Read Jinghpaw Common Language Bible 2009 2 HKAWHKAM 6 Bible Online

2 HKAWHKAM 6 - Jinghpaw Common Language Bible 2009 bible

2 HKAWHKAM 6

¹Myihtoi hpung mi gaw lani mi na aten hta Elisha hpe, “Anhte nga ai shara gaw nau kaji nga ai!

²Yawdan hka kau de sa nna, anhte nga na shara lu galaw la hkra, hpun loi mi sa kran na ahkang anhte hpe jaw mi,” ngu tsun ma ai.

³Shanhte hta na marai langai mi mahtang shanhte hte rau sa na matu shi hpe shadut wu ai; shaloi shi mung myit hkrum ya ai hte,

⁴shanhte yawng rau sha pru sa mat wa ma ai. Yawdan hka kau de shanhte du jang, amu galaw hpang wa nga ma ai.

⁵Marai langai mi mahtang gaw hpun ni hpe kran nga yang, shi a hpri nwa baw gaw hka kata de akajawng sha hkrat bang mat wa wu ai. Shi gaw Elisha hpe, “Madu e, ya ngai kaning di na rai sata? Dai gaw shap lang ai nwa she rai nga ai!,” ngu nna tsun wu ai.

⁶Elisha gaw, “Gara shara hta hkrat bang mat wa sata?,” ngu nna san wu ai. Dai masha wa mung shi hpe shara madun wu ai; Elisha gaw hpun dingshan langai mi kahtam la nhtawm hka de kabai bang dat wu ai rai nna nwa baw waw lung wa shangun wu ai.

⁷Shi gaw, “Dai hpe sai la sanu,” ngu nna hkang dat wu yang, gum let dai hpe sai la wu ai.

⁸Suri hkawhkam gaw Israela hte majan gasat nga ai. Shi gaw shi a du salang ni hte bawng yu nna dap jung na shara langai mi hpe jawm lata ma ai.

⁹Rai ti mung Elisha gaw Israela hkawhkam hpang de shiga shana dat nhtawm, dai yang e Suri masha ni hkap gasat na matu la nga ma ai majaw, dai shara de n shani sa na matu shi hpe sadi hkap jaw dat mu ai.

¹⁰Dai rai nna Israela hkawhkam wa mung dai shara hta nga ai masha ni hpe sadi jaw wu ai rai nna shanhte mung hpyen ni a sharu shatsang ai kaw nna lawt lu nga ma ai. Dai zawn byin ai gaw law law lang rai nga sai.

¹¹Dai lam a majaw Suri hkawhkam grai myit kahtet mat wu ai rai nna shi a du salang ni hpe shaga la nhtawm, “Nanhte hta na marai langai ngai Israela hkawhkam wa hpang maga de lawm ai masha mahkoi lawm nga myit dai kun?,” ngu nna san wu ai.

¹²Shanhte hta na langai wa mi gaw, “Madu hkawhkam e, shi a masha kadai mung n lawm ga ai. Na a gawk kata e shim ai hku nang kaning ngu tsun ai ga hpe pyi, Israela hkawhkam hpe dai myihtoi Elisha tsun dan nga ai,” ngu nna htan wu ai.

¹³Hkawhkam wa gaw, “Shi kanang e nga ai hpe hkan tam yu masu, shaloi shi hpe ngai rim la na we ai,” ngu nna hkang da wu ai. Elisha gaw Dohtan mare e nga nga ai lam shi hpe tsun dan jang,

¹⁴shi gaw dap kaba langai mi hpe gumra ni hte hpyen leng ni hte rau shangun dat wu ai. Shing rai dai mare de shana e du nna dai mare hpe wang tawn da mu ai.

¹⁵Elisha a shangun ma wa gaw hpang jahpawt manap jau jau e rawt let nta kaw nna pru wa yang, Suri hpyen hpung ni gaw gumra ni hte hpyen leng ni hte dai mare hpe wang tawn da nga ma ai hpe mu wu ai. Shi gaw Elisha hpang de bai nhtang wa nhtawm, “Madu e, an gaw daw dan ai she hkrum nga saga ai! Ya an kaning rai na rai nga ga ta?,” ngu nna tsun wu ai.

¹⁶Elisha gaw, “Hkum hkrit et; anhte a hpang maga de nga ai ni gaw shanhte a hpang maga de nga ai ni hta grau nna law nga ga ai,” ngu nna htan wu ai.

¹⁷Dai hpang shi gaw, “O MADU e, shi mu lu u ga, shi a myi hpaw ya u!,” ngu nna hpyi wu ai. Dai MADU mung shi akyu hpyi ai ga hpe htan ya wu ai rai nna Elisha a shangun ma wa yu dat wu yang Elisha a grup yin na bum nhkrem hkan e, wan gumra ni hte wan hpyen leng ni hte hpring nga ai hpe shi mu wu ai.

¹⁸Suri masha ni htim gasat ma ai shaloi, Elisha gaw, “O MADU e, ndai masha ni hpe myi n mu mat hkra shamak kau u!,” ngu nna hpyi wu ai. Dai MADU mung shi hpyi ai ga hte maren shanhte hpe shamak kau ya wu ai.

¹⁹Dai hpang Elisha gaw shanhte kaw sa nhtawm, “Nanhte mahtang shut ai lam hta hkan nga myit dai; ndai gaw nanhte tam ai mare n rai nga ai. Sa sa ngai kaw she hkan nang mi, nanhte tam ai wa hpang de ngai woi sa made ga,” ngu nna tsun wu ai. Shing rai shi shanhte hpe Samari mare de woi mat wa mu ai.

²⁰Shanhte mare de du bang mat wa ai hte rau Elisha gaw, “MADU e, shanhte a myi ni hpe hpaw ya u; shaloi shanhte mu lu na mara ai,” ngu nna hpyi wu ai. Dai MADU mung shi hpyi ai ga hpe htan ya let shanhte a myi ni hpe jahpaw ya wu ai rai nna Samari mare kata e rai nga ma ai hpe mu ma ai.

²¹Israela hkawhkam gaw dai Suri masha ni hpe mu jang, shi gaw Elisha hpe, “Madu e, ngai shanhte hpe sat kau na rai nga a ni? Ngai shanhte hpe sat kau na rai nga a ni?,” ngu nna san wu ai.

²²Shi chyawm gaw, “N rai law, nanhte gasat nna rim la lu ai hpyenla ni hpe pyi sat kau lu na myit dai n rai; lu na sha na lusha shanhte hpe jaw mu; shing rai shanhte a hkawhkam wa hpang de nhtang wa shangun mu,” ngu nna tsun wu ai.

²³Dai rai nna Israela hkawhkam wa gaw shanhte a matu lusha poi kaba galaw ya nna jaw sha wu ai; dai hpe lu sha ngut jang, Suri hkawhkam wa hpang de shanhte hpe wa kau shangun dat mu ai. Dai aten kaw nna Suri masha ni Israela mungdan hpe shang gasat ai lam jahkring kau manu ai.

²⁴Dai hpang gade n na yang, Suri Hkawhkam Benhadad gaw Israela hpe ninghkap na nga, shi a hpyen luksuk ting hpe woi nhtawm Samari mare hpe wang tawn da mu ai;

²⁵shing rai wang da ai majaw mare kata hta malu masha kadawn wa ai gaw laja lana byin wa ai rai nna lawze baw langai mi gaw gumhpraw dengga matsat shi, hkrudu hkyi pawng ka-ang hkup hpe gumhpraw dengga manga hte lu nga ai.

²⁶Israela hkawhkam wa gaw mare bunghku ntsa hku lai hkawm nga yang, numsha langai mi gaw, “Madu hkawhkam e, ngai hpe karum la e law!,” ngu nna jahtau tsun wu ai.

²⁷Shi gaw, “Dai MADU nang hpe n karum la ai rai yang, ngai gara hku karum shingtau lu na rai nga a ta? Hkaulan mam mung, sabyi mung ngai kaning rai lu na rai ta?,” ngu nna san wu ai.

²⁸Shi gaw, “Na a ru yak tsin-yam tsindam gaw hpa wa rai ta? Dai numsha gaw, “Ndai numsha gaw shawng shani e nye a kasha sha ga, hpang shani a matu chyawm gaw shi a kasha sha ga nga nna hpaji jaw ai,” ngu nna htan wu ai.

²⁹Dai rai nna an gaw nye a kasha hpe shadu sha ga ai. Hpawt ni gaw shi a kasha hpe an sha na ga ai ngu nna shi hpe ngai tsun ti mung shi a kasha hpe makoi kau nga ai!,” ngu nna htan wu ai.

³⁰Dai lam hpe hkawhkam wa na la ngut jang, hkrit kajawng ai hte shi a hpun palawng ni hpe gang je kau nna lachyit hpun palawng bu hpun nga ai hpe mare bunghku hte htep rai nga nga ai amyu masha ni mahtang mu ma ai.

³¹Shi gaw, “Elisha a baw hpe dai ni n lu daw kau ya ai rai yang, Karai Kasang ngai hpe si hkra adup nu ga law!,” ngu nna tsun wu ai.

³²Shing rai Elisha hpe sa woi wa na matu, kasa langai mi hpe shangun dat wu ai. Dai aten hta Elisha gaw shi kaw sa chyai ai myit su salang nkau mi hte rau shi a nta e nga nga wu ai. Hkawhkam wa a kasa garai n du shang wa ai aten hta Elisha gaw myit su salang ni hpe, “Dai masha sat ai wa gaw ngai hpe sat kau na matu marai langai ngai hpe shangun dat nga ai! Ya chyawm gaw nang e shi du nga sai rai nna shi hpe n shang shangun lu hkra chyinghka la kau mu. Hkawhkam wa nan shi a shingdu e hkan nang nga ai,” ngu nna tsun wu ai.

³³Shi gaw dai lam hpe ayak ahkak rai tsun shakre nga yang, hkawhkam wa du shang wa nhtawm, “Dai MADU gaw anhte a ntsa e ndai ru yak tsin-yam tsindam shapraw dat nu hka! Lama mi galaw na matu hpa majaw shi hpe naw ala nga ang na rai ta?,” ngu nna tsun wu ai.