Read Jinghpaw Common Language Bible 2009 2 HKAWHKAM 1 Bible Online

2 HKAWHKAM 1 - Jinghpaw Common Language Bible 2009 bible

2 HKAWHKAM 1

¹Israela Hkawhkam Ahab si mat ai hpang, Moba mung masha ni Israela hpe gumlau ma ai.

²Israela Hkawhkam Ahazia gaw Samari mare e nga ai shi a hkawhkam htingnu ntsa htap na nbang pinra kaw na di hkrat mat wu ai majaw grai sawng mat hkra machyi mat wu ai. Dai rai nna shi bai hkam kaja wa na, n kaja na lam chye lu hkra nga, Hpilisti karai Balazebu hpe san yu na matu shi a kasa nkau mi hpe Ekron mare de shangun dat wu ai.

³Rai ti mung dai MADU a lamu kasa gaw Tishbi mare na myihtoi Elia hpe Hkawhkam Ahazia a kasa ni hte sa hkrum na matu hkang dat nhtawm shanhte hpe, “Nanhte hpa majaw Ekron karai Balazebu hpe sa san nga myit ni? Dai gaw Israela mung hta karai kaga n nga sai ngu nna nanhte myit nawn la myit dai majaw rai kun?

⁴Dai MADU gaw, ‘Nang machyi nga ndai kaw nna bai mai wa na ndai n rai, nang si na rai ndai!,’” ngu nna tsun ai ngu hkawhkam wa hpe tsun dan u. Shaloi Elia gaw dai MADU hkang da ai hte maren, galaw wu ai rai nna,

⁵kasa ni mung hkawhkam wa hpang de nhtang mat wa ma ai. Dai rai nna shi gaw, “Nanhte hpa majaw nhtang wa myit ni?,” ngu nna hkap san wu ai.

⁶Shanhte gaw, “Anhte hpe nhtang wa mu nga nna sa tsun ai masha langai mi hte hkrum ga ai rai nna dai MADU mung nang hpe, ‘Ekron karai Balazebu hpe san yu na matu, nang hpa majaw kasa ni hpe shangun dat n ni? Dai Israela mung hta karai n nga sai ngu nanhte myit nawn la myit dai majaw rai nga a ni? Nang gaw machyi nga ai kaw na bai mai wa na ndai n rai, nang si na rai nga ndai!,’” ngu nna nang hpe tsun u, nga nna htet dat ai ngu nna htan mu ai.

⁷Hkawhkam wa gaw, “Dai masha wa gaw kaning san ai zawn rai nga a ta?,” ngu nna san wu ai.

⁸Shanhte gaw, “Dai wa gaw yam nga ahpyi hte galaw ai palawng galu hpe hpun nhtawm shanhpyi shingkyit langai kyit da nga ai,” ngu nna htan mu ai. Shaloi hkawhkam wa gaw, “Dai gaw Elia n rai a hka!,” ngu nna tsun wu ai.

⁹Dai hpang shi gaw Elia hpe shaga la na matu du langai mi hte masha manga shi hte hpe shangun dat wu ai. Ya dai du wa gaw kawng langai a ntsa e dung nga ai Elia hpe mu jang, “Karai Kasang a masha wa e, yu wa na matu, hkawhkam wa nang hpe hkang dat nga ai,” ngu nna tsun wu ai.

¹⁰Elia mahtang, “Ngai gaw Karai Kasang a masha langai mi rai nga nngai teng yang gaw, sumsing lamu de na wan hkrat yu wa nhtawm nang hte na a masha ni yawng hpe sat kau mu ga!,” ngu nna htan wu ai. Shaloi sumsing lamu de na wan akajawng sha hkrat wa nhtawm dai du wa hte shi a masha ni hpe sat kau wu ai.

¹¹Hkawhkam wa gaw kaga du langai hte masha manga shi hpe bai shangun dat wu ai; dai ni mung Elia nga ai de lung wa nhtawm, “Karai Kasang a masha wa e, ya kalang lata yu wa na matu hkawhkam wa nang hpe hkang dat nga ai!,” ngu nna tsun wu ai.

¹²Elia mahtang, “Ngai gaw Karai Kasang a masha langai mi rai nga nngai teng yang gaw, sumsing lamu de na wan hkrat yu wa nhtawm nang hte na a masha ni hpe sat kau mu ga!,” ngu nna htan wu ai. Shaloi Karai Kasang a wan gaw kalang lata hkrat yu wa nhtawm du wa hte shi a masha ni hpe sat kau nga ai.

¹³Ya lang mi bai hkawhkam wa gaw du langai hte masha manga shi hpe shangun dat wu ai. Shi gaw kawng de lung wa nhtawm Elia a man e lahput hput di let, “Karai Kasang a masha wa e, ngai hte nye a masha ni hpe matsan dum la e law. Anhte a asak hpe jahkrung da ya mi!

¹⁴Ya du lahkawng hte shan a masha ni gaw sumsing lamu na wan a majaw sat kau ai hkrum nga masai; rai ti mung chyeju hte ngai hpe matsan dum la e law!,” ngu nna hpyi nem wu ai.

¹⁵Dai MADU a lamu kasa gaw Elia hpe, “Shi hte rau yu wa su; hkum hkrit nga et,” ngu nna tsun wu ai. Elia gaw du wa hte rau hkawhkam wa hpang de shang sa nhtawm,

¹⁶shi hpe, “Da ndai gaw dai MADU tsun ai ga rai nga ai: ‘Israela mung hta nang san yu na karai kaga n nga mat sam nga ndai, Ekron karai Balazebu hpe sa san yu na matu kasa ni hpe nang shangun dat nga ndai majaw, nang hkam kaja wa lu na ndai n rai; nang si na rin dai!’”

¹⁷Dai MADU gaw Elia a n-gup hku tsun nu ai hte maren, Ahazia si mat sai. Ahazia gaw shadang sha n lu wu ai majaw shi a kanau Yoram hpe mahtang Yuda Hkawhkam Yehoshahpat a kasha Yehoram hkaw dung ai lahkawng ning hta shi a kahpu a hkang hta hkaw dung let hkawhkam tai wa sai.

¹⁸Hkawhkam Ahazia galaw nu ai lam magup hpe Israela Hkawhkam ni a Labau Laika hta ka matsing da nga ai.