Read Jinghpaw Common Language Bible 2009 2 HKAWHKAM LABAU 13 Bible Online

2 HKAWHKAM LABAU 13 - Jinghpaw Common Language Bible 2009 bible

2 HKAWHKAM LABAU 13

¹Israela Hkawhkam Yeroboam hkaw dung ai shi matsat ning hta Abiya mung Yuda hkawhkam tai wa sai.

²Shi gaw Yerusalem hta masum ning up hkang nga ai. Shi a kanu gaw Gibea mare na Uriela a shayi sha Mahka rai nga ai. Abiya hte Yeroboam a lapran majan gasat hpang wa nga masai.

³Abiya gaw hpyenla 400,000 nga ai hpyen luksuk hpe woi rawt nga ai; Yeroboam mung hpyenla 800,000 hte ninghkap wu ai.

⁴Hpyen luksuk ni gaw Ehprim bum ga hta hkrum hkat ma ai. Hkawhkam Abiya mahtang Zemarim Bum de lung wa nhtawm Yeroboam hte Israela masha ni hpe ning ngu nna jahtau tsun wu ai. Shi gaw, “Nye a ga madat mu law!,” ngu nna tsun wu ai.

⁵“Dai MADU Israela a Karai Kasang gaw Dawi hte agrin nga ai ga shaka tawn da nhtawm Israela hpe htani htana up hkang na hkawhkam ahkang aya shi hpe mung, shi a amyu matu ni hpe mung jaw da nu ai hpe nanhte n chye nga myit ni?

⁶Nebat a kasha Yeroboam gaw shi a Hkawhkam Shawlumon hpe gumlau nu ai.

⁷Dai hpang shi gaw akyu n rawng ai masha gumbyak hpung mi hpe shinggyin mahkawng la wu ai rai nna shanhte hpe hkap daw na matu asak nau naw kaji nna mahkrum madup hpa mung garai n nga ai Shawlumon a kasha Rehoboam hpe shanhte myit ra ai hku di kau manu ai.

⁸Ya mung nanhte gaw Dawi a amyu matu ni hpe dai MADU jaw tawn da ai hkawhkam ahkang aya hpe hkap daw na maw mawn nga myit dai. Nanhte gaw luksuk kaba lu nga myit dai hte nanhte a karai ni tai ya na matu Yeroboam galaw da ai aja dumsu kasha lahkawng mung nanhte hte rau rai nga myit dai.

⁹Nanhte gaw dai MADU a hkinjawng ni rai nga ai Arun a amyu matu ni hpe mung, Lewi masha ni hpe mung gau shapraw kau nhtawm, shanhte a shara hta maigan amyu baw ni galaw ai hte maren hkinjawng ni hpe dang da nga myit dai. Kadai mung usu langai shing n rai sagu sanit dun sa nhtawm shi nan sat nawng ya ai wa hpe nanhte a karai mying ai ni a hkinjawng tai lu nga ai.

¹⁰“Rai ti mung dai MADU anhte a Karai Kasang hpe anhte naw daw jau nga ga ai rai nna shi hpe n kau da ga ai. Arun kaw nna pra hkrat wa ai hkinjawng ni mung shanhte a lit ni hpe gun hpai nga ma ai rai nna Lewi masha ni shanhte hpe karum madi shadaw la nga ma ai.

¹¹Shanhte gaw jahpawt shagu, shana de shagu shi hpe manam pyaw ai baw hte yam nga hkungga ni hpe hkum ting nat nawng ma ai. Shanhte gaw htung hte maren san seng ai ku ntsa e muk hkungga ni hpe nawng ya nhtawm, shana de shagu ja pyengdin shadun ntsa e pyengdin ni hpe shatu da nga ma ai. Dai MADU hkang da sai hte maren anhte galaw ga ti mung nanhte mahtang shi hpe kau da nga myit dai.

¹²Karai Kasang shi nan anhte a ningbaw rai nga ai rai nna shi a hkinjawng ni mung pahtau ni hte ndai yang e nga nga ma ai majaw pahtau dum na matu jin jin galaw da nga ai hte nanhte hpe majan gasat na matu anhte hpe shaga nga ma ai. Dai rai nna Israela amyu masha ni e, dai MADU nanhte a kaji kawa ni a Karai Kasang hpe hkum gasat myit! Nanhte dang lu na myit dai n rai!”

¹³Shing rai nga yang, Yeroboam gaw shi a hpyen hpung nkau mi hpe Yuda hpyen luksuk a hpang maga hku nna mung, ngam ai nkau mi hpe shanhte hte nan man chyaw rai mayun gasat lu na matu mung, shangun dat wu ai.

¹⁴Yuda masha ni mahtang grup yin de mada yu mu ai shaloi, wang da hkrum nga masai hpe mu ma ai. Shaloi shanhte gaw dai MADU kaw karum la na matu hpyi jahtau mu ai hte hkinjawng ni mung pahtau dum shajang ma ai.

¹⁵Yuda masha ni aja awa jahtau garu ai hte Abiya woi awn let shanhte hpe htim gasat ma yang, Karai Kasang gaw Yeroboam hte Israela hpyen luksuk ni hpe dang kau wu ai.

¹⁶Israela masha ni mahtang Yuda masha ni kaw na hprawng htaw mat wa ma ai rai nna Karai Kasang gaw Yuda masha ni hpe daru magam n-gun ahkang aya ap ya nga wu ai.

¹⁷Abiya hte shi a luksuk ni gaw Israela masha ni hpe a mani di dang kau mu ai rai nna kaja htum ai Israela hpyenla sen manga hte mung sat kau ai hkrum ma ai.

¹⁸Yuda masha ni gaw dai MADU shanhte a kaji kawa ni a Karai Kasang hta shamyet shanat nga ma ai majaw awng padang hkam la lu nga ma ai.

¹⁹Abiya gaw Yeroboam a luksuk hpe hkan shachyut kau nhtawm shanhte a mare nkau mi ngu na Behtela, Yeshana, Ehpron hte dai mare ni a makau hkan nga ai kahtawng ni hpe madu la kau ya ma ai.

²⁰Yeroboam gaw Abiya hkaw dung ai laman hte tup hta shi a daru magam n-gun galoi mung bai n awai la lu nu ai. Hpang jahtum dai MADU gaw shi hpe adup kadawng kau ai hte si mat sai.

²¹Kaning mi rai tim Abiya chyawm gaw grau grau n-gun ja wa nga lu ai. Dai rai nna shi gaw madu jan ni shi mali hte shadang sha hkun lahkawng, shayi sha shi kru hte a kawa rai nga lu ai.

²²Naw gawn ra ai Abiya tsun ai lam hte shi galaw ai amu a labau hpe Myihtoi Ido a Labau Laika hta ka matsing da nga ai.