Read Jinghpaw Common Language Bible 2009 2 HKAWHKAM LABAU 12 Bible Online

2 HKAWHKAM LABAU 12 - Jinghpaw Common Language Bible 2009 bible

2 HKAWHKAM LABAU 12

¹Rehoboam gaw shi a hkawhkam ahkang aya hpe shagrin da lu ai shaloi jang, shi hte shi a amyu masha ni yawng dai MADU a tara kau da ma ai.

²Rehoboam hkaw dung ai manga ning hta dai MADU hta sadi n dung ai a majaw ari jaw hkrum nga sai. Egutu Hkawhkam Shishak gaw hpyen leng hkying mi lahkawng tsa,

³gumra jawn ai masha mun kru, Libya, Sukim hte Ehtiopi masha hpyen hpung ni lawm ai n dang hti hkra law ai hpyenla luksuk ni hte rau Yerusalem hpe lung gasat wu ai.

⁴Shi gaw Yuda mung na bunghku kum ai mare ni hpe gasat dang kau nhtawm Yerusalem de du hkra rawt lung mat wa wu ai.

⁵Myihtoi Shimaia gaw Shishak a lata kaw na hprawng lawt hkra nga, Yerusalem hta hpawng nga ai Hkawhkam Rehoboam hte Yuda ningbaw ni hpang de sa wa wu ai. Shi gaw shanhte hpe, “Ndai gaw nanhte tsun ai dai MADU a mungga rai nga ai: ‘Nanhte ngai hpe kau da manit dai majaw, ya ngai mung Shishak a lata de nanhte hpe ap kau ma sade ai,’” ngu nna tsun wu ai.

⁶Hkawhkam wa hte ningbaw ni gaw shanhte shut kau nga ai lam hpe yin la let, “Dai MADU galaw nga ai amu gaw teng man nga ai,” ngu nna shanhte tsun nga ma ai.

⁷Dai MADU gaw shanhte yin la ai hpe mu jang, Shimaia kaw shi bai du nna, “Shanhte gaw shanhte galaw shut kau sai yubak mara ni hpe yin la manu ai majaw ngai shanhte hpe jahten sharun kau na nngai n rai. Rai ti mung, Shishak htim gasat ai shaloi shanhte tsam mari lawt lu na rai ma ai. Yerusalem gaw nye a pawt sindawng ai n-gun hpe laja lana hkam sha lu na ra ai n rai,

⁸rai ti mung ngai hpe daw jau ai hte mungkan ga na up hkang du ni hpe daw jau ai amu a lam hpe chye na ginhka la lu mu ga, Shishak gaw shanhte hpe ka-up la kau na ra ai,” ngu nna shi hpe tsun wu ai.

⁹Hkawhkam Shishak gaw Yerusalem de sa nna Nawku Htingnu hte hkawhkam htingnu na sut gan yawng hpe htawm la kau ya wu ai. Shi gaw Hkawhkam Shawlumon galaw da ai ja ninggang lawm hkra nga manga arung arai ni hpe magawn la wu ai.

¹⁰Rehoboam gaw ja ninggang ni a malai magri mang ninggang ni hpe galaw nna hkawhkam htingnu chyinghka sin na lit lu ai du salang ni a lata hta ap ya wu ai.

¹¹Hkawhkam wa Nawku Htingnu de sa shagu sin langa ni dai ninggang ni hpe lang nna sin langa gawk hta bai wa tawn da da di ma ai.

¹²Shi gaw dai MADU hpe shi hkum shi shagrit shanem let ap ya nu ai majaw dai MADU a pawt sindawng ai gaw shi hpe atsai awai n shamyit kau wu ai rai nna Yuda mung a matu ngamu ngamai lam ni naw nga nga ai.

¹³Rehoboam gaw Yerusalem mare hpe up hkang nga ai rai nna shi a daru magam n-gun ja wa wu ai. Shi gaw asak mali shi langai ning kaba sayang she hkawhkam tai wa ai rai nna Yerusalem mare hta shi sanit ning hkaw dung nga ai; dai mare gaw dai MADU nawku hkam la na matu Israela mung ting hta na lata la ai shara rai nga ai. Rehoboam a kanu gaw Amon mung na Nama rai nga ai.

¹⁴Shi gaw dai MADU a myit ra sharawng ai hpe n hkan tam mayu nga ai majaw n hkru ai amu galaw wu ai.

¹⁵Npawt ndung hkren gawn da ai Rehoboam a amu ni hte ka matsing da ai shi a dinghku lam ni hpe Myihtoi Shimaia a Labau Laika hte Myihtoi Ido a Labau Laika ni hta ka matsing da nga ai hpe mu lu nga ai. Rehoboam hte Yeroboam yan gaw shan a prat tup hta majan a gasat nga ma ai.

¹⁶Rehoboam si mat sai rai nna Dawi a Mare na hkawhkam lupwa hta lup makoi da ma ai; shi a kasha Abiya gaw shi a hkang hta hkawhkam tai wa sai.