Read Jinghpaw Common Language Bible 2009 1 HKAWHKAM LABAU 26 Bible Online

1 HKAWHKAM LABAU 26 - Jinghpaw Common Language Bible 2009 bible

1 HKAWHKAM LABAU 26

¹Ndai gaw Nawku Htingnu sin ai daw jau amu galaw ai Lewi masha ni a matu bungli lit shatsam da ai lam rai nga ai. Kora amyu lakung kaw na Asap dinghku na Kore a kasha Meshelemia rai nga ai.

²Shi gaw shadang sha sanit lu ai; asak kaji kaba hku hkan yang, Zehkaria, Yediela, Zebadia Yatniela,

³Elam, Yehohanan hte Elihonai ni rai nga ai.

⁴Obed Edom hpe mung Karai Kasang gaw shadang sha matsat shaman ya nga ai; shanhte a asak kaji kaba hku hkan yang, Shemaia, Yehozaba, Yoa, Sahkara, Nehtanela,

⁵Amiela, Yisahka, hte Peulahtai ni rai ma ai.

⁶Obed Edom a shadang sha alat Shemaia mung shadang sha kru lu ai; dai ni gaw Otni, Rehpaela, Obed, Elzabad, Elihu hte Semahkia ni rai nga ai. Shanhte a n-gun atsam kaba a majaw shanhte a amyu lakung hta ahkyak ai masha ni rai ma ai; hpang jahtum na lahkawng yan mahtang gaw ningtawn n-gun atsawm rawng ai yan rai ma ai.

⁸Obed Edom a dinghku na masha kru shi lahkawng hte gaw ndai amu a matu htap htuk nna grai atsam rawng ai ni rai ma ai.

⁹Meshelemia a dinghku kaw na n-gun atsam rawng ai masha shi matsat rai nga ai.

¹⁰Merari amyu lakung kaw na Hosa gaw shadang sha mali lu ai; dai ni gaw Shimri (shi a kawa mahtang kasha alat n rai tim shi hpe ningbaw shatai da wu ai),

¹¹Hilkia, Tebalia hte Zehkaria ni rai nga ai. Hosa a dinghku kaw na Nawku Htingnu sin ai masha yawng marai shi masum rai nga ai.

¹²Dinghku hku hkan nna Nawku Htingnu sin ai ni hpe hpung hku garan da nga ai rai nna, shanhte gaw kaga Lewi masha ni zawn Nawku Htingnu kata hta bungli galaw na lit shatsam da ai hkrum nga ma ai.

¹³Dinghku shagu ngu na kaji kaba n nga, gara chyinghka sin ang na lit hpe hpaida da nga ma ai.

¹⁴Shelemia hpaida da wu yang, sinpraw chyinghka maga ang nga ai; dai hpang kaja ai hpaji tut nawng chye jaw ai shi a kasha Zehkaria hpaida da wu yang, dingdung chyinghka de ang nga ai.

¹⁵Obed Edom mahtang dingda chyinghka de ang nga ai; shi a shadang sha ni gaw arai tawn da ai gawk ni hpe sin na lit garan la nga ma ai.

¹⁶Shupim hte Hosa yan gaw sinna chyinghka hte nmaw lam lahta e nga ai Shalek Chyinghka ni hpe sin na lit garan la nga ma ai. Sin langa lit hpe masat da ya ai aten langai hpang langai sin na matu lit shatsam da nga ma ai.

¹⁷Sinpraw maga, shani shagu sin na sin langa kru, dingdung maga marai mali, dingda maga marai mali, arai tawn da ai gawk ni hta shani shagu sin langa marai mali, arai tawn da ai gawk a matu marai lahkawng hkawng rai nga ai.

¹⁸Sinna maga de na ginsum makau na lam sin na matu marai mali hte dai ginsum hta nan marai lahkawng sin na rai nga ai.

¹⁹Ndai gaw Kora hte Merari lakung ni hta na sin langa lit gun hpai na matu lit shatsam da ai lam rai nga ai.

²⁰Shanhte hte seng ai kaga Lewi kahpu kanau ni gaw Nawku Htingnu sut dek hte Karai Kasang hpe ap nawng ya ai kumhpa ni hpe tawn da ai arung arai gawk ni hpe woi hpareng na lit lu nga ma ai.

²¹Gershon a shadang sha langai rai nga ai Ladan gaw shi a kasha Yehiela a dinghku lawm hkra, dinghku hpung law law a kaji kawa rai nga ai.

²²Ladan hta kaga shadang sha lahkawng nga nga ai; dai yan gaw Zehtam hte Yoela yan rai nga ai. Shan gaw Nawku Htingnu sut dek hte arung arai ni hpe hpareng ai yan rai ma ai.

²³Amram, Izhara, Hebron hte Uziela amyu matu ni hpe mung magam lit ni shatsam da nga ma ai.

²⁴Mawshe a kasha Gershom a amyu lakung na Shebuela gaw Nawku Htingnu sut dek hpe up hkang na lit lu nga ai.

²⁵Gershom a kanau Elieza a maga hku nna Shelomit hte jinghku daw nga wu ai. Elieza gaw Rehabia a kawa rai nga ai, shi gaw Yeshaia a kawa, shi gaw Yoram a kawa, shi gaw Zihkri a kawa, shi gaw Shelomit a kawa rai nga ai.

²⁶Shelomit hte shi a dinghku masha ni gaw Hkawhkam Dawi hku nna mung, dinghku ni a ningbaw tai ya ai ni hte amyu lakung na hpung ni a ningbaw ni hku nna mung luksuk du ni hku nna mung, Karai Kasang hpe ap nawng ya sai kumhpa ni yawng hpe yu hpareng ai ni rai ma ai.

²⁷Shanhte gaw majan gasat nna lu la ai lanep nkau mi hpe la nhtawm Nawku Htingnu kata e lang na matu dai ni hpe ap nawng da ma ai.

²⁸Shelomit hte shi a dinghku gaw myihtoi Samuela, Hkawhkam Shawlu, Nera a kasha Abna hte Zeruia a kasha Yoab ni la wa ai kumhpa ni lawm hkra, Nawku Htingnu kata e lang na matu ap nawng da sai arai magup hte hpe hpareng ya nga ma ai.

²⁹Izhara a amyu matu hta na Hkenania hte shi a shadang sha ni gaw up hkang dap hte seng ai lit ngu ai labau gawn mazing amu, Israela amyu masha ni hpe tara dara ya ai amu ni hta lit shatsam da ai hkrum ma ai.

³⁰Hebron amyu matu ni hta na Hashabia hte shi a amyu abaw apa hkying mi sanit tsa hte ngu na ningtawn ai masha yawng hte gaw Yawdan hka a sinna hkran maga na Israela mung hta, nawku htung hte mung shawa hte seng ai up hkang lam yawng hpe woi hpareng nga ma ai.

³¹Yeria gaw Hebron amyu matu ni a ningbaw rai nga ai. Dawi hkawhkam tai nga ai mali shi ning hta e Hebron a amyu matu na dinghku ru sai ni hpe jep sagawn yu yang, dai dinghku kaw na laklai share shagan ai hpyenla ni, Gilead mung Yazera mare e nga nga ma ai hpe mu hkrup ma ai.

³²Hkawhkam Dawi gaw Yeria a amyu abaw apa ni hta na laklai share shagan ai dinghku a baw tai ya ai masha hkying lahkawng sanit tsa hpe lata la nhtawm Yawdan hka a sinpraw maga Rubin, Gad hte Sinpraw Manashe lamu ga na Israela mung hta nawku htung hte mung shawa hte seng ai up hkang lam yawng hpe woi hpareng nga ma ai.