Read Jinghpaw Common Language Bible 2009 2 HKAWHKAM LABAU 11 Bible Online

2 HKAWHKAM LABAU 11 - Jinghpaw Common Language Bible 2009 bible

2 HKAWHKAM LABAU 11

¹Rehoboam gaw Yerusalem mare de du ai shaloi shi gaw Yuda hte Benyamin amyu bawsang ni kaw na kaja htum ai hpyenla 180,000 hte hpe shaga hpawng da wu ai. Shi gaw majan gasat nhtawm dingdung maga de na Israela amyu bawsang ni hpe shi a up hkang ai npu hta bai nhtang jashawn lu na matu shatawng shada da wu ai.

²Rai ti mung, dai MADU gaw myihtoi Shimaia hpe,

³ndai mungga Rehoboam hpe mung, Yuda hte Benyamin amyu bawsang hta na amyu masha ni yawng hpe mung jaw ya na matu tsun wu ai.

⁴“Israela amyu masha na a nhpu nnau majing ni hpe sa gasat lu na myit dai n rai; nanhte yawng tinang nang a nta de bai wa manu. Byin lai mat wa sai lam gaw nye a myit ra ai lam rai nga li ai.” Shing rai shanhte yawng gaw dai MADU a hkang da ai ga hpe madat mara nna tinang nang a nta de nhtang mat wa shajang ma ai.

⁵Rehoboam gaw Yerusalem e naw nga nga nhtawm Yuda, Benyamin mung na mare ni hpe bunghku kum da wu ai: dai mare ni gaw,

⁶Betlehem, Etam, Tekoa,

⁷Betzura, Sohko, Adulam,

⁸Gat, Maresha, Zip,

⁹Adorim, Lahkisha, Azeka,

¹⁰Zoara, Aiyalon, hte Hebron mare ni rai nga ai.

¹¹Shi gaw dai ni hpe ngang ngang kang kang bunghku kum nhtawm dai hkan e up hkang du langai ngai hte dai shara ni hta lusha shahpa, tsanlun sau hte sabyi ntsin,

¹²ninggang ni hte nri ni hpe tawn da wu ai. Ndai hku nna Yuda hte Benyamin yan hpe shi makawp la nna shi a up hkang ai npu hta tawn da wu ai.

¹³Israela mung ting na hkinjawng ni hte Lewi masha ni gaw dingda maga Yuda mung de sa wa ma ai.

¹⁴Israela Hkawhkam Yeroboam hte shi a hkringhtawng dagraw la ai ni gaw Lewi masha ni hpe dai MADU a hkinjawng ni zawn n daw jau shangun mu ai majaw shanhte gaw shanhte a udat shara ni hte kaga lamu ga ni hpe tawn kau da nhtawm Yuda mung hte Yerusalem mare de htawt yu mat wa ma ai.

¹⁵Yeroboam gaw tara maigan masha ni a nawku shara ni hta daw jau na matu mung, nat matse ni hpe nawku na matu hte dumsu usu hkrang hte shi galaw da ai hpara sumla ni hpe nawku daw jau na matu shi a hkinjawng ni hpe nan san tawn da wu ai.

¹⁶Dai MADU Israela a Karai Kasang hpe myit kraw asan sha hte nawku mayu ai Israela amyu bawsang ni yawng gaw Lewi masha ni a hpang hkan nna, Yerusalem mare de yu sa mat wa ma ai: shaloi shanhte gaw dai MADU shanhte a kaji kawa ni a Karai Kasang hpe shagu hkungga nawng ya lu na rai ma ai.

¹⁷Dai gaw Yuda mungdan hpe shangang shakang ya ai rai nna shanhte gaw Shawlumon a kasha Rehoboam hpe masum ning tup madi shadaw ya ai hte Hkawhkam Dawi hte Hkawhkam Shawlumon yan a up hkang ai npu hta shanhte nga ai zawn nga nga ma ai.

¹⁸Rehoboam gaw Dawi a kasha Yerimot a shayi sha Mahalat hpe hkungran la ai rai nna, shi a kanau mahtang Eliaba a shayi sha Abihala rai nna Yese a kashu shayi sha rai nga ai.

¹⁹Shan gaw shadang sha masum lu ma ai; dai ni gaw Yeusha, Shemaria hte Zaham ni rai nga ai.

²⁰Dai hpang shi gaw Absalom a shayi sha Mahka hpe hkungran la wu ai; shing rai shan shadang sha mali lu ma ai; dai ni gaw Abiya, Atai, Ziza hte Shelomit ni rai nga ai.

²¹Rehoboam hta madu jan ni yawng shi matsat hte lashi num kru shi lu nga ai. Shi gaw shadang sha hkun matsat, shayi sha kru shi a kawa tai nga ai. Shi a madu jan ni hte lashi num ni yawng hta Mahka hpe mahtang kaja htum ai hku shi tsaw ra wu ai rai nna,

²²shi a kasha Abiya hpe kaga kashu kasha ni yawng hta grau nna myi man pa shangun nga ai. Shi gaw shi a hkang hta galai nna hkawhkam tai shangun na matu shi hpe lata san da wu ai.

²³Rehoboam mung hpaji machye machyang shaw let shi a shadang sha ni hpe bungli lit shatsam nhtawm Yuda mung hte Benyamin mung shara shagu hkan na bunghku kum ai mare ni hta shanhte hpe tawn da wu ai. Shanhte a matu lusha nhpaw n-ya ndaw nhta jaw sha nna shanhte a matu madu jan law law ni hpe mung shim lum hkra tawn da ya wu ai.