Read Jinghpaw Common Language Bible 2009 2 HKAWHKAM 18 Bible Online

2 HKAWHKAM 18 - Jinghpaw Common Language Bible 2009 bible

2 HKAWHKAM 18

¹Israela Hkawhkam Ela a kasha Hoshea hkaw dung ai masum ning hta Ahaza a kasha Hezekia mung

²shi a asak hkun manga ning hta Yuda hkawhkam tai wa nhtawm Yerusalem mare e hkaw dung let hkun jahku ning tup up nga ai. Shi a kanu gaw Zehkaria a shayi sha Abiya rai nga ai.

³Shi a kaji kawa Hkawhkam Dawi a kasi hkan ai rai nna dai MADU awng sharawng ai hku amu galaw nga ai.

⁴Shi gaw tara maigan masha ni a nawku shara ni hpe jahten shaza kau nhtawm nlung shadaw ni hpe agrawp kau nga ai; Ashera karai num a gawkngu sumla ni hpe kran kadawng kau ya wu ai. Nehuhtan ngu shamying ai dai Mawshe galaw da ai magri mang lapu hpe mung kahtum kadaw di kau wu ai. Dai ahkying du hkra, Israela amyu masha ni mahtang dai hpe shagrau sha-a let manam pyaw ai baw hpe naw nawng ya ma ai.

⁵Hezekia gaw dai MADU Israela a Karai Kasang hpe kam hpa nga ai rai nna Yuda hkawhkam ni hta shi zawn re ai shawng de mung, hpang de mung galoi mung kadai mung n nga nga ai.

⁶Shi gaw dai MADU hta sadi dung kam sham nga ai wa rai nna, shi a ga hpe galoi mung n madat nga ai wa n rai; dai MADU Mawshe hpe jaw ya nu ai hkang da ai ga ni yawng hpe chyawm gaw sadi sahka hte shadik shatup da wu ai.

⁷Dai re ai majaw, dai MADU gaw shi hte rau nga nga ai rai nna shi galaw ai lam shagu hta awng dang hkrat hkrang nga wu ai. Shi gaw Asuri hkawseng wa hpe gumlau wu ai rai nna shi hpe hkungga lara na lam ningdang kau ya wu ai.

⁸Shi gaw Hpilisti masha ni hpe gasat dang kau nhtawm shanhte a nga shara ngu na Gaza hte de a grup yin lamu ga du hkra lawm ai kaji htum ai kahtawng kaw nna kaba htum ai mare ni du hkra hpe shang hpya kau ya wu ai.

⁹Hezekia hkaw dung ai mali ning ngu na Israela hpe up ai Hkawhkam Hoshea hkaw dung ai sanit ning hta Asuri Hkawseng Shalmanesa gaw Israela hpe shang gasat nhtawm Samari mare hpe wang shinggrup da wu ai.

¹⁰Wang da ai masum ning ngu na shaning hta, Samari mare hkrat sum mat sai. Dai gaw Hezekia hkaw dung ai kru ning hte Hoshea hkaw dung ai jahku ning hta rai nga ai.

¹¹Asuri hkawseng wa gaw Israela masha ni hpe bawng masha hku rim mat wa nhtawm shanhte hta na nkau mi hpe Hala mare, nkau mi hpe Gozan ginwang na Habora hka makau hte nkau mi hpe Medi mare ni hta nga shangun nga ai.

¹²Israela masha ni gaw dai MADU shanhte a Karai Kasang a ga hpe n madat ma ai sha n-ga, shanhte hte tawn da sai ga shaka hpe mung jahten nga ma ai; dai MADU a shangun ma Mawshe a lata hku jaw ya ai tara ni yawng hpe gang kau nna n madat n mara n hkan galaw kau mu ai majaw Samari mare hkrat sum mat nga sai.

¹³Hkawhkam Hezekia hkaw dung ai shi mali ning hta, Asuri Hkawseng Senahkerib gaw Yuda mung na bunghku kum ai mare ni hpe htim gasat nna dang la kau nga wu ai.

¹⁴Hezekia gaw Lahkisha mare e nga ai Senahkerib hpang de ning ngu nna shiga shana dat wu ai: “Ngai shut ni ai; chyeju hte na a gasat gala ai amu hpe jahkring kau nu, nang hpyi ai hte maren ngai jaw na we ai.” Shing rai hkawseng wa shi ra ai mahtai gaw Hezekia shi hpe gumhpraw tan shi, aja tan mi shagun ya na lam rai nga ai.

¹⁵Hezekia mung Nawku Htingnu kata hte hkawhkam htingnu sut dum na gumhpraw yawng hpe shagun ya wu ai;

¹⁶shi gaw Nawku Htingnu chyinghka ni hta na aja ni hpe mung, shi nan sup da ai chyinghka shadaw ni a aja ni hpe mung, gawng la nna dai ni yawng Senahkerib hpang de shagun ya wu ai.

¹⁷Asuri hkawseng wa gaw Yerusalem mare e nga ai Hezekia hpe Lahkisha mare kaw nna htim gasat na matu hpyen hpung kaba langai mi dat dat wu ai: dai luksuk hpe shi a npu na tsaw htum ai du kaba masum e up hkang da nga ma ai. Shanhte Yerusalem mare de du shang wa jang, lahta hka lawng kaw nna hka la yu wa ai hka hkawng makau e hpun nba hkrut ai ni lang ai nmaw lam hpe sa madu la nga ma ai.

¹⁸Dai hpang shanhte gaw Hezekia hpe shaga dat ma ai. Shaloi Hezekia gaw shanhte hte sa hkrum na matu shi a du salang masum rai nga ai hkawhkam htingnu hpe hpareng ai Hilkia a kasha Eliakim, hkawhkam hkaw wang amu madu Shebna hte labau gawn amu hpareng rai nga ai Asap a kasha Yoa hte hpe shangun dat wu ai.

¹⁹Asuri du salang langai wa mi gaw shanhte hpe Hkawhkam Hezekia kaning re ai hta dai daram kam hpa mai nga ai ngu ai lam hpe hkawseng wa chye mayu nga ai, ngu tsun wu ai.

²⁰Shi gaw, “Hpyen gasat na matu kung kyang ai hpaji byeng-ya hte chyalai n-gun hpe n-gup aga hte hkang lu ai ngu nang myit nawn da wu ni?

²¹Nang hpe karum la na matu Egutu hpe nang la dingda nga n hka gaw! Rai ti mung dai gaw mai-aw hpe lam hkawm dawhkrawng zawn lang ai hte bung nna dai gaw daw mat ai hte na a lata hpe ju htinggrang ya na ra ai. Shi hpe marai langai ngai kam hpa wa ai shaloi dai gaw Egutu hkawhkam wa zawn hkrum sha na lam rai nga ai,” ngu nna tsun dan wu ai.

²²Dai Asuri du salang wa gaw matut nna, “Shing n rai, Hezekia gaw dai MADU na a Karai Kasang hpe naw kam hpa nga a ni? Hezekia gaw dai MADU a tawn hkungri ni hte nawku shara langai ngai hta lai nna kaga yawng hpe jahten kau nga nu ni? Shi gaw Yuda hte Yerusalem masha ni hpe shara langai mi hta chyu sha nawku lu na lam n tsun yu a ni?, nga nna nang ngai hpe tsun na n rai ni?

²³Hkawseng wa a mying gang let, ngai nang hte manu dara na nngai; gumra jawn masha law law nang mu tam ai rai yang nang hpe ngai gumra hkying lahkawng jaw na de ai!

²⁴Nang gaw Asuri du salang na kaji htum duwa hte pyi n dang bung ai mi, Egutu masha ni gaw hpyen leng ni hte gumra jawn masha ni hte nang hpang de shangun dat ya na hpe la dingda nga n hka i!

²⁵Dai MADU a karum la lam n nga ai sha, na a mungdan hpe ngai shang gasat nna dai hpe ngai jahten sharun kau na re ngu, nang myit nawn da wu ni? Dai MADU shi nan dai mungdan hpe htim gasat nhtawm jahten sharun kau na matu ngai hpe tsun da ni ai,” ngu nna tsun wu ai.

²⁶Dai hpang Eliakim, Shebna, hte Yoa ni gaw dai du salang wa hpe, “Madu e, anhte hpe Aramik ga shaga mi. Anhte ga dai hpe chye na ga ai. Hebre ga hte hkum shaga et; bunghku ntsa hku nga nga ai ni yawng madat nga ma ai,” ngu nna tsun mu ai.

²⁷Shi gaw, “Nang hte hkawhkam wa hpe ndai ga ni mahkra tsun dan na matu hkawseng wa ngai hpe shangun dat ai zawn nang myit nawn da wu ni? N rai law, nanhte zawn shanhte a hkyi shanhte sha nna shanhte a jit shanhte lu na mara ai ngu nna she mare bunghku ntsa e dung nga ai masha ni hpe ngai tsun nga nngai.

²⁸Dai hpang dai du salang wa gaw rawt tsap nna Hebre ga hte, “Asuri hkawseng nanhte hpe tsun ai ga hpe madat la mu!,” ngu jahtau tsun wu ai.

²⁹Hezekia gaw nanhte hpe n hkalem kau lu myit ga, shi nanhte hpe sadi jaw nga ai. Hezekia gaw nanhte hpe hkye la lu ai n rai.

³⁰Dai MADU hta shamyet shanat nga na matu shi hpe hkum hkalem kau shangun nga myit. Dai MADU gaw nanhte hpe hkye hkrang la nna nanhte a mare hpe madu la nga ai anhte a Asuri hpyen luksuk hpe shi jahkring kau ya na ra ai, ngu nna mung hkum myit nawn la nga myit.

³¹Hezekia a ga hpe hkum madat myit. Mare kata kaw nna pru nhtawm lata sharawt asum hkam na matu Asuri hkawseng wa nang hpe tsun nga sai. Dai shaloi nanhte a mungdan hte bung ai nanhte a matu sabyi jaw ya ai sabyi sun ni, muk kabaw na matu nsi naisi, tsanlun sau a matu tsanlun hpun ni hte lagat ntsin pru ai mung de hkawseng wa bai woi wa ai aten du hkra, nanhte gaw nanhte a sabyi ru ni hta na sabyi si ni hpe mung, nanhte a hpun ni hta na maihpang si ni hpe sha lu nhtawm nanhte a hka htung ni hta na nan hka ja lu na ahkang lu na rai nga myit dai. Shi hkang da ai hte maren nanhte hkan galaw myit dai rai yang, nanhte si na n rai; hkrung nga lu na rai myit dai. Rai ti mung dai MADU gaw nanhte hpe hkye mawai la na ra ai nga nna nanhte a myit nawn ai lam Hezekia nanhte hpe mana hkum shachyoi kau shangun nga myit.

³²

³³Kaga masha amyu baw hta na kaning re ai karai ni shanhte a mungdan hpe Asuri hkawseng wa a lata kaw nna hkye mawai la lu yu nga a ni?

³⁴Hamat hte Arpad a karai ni, ya kanang e rai nga ma ni? Sehparim, Hena hte Awa karai ni kanang rai nga ma sata? Samari hpe kadai wa hkye yu sani?

³⁵Anhte a hkawseng wa a lata kaw nna shanhte a mungdan hpe ndai mungdan yawng na kadai karai wa galoi e hkye la yu sata?, ngu nna tsun wu ai. Dai hpang dai MADU gaw Yerusalem hpe hkye lu na re ngu, hpa lam a majaw myit nawn nga myit ni?

³⁶Hkawhkam Hezekia gaw amyu masha ni hpe tsun da nu ai hte maren, shanhte ga hkaw mi mung n tsun ai, asim sha nga nga ma ai.

³⁷Dai hpang Eliakim, Shebna, hte Yoa hte gaw yawn ai myit hte shanhte a hpun palawng ni hpe gang je kau nhtawm Asuri du salang wa tsun ai ga ni hpe hkawhkam wa a man e tang madun nga ma ai.