Read Jinghpaw Common Language Bible 2009 2 HKAWHKAM LABAU 14 Bible Online

2 HKAWHKAM LABAU 14 - Jinghpaw Common Language Bible 2009 bible

2 HKAWHKAM LABAU 14

¹Hkawhkam Abiya si mat sai rai nna Dawi a Mare na hkawhkam lupwa hta lup makoi da ma ai. Shi a kasha Asa gaw shi a hkang hta hkawhkam tai wa sai rai nna Asa up hkang ai npu hta mungdan gaw shi ning ngwi pyaw sim sa nga ai.

²Asa gaw ding man ai hte mai kaja ai amu hpe galaw let dai MADU shi a Karai Kasang hpe awng sharawng shangun nga wu ai.

³Shi gaw maigan tawn hkungri ni hte tara maigan ni a nawku shara ni hpe yeng seng kau nhtawm, chyoi pra ai nlung shadaw ni hpe agrawp shadaw kau let Ashera karai num a hkrang sumla ni hpe kran daw kau ya wu ai.

⁴Shi gaw Yuda amyu masha ni hpe dai MADU shanhte a kaji kawa ni a Karai Kasang myit ra ai hku hkan galaw na matu mung, shi a sharin achyin ai ga hte hkang da ai ga ni hpe hkan sa madat mara na matu mung hkang da wu ai.

⁵Tara maigan ni a nawku shara ni hte Yuda mare ni yawng hkan nga ai manam pyaw ai baw nawng ya ai tawn hkungri ni hpe shi asan apan shatsai kau wu ai majaw mungdan gaw shi a up hkang ai npu hta ngwi pyaw sim sa nga sai.

⁶Dai MADU gaw shi hpe ngwi pyaw sim sa lam jaw ya wu ai majaw Yuda mung na mare ni hpe mung bunghku kum let shi woi de nga ai rai nna dai aten laman hte yang shaning law law majan n nga nga ai.

⁷Shi gaw Yuda amyu masha ni hpe, “Mare ni hpe shangang shakang na matu bunghku ni, langchyi ni hte la htinggrang lu ai chyinghka ni hpe galaw da ga. Dai MADU anhte a Karai Kasang a myit ra ai hku anhte galaw ai a marang e, shi anhte hpe makawp maga la mi ai hte anhte hpe lam shagu hta shim lum lam jaw ya mani ai majaw ndai mungdan hpe anhte up hkang da nga saga ai,” ngu nna tsun wu ai. Shing rai shanhte jawm gaw gap nna ngamu ngamai nga ma ai.

⁸Hkawhkam Asa gaw Yuda mung na ninggang hte nri ni lang ai hpyen masha 300,000 lawm ai luksuk hte Benyamin amyu kaw na ninggang hte ndan chye lang ai hpyen masha 280,000 lu wu ai. Shanhte gaw magrau grang ai hte hpyen amu atsawm sha sharin da sai masha ni hkrai rai ma ai.

⁹Zera mying ai Ehtiopi masha langai mi gaw hpyen masha sen shi rawng ai luksuk hte hpyen leng masum tsa hte rau Yuda mung hpe shang gasat nhtawm Maresha mare du hkra rawt lung wa wu ai.

¹⁰Asa gaw shi hpe gasat ninghkap na nga pru sa wa wu ai; lahkawng maga na hpyen hpung ni gaw Maresha mare makau na Zehpahta Kadit e shara la shajang nga ma ai.

¹¹Asa gaw dai MADU shi a Karai Kasang hpe, “O MADU e, nang chyawm gaw n-gun ja wa hkra karum ya lu nga ndai. Dai rai nna ya jang anhte hpe karum la mi. O MADU anhte a Karai Kasang e, nang hta anhte shamyet shanat nga ga ai majaw na a mying ningsang hta ndai hpyen hpung kaba hpe gasat ninghkap na matu anhte pru sa wa na ga ai. MADU e, nang gaw anhte a Karai Kasang rai nga ndai, kadai mung nang hpe dang kau lu na matu myit mada lu nga ai n rai,” ngu nna hpyi tsun wu ai.

¹²Asa hte Yuda hpyen luksuk ni gaw shanhte hpe gasat ma yang, dai MADU gaw Ehtiopi hpyen hpung ni hpe gasat dang kau wu ai. Shanhte hprawng htaw mat wa ma ai rai nna,

¹³Asa hte shi a hpyen hpung ni shanhte hpe Gerara mare du hkra hkan shachyut kau ma ai. Dai rai nna Ehtiopi masha ni law law sat kau ai hkrum nga ma ai; dai luksuk gaw gasat na matu n-gun n lu galung la nga ma ai. Shanhte chyawm gaw dai MADU hte shi a luksuk ni a majaw sum mat ma ai rai nna luksuk ni mung lanep law law hta la lu ma ai.

¹⁴Dai hpang dai yang na masha ni gaw MADU hpe hkrit gari nga ma ai majaw Gerara grup yin na mare ni hpe shanhte jahten sharun kau lu ma ai. Shing rai luksuk ni mung dai mare ni yawng hpe hpya kau ya nhtawm lanep law law madu la nga ma ai.

¹⁵Shanhte gaw sagu rem ai ni a dap dabang ni hpe gasat ma ai rai nna sagu hte gawla-uk law law rim la ma ai. Dai hpang Yerusalem mare de shanhte bai nhtang mat wa ma ai.