Read Jinghpaw Common Language Bible 2009 1 HKAWHKAM 8 Bible Online

1 HKAWHKAM 8 - Jinghpaw Common Language Bible 2009 bible

1 HKAWHKAM 8

¹Dai hpang hkawhkam Shawlumon gaw Israela amyu bawsang ni hte lakung lama ni yawng a ningbaw ni hpe dai MADU a Ga Shaka Sumpu hpe Ziun ngu ai Dawi a Mare kaw nna Nawku Htingnu de jashawn da na matu, shi nga ai Yerusalem mare de sa wa na hkang dat wu ai.

²Shanhte yawng hte gaw shata sanit ngu na Ehtanim shata laman galaw ai Sum Poi aten hta sa zup nga ma ai.

³Ya ningbaw ni du zup jang, dai Ga Shaka Sumpu hpe hkinjawng ni sharawt nhtawm,

⁴Nawku Htingnu de hpai sa wa ma ai. Lewi masha ni hte hkinjawng ni mung dai MADU a hpung shingkang shanu nga ai Sum hte dai hta lang ra ai arung arai ni yawng hpe Nawku Htingnu de htawt sit bang ma ai.

⁵Hkawhkam Shawlumon hte Israela amyu masha ni yawng Ga Shaka Sumpu man e zup hpawng let n dang hti hkra law ai sagu dumsu wunawng wuwa sat nawng ya ma ai.

⁶Dai hpang hkinjawng ni mung Ga Shaka Sumpu hpe Nawku Htingnu kata de hpai jashawn nhtawm Chyoi Pra Htum Ai Shara na singkaw tu ai hkrung kanu yan a npu e dai hpe tawn da ma ai.

⁷Shan a kahpyan da ai singkaw ni gaw sumpu hte dai hpe hpai ai kandang ni hpe ka-up da nga ai.

⁸Chyoi Pra Htum ai Shara a man e tsap ai wa kadai mung kandang matu ni hpe ading tawk mu lu nga ai; kaga shara kaw nna n mu lu nga ai. (Kandang dai ni dai yang e dai ni du hkra naw nga nga ai.)

⁹Israela amyu masha ni Egutu mung na pru wa yang, dai MADU gaw Sina Bum e shanhte hte ga shaka tawn da nhtawm Mawshe tawn da ai lung pa lahkawng hta kaga, dai Ga Shaka Sumpu e hpa mung n rawng nga ai.

¹⁰Hkinjawng ni dai Nawku Htingnu kaw na pru wa ma yang, dai shara hta sumwi akajawng sha ka-up nga ai;

¹¹dai MADU a hpung shingkang htoi kabrim nga ai rai nna shanhte gaw bai nhtang sa nna shanhte a daw jau magam bungli ni hpe n galaw lu nga ma ai.

¹²Shaloi Shawlumon gaw ning ngu nna akyu hpyi wu ai: “MADU e, nang gaw lamu ntsa e ajan hpe tawn da nga ndai; timung, nang chyawm gaw sumwi ni hte htat ai nsin kata e nga na matu lata la nga ndai.

¹³Ya chyawm gaw na a matu htani htana shanu nga na hkik hkam ai htingnu langai mi hpe ngai gaw da ni ai.”

¹⁴Dai yang e amyu masha ni tsap nga ma yang, Hkawhkam Shawlumon shanhte hpang de myi man kayin nhtawm shanhte a ntsa Karai Kasang a chyeju shaman ya na matu hpyi ya wu ai.

¹⁵Shi gaw, “Dai MADU Israela a Karai Kasang hpe shakawn mu! Nye wa Dawi hta shi tawn da ai ga sadi hpe shadik shatup na nga,

¹⁶‘Egutu mung kaw nna nye a amyu masha ni hpe ngai woi shapraw wa ai shani kaw nna ngai hpe nawku na htingnu gaw gap na shara hpe Israela mung ting na kaning re ai mare hpe mung ngai n lata la nngai. Rai ti mung nye a amyu masha ni hpe up hkang na matu ngai Dawi hpe lata la se ai,’” ngu nna tsun wu ai.

¹⁷Shawlumon gaw matut nna, “Dai MADU Israela a Karai Kasang hpe nawku na matu htingnu langai gaw gap na lam nye wa Dawi maw mawn nga ti mung,

¹⁸dai MADU mahtang shi hpe, “Nye a matu nawku htingnu langai gaw gap na nang myit ra sharawng nga ai lam gaw jaw ai lam rai nga lit dai;

¹⁹rai ti mung dai hpe nang galoi mung gap lu na ndai n rai. Dai hpe na a kasha ngu na na a nshang hkrat kasha majing mahtang nye a matu nawku htingnu hpe gap na rai wu ai,’ ngu nna tsun wu ai.

²⁰“Ya chyawm gaw dai MADU shi a ga sadi hpe shatup nu ai hte maren, Israela hkawhkam rai nga ai nye wa a hkaw tingnyang hta ngai matut dung nga ni ai rai nna, dai MADU Israela a Karai Kasang hpe nawku na Nawku Htingnu hpe ngai gaw da se ai.

²¹Shi shanhte hpe Egutu mung kaw nna woi shapraw wa yang, dai MADU anhte a kaji kawa ni hte tawn da ai ga shaka lung pa ni rawng ai Ga Shaka Sumpu a matu dai Nawku Htingnu kata shara langai mi hpe mung ngai san da se ai,” ngu wu ai.

²²Shaloi Shawlumon gaw amyu masha ni a man hte tawn hkungri a man e sa tsap let shi a lata sharawt nna,

²³“Dai MADU Israela a Karai Kasang e, sumsing lamu lahta tang e mung, ginding aga a lawu tsang e mung nang zawn re ai karai kasang mi n nga nga a hka! Na a amyu masha ni hte tawn da ai na a ga shaka hpe nang shadik shatup nhtawm nang hpe myit masin mahkra hte hkan sa madat mara let shanhte nga nga mu yang, shanhte hpe na a tsaw ra myit madun dan nga ndai.

²⁴Nye a wa Dawi hpe nang jaw da sai ga sadi hpe nang shatup ya nga nit dai; tsun ai ga mung dai ni hpring tup wa nga sai.

²⁵Ya chyawm gaw dai MADU Israela a Karai Kasang e, shi sadi sahka hte galaw ai zawn shanhte na a ga hpe madat mara hkan sa ai rai yang, Israela hpe up hkang na hkawhkam shi a amyu matu ni hta na langai mi teng teng paw pru wa na lam nang shi hpe tsun let nye wa hte ga sadi tawn da sai hpe mung nang shatup na rai ndai hpe ngai hpyi nga nngai.

²⁶Rai sa, O Israela a Karai Kasang e, na a shangun ma nye wa Dawi hpe nang jaw tawn da nit dai ga sadi shagu hpe teng tup byin shangun nga u law.

²⁷“Rai ti mung, O Karai Kasang e, nang gaw ginding aga ntsa e teng teng shanu nga lu na kun? Sumsing lamu yawng pyi nang hpe sharawng da lu na daram kaba nga ai n rai; dai rai yang, ngai gap da ai ndai Nawku Htingnu gaw kaning rai kaba ram lu na rai nga a ta?

²⁸MADU nye a Karai Kasang e, ngai gaw na a shangun ma wa rai nga nngai. Nye a hpyi nem ai ga hpe madat ya nna dai ni ngai nang kaw hpyi lajin ai ga ni hpe mahtai jaw ya e law.

²⁹Nawku na matu nang lata san da nit dai ndai shara na ndai Nawku Htingnu hpe shani shana sin yu nga u law. Ndai Nawku Htingnu de ngai myi man yawng let akyu hpyi ai ga hpe na ya e law.

³⁰Nye a akyu hpyi ga ni hpe mung, ndai shara de myi man yawng nna hpyi ai na a amyu masha ni a akyu hpyi ga ni hpe mung na ya e. Sumsing lamu na na a nta hta anhte a akyu hpyi ga hpe madat ya nna anhte hpe mara dat ya mi law.

³¹“Masha langai gaw kaga langai wa hpe shut hpyit nna mara shagun hkrum ai hte ndai Nawku Htingnu kata na a tawn hkungri de woi sa nhtawm shi mara n kap nga ai hpe sa dagam yang,

³²O MADU e, sumsing lamu hta e madat la nna, na a shangun ma ni hpe jeyang mi. Mara kap ai wa hpe shi hkam la ging ai hte maren ari jaw u; mara n kap ai wa hpe chyawm gaw shi lu la ging ai hte maren mara dat ya u law.

³³Na a amyu masha Israela ni nang hpe shut kau ai majaw gumlau hpyen ni a lata hte sum mat ai hkrum jang, shanhte nang kaw myit kayin wa let ndai Nawku Htingnu de sa nhtawm mara raw dat ya na matu nang kaw shagrit shanem ai myit hte akyu hpyi nga ma yang,

³⁴shanhte a hpyi nem ai ga hpe sumsing lamu hta madat mara ya u. Na a amyu masha ni a yubak mara ni hpe raw dat kau ya nna shanhte a kaji kawa ni hpe jaw na ngu ai mungdan de bai woi wa u law.

³⁵“Na a amyu masha ni nang hpe shut kau ai mara a majaw marang n htu mat jang, shanhte myit malai wa nna ndai Nawku Htingnu de myi man yawng let nang kaw shagrit shanem ai hte hpyi nem mu yang,

³⁶shanhte a hpyi nem ai ga hpe sumsing lamu hta madat mara ya u. Hkawhkam wa hte Israela amyu masha ni a shut kau ai yubak mara ni hpe mara dat ya u. Jaw ai amu hpe galaw na shanhte hpe sharin ya u law. O MADU e, na a amyu masha ni hpe nang jaw da ai htani htana sali ga ngu ai ndai na a lamu ga ntsa e marang jahtu ya mi law.

³⁷“Dai mungdan hta hkuwa wa ai, ana zinli, kahtet kang ai nbung a majaw hten za mat ai nsi naisi, dinggam-yaw prang hkawm ai, na a amyu masha ni gumlau hpyen ni e htim gasat hkrum ai,

³⁸ana ahkya hte machyi makaw shanhte hta hkrum sha yang, shanhte a akyu hpyi ga ni hpe madat mara ya u. Na a amyu masha Israela hta na kadai rai ti mung tinang a yawn hkyen ai myit hpe shapraw let ndai Nawku Htingnu de shanhte a lata sharawt nna akyu hpyi ai rai yang,

³⁹shanhte a akyu hpyi ga hpe na ya u. Sumsing lamu na, na a nta hta shanhte a ga hpe madat ya nna shanhte hpe mara dat ya let karum la u law. Nang chyu sha shinggyim masha a myit masin kata na myit mang ai lam ni hpe chye ya nga ndai. Langai hte langai tinang galaw ai amu hte maren hkam la shangun mi law;

⁴⁰shaloi anhte a kaji kawa ni hpe nang jaw da ai mungdan hta shanhte nga nga ai aten yawng hta, na a amyu masha ni nang hpe madat mara nga na mara ai law.

⁴¹“Na a daru magam gumhkawng ai hpe mung, na a amyu masha ni a matu nang galaw nit dai magam bungli kaba ni a lam hpe mung sumtsan mung e nga nga ai maigan masha langai na nna nang hpe nawku na nga, ndai Nawku Htingnu hta akyu hpyi na matu sa du yang,

⁴²

⁴³shi a akyu hpyi ga hpe madat ya u. Sumsing lamu na nang nga ai shara hta, shi a ga hpe madat ya nna, galaw na matu nang hpe hpyi tsun ai lam hpe galaw ya u, shaloi mungkan ting na masha amyu ni yawng gaw na a amyu masha Israela ni galaw ai zawn nang hpe chye chyap wa nna na a ga hpe madat mara hkan sa na mara ai. Dai shaloi shanhte gaw nang hpe nawku na matu ngai galaw da sai ndai Nawku Htingnu rai nga ai hpe chye lu na mara ai.

⁴⁴“Shanhte a gumlau hpyen ni hpang de rawt sa na matu na a amyu masha ni hpe nang hkang dat ai hte nang lata san da sai ndai mare de man yawng let, na a matu ngu nna ngai gap da sai ndai Nawku Htingnu de shanhte nga ai shara kaw nna nang hpe akyu hpyi ma ai rai yang,

⁴⁵shanhte a akyu hpyi ga ni hpe madat ya u. Sumsing lamu hta shanhte a hpyi nem ai ga hpe madat ya nhtawm shanhte hpe awng padang ninglaw jaw ya u.

⁴⁶“Na a amyu masha ni hta yubak n galaw ai kadai mung n nga nga ai majaw na a pawt sindawng ai hta shanhte hpe shanhte a gumlau hpyen ni hpe dang kau shangun nna kaga mungdan nkau mi de bawng masha hku woi mat wa ai majaw mungdan hte tsan mat wa tim,

⁴⁷na a amyu masha ni a akyu hpyi ga ni hpe madat ya u. Shanhte gade wa yubak mara galaw nna n hkru n hkra rai nga ma ti mung, dai mungdan hta shanhte myit malai lu nna nang kaw akyu hpyi let mara hpyi nem mu ai shaloi, O MADU e, shanhte a akyu hpyi ga hpe madat ya u law.

⁴⁸Dai mungdan e shanhte teng teng myit masin kraw lawang asan sha hte myit malai lu wa nhtawm anhte a kaji kawa ni hpe jaw da sai ndai mungdan de myi man yawng let nang e lata san da sai ndai mare hte na a matu ngu nna ngai gap da ya se ai ndai Nawku Htingnu de nang hpe akyu hpyi mu ai shaloi,

⁴⁹shanhte a akyu hpyi ga ni hpe madat mara ya u. Sumsing lamu na na a nta hta shanhte a hpyi nem ai ga hpe na ya ai hte shanhte hpe matsan dum la u law.

⁵⁰Shanhte shut hpyit kau ai yubak mara mahkra hte nang hpe gumlau ai lam yawng hpe mara dat ya u; shanhte a gumlau hpyen ni shanhte hpe matsan yu dum shangun nga u law.

⁵¹Shanhte gaw Egutu mung grung nga ai wan htung kaw na nang woi shapraw wa ai na a amyu masha majing ni rai nga ai.

⁵²“Tsaw Htum ai MADU e, na a amyu masha Israela hte shanhte a hkawhkam wa tut nawng myi man pa nga mu ga, mada azi yu nga u law; karum la na matu shanhte nang hpe shaga ma ai shaloi, shanhte a akyu hpyi ga ni hpe na ya u.

⁵³Anhte a kaji kawa ni hpe Egutu mung kaw nna nang woi wa ai shaloi, na a shangun ma Mawshe hku nna nang shanhte hpe tsun nit dai hte maren, na a amyu masha majing tai na matu masha amyu ni yawng hta na nang shanhte hpe lata la nga nit dai.”

⁵⁴Shawlumon gaw dai MADU hpe akyu hpyi ngut jang, tawn hkungri man e lahput hput di ai kaw na lata ladawn let rawt tsap wu ai.

⁵⁵Dai yang e zup hpawng ai amyu masha ni yawng a matu, nsen ja ja hte Karai Kasang a shaman chyeju ni hpe hpyi wu ai. Shaloi shi gaw,

⁵⁶“Shi ga sadi tawn da nga ai hte maren shi a amyu masha ni hpe ngwi pyaw sim sa lam jaw ya ai dai MADU hpe shakawn mu law. Shi a shangun ma Mawshe hku nna jaw da sai kaga ga sadi ni yawng hpe shi shatup nga ai.

⁵⁷Anhte a kaji kawa ni hte rau shi nga nga ai zawn dai MADU anhte a Karai Kasang mung anhte hte rau anga nga u ga law; shi anhte hpe galoi mung n kau da ai hte n kabai kau nga u ga.

⁵⁸Anhte a jiwa ni hpe shi jaw ya sai tara ni yawng hte hkang da ai ga ni hpe shatup nna anhte hpe shi a ga madat mara shangun mi ai shaloi, anhte hkrung nga na hpe shi ra sharawng nga ai hte maren, anhte tut nawng ahkrung nga lu na ga ai.

⁵⁹Ndai akyu hpyi ga hte ngai shi hpe hpyi lajin ai ga ni hpe dai MADU anhte a Karai Kasang gaw aten shagu adum ya nga u ga law. Shi gaw Israela amyu masha ni hpe mung, shanhte a hkawhkam wa hpe mung shani shagu ra kadawn nga ai hte maren, tut nawng matsan dum nga u ga law.

⁶⁰Dai rai nna karai shaje n nga ai hte dai MADU chyu sha Karai Kasang rai nga ai hpe mungkan ting na masha amyu baw ni chye lu na mara ai.

⁶¹Dai ni rai nga ai hte maren, shi a tara ni yawng hte hkang da ai lam yawng mayawng hte hpe madat mara hkan sa nhtawm shi a amyu masha ni dai MADU anhte a Karai Kasang hta tut nawng sadi sahka rai nga let hkawm sa nga mu law.

⁶²Dai hpang hkawhkam Shawlumon hte amyu masha ni yawng dai yang e, dai MADU hpe hkungga nawng ya ma ai.

⁶³Shi gaw mahku hkungga a matu dumsu 822,000 hte sagu 120,000 hpe sak nawng ya wu ai; shing rai hkawhkam wa hte amyu masha ni yawng dai Nawku Htingnu hpe ap nawng ai hte dingshawn shang ma ai.

⁶⁴Dai shani jang shi gaw Nawku Htingnu man na wang ka-ang hpe ap nawng wu ai rai nna, dai yang e wan nat hkungga, shadung hkungga hte mahku hkungga ni a matu yam nga sau man ni hpe sak nawng ya wu ai. Shi galaw ai ndai amu a majaw ndai hkungga ni yawng hpe nawng jau na matu, dai magri mang hkungri nau wa kaji mat nga ai.

⁶⁵Shawlumon hte Israela amyu masha ni yawng gaw Nawku Htingnu e sanit ya tup Sum Poi galaw ma ai. Dai yang e dingdung maga Hamat uhkan kaw nna dingda maga Egutu lamu ga jarit du hkra na amyu masha wunawng wuwa ni sa du shajang ma ai.

⁶⁶Ya matsat ya ngu na shani hta Shawlumon gaw amyu masha ni hpe nta de wa kau shangun nga ai. Shanhte mung shi hpe shakawn kungdawn let shi a shangun ma Dawi hte shi a amyu masha Israela hpe dai MADU shaman ya ai chyeju yawng a majaw kabu gara ai hte tinang nang a dum nta de wa mat wa ma ai.