Read Jinghpaw Common Language Bible 2009 2 HKAWHKAM 9 Bible Online

2 HKAWHKAM 9 - Jinghpaw Common Language Bible 2009 bible

2 HKAWHKAM 9

¹Dai aten laman hte yang, myihtoi Elisha gaw myihtoi ma ni hta na langai mi hpe shaga la nhtawm shi hpe, “Gilead mung na Ramot mare de sa wa na matu shajin da sanu. Ndai tsanlun sau rawng ai namtau hpe mung nang hte rau la sa wa su;

²Dai yang e nang du jang, Nimshi a kashu, Yehoshahpat a kasha Yehu hpe hkan tam u. Shi a manaw manang ni kaw na shi hpe sha dinghkrai la nhtawm kata gawk de woi shang mat wa nna,

³ndai tsanlun sau shi a baw ntsa e ru bun let, ‘Israela hkawhkam tai na matu nang hpe namman jaw ya u, nga nna dai MADU tsun ai,’ ngu tsun u. Dai hpang dai yang kaw nna nang chyang lu ai made pru mat wa u,” ngu nna tsun wu ai.

⁴Shing rai myihtoi shabrang wa gaw Ramot mare de sa wa wu yang,

⁵luksuk hpyen du ni zup hpawng hpawng nga ma ai hpe sa mu wu ai. Shaloi shi gaw, “Madu e, ngai nang hpe tsun dan na shiga lu nngai,” ngu nna tsun wu ai. Yehu mahtang, “Anhte hta na kadai hpe mahtang tsun mayu n ni?,” ngu nna san wu ai. Shaloi shi gaw, “Madu e, nang hpe le,” ngu nna tsun wu ai.

⁶Dai hpang shan lahkawng nta nhku de shang nhtawm myihtoi shabrang wa mahtang Yehu a baw ntsa e tsanlun sau ru bun let shi hpe, “Dai MADU Israela a Karai Kasang ning nga tsun dat ai: ‘Nye a amyu masha Israela a hkawhkam tai na, ngai nang hpe namman jaw ya nngai.

⁷Ahab a kasha rai nga ai na a madu hkawhkam wa hpe nang sat kau na rai ndai; shing rai ngai gaw nye a myihtoi ni hte kaga shangun ma ni hpe sat sharu kau ya ai Yezebela hpe ari jaw na we ai.

⁸Ahab a dinghku masha ni yawng hte shi a amyu matu ni si na rai mu ai; shi a dinghku kata na la sha kaji kaba n nga yawng hte hpe yeng seng kau na nngai.

⁹Israela Hkawhkam Yeroboam hte Hkawhkam Basha yan a dinghku masha ni hpe di kau we ai zawn shi a dinghku masha ni hpe mung di kau na we ai.

¹⁰Yezebela a moi mang hpe lup makoi lu na n rai; shi a hkum shan hpe Yezrela lamu ga hta gwi ni sha kau na ra ai,’” ngu nna tsun wu ai. Shing nga ga shaga ngut jang, dai shabrang myihtoi wa gawk kata kaw nna pru wa nhtawm hprawng mat wa wu ai.

¹¹Yehu gaw shi a du manang ni kaw bai nhtang wa yang, “Lam shagu hkrak rai nga a ni? Dai mana bu ai wa nang hpe hpa galaw shangun mayu a ta?,” ngu nna shi hpe hkap san ma ai. Yehu gaw, “Shi hpa ra nga ai gaw nanhte chye nga myit dai,” ngu nna sha htan wu ai.

¹²Shanhte gaw, “N rai law, anhte n chye ga ai; shi kaning nga tsun ai lam anhte hpe she tsun dan yu mi!,” ngu nna tsun htang ma ai. “Dai MADU ning nga nna tsun ndau ai lam shi ngai hpe ning ngu tsun dan ai: “Israela hkawhkam tai na, ngai nang hpe namman jaw ya nngai.”

¹³Yehu a du manang ni gaw kalang lata shanhte a palawng galu ni hpe raw la nna Yehu wa tsap na matu lakang baw e nep da nhtawm pahtau ni hpe dum let, “Yehu gaw hkawhkam rai nga sai law!,” ngu nna jahtau tsun ma ai.

¹⁴Dai hpang Yoram gaw Suri Hkawhkam Hazaela hte Ramot mare e majan gasat hkat ai majaw hkala hkrum ai ningma ni hpe shamai la na matu Yezrela e wa nga nga yang, Yehu shi hpe gumlau na maw mawn nga ai. Dai rai nna Yehu gaw shi a hpyen du manang ni hpe, “Nanhte ngai hte rau rai myit yang gaw, Yezrela mare e nga ai masha ni hpe sa shadum na matu, ndai Ramot mare kaw nna kadai mung n pru hkawm mu ga,” ngu nna hkang da wu ai.

¹⁶Dai hpang Yehu gaw gumra leng jawn nna, Yezrela mare de sa wa wu ai. Yoram chyawm gaw machyi garai n mai nga ai; Yuda Hkawhkam Ahazia mung dai yang e shi kaw sa chyai nga ai.

¹⁷Yezrela langchyi ntsa e lit nga ai sin langa langai mi gaw Yehu hte shi a masha ni shanang sa wa ai hpe mu jang, “Hpyen hpung mi lung wa nga ma ai hpe ngai mu nngai!,” ngu nna jahtau tsun wu ai. Yoram gaw, “Shanhte gaw jinghku shing n rai hpyen ni rai nga ma ai kun?, chye lu hkra gumra jawn ai wa langai mi hpe shangun dat u,” ngu nna tsun htang wu ai.

¹⁸Dai dat kasa wa gaw Yehu kaw jawn sa wa nhtawm shi hpe, “Jinghku langai hku nang du sa ai rai yang mung, hkawhkam wa chye mayu ai da,” ngu nna tsun wu ai. Yehu gaw, “Dai na a amu n re! Nye a hpang e she hkan nang u,” ngu nna htan wu ai. Bai langchyi ntsa na sin langa wa mung dai dat kasa wa wora hpung de du mat wa tim, bai nhtang wa nga ai n rai, ngu nna shana ya wu ai.

¹⁹Kaga dat kasa langai mi hpe mung shangun dat nna shawng na ga san hte maren Yehu hpe san wu ai. Yehu chyawm gaw, “Dai na a amu n re! Nye a hpang e she hkan nang u,” ngu nna htan wu ai.

²⁰Ya lang mi mung sin langa wa gaw dai dat kasa wa wora hpung ni de du mat wa tim, bai nhtang wa nga ai n rai. Shi gaw, “Dai masha hpung a ningbaw wa gaw mana bu ai wa zawn shi a leng hpe gau nga ai rai nna Yehu zawn rai nga ai!,” ngu nna tsun wu ai.

²¹Hkawhkam Yoram gaw, “Nye a gumra leng hpe jin jin byau tawn mu,” ngu nna hkang dat wu ai. Dai byau ngut jang, shi hte Hkawhkam Ahazia gaw tinang nang a hpyen leng ni hta jawn nhtawm sa hkrum na nga, pru sa mat wa ma ai. Ya shan gaw Nabot madu tawn yu sai sun hta shi hpe sa hkrum nga ma ai.

²²Yoram gaw, “Nang gaw ngwi pyaw sim sa ai hte du sa wa nga n ni?,” ngu nna hkap san wu ai. Yehu gaw, “Na nnu Yezebela galaw hpang dat ai hpyi lamum shung sha ai hte hpara sumla nawku ai lai ni yawng nde wa anhte kaw naw nga nga ai rai yang, ngwi pyaw sim sa lam kaning rai lu la mai na rai nga a ta?,” ngu nna htan wu ai.

²³Yoram gaw shi a hpyen leng hpe kayin dat nna, “Ahazia e, Ahazia e, dai gaw gumlau ai amu she rai sai!,” ngu nna jahtau tsun let hprawng mat wa ma ai.

²⁴Yehu wa gaw shi a ndan hpe n-gun mahkra hte gap dat wu yang, pala gaw Yoram a shingma hku shang mat wa nhtawm salum e wa hkra ya nga ai. Yoram gaw shi a hpyen leng hta kadawng si mat wu ai.

²⁵Yehu gaw shi a hpyen du Bidka hpe, “Shi a hkum hpe la nna Nabot madu tawn ai sun e dai hpe sa kabai bang da su. An lahkawng Hkawhkam Yoram a kawa Ahab a hpang e gumra rau jawn nna hkan nang nga yang, dai MADU gaw ndai ga ni hte ning nga tsun nu ai hpe dum ga:

²⁶‘Nabot hpe mung, shi a shadang sha ni hpe mung mani e sat kau ai hpe ngai mu nngai. Ndai sun hta e nan ngai nang hpe ari jaw na we ai.’ Yehu gaw shi a hpyen du wa hpe, “Dai MADU a ga sadi shatup na matu mung, Yoram a moi mang hpe la nna Nabot madu tawn da ai sun hta dai hpe sa kabai tawn su,” ngu nna hkang dat wu ai.

²⁷Hkawhkam Ahazia gaw byin ai lam hpe mu jang, shi a hpyen leng hta jawn nna Bet Hagan mare maga de hprawng mat wa wu ai. Yehu chyawm gaw shi hpe hkan shachyut let, “Shi hpe sat kau mu!,” ngu nna shi a masha ni hpe hkang dat wu yang, Iblim mare makau na Gura kadawng e shi a hpyen leng hpe gawt lung wa yang shanhte shi hpe hkala kau mu ai. Rai ti mung shi gaw Megido mare de du hkra matut sa wa lu ai hte dai yang e si wa sai.

²⁸Shi a du salang ni mung shi a moi mang hpe hpyen leng ntsa hta htaw nna Yerusalem mare de la wa nhtawm Dawi a Mare na hkawhkam ni a lupwa hta shi hpe lup makoi da ma ai.

²⁹Israela Hkawhkam Ahab a kasha Yoram hkaw dung ai shi langai ning hta Ahazia mahtang Yuda hkawhkam tai wa sai.

³⁰Yehu gaw Yezrela mare de du shang wa nga sai. Yezebela gaw hpa byin nga sai lam hpe na jang, shi a myi-kaw mun hta tsi chya la nna, shi a kara ni hpe mawn sumli la nhtawm hkawhkam htingnu kata na hkuwawt hku langai mi kaw nna nmaw lam de mada tsap nga wu ai.

³¹Ya Yehu mare chyinghka lam hku shang bang wa nga yang, shi gaw, “Zimri nang e, nang gaw masha sat ai wa rai nga ndai! Nang de hpa majaw sa nga n ta?,” ngu nna hkap san wu ai.

³²Yehu gaw ntsa de mada yu nhtawm, “Nye maga de kadai ni nga nga myit ta?,” ngu nna jahtau tsun dat wu ai. Shaloi hkawhkam htingnu kata de na du salang lahkawng masum mi hkuwawt hku kaw nna shi hpe gum yu ma ai.

³³Yehu gaw shanhte hpe, “Shi hpe kabai jahkrat dat mu!,” ngu nna tsun wu ai. Shanhte mung kabai jahkrat dat mu ai rai nna shi a asai gaw nta shakum hta mung, gumra ni hta mung gamang hkra nga ai. Yehu gaw shi a gumra hte rau shi a mang ntsa hku gawt lai mat wa nhtawm,

³⁴hkawhkam htingnu kata de shang nna lu lu sha sha rai nga wu ai. Dai hpang shi gaw, “Ndai dagam dala hkrum ai numsha hpe sa hta lup kau masu; hpa mi rai tim, shi gaw hkawhkam shayi sha rai nga ai,” ngu nna tsun wu ai.

³⁵Rai ti mung shi hpe lup makoi na masha ni mahtang shi a pungkum, lagaw hte lata lahpan nra hta kaga hpa mung n nga nga ai hpe sa mu ma ai.

³⁶Dai lam Yehu hpe shanhte wa tsun dan mu yang, shi gaw, “Da ndai lam gaw dai MADU tsun da nu ai hte maren, byin wa ai lam rai nga ai. Dai MADU gaw shi a shangun ma Elia a n-gup aga hku nna ning nga tsun da nga ai: ‘Yezrela lamu ga hta Yezebela a hkum shan hpe gwi ni sha kau na mara ai.

³⁷Kadai mung shi a lup rai nga ai nga nna alak mi n madun lu hkra naw ngam nga ai shi a mang gaw dai yang e hkyi sumpum zawn agat kau ai hkrum na ra ai.’”