Read Jinghpaw Common Language Bible 2009 2 HKAWHKAM LABAU 1 Bible Online

2 HKAWHKAM LABAU 1 - Jinghpaw Common Language Bible 2009 bible

2 HKAWHKAM LABAU 1

¹Hkawhkam Dawi a kasha Shawlumon gaw Israela mungdan hpe ngang ngang jum da lu nu ai. Dai MADU shi a Karai Kasang mung shi hpe shaman ya let daru magam n-gun grai shaja da ya nga ai.

²Hkawhkam Shawlumon gaw masha hkying mi hte latsa up ai du salang ni yawng hpe mung, asuya du salang ni yawng hpe mung, dinghku ni a ningbaw ni yawng hpe mung amyu masha ni hta na naw ngam nga ai ni yawng hpe mung,

³Gibeon mare na nawku shara de shi hte rau sa na matu shanhte hpe hkang da wu ai. Dai MADU a shangun ma Mawshe gaw nam mali hkan e galaw tawn ai dai MADU a hpung shingkang shanu nga ai Sum dai yang e nga nga ai majaw dai de shanhte sa ma ai.

⁴(Ga Shaka Sumpu hpe chyawm gaw Kiriat Yearim kaw nna shi hpai la wu ai rai nna de a matu Yerusalem mare hta Hkawhkam Dawi sharawt da ai Sum hta tawn da wu ai.)

⁵Hura a kashu, Uri a kasha Bezalela galaw ai magri mang tawn hkungri gaw Gibeon mare dai MADU a hpung shingkang shanu nga ai Sum a man e nga nga ai. Hkawhkam Shawlumon hte amyu masha ni yawng dai yang e dai MADU hpe nawku ma ai.

⁶Magri mang tawn hkungri ntsa e shagu hkungga ni hpe nawng ya let hkawhkam wa gaw dai Sum a man e, dai MADU hpe nawku wu ai. Dai hkungri ntsa e shi gaw hkungga yam nga hkying mi sat nhtawm hkum ting nat nawng ya wu ai.

⁷Dai shana e, Karai Kasang gaw Shawlumon kaw dan pru nna, “Ngai nang hpe hpa jaw na ra sharawng nga n ta?,” ngu nna san wu ai.

⁸Shawlumon gaw, “Nye a kawa Dawi hpe tsaw ra myit kaba nang tut nawng madun dan nga ndai; ya chyawm gaw shi a hkang hta ngai hpe hkawhkam shatai nga nit dai.

⁹O, MADU Karai Kasang e, nye wa hte shagrin da sai ga sadi hpe shatup u law; nang chyawm gaw ngai hpe n dang hti hkra grai law la ai amyu masha ni a hkawhkam shatai da nga nit dai rai nna;

¹⁰ngai shanhte hpe up hkang ra nga nngai majaw hpaji byeng-ya hte chye chyang ai nyan hpaji ngai hpe jaw e law. Shing n rai yang, ndai na a galu kaba ai amyu masha ni hpe ngai kaning rai up hkang lu na rai ta?,” ngu nna htan wu ai.

¹¹Karai Kasang gaw Shawlumon hpe, “Nang lata la ai lam jaw nga nit dai. Sut gan, manu dan ai sut arung arai, mying dan hkung ai, na a gumlau hpyen ni a si hkrung si htan lam, nang hkum nan asak galu na lam ni hpe hpyi na malai, ngai nang hpe hkawhkam shatai ai amyu masha ni hpe nang up hkang lu hkra nga, hpaji byeng-ya hte chye chyang ai nyan hpaji hpe sha nang hpyi nga ndai.

¹²Ngai gaw hpaji byeng-ya hte chye chyang ai nyan hpaji nang hpe jaw na we ai; dai sha n-ga, na a shawng na hte hpang na hkawhkam ni kadai mung n hkam la yu ai sut gan, manu dan ai sut arung arai, mying dan hkung ai lam ngai nang hpe grau jaw ya na de ai,” ngu nna tsun htang wu ai.

¹³Dai rai nna Shawlumon gaw Gibeon mare na dai MADU a hpung shingkang shanu nga ai Sum a nawku shara kaw nna pru wa nhtawm Yerusalem mare de nhtang mat wa nna Israela amyu hpe up nga ai.

¹⁴Shi gaw gumra leng hkying mi mali tsa hte gumra dap e lang ai gumra mun mi hkying lahkawng nga ai n-gun hpe gaw sharawt da nhtawm nkau mi hpe Yerusalem mare e tawn da nna ngam ai ni hpe kaga mare ni hkan tawn da shajang wu ai.

¹⁵Shi hkaw dung ai aten hta aja gumhpraw gaw Yerusalem mare e nlung zawn, arit hpun gaw Yuda mung bum lagaw hkan e tu ai maihkawng hpun ni zawn law htam nga ai.

¹⁶Hkawhkam wa a dat kasa ni mahtang Musri hte Kiliki mungdan hkan na shapraw ai gumra ni hte

¹⁷Egutu mung na shapraw ai gumra leng manu ni gaw shanhte a lata hta rai ma ai. Shanhte gaw Hiti hte Suri hkawhkam ni hpe gumra ni hte gumra leng ni hpe dut ya nga ma ai; shing re ai leng langai mi hpe gumhpraw 600 hte gumra langai mi hpe gumhpraw 150 hte ging dan ai hku dut nga ma ai.