Read Jinghpaw Common Language Bible 2009 2 HKAWHKAM 3 Bible Online

2 HKAWHKAM 3 - Jinghpaw Common Language Bible 2009 bible

2 HKAWHKAM 3

¹Yuda Hkawhkam Yehoshahpat hkaw dung ai shi matsat ning hta Ahab a kasha Yoram gaw Israela hkawhkam tai wa sai rai nna Samari mare e hkaw dung let shi lahkawng ning up nga wu ai.

²Shi gaw dai MADU hpe shut hpyit kau wu ti mung, shi kawa hte kanu ngu na Yezebela zawn n kaja nga ai n rai. Bala hpe nawku na matu shi kawa galaw tawn da sai gawkngu sumla hpe shi gang kadawng kau wu ai.

³Rai ti mung shi a shawng na Nebat a kasha Hkawhkam Yeroboam zawn Israela masha ni hpe yubak lam de woi sa ai hta hkum shingdang lu ai n rai.

⁴Moba Hkawhkam Mesha gaw sagu rem ai wa rai nna Israela hkawhkam wa hpe shaning shagu shagrau hkungga ai kumhpa ngu na sagu kasha 100,000 hte sagu 100,000 kaw na sagu mun ni hpe jaw jaw di wu ai.

⁵Rai ti mung Israela Hkawhkam Ahab si mat jang, Mesha mahtang Israela hpe gumlau rawt wu ai.

⁶Hkawhkam Yoram gaw Samari mare kaw nna kalang lata pru wa nhtawm shi a hpyen hpung ni yawng hpe shinggyin da wu ai.

⁷Shi gaw Yuda Hkawhkam Yehoshahpat hpang de shiga shana dat wu ai: “Moba hkawhkam ngai hpe gumlau nga nu ai; shi hpe ninghkap na matu mung, ngai hte rau majan gasat na n ni?” Shaloi Hkawhkam Yehoshahpat mung, “Ngai gasat nang na nngai. Nye a masha ni hte nye a gumra ni gaw na a daw dan hparan ai amu hta sha madung nga ai.

⁸Dai re ai gaw gara lam hku anhte lung gasat na rai nga ga ta?,” ngu wu ai. Ya Yoram chyawm gaw Edom mung nam mali hku lam galu hkawm lung wa na re ai,” ngu nna htan wu ai.

⁹Dai rai nna, Hkawhkam Yoram mung Yuda hte Edom hkawhkam ni pru sa nna sanit ya tup kawan yu ngut ai hpang shanhte hka n lu ma ai. Masha mung, daw htaw ai yam nga ni a matu mung hpa n nga nga sai.

¹⁰Hkawhkam Yoram gaw, “Anhte gaw shamyit kau ai hkrum na saga ai law! Dai MADU gaw anhte masum hpe Moba hkawhkam a daru magam n-gun lata hta ap kau nga sanu hka!,” ngu nna tsun wu ai.

¹¹Hkawhkam Yehoshahpat chyawm gaw, “Dai MADU hpe anhte san lu na matu, ndai yang e myihtoi langai ngai nga nga a ni?,” ngu nna san wu ai. Shaloi Hkawhkam Yoram a dap na du langai mi gaw, “Shahpat a kasha Elisha mahtang nang e nga nga ai. Shi gaw Elia hpe karum ai wa rai nga ai,” ngu nna htan wu ai.

¹²Hkawhkam Yehoshahpat mung, “Shi gaw teng man ai myihtoi langai mi rai nga ai,” ngu nna tsun wu yang, hkawhkam masum hte mung Elisha hpang de sa wa ma ai.

¹³Elisha gaw Israela hkawhkam wa hpe, “Nanhte hpe ngai hpa lam a majaw karum ang na rai nga a ta? Nanhte a kanu kawa ni san san re ai myihtoi ni kaw mahtang sa san la masu,” ngu nna tsun wu ai. Yoram gaw, “N rai law, hkawhkam masum ngu ai anhte hpe Moba hkawhkam a daru magam n-gun lata de ap kaw nga ai gaw dai MADU rai nga ai,” ngu nna tsun htang wu ai.

¹⁴Elisha mahtang, “Nanhte a myit rum manang Yuda Hkawhkam Yehoshahpat hpe ngai n hkrit hkungga ai rai taw gaw, nanhte hte ngai hpa mung galaw lu na n rai nga ai hpe ngai daw jau nga ai dai ahkrung nga ai dai MADU hta dagam da nga nngai.

¹⁵Ya chyawm gaw tingse chye dum ai masha langai mi ngai hpang de shaga wa marit,” ngu nna htan wu ai. Ya tingse dum ai wa dum dat yang, dai MADU a daru magam n-gun gaw Elisha a ntsa e du sa nga ai rai nna,

¹⁶shi gaw, “Dai MADU tsun ai gaw da ndai hku rai nga ai: “Dai hkaraw hkamwam ting hta hka hkawng ni htu mu.

¹⁷Nanhte gaw marang hte nbung hpe loi sha pyi n mu lu tim, dai hkaraw hkamwam chyawm gaw hka hte hpring nga na ra ai; nanhte mung nanhte a yam nga hpung ni hte lit gun ai yam nga ni hkru kat hkra lu lu na mara ai,” ngu nna tsun wu ai.

¹⁸Elisha gaw matut nna, “Rai ti mung dai chyawm gaw dai MADU galaw na matu aloi sha re ai amu rai nga ai; Moba masha ni hpe dang kau na awng padang shi nanhte hpe mung jaw na ra ai.

¹⁹Nanhte gaw mare bunghku kum shatsawm da ai mare ni yawng hpe gasat dang kau nna namsi si ai hpun ni yawng hpe kran kau nhtawm, hka hpawk mahkra hpe pat kau let, shanhte a namhpun rawng ai yi sun ni hta nlung ni hte ayai tawn nna jahten kau na rai myit dai”

²⁰Hpang jahpawt shawoi galaw nga ai manap hkungga nawng ya ai aten hta, Edom mung hku hka lwi pru wa ai rai nna, lamu ga hpe ka-up kau nga ai.

²¹Hkawhkam masum gaw shanhte hpe sa gasat nga masai lam hpe Moba masha ni na jang, hpyen laknak lu hpai sai masha ngu na kaba htum dingla ni kaw nna kaji htum ma ni du hkra hpe shaga la nna lamu ga jarit e jahkrat tawn da mu ai.

²²Hpang jahpawt shanhte rawt wa mu yang, hka ntsa e jan a shingkang tu kabrim nga nna dai gaw sai zawn hkyeng nga ai hpe mu mada jang,

²³shanhte gaw, “Asai she rai nga a hka! Dai gumlau hpyen hpung masum gaw shada da htim gasat nna sat hkat ang nga masai! Shanhte gaw dap de lanep sa hta la sagaw!,” ngu nna tsun hkat ma ai.

²⁴Rai ti mung shanhte dap de du jang, Israela masha ni shanhte hpe hkap gasat ai hte nhtang shaden kau ma ai. Israela masha ni mung matut shachyut nhtawm Moba masha ni hpe sat sharu kau ma ai;

²⁵shanhte a mare ni hpe mung jahten sharun kau ya mu ai. Namhpun kaja ai yi hkauna hpe shanhte lai hkrup jang, dai yi hkauna hta nlung hpring hkra Israela masha shagu nlung langai ngai kabai bang da mu ai; shanhte gaw hka hpawk ni hpe mung pat kau ya nhtawm asi si ai hpun ni hpe kran kau mu ai. Hpang jahtum mare daju Kira Here hpe chyu sha ngam tawn da nhtawm lakli ningwat ai ni dai mare hpe wang tawn nna gasat ma ai.

²⁶Moba hkawhkam gaw majan n dang lu na lam hpe dum chye wa jang, shi hte rau nhtu hpye ai masha sanit tsa shaga la nna, Suri hkawhkam wa hpang de hprawng lawt lu hkra nga, hpyen ni nga ai lam hku ga lai mat wa tim, n dang lu mat nu ai.

²⁷Dai rai nna shi a hkang hta hkaw dung na kasha alat hpe woi la nhtawm mare bunghku ntsa e Moba karai hpe hkungga shatai nna nawng kau wu ai. Shing rai Israela masha ni hkrit kajawng mat ma ai majaw mare kaw nna shanhte htingnut mat wa ai hte tinang nang a mung ga de nhtang mat wa shajang ma ai.