tu ai hkrung kanu lahkawng hpe Chyoi Pra Htum Ai Shara hta tawn da nga ai; langai hte langai pe 15 tsaw nga ma ai.

²⁴Shan lahkawng a hkrang sumla hte hkum shingyan hkrang maren rai nga ai; shan a singkaw gaw maga mi de pe 7 chyen galu nga ai, shan a singkaw matu maga mi kaw nna maga mi de du hkra pe 15 rai nga ai.

²⁷Shan hpe Chyoi Pra Htum Ai Shara hta maga mi de langai ngai rai shadun da nhtawm shan a singkaw maga mi hte maga mi shachyen da nna gawk ka-ang e de a matu lahkawng shada hkrum nga ma ai; kaga singkaw lahkawng mahtang shakum hte hkra nga ma ai.

²⁸Dai singkaw tu ai hkrung kanu lahkawng yan hpe mung ja hte sup da nga ai.

²⁹Gawk madung a shakum ni hte kata gawk shakum ni mahkra hkan singkaw tu ai hkrung kanu sumla, namhtan hpun sumla hte nampan sumla ni hte tawk ka da nga ai.

³⁰Dun hpe pyi ja hte sup da nga ai.

³¹Chyoi Pra Htum Ai Shara a shang wa chyinghka lam a matu tsanlun hpun hte galaw ai chyinghka man mi hpe galaw shakap ma ai; chyinghka hkadun a ntsa ka-ang e gum gum re ai hkanoi masen langai nga nga ai.

³²Dai chyinghka ni hpe singkaw tu ai hkrung kanu sumla, namhtan hpun sumla ni, nampan sumla ni hte tawk ka da nga ai. Dai chyinghka lam na singkaw tu ai hkrung kanu hte namhtan hpun sumla ni hpe ja hte chya da nga ai.

³³Gawk madung de shang wa ai chyinghka lam a matu tsanlun hpun hte galaw ai jut ding chyinghka hkrang hpe shadun da nga ai.

³⁴Kahtap la kau mai ai chyinghka man mi hpe marau hpun hte galaw nhtawm,

³⁵singkaw tu ai hkrung kanu sumla, namhtan hpun sumla ni hte nampan sumla ni hpe tawk ka da nna dai ni hpe ja hte ara sha chya shakap da nga ai.

³⁶Nawku Htingnu a man na kata wang hpe mung galaw nhtawm tawk da ai nlung masum tawn da shagu arit hpun dangbat langai ngai tawn mara mat wa ai shakum hpe kum shinggrup da nga ai.

³⁷Shawlumon hkaw dung ai mali ning na shata lahkawng ngu ai Ziwa shata hta Nawku Htingnu gaw wa na npawt nhpang hpe jahkrat nna galaw da nga ai.

³⁸Shawlumon hkaw dung ai shi langai ning a shata matsat ngu na Bula shata hta shatawng shada da ai hte maren dai Nawku Htingnu hpe tup hkrak tsep kawp shangut da lu nga ai. Dai Nawku Htingnu hpe Shawlumon e sanit ning tup aten la nna gaw gap da ga ai.