Read Jinghpaw Common Language Bible 2009 2 HKAWHKAM 23 Bible Online

2 HKAWHKAM 23 - Jinghpaw Common Language Bible 2009 bible

2 HKAWHKAM 23

¹Hkawhkam Yoshia gaw Yuda mung hte Yerusalem mare na ningbaw ni yawng hte hpe shi hpang de shaga la nhtawm shanhte hte rau

²hkinjawng ni hte myihtoi ni, naw ngam nga ai amyu masha ni, matsan mayan hte sut su ai masha ni n nga hkan gumbawm nang let Nawku Htingnu de sa wa ma ai. Dai hpang shanhte yawng a man e hkawhkam wa gaw Nawku Htingnu kata hta mu tam la ai ga shaka laika buk ting hpe nsen ja ja hte hti dan wu ai.

³Shi gaw shadaw makau e tsap let, dai MADU a ga hpe madat mara nna shi a tara ni yawng hte hkang da ai ga ni hpe myit masin mahkra hte shadik shatup let dai laika hta ka da ai hte maren dai MADU hte ga shaka shagrin da nhtawm dai hpe hkan galaw na ga shaka tawn da wu ai. Amyu masha ni yawng mung dai ga shaka hpe hkan sa na matu ga sadi tawn da nga masai.

⁴Dai hpang Yoshia gaw Bala hpe mung, Ashera karai num hpe mung, shagan ni hpe mung nawku ai hta lang ai arung arai ni yawng hpe Nawku Htingnu shinggan de shapraw da na matu Hkinjawng Kaba Hilkia hte shi hpe karum ai hkinjawng ni, Nawku Htingnu de shang wa ai chyinghka e lit ang ai sin langa ni hpe hkang da wu ai. Hkawhkam wa mung dai arai ni yawng hpe mare shinggan ngu na Kidron Kadit makau e sa nat kau wu ai; de a wan dap ni hpe Behtela mare de hpai kau ma ai.

⁵Shi gaw Yuda mung na mare ni hte Yerusalem mare makau hkan nga ai tara maigan ni a tawn hkungri ni a ntsa hta shagu hkungga nawng ya na matu Yuda hkawhkam ni e aya dang ya ai hkinjawng ni hpe rung kaw nna mung, Bala hpara hte jan, shata, shagan ni hte sumsing lamu na gintawng ni hpe shagu hkungga nawng jau ya ai hkinjawng ni yawng hte hpe yeng seng kau wu ai.

⁶Shi gaw Nawku Htingnu kata na Ashera karai num a sumla shaw la nna mare shinggan Kidron Kadit e dai hpe nat kau nna ga nhpu zawn adup mani la nhtawm shawa lupwa e gat ayai kau wu ai.

⁷Shi gaw htingnu shawa num shawa la ni e madu da ai Nawku Htingnu wang na nta ni hpe mung jahten shaza kau wu ai. (Dai yang e Ashera karai num hpe nawku ai shaloi hpun ai palawng galu hpe dai numsha ni da ma ai.)

⁸Yuda mung na mare ni hkan nga ai hkinjawng ni hpe Yerusalem mare de woi la ai hte mungdan ting hta shanhte shagu hkungga nawng ya ai tawn hkungri ni hpe shi awu asin di kau wu ai. Shi gaw mare de shang wa ai nmaw lam kaba langai a pai maga na mare up du Yoshua gap da ai mare chyinghka makau e bainam nat matse ni hpe nawng ya ai tawn hkungri ni hpe agrawp daw kau ya wu ai.

⁹Dai hkinjawng ni gaw Nawku Htingnu kata e daw jau na ahkang n lu ma ai; rai ti mung shanhte a hkinjawng manang ni a matu jaw ai matsi n rawng ai muk hpe shanhte sha lu ma ai.

¹⁰Hkawhkam Yoshia gaw kadai mung Molek karai a matu tinang a shayi shadang sha ni hpe wan nat hkungga n shatai ya lu hkra nga, Hinom Kadit na Tohpet ngu ai tara maigan masha ni a nawku shara hpe mung awu asin di kau ya wu ai.

¹¹Shi gaw jan hpe nawku yang, Yuda hkawhkam ni e ap nawng da ai gumra ni hpe mung dawm kau ya wu ai. Bai nna nawku ai hta lang ai gumra leng ni hpe mung nat kau ya wu ai. (Dai ni hpe du kaba Nahtan Melek a nta kaw nna grai wa n tsan ai chyinghka makau hte htep re ai nawku htingnu wang kata hta tawn da nga ai.)

¹²Hkawhkam Ahaza a hkaw numgaw ntsa e Yuda hkawhkam ni galaw da ai tawn hkungri ni hte Nawku Htingnu wang lahkawng hta Hkawhkam Manashe sharawt da ai tawn hkungri ni hte hpawn Hkawhkam Yoshia run hpya nna ayun ayaw di agrawp mani kau let Kidron Kadit de kabai bang kau wu ai.

¹³Yoshia gaw Yerusalem mare a sinpraw maga de mung, Tsanlun Bum ni a dingda maga de mung Hkawhkam Shawlumon gap tawn ai tawn hkungri ni hte Sidon karai num Astarte, Moba karai Hkemosha, Amon karai Molek ni zawn re ai matsat shabat hpara sumla ni hpe nawku ai shara ni hpe awu asin di kau wu ai.

¹⁴Yoshia gaw nlung shadaw ni hpe ayun ayaw di agrawp jahten kau nna, Ashera karai num a hkrang sumla ni hpe kran daw kau nhtawm dai ni hpe shadun da ai lamu ga hta si sai masha a nrut nra ni hte jahpring da nga ai.

¹⁵Yoshia gaw Israela amyu masha ni hpe yubak lam de woi sa wa ai Nebat a kasha Hkawhkam Yeroboam gaw Behtela shara e galaw da ai nawku shara hpe mung run hpya kau wu ai; shi gaw tawn hkungri ni hpe gang daw kau nna de a nlung ni hpe ayun ayaw di agrawp kau let ga nhpu tai mat hkra mani kau wu ai. Ashera a sumla hpe mung nat kau wu ai.

¹⁶Dai hpang Yoshia gaw grup yin de mada yu wu yang, bum ntsa e nga ai lup nkau mi hpe mu wu ai; dai hta na nrut nra nkau mi hpe htu shaw la nhtawm tawn hkungri ntsa e nat kau wu ai. Ndai lam hku nna, moi shawng de tawn hkungri e Hkawhkam Yeroboam tsap nga nna poi galaw nga yang, myihtoi wa tau tsun da nu ai hte maren, galaw nna tawn hkungri hpe awu asin di kau wu ai. Hkawhkam Yoshia mung makau grup yin de mada yu dat wu yang, tau nna tsun da sai myihtoi wa a lup rai nga ai hpe mu wu ai.

¹⁷Shi gaw, “Dai lup gaw kade a rai ta?,” ngu nna san wu ai. Behtela masha ni chyawm gaw, “Ndai tawn hkungri hpe nang galaw kau nit dai hte maren, dai amu ni a lam hpe tau tsun ai Yuda mung na du sa wa ai myihtoi wa a lup rai nga ai,” ngu nna htan ma ai.

¹⁸Yoshia gaw, “Dai hku tawn da mu; shi a nrut nra ni hpe htawt sit mai na n rai,” ngu nna hkang da wu ai. Dai rai nna Samari mung na du sa ai myihtoi a nrut nra ni hte rau shi a nrut nra ni hpe n sit kau ma ai.

¹⁹Hkawhkam Yoshia gaw Israela hkawhkam ni dai MADU a masin kahtet shangun na nga, Israela mung na mare shagu hta gap da ai tara maigan masha ni a nawku shara ni hpe jahten shaza kau nu ai. Behtela e shi galaw kau nu ai zawn dai tawn hkungri ni yawng hpe galaw kau wu ai.

²⁰Shi gaw tara maigan hkinjawng ni yawng hpe shanhte daw jau ai tawn hkungri ntsa hkan e sat kau wu ai; masha a nrut nra ni hpe mung tawn hkungri shagu hta shi nat kau wu ai. Dai hpang Yerusalem mare de shi bai nhtang wa wu ai.

²¹Hkawhkam Yoshia gaw ga shaka laika hta ka da ai hte maren, dai MADU shanhte a Karai Kasang hpe shagrau sha-a na matu Shalai Wa ai Poi hpe galaw na lam, amyu masha ni hpe hkang da wu ai.

²²Amyu baw hpe tara agyi ni up hkang wa ai aten kaw nna Israela hkawhkam ni hte Yuda hkawhkam ni kadai mung dai zawn re ai Shalai Wa ai Poi hpe n galaw yu nga ma ai.

²³Ya chyawm gaw, jahtum e Yoshia hkaw dung ai shi matsat ning hta she dai Shalai Wa ai Poi hpe Yerusalem mare e galaw nga ai.

²⁴Hkinjawng Kaba Hilkia Nawku Htingnu hta mu hkrup ai tara laika hta ka da ai tara ni hpe lang na matu Hkawhkam Yoshia gaw Yerusalem mare hte naw ngam nga ai Yuda mung na nat num ni hte gumhpan hpan ai ni; nta e tawn da ai karai sumla ni hte hpara sumla ni yawng hte hpawn, kaga tara maigan wa a nawku arung arai ni yawng hpe yeng seng kau wu ai.

²⁵Mawshe a Tara yawng hpe madat mara nhtawm dai MADU hpe shi a myit masin mahkra hte kraw lawang mahkra hte n-gun lagaw mahkra hte daw jau ai shi zawn re ai hkawhkam gaw shi a shawng e mung, hpang e mung galoi mung n pru yu nga ai.

²⁶Rai ti mung Hkawhkam Manashe galaw shut hpyit kau ai amu a majaw Yuda amyu masha ni a ntsa dai MADU a masin kahtet nga ai rai nna ya e pyi dai kawp lu nga ai n rai.

²⁷Dai MADU gaw, “Israela hpe ngai galaw kau we ai zawn Yuda amyu masha ni hpe mung nye man kaw nna shaden shapraw kau na we ai. Ndai ngai lata da ai Yerusalem mare hpe mung, ngai hpe nawku mu ga, ngu nna ngai tsun ai Nawku Htingnu shara hpe mung ngai kau da na nngai,” ngu nna tsun wu ai.

²⁸Hkawhkam Yoshia galaw nu ai amu magup shagu hte hpe Yuda Hkawhkam ni a Labau Laika hta ka matsing da nga ai.

²⁹Yoshia hkawhkam tai nga yang, Egutu Hkawhkam Niko gaw hpyen luksuk mi hpe woi nhtawm Asuri hkawseng wa hpe sa karum la na nga, Uhprat hka du hkra lung wa wu ai. Hkawhkam Yoshia gaw Egutu hpyen hpung mi hpe Megido mare e hkap hkum na maw wu ai; dai majan hta sat kau ai hkrum wu ai.

³⁰Shi a du salang ni chyawm gaw shi a moi mang hpe hpyen leng langai mi hta mara nhtawm Yerusalem mare de la wa let hkawhkam lupwa hta lup makoi da ma ai. Yuda amyu masha ni gaw shi a kasha Yoahaza hpe lata la nhtawm namman jaw ya let hkawhkam shatai da nga ma ai.

³¹Yoahaza gaw Yuda hkawhkam tai wa yang, asak hkun masum ning rai nna Yerusalem mare hta shata masum up nga ai. Shi a kanu gaw Libna mare na Yeremia a shayi sha Hamutala rai nga ai.

³²Shi gaw shi a kaji kawa ni a kasi hta hkan let dai MADU hpe shut kau wu ai.

³³Shi a hkaw dung ai hpe jahtum kau na nga, Egutu Hkawhkam Niko gaw shi hpe Hamat mung Ribla mare e bawng dung shangun let gumhpraw pawng 7, 500 hte aja pawng 75 hpe hkanse hku Yuda masha ni hpe bang shangun wu ai.

³⁴Egutu Hkawhkam Niko gaw Yoshia a kasha Eliakim hpe kawa a malai Yuda hkawhkam shatai nna shi a mying hpe Yehoiakim ngu nna galai shamying da wu ai. Egutu Hkawhkam Niko gaw Yoahaza hpe Egutu mung de woi wa nna, dai mung e shi wa si mat wu ai.

³⁵Hkawhkam Yehoiakim gaw Egutu hkawhkam wa e hpyi dat ai ahkun hkanse ra ai made hpe jaw ya na matu, amyu masha ni lu lawm ai sut gan hta na jaw lu ai made hpe hkan lahkawn la wu ai.

³⁶Yehoiakim gaw Yuda hkawhkam tai wa ai shaloi shi a asak hkun manga ning rai nga nna, Yerusalem mare hta shi langai ning up nga ai. Shi a kanu gaw Ruma mare na Pedaia a shayi sha Zebida rai lu ai.

³⁷Shi gaw shi a kaji kawa ni a kasi hkan let dai MADU hpe shut hpyit kau wu ai.