Read Jinghpaw Common Language Bible 2009 1 HKAWHKAM LABAU 16 Bible Online

1 HKAWHKAM LABAU 16 - Jinghpaw Common Language Bible 2009 bible

1 HKAWHKAM LABAU 16

¹Shanhte gaw de a matu ngu nna Dawi hkyen tawn ai Sum kata, shi a shara ngu na kaw, dai Sumpu hpe la wa nna tawn da ma ai. Dai hpang shanhte gaw Karai Kasang hpe shagu hkungga hte mahku hkungga ni nawng ya ma ai.

²Dawi gaw shagu hkungga ni hpe nawng jau ngut jang, dai MADU a mying ningsang hta amyu masha ni hpe shi shaman ya nhtawm,

³shanhte yawng hpe lusha karan jaw mu ai. Israela mung na numsha, lasha shagu hte hpe muk pa pa, shan tau hkyep hkyep hte sabyi si jahkraw loi loi jaw wu ai.

⁴Dawi gaw Ga Shaka Sumpu a man e dai MADU Israela a Karai Kasang hpe nawku ai hta shi hpe mahkawn mangoi let shakawn kungdawn na matu, Lewi masha nkau mi hpe woi awn shangun wu ai.

⁵Asap gaw ningbaw aya hta san da hkrum ai wa rai nna shi hpe karum na matu Zehkaria nga nga ai. Bai Yeiela, Shemiramot, Yehiela, Matihtia, Eliaba, Benaia, Obed Edom hte Yeiela hte gaw dawraw tingse dum na rai ma ai. Asap mahtang shupsheng dum nna,

⁶hkinjawng lahkawng rai nga ai Benaia hte Yahaziela yan gaw Ga Shaka Sumpu a man e pahtau hpe aten man man dum ya nga ma ai.

⁷Shing rai dai MADU hpe chyeju shakawn mahkawn mangoi na lit, Asap hte shi a kahpu kanau Lewi masha ni hpe Dawi shawng jaw tawn da wu ai.

⁸Dai MADU a chyeju hpe shakawn mu, shi a galu kaba ai lam hpe htawn tsun mu; shi galaw dan sai magam bungli ni amyu baw ni hpe tsun dan mu.

⁹Dai MADU hpe mahkawn shakawn nga mu; shi galaw dan sai mauhpa amu nlang ni hpe tsun dan mu.

¹⁰Anhte hpe shi madu da nga ai majaw kabu gara nga mu; shi hpe nawku daw jau ai ni kabu gara lu mu ga!

¹¹Karum hpyi na matu dai MADU hpang de sit shang wa mu; shi hpe n sim n sa nawku nga mu.

¹²Karai Kasang a shangun ma Yaku a amyu matu ni hte Karai Kasang e lata la sai Israela amyu matu ni e, Karai Kasang galaw dan sai lamik kumla ni hte shi jaw da sai tara dara lam ni hpe adum nga mu.

¹⁴Dai MADU gaw anhte a Karai Kasang rai nga ai; shi a hkang da ai tara ni mungkan ting a matu rai nga ai.

¹⁵Htani htana agrin nga na matu shi tawn da nu ai Karai Kasang a ga shaka ngu ai

¹⁶Abraham hte shi tawn da ai ga shaka hpe mung, Isak hte shagrin da ai ga sadi hpe mung, galoi mung hkum malap kau myit.

¹⁷Dai MADU gaw Yaku hte ga shaka galaw da nu ai; dai gaw htani htana agrin nga na ra ai.

¹⁸Shi mahtang, “Nang hpe ngai Hkanan mung jaw na nngai; dai gaw nanhte a sut gan tai na ra ai,” ngu nna tsun wu ai.

¹⁹Karai Kasang a amyu masha ni gaw hti hkum hku nna n law nga ma ai, shanhte gaw Hkanan mung hta masha tsasam ni rai ma ai.

²⁰Shanhte gaw mungdan langai mi kaw nna langai mi de, hkawhkam mungdan mi kaw nna mungdan mi de kayin hkawm nga ma ai.

²¹Rai ti mung Karai Kasang gaw shanhte hpe dip gamyet sha na ahkang kadai hpe mung n jaw ya nga ai; shanhte hpe makawp maga la na matu hkawhkam ni hpe ning ngu nna sadi jaw wu ai:

²²“Ngai lata san da sai shangun ma ni hpe hkum machyi shangun myit; nye a myihtoi ni hpe hkum hkra ya mi.”

²³Mungkan ga yawng hte e, dai MADUhpe mahkawn mangoi mu! Shi anhte hpe hkye hkrang la nu ai kabu gara shiga hpe shani shagu htawn tsun mu.

²⁴Shi a hpung shingkang masha amyu ni hpe, shi a chyalai n-gun hte hpring ai amu masha yawng hte hpe htawn tsun dan mu.

²⁵Dai MADU gaw galu kaba nga ai rai nna nachying shakawn ging ai wa rai nga ai; shi gaw karai ni yawng hta grau nna shagrau sha-a na mai nga ai.

²⁶Kaga amyu baw ni yawng a karai ni gaw hpara sumla ni hkrai rai nga ai; rai ti mung dai MADU chyawm gaw sumsing lamu ni hpe hpan da nu ai.

²⁷Hpung shingkang hte daru magam n-gun gaw shi hpe gawan da nna; n-gun atsam hte kabu gara ai gaw shi a Nawku Htingnu hta hpring nga ai.

²⁸Ginding aga ntsa na masha yawng hte e, dai MADU hpe shakawn mu; shi a hpung shingkang hte n-gun atsam hpe shakawn mu.

²⁹Dai MADU a hpung shingkang hte seng ai mying ningsang hpe shakawn mu; hkungga lara let shi a Nawku Htingnu kata de shang sa mu. Shi dan pru ai shaloi, Chyoi Pra Ai Wa a man e, gum dagup nga mu.

³⁰Ginding aga yawng hte e, shi a man e hkrit gari nga mu! Ginding aga gaw shi a shara hta ngang ngang dung nga ai rai nna n shamu lu nga ai.

³¹Ginding aga hte sumsing lamu e, kabu gara nga mu! Dai MADU gaw hkawhkam rai nga ai ngu nna amyu baw ni hpe tsun dan mu.

³²Panglai hte dai hta rawng marawng hkrung kanu shagu hte e, nsen kaba hte kashaw nga mu; pa ni hte dai yang na nga manga hte e, kabu gara nga mu.

³³Ginding aga hpe up hkang na matu dai MADU du sa ai shaloi, nam maling na hpun ni kabu gara ai hte jahtau garu na mara ai.

³⁴Dai MADU gaw mai kaja nga ai rai nna, shi hpe chyeju dum mu; shi a tsaw ra myit htani htana agrin nga ai.

³⁵Nanhte gaw shi hpe, “Anhte hpe hkye hkrang la ai; O, Karai Kasang e, anhte hpe hkye hkrang la mi; anhte hpe shinggyin la ai hte amyu baw ni a lata kaw nna hkye mawai la mi; shaloi anhte chyeju dum ai hte na a chyoi pra ai mying hpe shakawn na ga ai,” ngu tsun mu.

³⁶Dai MADU Israela a Karai Kasang hpe shakawn kungdawn mu! Ya kaw nna shi hpe htani htana shakawn kungdawn mu! Dai hpang amyu masha ni yawng, “Amen,” ngu nna tsun let dai MADU hpe shakawn kungdawn ma ai.

³⁷Hkawhkam Dawi gaw Ga Shaka Sumpu tawn da ai shara hta tut nawng nawku woi na matu Asap hte shi a hpu nau Lewi masha ni hpe mung san tawn da nga ai. Shanhte gaw dai yang e lani hte lani shanhte gun hpai ang ai lit ni hpe galaw nga ma ai.

³⁸Yeduhtun a kasha Obed Edom hte shi a amyu lakung kaw na masha kru shi matsat hte mung shanhte hpe karum ma ai. Hosa hte Obed Edom yan mung chyinghka ni hpe sin ai hpareng yan rai ma ai.

³⁹Hkinjawng Zadok hte shi a kahpu kanau hkinjawng masha ni gaw Gibeon mare na nawku ai shara hta dai MADU hpe nawku daw jau ai amu hta woi awn nga ma ai.

⁴⁰Shanhte gaw Israela hpe dai MADU jaw ya ai Tara hta ka da ai hte maren, tawn hkungri ntsa e shani shagu jahpawt hte shana de e shagu hkungga ni hpe hkum ting nat nawng ra ma ai.

⁴¹Dai MADU a tsaw ra myit htani htana agrin nga ai majaw shi hpe mahkawn mangoi let shakawn kungdawn na matu Heman mung, Yeduhtun hte laksan lata da hkrum ai ni mung shanhte hte rau rai ma ai.

⁴²Mahkawn mangoi let shakawn kungdawn nga ma yang, Heman hte Yeduhtun yan mung pahke hte shupsheng ni hpe mung, kaga madum sumpyi ni hpe mung woi awn dum ma ai. Yeduhtun a amyu lakung ni chyawm gaw chyinghka ni hpe sin nga ma ai.

⁴³Dai hpang masha shagu gaw dum nta de wa mat shajang ma ai; Dawi mung shi a dinghku masha ni hte wa hkrum chyai na nga nta de wa mat wa wu ai.