Read Jinghpaw Common Language Bible 2009 2 HKAWHKAM LABAU 15 Bible Online

2 HKAWHKAM LABAU 15 - Jinghpaw Common Language Bible 2009 bible

2 HKAWHKAM LABAU 15

¹Karai Kasang a wenyi gaw Oded a kasha Azaria a ntsa e yu sa ai rai nna,

²shi gaw Hkawhkam Asa hpe sa hkrum na nga pru sa mat wa wu ai. Dai hpang shi gaw, “O Hkawhkam Asa hte Yuda hte Benyamin amyu masha ni yawng hte e, nye a ga madat mu! Nanhte shi hte rau nga nga dingsa, dai MADU mung nanhte hte rau nga nga ai. Nanhte shi hpe tam myit yang shi nanhte hpe mu shangun na ra ai; rai ti mung nanhte shi hpe kayin kau myit dai rai yang shi nanhte hpe kau da na ra ai.

³Israela amyu ni gaw aten na na wa teng man ai Karai Kasang n nga, shanhte hpe sharin achyin ya na hkinjawng ni n nga, tara langai mi mung n nga ai hku nna mung nga lai wa yu manu ai.

⁴Rai ti mung ru yak tsin-yam tsindam du jang, dai MADU Israela a Karai Kasang hpang de shanhte kayin wa nna shi hpe tam mu ma ai.

⁵Dai nhtoi hte yang mungdan shagu hta ru yak tsin-yam tsindam hte kashuk kashak rai nga ai majaw kadai mung shim lum ai hte pru wa, shang wa lu ma ai n rai.

⁶Karai Kasang gaw ru yak tsin-yam tsindam hte myit ru myit yak lam shanhte hpe shapraw dan wu ai majaw amyu baw ni gaw kaga amyu baw wa hpe, mare mi gaw kaga mare mi hpe dip gamyet hkat ma ai.

⁷Rai ti mung nanhte mahtang gaw n-gun shaja mu; myit hkum daw myit. Nanhte galaw ai amu hte maren shabrai lu la na marin dai,” ngu nna jahtau tsun wu ai.

⁸Oded a kasha Azaria tsun ai myihtoi ga hpe Asa na jang, myit n-gun lu la wu ai. Shi gaw Yuda hte Benyamin mung ting hta na mung, Ehprim bum ga na gasat dang la ai mare ni hta nga ai hpara sumla ni yawng hpe yeng seng kau wu ai. Shi gaw Nawku Htingnu wang kata e nga ai dai MADU a tawn hkungri hpe bai gram lajang da wu ai.

⁹Dai MADU gaw Asa hte rau nga nga ai hpe shanhte mu ai majaw Ehprim, Manashe hte Simun amyu masha ni hte shi a mungdan hta nga ai ni gaw Asa hpang maga de sa nga nga ma ai. Asa gaw shanhte yawng hpe mung, Yuda hte Benyamin amyu masha ni hpe mung shaga dat wu ai.

¹⁰Shanhte gaw Asa hkaw dung ai shi manga ning a shata masum hta Yerusalem mare e hpawng nga ma ai.

¹¹Shanhte gaw dai shani e shanhte la wa ai lanep hta na dumsu sanit tsa, sagu hkying sanit dai MADU a matu nawng ya ma ai.

¹²Shanhte gaw dai MADU shanhte a kaji kawa ni a Karai Kasang hpe kraw lawang mahkra hte myit masin mahkra hte nawku na matu myit hkrum ai hte ga shaka galaw tawn da ma ai.

¹³Numsha lasha kaji kaba kadai n nga, shi hpe n nawku ai wa gaw si ai hkrum lu na rai wu ai.

¹⁴Dai ga shaka hpe shatup na nga shanhte gaw jahtau garu ai hte pahtau dum let dai MADU a mying ningsang hta ja ja jahtau nna dagam shaka da ma ai.

¹⁵Ndai ga shaka hpe shanhte a myit masin mahkra hte shagrin da nga ma ai majaw Yuda amyu masha ni yawng kabu gara nga ma ai. Dai MADU hpe nawku ai hta shanhte awng sharawng nga ma ai majaw shi shanhte hpe hkap la nhtawm shara shagu hkan ngwi pyaw sim sa lam jaw ya wu ai.

¹⁶Hkawhkam Asa a kawoi Mahka mahtang mayat maya ai Ashera karai num a matsat shabat re ai hpara sumla galaw nu ai majaw shi hpe hkawhkam jan a kanu aya kaw nna la kau wu ai. Asa gaw dai hpara sumla hpe kran daw kau nhtawm dai hpe achye ga kau nna Kidron Kadit e adaw atang di nat kau wu ai.

¹⁷Asa gaw mungdan kata na tara maigan masha ni a nawku shara ni yawng hpe n lu jahten sharun kau lu ti mung, shi naw hkrung nga ai prat tup dai MADU hta sadi sahka hte naw nga nga ai.

¹⁸Shi gaw Nawku Htingnu kata hta shi a kawa Abiya Karai Kasang a matu nawng ya ai arung arai yawng hpe mung, shi nan ap ya ai aja, gumhpraw arai ni hpe mung tawn da wu ai.

¹⁹Shi hkaw dung ai sumshi manga ning du hkra hpyen majan hpa mung n nga nga ai.