Read Jinghpaw Common Language Bible 2009 1 HKAWHKAM LABAU 24 Bible Online

1 HKAWHKAM LABAU 24 - Jinghpaw Common Language Bible 2009 bible

1 HKAWHKAM LABAU 24

¹Ndai gaw Arun hte seng ai amyu matu ni a hpung rai nga ai. Arun gaw shadang sha mali lu ai; dai ni gaw Nadab, Abihu, Eleaza, hte Ihtama ni rai nga ai.

²Nadab hte Abihu yan gaw shan a kawa a shawng e si mat ma ai rai nna amyu matu htum mat ma ai. Dai rai nna shan a kanau yan rai nga ai Eleaza hte Ihtama yan mahtang hkinjawng tai wa masai.

³Hkawhkam Dawi gaw Arun a amyu matu ni hpe shanhte galaw ang ai amu hte maren, hpung hte hpung garan nna ninghtan shinggyin da wu ai. Shi gaw ndai amu a matu Eleaza amyu matu kaw na Zadok, Ihtama amyu matu kaw na Ahimelek yan a karum la ai hkrum nga ai.

⁴Eleaza a amyu matu ni hpe hpung shi kru, Ihtama a amyu matu ni hpe hpung matsat hku ninghtan shinggyin da nga ai; Eleaza a amyu matu ni a dinghku ni hta na lasha ningbaw tai ai ni grau law nga ai majaw dai hku galaw ai lam rai nga ai.

⁵Eleaza hte Ihtama yan a amyu matu ni gaw Nawku Htingnu na du salang ni hte wenyi lam hta woi awn ningbaw ai ni rai nga ma ai majaw hpaida da let bungli lit lata la nga ma ai.

⁶Eleaza hte Ihtama amyu matu ni langai hpang langai hpaida da ma ai. Dai hpang Nehtanela a kasha, Lewi amu madu Shemaia gaw shanhte hpe mying ka la wu ai. Dai rai nna hkawhkam wa hte shi a du salang ni mung, hkinjawng Zadok hte Abiahta a kasha Ahimelek mung, hkinjawng dinghku ni hta na ningbaw ni, hte Lewi dinghku ni yawng hte mung sakse ni hkrai rai ma ai.

⁷Ndai gaw bungli lit gun hpai na matu shatsam da hkrum sai dinghku hpung hkun mali hte a mying rai nga ai: dai ni gaw 1) Yehoiarib; 2) Yedaia; 3) Harim; 4) Seorim; 5) Malhkiya; 6) Miyamin; 7) Hakoza; 8) Abiya; 9) Yeshua; 10) Shehkania; 11) Eliashib; 12) Yahkim; 13) Hupa; 14) Yeshebea; 15) Bilga; 16) Imera; 17) Hezira; 18) Hapize; 19) Pehtahia; 20) Yehekela; 21) Yahkin; 22) Gamula; 23) Delaia; 24) Mazia ni rai nga ai.

¹⁹Ndai masha ni gaw dai MADU Israela a Karai Kasang a hkang da ai ga hpe madat mara let shanhte a kaji kawa Arun shagrin da ai hte maren, Nawku Htingnu de sa nna shanhte a bungli lit hte daw jau ai amu galaw na matu san da hkrum ai hpung ni a jahpan rai nga ai.

²⁰Ndai gaw Lewi amyu bawsang kaw na yu hkrat wa ai dinghku ni a ningbaw ni rai nga ai; dai ni gaw, Yedea gaw Amram a amyu matu langai rai nna Shebuela hku shangai hkrat wa ai wa rai nga ai.

²¹Ishia gaw Rehabia a amyu matu langai mi re.

²²Yahat gaw Izhara a amyu matu langai rai nna Shelomit hku nna pra sa wa ai wa re.

²³Asak hku hkan yang, Hebron a shadang sha ni gaw Yeria, Amaria, Yahaziela hte Yekameam ni rai ma ai.

²⁴Shamira gaw Uziela a amyu matu langai mi rai nna Mihka hku nna pra sa wa ai wa rai nga ai.

²⁵Zehkaria gaw Uziela a amyu matu langai mi rai nna Ishia ngu ai Mihka a kanau hku pra sa wa ai wa rai nga ai.

²⁶Merari amyu matu ni gaw Mali, Mushi hte Yazia ni rai ma ai.

²⁷Yazia gaw shadang sha masum lu ai; dai ni gaw Shoham, Zahkura hte Ibri ni rai ma ai.

²⁸Mali gaw shadang sha lahkawng lu ai; dai yan gaw Eleaza hte Kisha rai ma ai. Eleaza mahtang shadang sha n lu ti mung Kisha gaw kasha Yeramela lu nga ai.

³⁰Mushi gaw shadang sha masum lu ai; dai ni gaw Mali, Edera, hte Yeremot ni rai nga ai. Ndai ni gaw Lewi masha ni a dinghku dap ni rai ma ai.

³¹Shanhte gaw Arun kaw na yu hkrat wa ai amyu matu hkinjawng dinghku ni zawn dinghku shagu na ningbaw hte shi a kanau ni hta na langai mi gaw shanhte a daw jau amu bungli ni a matu hpaida da ma ai. Dai rai nna Hkawhkam Dawi mung, Zadok hte Ahimelek mung, hkinjawng dinghku ni a ningbaw ni hte Lewi masha ni gaw sakse ni rai ma ai.