Read Jinghpaw Common Language Bible 2009 2 HKAWHKAM LABAU 18 Bible Online

2 HKAWHKAM LABAU 18 - Jinghpaw Common Language Bible 2009 bible

2 HKAWHKAM LABAU 18

¹Yuda Hkawhkam Yehoshahpat gaw sut su wa nna kajai gumhkawng wa ai shaloi, shi a dinghku hte Israela Hkawhkam Ahab a dinghku yan a lapran mayu dama daw hkrang na lam lajang wu ai.

²Shaning tsawmra mi na jang, Yehoshahpat gaw Ahab kaw sa hkrum chyai na matu Samari mare de sa wa wu ai. Yehoshahpat hte shi kaw hkan bawp nang ai ni hpe shagrau sha-a na matu Ahab gaw lusha poi a matu sagu dumsu law law sat lajang da wu ai. Shi chyawm gaw Gilead mung na Ramot mare hpe htim gasat ai hta shi kaw shang lawm na matu Yehoshahpat hpe zai hku nna lau shakut wu ai.

³Shi gaw, “Ramot mare hpe htim gasat na matu ngai hte rau pru sa na ndai kun?,” ngu nna san wu ai. Yehoshahpat chyawm gaw, “Nang jin jang ngai mung jin jin rai nga nngai, ndai ni gaw nye a luksuk ni rai nga ai. Anhte nang kaw shang gasat lawm na ga ai,” ngu nna tsun htang wu ai.

⁴Dai hpang shi gaw, “Rai ti mung dai MADU hpe shawng naw san yu ga,” ngu nna tsun jat wu ai.

⁵Dai rai nna Ahab mung myihtoi mali tsa daram hpe shaga hpawng tawn nhtawm shanhte hpe, “Ramot mare hpe ngai sa htim gasat ang na kun? N ang na kun?,” ngu nna san yu wu ai. Shaloi shanhte gaw, “Dai mare hpe htim gasat su; Karai Kasang gaw nang hpe awng dang lam jaw na ra ai,” ngu nna htan ma ai.

⁶Rai ti mung Yehoshahpat chyawm gaw, “Anhte dai MADU hpe san yu lu na lam, kaga myihtoi naw nga nga a ni?,” ngu nna san wu ai.

⁷Ahab mahtang, “Imla a kasha Mihkaia hta kaga kadai n nga nga sai. Rai ti mung shi chyawm gaw nye a matu mai kaja ai lam galoi mung myihtoi n htoi ya yu wu ai majaw ngai shi hpe n dawng nngai. Lama ma hta n kaja ai hku tut nawng tsun ya ya rai nga ai,” ngu nna htan wu ai. Yehoshahpat gaw, “Dai lam nang n tsun sanu ga law!,” ngu nna tsun htang wu ai.

⁸Dai rai nna Ahab gaw hkaw wang na du salang langai mi hpe shaga la nhtawm Mihkaia hpe kalang lata sa woi la na matu hkang dat wu ai.

⁹Hkawhkam lahkawng yan gaw hkawhkam hpun palawng bu hpun let Samari mare chyinghka shinggan na chyarang pa e shan a tingnyang hta dung nga ma ai; myihtoi ni yawng mung shan a man e myihtoi htoi nga ma ai.

¹⁰Shanhte hta na Hkenana a kasha Zedekia gaw hpri nrung ni galaw la nna Ahab hpe, “Ndai gaw dai MADU tsun ai lam rai nga ai: ‘Ndai nrung ni hte Suri masha ni hpe gasat u; shaloi shanhte hpe tsep kawp dang kau lu na ndai,’” ngu nna tsun wu ai.

¹¹Kaga myihtoi ni yawng mung dai hte maren tsun ma ai. Shanhte gaw, “Ramot mare hpe lung gasat mu, dang la na ra ai, dai MADU mung nan hpe awng padang jaw na ra ai,” ngu nna tsun ma ai.

¹²Dai aten hta Mihkaia hpe sa shaga ai du salang wa gaw shi hpe, “Kaga myihtoi ni yawng mung hkawhkam wa awng dang na lam htoi ya masai, nang mung dai hte maren sha htoi lu yang grau kaja nga ndai,” ngu nna tsun wu ai.

¹³Rai ti mung Mihkaia mahtang, “Ahkrung nga ai dai MADU hku nna sha nye a Karai Kasang ngai hpe tsun ai ga hpe tsun na nngai,” ngu nna htan wu ai.

¹⁴Shi gaw Hkawhkam Ahab a man de dawng pru wa jang, hkawhkam wa shi hpe, “Mihkaia e, Hkawhkam Yehoshahpat hte ngai Ramot mare sa gasat mai, n mai na kun?,” ngu nna san wu ai. Mihkaia chyawm gaw, “Gasat su! Nang teng teng dang la lu na rai ndai. Dai MADU mung nang hpe awng padang jaw ya na ra ai,” ngu nna htan wu ai.

¹⁵Rai ti mung Ahab gaw, “Dai MADU a mying ningsang hta nang ngai hpe ga shaga ndai shaloi teng man ai ga hpe tsun u! Dai lam ngai nang hpe kade lang tsun shadum ra na rai ta?,” ngu nna tsun htang wu ai.

¹⁶Mihkaia gaw, “Sagu rem wa n nga ai sagu ni zawn dai Israela hpyen luksuk ni kawng jinghkang hkan e bra ayai nga ma ai hpe ngai mu nngai. Dai rai nna dai MADU gaw, ‘Ndai masha ni ningbaw n lu ma ai; tinang nang a nta de ngwi pyaw sim sa ai hte wa kau shangun mu,’” ngu tsun wu ai.

¹⁷Ahab gaw Yehoshahpat hpe, “Nye a matu kaja ai lam hpa mung shi galoi mung n htoi ya yu ai ngu nna ngai nang hpe tsun ni ai. Lama ma mi hta n kaja ai hku tut nawng tsun ya ya rai chye nga ai!,” ngu nna tsun wu ai.

¹⁸Mihkaia gaw ning ngu nna matut tsun wu ai: “Dai MADU hpa tsun ai ga hpe ya madat u! Dai MADU gaw sumsing lamu na shi a tingnyang hta dung nga nna shi a lamu kasa ni yawng mung shi a makau e tsap nga ma ai hpe ngai mu nngai.

¹⁹Dai MADU gaw, “Ramot mare de shi sa nna sat kau ai hkrum mat hkra, Ahab hpe kadai wa woi alau lu na rai ta?,’ ngu nna san wu ai. Lamu kasa nkau mi mahtang ndai lam hku, bai kaga ni mahtang wora lam hku ngu nna tsun shajang ma yang,

²⁰wenyi langai gaw dai MADU hpang de sit sa wa nhtawm, ‘Ngai shi hpe woi alau lu na we ai,’ ngu nna tsun wu ai. Shaloi dai MADU gaw, ‘Kaning rai lau na law,’ ngu nna san wu ai.

²¹Dai wenyi chyawm gaw, ‘Ngai sa nhtawm Ahab a myihtoi ni yawng hpe masu ga tsun shangun na we ai,’ ngu nna tsun htang wu ai. Bai dai MADU gaw, ‘Rai sa, shi hpe sa alau yu su; nang awng dang lu na ndai,’” ngu nna tsun wu ai.

²²Mihkaia mung ning ngu tsun let hpungdim dat wu ai: “Byin lai wa sai lam gaw ndai hku rai nga ai. Dai MADU gaw ndai na a myihtoi ni hpe mahtang nang hpe masu hkalem kau shangun nu ai. Rai ti mung nang nan chyawm gaw ru yak tsin-yam tsindam hkrum kadup na ra ai lam shi nan daw dan da nu ai!”

²³Dai hpang myihtoi Zedehkia gaw Mihkaia hpang de sit lung wa nhtawm shi a myi man hpe kahpret ya let, “Dai MADU a wenyi gaw ngai kaw nna pru mat wa nhtawm nang kaw galoi aten e sa shaga yu a ta?,” ngu nna san wu ai.

²⁴Mihkaia gaw, “Shingdu gawk shara ra hta sa makoi nga na matu nang shang wa ndai shaloi mu lu na rin dai,” ngu nna tsun htang wu ai.

²⁵Dai hpang Hkawhkam Ahab gaw shi a du salang langai mi hpe, “Mihkaia hpe rim la nna mare agyi Amon hte hkawhkam kasha Yosha yan a lata de ap ya u.

²⁶Ngai shim lum ai hte bai nhtang wa ai aten du hkra shi hpe htawng bang da nna muk hte hka jaw lu jaw sha na lam shanhte hpe tsun u,” ngu nna hkang da wu ai.

²⁷Mihkaia gaw, “Nang shim lum ai hte bai nhtang wa lu ai rai yang, dai MADU gaw ngai hku nna ga shaga sana nu ai n rai!,” ngu nna jahtau tsun wu ai. Shi gaw, “Masha shagu hte e, ngai tsun ai ga hpe madat mu law!,” ngu nna tsun jat wu ai.

²⁸Israela Hkawhkam Ahab hte Yuda Hkawhkam Yehoshahpat yan gaw Gilead mung na Ramot hpe sa gasat na nga pru sa wa ma ai.

²⁹Ahab gaw Yehoshahpat hpe, “Nye a hkum hpe masu kau nhtawm majan ginra de pru sa na nngai; rai ti mung nang chyawm gaw na a hkawhkam hking ni hte bu hpun da na rai ndai. Shing rai Israela hkawhkam gaw shi a hkum hpe masu kau nhtawm majan pa de shang sa mat wa wu ai.

³⁰Suri hkawhkam mung Israela hkawhkam wa hta kaga, langai mi hpe mung n htim gasat lu na lam gumra leng dap ni hpe up hkang nga ai up hkang du sumshi lahkawng hte hpe hkang da wu ai.

³¹Dai rai nna Hkawhkam Yehoshahpat hpe shanhte mu jang, shi gaw Israela hkawhkam rai nga ai ngu shanhte yawng myit nawn la nga ma ai majaw shi hpe gasat na nga, shanhte kayin htim ma ai; rai ti mung shi marawn jahtau dat wu yang MADU Karai Kasang hkye mawai la ai majaw hpyen man gaw shi kaw nna kayin mat wa shangun kau nga ai.

³²Shi gaw Israela hkawhkam n rai nga ai hpe hpyen leng up hkang ai du ni mu ai shaloi shi hpe n hkan mat ma ai.

³³Rai ti mung Suri hpyenla langai mi pagawn mi gap dat ai pala langai gaw Ahab a ninggang magap a hkrihkraw lapran ang ang e gap jung dat ya wu ai rai nna shi a gumra leng gau ai wa hpe, “Ngai hkala hkrum nga ni ai! Kayin mat wa nhtawm majan pa kaw nna shapraw mat wa ya e!,” ngu nna jahtau tsun wu ai.

³⁴Dai majan myit htum myit si gasat hkat nga yang, Ahab gaw shi a gumra leng hta shanat nga let, Suri masha ni hpang de myi man yawng nga wu ai. Shing rai shana de rai jang shi si mat nga sai.