Read Jinghpaw Common Language Bible 2009 2 HKAWHKAM 4 Bible Online

2 HKAWHKAM 4 - Jinghpaw Common Language Bible 2009 bible

2 HKAWHKAM 4

¹Myihtoi hpung mi na myihtoi langai mi a gaida jan gaw Elisha hpang de sa nhtawm, “Madu e, nye a madu wa si mat sali ai! Nang chye ndai hte maren, shi gaw Karai Kasang hpe hkrit kamyin ai masha langai mi rai nga ai; rai ti mung shi hpe gumhpraw hkoi ya ai wa hpe mahtang nye madu wa a hka a majaw nye a shadang sha lahkawng yan hpe mayam hka jahkaw la na nga, sa wa nga ai,” ngu nna tsun wu ai.

²Shi gaw, “Na a matu hpa galaw ya na rai nga a ta?, ngai hpe tsun dan rit, nta e nang hpa lu tawn da n ni?,” ngu nna san wu ai. Shi gaw, “Tsanlun sau di bu kaji hta kaga, hpa mung ngai n lu nngai,” ngu nna htan wu ai.

³Elisha gaw, “Nang wa nna dang lu ai made na a htingbu ni yawng kaw na man ai di bu ni hpe shap tawn u.

⁴Dai hpang nang hte na a kasha yan nta nhku de shang wa nna chyinghka la kau nhtawm di bu ni hta sau ru bang hpang wa mu. Langai hpang langai hpring ma jang she la tawn da u,” ngu nna tsun dat wu ai.

⁵Dai rai nna numsha mung shi a kasha yan hte rau nta nhku de shang wa nna chyinghka la kau nhtawm tsanlun sau rawng ai di bu kaji hpe la nna kasha yan la shapraw ya ai di bu ni hta sau ru bang wu ai.

⁶Dai di bu ni yawng hta shanhte jahpring ngut jang, di bu kaga mi naw nga yang la wa rit, ngu nna san wu yang, kasha langai mi mahtang, “Dai mahtang jahtum rai sai,” ngu nna htan wu ai. Shaloi jang tsanlun sau gaw lwi nga ai kaw nna hkring mat nga ai.

⁷Numsha gaw Elisha hpang de bai sa wa wu ai rai nna myihtoi wa gaw shi hpe, “Dai tsanlun sau ni hpe dut nhtawm na a hka yawng wa kau u; ngam ai hte mung nang hte na n sha yan a asak bau na matu law ram ai gumhpraw tai na ra ai,” ngu nna tsun wu ai.

⁸Lani mi hta Elisha gaw sut su ai numsha langai nga ai Shunem mare de sa wa wu ai. Shaloi lusha hkap daw na matu dai numsha shi hpe saw shaga wu ai; dai aten kaw nna Shunem mare de shi sa ai aten shagu dai numsha a nta hta lusha sha la la rai nga ai.

⁹Dai numsha gaw shi a madu wa hpe, “Ndai shara de sa ai ndai masha wa gaw chyoi pra ai masha langai mi rai nga ai gaw ngai dum chye nga nngai.

¹⁰Shi anhte kaw sa shagu hkring sa la lu u ga, ntsa htap e gawk kaji langai galaw ya nna dai kaw yup ku, sha ku, lahkum hte pyengdin ni hpe tawn da ya ga,” ngu nna tsun wu ai.

¹¹Elisha gaw Shunem mare de nhtang wa ai lani mi hta hkring sa la na nga, shi a gawk de lung wa wu ai.

¹²Shi gaw shi a shangun ma Gehazi hpe dai numsha hpe sa shaga na matu tsun wu ai. Shi du jang,

¹³Elisha gaw Gehazi hpe, “An a ra kadawn ai lam ni hpe jam jau hkam nna galaw ya ai amu hpe chyeju htang ai hku nna shi a matu hpa galaw ya ra na lam san wa rit. Hkawhkam wa shing n rai luksuk hpe up hkang ai wa hpang de shi a matu shiga kaja tang shawn shangun na ngai hpe mi she sa shangun mayu nga a dawng,’” ngu nna tsun dat wu ai. Dai numsha gaw, “Nye a amyu masha ni hta ra kadawn ai lam yawng mayawng lu la nga nngai,” ngu nna htan wu ai.

¹⁴Elisha gaw Gehazi hpe, “Ataw dai rai yang shi a matu hpa galaw ya lu na rai nga ga ta?,” ngu nna san wu ai. Shi chyawm gaw, “Rai sa, shi kasha n lu nga ai; shi a madu wa mung dingla wa nu ai,” ngu nna htan wu ai.

¹⁵Elisha gaw, “Ndai de sa wa na matu shi hpe tsun u,” ngu nna hkang dat wu ai. Ya shi du nna chyinghka lam e tsap nga ai rai nna,

¹⁶Elisha gaw dai numsha hpe, “Htaning ndai aten hta, na a lata hta shadang sha lu pawn na rai ndai,” ngu nna tsun wu ai. Dai numsha gaw, “Oh! madu e, chyeju hte ngai hpe hkum masu et. Nang gaw Karai Kasang a masha langai mi rai nga ndai!,” ngu nna tsun wu ai.

¹⁷Rai ti mung Elisha tsun nu ai hte maren, dai aten shaning ladu wa hkrum jang shadang sha langai shangai wu ai.

¹⁸Ya shaning ram ram na ai hpang, mam dan ai lahpawt mi na aten hta ma dai gaw hkauna e nga ai shi a kawa hte mam dan masha ni hpang de sa yu na nga sa mat wa wu ai.

¹⁹Shi gaw akajawng sha shi a kawa hpe, “Nye a baw machyi ai! Nye a baw machyi ai!,” ngu nna jahtau hkrap wu ai. Kawa gaw shi a shangun ma wa hpe, “Dai ma hpe shi a kanu hpang de pawn wa su,” ngu nna hkang dat wu ai.

²⁰Dai ma hpe kanu hpang de woi wa ngut jang, shi gaw jan pungding madi ai aten du hkra kanu a lahpyen e adung nga nna si mat wa sai.

²¹Shi gaw Elisha a gawk de pawn lung wa nhtawm shi hpe yup ku ntsa hta tawn da let chyinghka la kau da nna pru mat wa wu ai.

²²Dai hpang numsha gaw shi a madu wa hpe shaga la nhtawm shi hpe, “Shangun ma langai hpe lawze hte nang de shangun dat ya e; myihtoi Elisha kaw ngai sa ra nga nngai; ngai shi hpe shaga lu ai hte rau bai wa na nngai,” ngu nna tsun wu ai.

²³Shi a madu wa mahtang, “Nang dai ni jang hpa majaw sa ra nga n ta? Bansa Nhtoi mung n rai; Shata Praw na Poi mung n rai,” ngu nna san wu ai. Shi gaw, “Mai na re,” ngu nna htan wu ai.

²⁴Shaloi shi gaw lawze langai mi hpe byau la nna shi a shangun ma wa hpe, “Lawze hpe shachyang lu ai made shachyang u; ngai n tsun yang hkum lanyan kau et,” ngu nna hkang wu ai.

²⁵Dai rai nna shi pru sa wa nhtawm Elisha nga ai Hkarmela Bum de rawt lung mat wa wu ai. Ya Elisha gaw tsan tsan e naw rai nga ai numsha hpe shi mu wu ai rai nna shi a shangun ma Gehazi hpe, “Yu u, Shunem numsha gaw htawra kaw e du ra ai!

²⁶Shi hpang de tin tin sa su, numsha mung, shi a madu wa mung, shi a kasha mung lam magup hta hkrak rai nga ma ai kun?,” ngu nna tsun wu ai. Dai numsha mung lam magup hta hkrak rai nga ai lam Gehazi hpe tsun dan wu ai:

²⁷rai ti mung Elisha kaw shi du jang, shi a lagaw hpe ginshum nna shi a man e dingnyawm wu ai. Shaloi Gehazi mahtang dai numsha hpe kanawng kau na hkyen wu ai; rai ti mung Elisha gaw, “Shi nga nga u ga. Shi gaw grai myit machyi hkra mat hkra tsin-yam tsindam hkrum sha nga ai hpe nang n mu n ni? Dai MADU mung dai hte seng ai amu ngai hpe n tsun da nga ai.

²⁸Dai numsha gaw shi hpe, “Madu e, nang kaw shadang sha langai, ngai hpyi yu a ni? Ngai hpe hkum masu kau et, ngu nna nang hpe ngai tsun yu ni ai n rai ni?,” ngu nna tsun wu ai.

²⁹Elisha gaw Gehazi hpang de kayin mada yu nhtawm, “Tin tin rai su! Nye a dawhkrawng hpe lang nna sa wa su. Nang hte hkrum ai masha kadai hpe mung hkum shakram tsap nga et; nang hte shakram ai wa kadai hpe mung aten shama rai hkum tsap nga et. Nta de dingyang sa mat wa nhtawm dai ma a ntsa e nye a dawhkrawng hpe mara da ya e,” ngu nna tsun wu ai.

³⁰Dai numsha gaw Elisha hpe, “Ngai nang hte n hka na nngai gaw ahkrung nga ai dai MADU hta mung, nang hta mung nye a sadi dung ai lam hpe ngai dagam we ai!,” ngu nna tsun wu ai. Shan lahkawng mung hpang kaw nna hkan nang ma ai.

³¹Gehazi mahtang shan a shawng e sa wa nna ma a ntsa e Elisha a dawhkrawng sa mara da ya wu ti mung, nsa bai sa wa ai kumla hpa mung n mu, n na rai nga ai. Elisha hpe sa tau la na nga shi bai nhtang wa nhtawm, “Dai ma gaw n hprang nga ai,” ngu nna tsun wu ai.

³²Ya Elisha du jang, shi chyu sha gawk kata de shang wa nhtawm yup ku ntsa e si taw nga ai ma hpe mu wu ai.

³³Shi gaw chyinghka hpe la kau nhtawm dai MADU kaw akyu hpyi nga ai.

³⁴Shi gaw ma a ntsa e shi a n-gup hte ma a n-gup, shi a myi hte ma a myi, shi a lata hte ma a lata dagap jahkrum da wu ai. Shi a hkum hpe dai ma a ntsa e ka-up da wu ai majaw ma a hkum mung lum wa nga ai.

³⁵Elisha gaw rawt nna gawk kata e kahkrang hkawm let bai wa nna ma a ntsa e kalang mi bai shi a hkum hte dagap da wu ai. Shaloi ma gaw sanit lang kahti ai hte myi hpaw wa sai.

³⁶Elisha gaw Gehazi hpe shaga la nhtawm ma a kanu hpe shaga dat na matu tsun wu ai. Dai numsha shang wa jang shi gaw dai numsha hpe, “Na a kasha nang e rai nga ai,” ngu nna tsun wu ai.

³⁷Shi gaw Elisha a lagaw nhpang e ga de hkra hkra gum dagup nhtawm shi a kasha hpe pawn la let pru mat wa wu ai.

³⁸Lang mi, Elisha gaw Gilgala mare de nhtang wa yang, dai mung e hkuwa wa nga ai. Shi gaw myihtoi hpung mi hpe sharin achyin nga yang, shi a shangun ma ni hpe wan ntsa e di kaba shadun nhtawm myihtoi ni a matu shatmai shadu shangun wu ai.

³⁹Shanhte hta na langai wa mi gaw shatmai lap loi mi di la na nga, pa de pru sa mat wa wu ai. Shi gaw ru chyalam hpe mu hkrup wu ai rai nna dai si ni hpe hpai lu ai made law law di wa wu ai. Shi gaw dai ni hpe la wa nhtawm dai gaw hpa baw ni rai nga ai hpe n chye ai sha, shatmai di hta galep bang wu ai.

⁴⁰Shanhte mung sha na nga, dai shatmai hpe ru tawn da ma ai; rai ti mung shanhte dai hpe hta chyim dat mu ai shaloi jang, shanhte gaw myihtoi Elisha hpe, “Ndai gaw gung she rai nga a hka!,” ngu nna jahtau tsun let dai hpe n sha ai sha tawn kau mu ai.

⁴¹Elisha gaw lusha loi mi hpe hpyi la nhtawm di kata de bang dat nna, “Sha na lusha loi mi ru shapraw tawn yu mu,” ngu nna tsun wu ai. Shaloi dai hta shut ai lam hpa mung n nga nga ai.

⁴²Bai kalang mi na masha langai mi Bala Shalisha kaw nna wa yang, dai shaning hta shawng shu la ai muk-yaw mam muk tawng hkun hte nsi naisi gungsi nnan loi mi Elisha kaw la sa ya wu ai. Shaloi Elisha gaw dai hpe myihtoi hpung mi hpe jaw sha na matu shi a shangun ma ni hpe tsun wu ai;

⁴³rai ti mung shi mahtang, “Dai gaw masha latsa a matu law na sai ngu nang myit nawn da wu ni?,” ngu nna htan wu ai. Elisha gaw, “Shanhte sha nna loi mi pyi naw ngam na re, nga nna dai MADU tsun ai majaw shanhte sha na matu dai hpe jaw mu,” ngu nna tsun htang wu ai.

⁴⁴Dai rai nna shangun ma wa mung shanhte a man e lusha ni hpe garan tawn ya nna dai MADU tsun da sai hte maren shanhte yawng sha ma ai; lusha loi mi pyi naw ngam nga ai.